Ӗнер 14 сехет те 45 минутра Шупашкарти Николаев урамӗнчи 46-мӗш ҫурт ҫывӑхӗнче йывӑр тиевлӗ машина 87 ҫулти кинемее таптанӑ. Ватӑскер йывӑр сурансене пула кайран реанимацире вилнӗ.
Ҫакӑ паллӑ: водитель урӑ пулнӑ. Кӑҫал ӑна ҫул-йӗр правилисене пӑснӑшӑн явап тыттарман.
Халӗ Патшалӑх автоинспекцийӗ ку тӗслӗх тӗлӗшпе тӗрӗслев ирттерет.
Пӗлтӗр юпа уйӑхӗнче «Ҫӗмӗрле – Вӑрнар» перегонра пуйӑс ҫынна таптаса кайнӑ. Машинист чарӑнма хӑтланнӑ, анчах ҫынна таптаса каяссинчен пӑрӑнайман.
Чукун ҫул ҫинче пулнӑ арҫын вилмеллех аманнӑ. Унӑн ывӑлӗ кун хыҫҫӑн питӗ куляннӑ. Ҫавна май Чӑваш транспорт прокуратури кӑмӑл-сипет тӗлӗшӗнчен сиен кӳнӗшӗн компенсаци илме суда тавӑҫ тӑратнӑ.
Ҫӗмӗрле районӗн сучӗ тавӑҫа пӑхса тухнӑ, «РДЖ»-на 90 пин тенке яхӑн тӳлеттерме йышӑннӑ. Ку – кӑмӑл-сипет тӗлӗшӗнчен сиен кӳнӗшӗн тата пытарнӑшӑн.
Пӑрачкав ялӗнчи Ульянов урамӗнче пурӑнакансем машина тепри ҫине пырса кӗнӗ. Пӑтӑрмах раштав уйӑхӗн 5-мӗшӗнче пулса иртнӗ.
«Шевроле Нива» автомобиль ҫултан тухса кайса «Хендай» машина ҫине пырса кӗнӗ. Хамӑр ҫӗршывра туса кӑларнӑ машина рулӗ умӗнче 80 ҫулти водитель пулнӑ. Инкеке асӑрханӑ ҫын водитель патне чупса пынӑ. Ӑна япӑххине кура вӑл васкавлӑ пулӑшу машинине чӗнсе илнӗ. Автомобилистӑн ҫул ҫинче инсульт пулнӑ иккен, ӑна васкавлӑн пульницӑна илсе кайнӑ.
Ҫав вӑхӑтрах патшалӑхӗн автоинспекцийӗн ӗҫченӗсем чирленӗ вӑхӑтра руль умне ларма юраманнине аса илтереҫҫӗ.
Элӗк районӗнчи Анатри Хурасанти арҫын почтальона вӗлернӗ те унӑн укҫине пуҫтарса чикнӗ.
Хӗрарӑм ҫухалнӑ хыҫҫӑн тӗрӗслев пуҫарнӑ. Вӑл пӗрмай пӗр арҫынпа калаҫнине палӑртнӑ. Хӑй ҫуралнӑ кун та ҫав ҫынпа калаҫнӑ иккен. Анчах 51 ҫулти арҫын туннӑ, эп ӑна пӗр ялтан тепӗр яла ҫитерсе ятӑм ҫеҫ тесе турткаланнӑ.
Тӗрӗссипе, иикӗш хушшинче тавлашу сиксе тухнӑ. Вӑл ӑна кӗленчепе пуҫӗнчен ҫапнӑ, хӗрарӑм тӗнне ҫухатнӑ. Унтан ӑна машинӑран туртса кӑларнӑ та пӑвса вӗлернӗ. Вилене вӑрманти ҫырмана пенӗ, ҫулҫӑпа тата туратпа хупланӑ. Машинӑра хӗрарӑмӑн сумки тӑрса юлнӑ, унта ялти ватӑсене памалли 200 пин тенкӗ пулнӑ. Ӑна арҫын кӑларса илнӗ.
Пуҫиле ӗҫе суда ярса панӑ.
Раштав уйӑхӗн 4-мӗшӗнче Элӗк районӗнчи пульницӑна икӗ ача лекнӗ. Вӗсем Вутланти шкулта вӗренекенсем пулнӑ. Ачасем хӑйсене япӑх туйнӑ, вар пӑсӑлнине, ӑш пӑтраннине пӗлтернӗ. Вӗсене пульницӑна вырттарнӑ. Ҫавӑн пек нушаланакансем татах пулнӑ. Темиҫе ача тата шкулта ӗҫлекенсем. Вӗсем килте сипленеҫҫӗ.
Пӑтӑрмах тӗлӗшпе РФ Следстви комитечӗн Чӑваш Енри управленийӗн ӗҫченӗсем пуҫиле ӗҫ пуҫарнӑ. Малтанласа шухӑшланӑ тӑрӑх, вӗсем шкулти столовӑй апачӗпе наркӑмӑшланнӑ.
Ӗнер каҫхине Шупашкарти Карл Маркс урамӗнче ҫӗкленекен элита ҫуртра инкек пулнӑ. 23 ҫулти рабочи 11 тата, 12-мӗш хушшинчи урая тунӑ хыҫҫӑн картламан лифт шахтине ӳкнӗ. Вӑл суранӗсене пула ҫавӑнтах вилнӗ.
Ҫакӑ паллӑ: арҫынна йӗркене пӑхӑнса илмен, инструктажсем ирттермен. Яваплӑ ҫын лифт шахтине картлассине сӑнаса тӑман. Инкек сӑлтавӗ урӑххи те пулма пултарнӑ: арҫын напарникӗпе ӗҫ вырӑнӗнче эрех ӗҫнӗ.
Шупашкарти пӗр водитель машинӑсӑр тӑрса юлнӑ.
Хулари Ленин районӗн сучӗ 36 ҫулти арҫынна РФ Пуҫиле кодексӗн 264.3-мӗш статйин 1-мӗш пайӗпе явап тыттарма йышӑннӑ. Ҫамрӑк арҫыннӑн водитель правине пӗрре туртса илнӗ, вӑл пӗрех каллех руль умне ларнӑ. «Skoda Octavia» автомобильпе вӑл хула тӑрӑх пынӑ, ӑна йӗрке хуралҫисем асӑрханӑ.
Йӗркене пӑсакан водителе суд 280 сехет ӗҫлеттерсе юсантарма, 2 ҫул руль умне ларма чарнӑ. «Skoda Octavia» автомобиле конфискациленӗ.
РФ Следстви комитечӗн Чӑваш Енри управленийӗн специалисчӗсем Вӑрнар тӑрӑхӗнчи Пысӑк Хирлеп ялӗнчи арҫын тӗлӗшпе пуҫиле ӗҫ пуҫарнӑ. Ӑна РФ Пуҫиле кодексӗн 111-мӗш статйин 4-мӗш пайӗпе явап тыттарасшӑн. Ку статьяпа ҫынна асӑрханмасӑр вӗлернӗшӗн суд тӑваҫҫӗ.
Чӳк уйӑхӗн 26-мӗшӗнче пӗрле пурӑнакан хӗрарӑмпа вӑрҫса кайнӑ. Харкашӑвӗ хӗрарӑм эрех ӗҫме юратнишӗн сиксе тухнӑ. Тарӑхса ҫитне арҫын ӑна хӗнесе пӗтернӗ. Тепӗр кун ирхине хӗрарӑм вилсе кайнӑ.
Шупашкарта пурӑнакан 16-ри геймер улталаннӑ. Яш хӑйне аслисем ҫуралнӑ кунта парнеленӗ укҫасӑр тӑрса юлнӑ.
Пӑтӑрмах пирки яш раштав уйӑхӗн 1-мӗшӗнче йӗрке хуралҫисене пӗлтернӗ. Вӑл компьютер вӑййине выляма юратнӑ. Мессенджерсенчен пӗринчи чатра хайхи администраторпа калаҫса кӗрсе кайнӑ.
Лешӗ унран малтан 700 тенкӗ ыйтнӑ, унтан — 1 тенкӗ, кайран — 2 пин тенкӗ. Ача онлайн-укҫӑллӑ пулайман, хӑйӗн пуррине вара ҫухатнӑ. Бот ултавҫӑ пулнине вӑл хӑйӗнчен тата тепӗр 5 пин тенкӗ ыйтсан ҫеҫ ӑнланса илнӗ.
Ӗнер, раштав уйӑхӗн 2-мӗшӗнче, Ҫӗнӗ Шупашкарти Промышленность урамӗнчи 46-мӗш ҫурт патӗнче инкек пулса иртнӗ.
Ирхи 6 сехетре «Шевроле Нива» ҫӑмӑл машина 54 ҫулти хӗрарӑм ҫине пырса кӗнӗ. Шар курнине пульницӑна илсе кайнӑ, анчах вӑл унта куҫне ӗмӗрлӗхе хупнӑ.
Руль умӗнчи 47 ҫулти водитель ӳсӗр пулнӑ.
+9.3 °C