Лариса Петрова

Лариса Петрова Хĕрлĕ Чутай районĕнчи Чурпай ялĕнче 1990 çулхи утă уйăхĕн 7-мĕшĕнче çуралнă. 1997 çулта Çĕн Атикасси шкулне пĕрремĕш класа кайнă. Шăпах 3-мĕш класра вĕреннĕ чух Лариса пĕрремĕш сăввине çырнă. Хĕрача пĕчĕклех амăшĕн Юрă тетрадьне вулама кăмăлланă, унти юрă-сăвăсен асамлăхĕнчен тĕлĕннĕ. Тен, çавăнпах пуль, пĕрремĕш сăвви «Ах, мĕн чухлĕ чечексем Илсе килчĕç хăнасем» юрра евĕрленĕ пекрех пулса тухнă. Пĕчĕккĕн-пĕчĕккĕн, утăм хыççăн утăм туса вара Лариса сăвăсен вăрттăн тĕнчине кĕме хăтланнă. «Тантăш» хаçатра пичетленме пуçланă, конкурссенче палăрнă.

Шкул пĕтерсен çамрăк сăвăç И.Н.Ульянов ячĕллĕ ЧПУн чăваш филологипе культура факультетне вĕренме кĕнĕ.

Лариса — ЧР Президенчĕн стипендиачĕ (2008) тата А.Тихонов-Ялгир ячĕллĕ преми лауреачĕ.