Ҫӗрпӳ районӗнчи шкулсенчен пӗринче бухгалтера лаборант укҫине тӳлесе пурӑннӑ. Ӗҫлемесӗр укҫа илсе пурӑнаканни — Ҫӗрпӳ тӑрӑхӗнчи бухгалтер учёчӗн ертсе пыракан бухгалтерӗ. Ӑна шкулта ӗҫленӗҫи тума пулӑшаканни — пӗлӗшӗ, шкулта директорта тӑрӑшакан ҫын. Укҫана куҫарса параканни вара хайхи бухгалтер хӑй пулнӑ.
2018 ҫулхи авӑн уйӑхӗнчен пуҫласа 2024 ҫулхи юпа уйӑхӗччен пурӗ 1 миллион та 611 пин тенкӗ укҫа тӳленӗ.
Пӑтӑрмаха РФ Следстви комитечӗн Чӑваш Енри управленийӗн тата Федерацин хӑрушсӑрлӑх службин ӗҫченӗсем пӗрле тупса палӑртнӑ. Пӑтӑрмах тӗлӗшпе пуҫиле ӗс пуҫарнӑ.
Кӑрлач уйӑхӗн 1-мӗшӗнче ҫӗрле Шупашкарти гараж кооперативӗсенчен пӗринче хӗрарӑм виллине тупнӑ. 36-ри арҫынна тытса чарнӑ. Вӑл – унӑн упӑшки.
Следстви версийӗ тӑрӑх, ҫав кун арӑмӗпе упӑшки гаражра пулнӑ. Арҫын ӳсӗр пулнӑ. Вӑл арӑмне кӗвӗҫнипе ӑна кӗреҫе аврипе пуҫӗнчен, кӗлеткинчен ҫапнӑ. Лешӗ ҫавӑнтах тепӗртакран вилнӗ.
Тытса чарнӑ арҫын халӗ следстви изоляторӗнче.
Ӗнер кӑнтӑрла Патӑрьел округӗнчи Аслӑ Арапуҫ ялӗнче пахча ҫимӗҫе тирпейлемелли складра пушар пулнӑ. Пушар 288 тӑваткал метр лаптӑка тата пурлӑха сиенлетнӗ. Телее, аманнисем, вилнисем пулман.
Малтанлӑха пӗлтернӗ тӑрӑх, пушар электричество сечӗ авариллӗ режимра ӗҫленӗрен тухнӑ. Палӑртмалла: республикӑра ҫулталӑк пуҫланнӑранпа 19 пушар пулнӑ. Вӗсенче 3 ҫын суранланнӑ.
Ӗнер, кӑрлачӑн 2-мӗшӗнче, Канаш хулинче лавккана Хӗл мучи тумне тӑхӑннӑ арҫын кӗнӗ те лавкка хуҫине персе пӑрахнӑ. Унччен маларах лавкка хуҫи Хӗл мучипе селфи ӳкерӗннӗ. Кайран Хӗл мучи тумӗ айӗнчен пистолет кӑларса сентре патӗнче тӑракан 54-ри арҫынна персе пӑрахнӑ та тухса тарнӑ.
Арҫынна Росгварди ӗҫченӗсем Канаш округӗнчи пӗр ялта тытса чарнӑ. Малтанлӑха пӗлтернӗ тӑрӑх, тытса чарнӑ арҫын лавкка хуҫине парӑмшӑн вӗлернӗ.
Шупашкарти банксенчен пӗринче ӗҫлекен 20 ҫулти хӗр ултавҫӑсен аллине ҫакланнӑ. Банкра кивҫен илнӗ 600 пин тенке вӑл банкомат урлӑ куҫарса янӑ. Асӑннӑ банкомата вырнаҫтарнӑ суту-илӳ центрӗнче ултавҫӑсенчен асӑрханма чӗнсе калакан кӳлепе те вырнаҫтарнӑ.
Халӗ хӗрӗн уйӑхсерен 20-шер пин тенкӗ кредит тӳлесе пыма тивӗ. Пӗтӗмпе 7 ҫул. Ытларах та илесшӗн пулнӑ та, анчах тепӗр икӗ банкра ӑна вӑл илме ӗмӗтленнӗ 800 пин тенке паман.
Кӑҫал пӗррӗмӗш пушар Вӑрнар поселокӗнче пулнӑ.
Паян ирхи 5 сехет иртсен вӑхӑтлӑх тытмалли изолятор ӗҫченӗсем Дмитрий Якушин тата Евгений Игнатьев патруль вӑхӑтӗнче Жуков урамӗнчи ҫуртра тӗтӗм йӑсӑрланнине асӑрханӑ. Вӗсем кил хуҫисене чӳречерен шаккаса вӑратнӑ. 36-ри кил хунҫине, унӑн 34-ри мӑшӑрне, вӗсен 3-ри ачине, арҫыннӑн ашшӗ-амӑшне чӳречерен тухма пулӑшнӑ.
Вӗсем мунча хутнӑ пулнӑ иккен. Анчах юсавсӑр мӑрьене пула пушар тухнӑ. Тимӗр тӑрӑ айӗнче ҫулӑм курӑнман, анчах вӑл пӳрт патнелле ҫывхарма пуҫланӑ.
Пушара 3 сехетрен сӳнтернӗ.
Чӑваш Енри тӗпчевҫӗсем Шупашкарта пӗр ача канализаци шӑтӑкне кӗрсе ӳкнипе ҫыхӑннӑ пӑтӑрмаха тӗпчеҫҫӗ.
Пӑтӑрмах раштав уйӑхӗн 18-мӗшӗнче хулари Мичман Павлов урамӗнче пулса иртнӗ. Улттӑри хӗрача канализаци ҫӑлне персе аннӑ. Анчах вӑл шар курман иккен.
Тӗпчевҫӗсем ҫав канализаци шӑтӑкӗ уҫӑ пулнишӗн яваплисене тупса палӑртӗҫ.
Паян 12 сехет те 53 минутра Красноармейскинчен инҫех мар 121-мӗш маршрутпа ҫӳрекен микроавтобус ҫине ҫӑмӑл машина пырса тӑрӑннӑ. Малтанлӑха пӗлтернӗ тӑрӑх, ҫӑмӑл машина водителӗ руле итлеттереймен – хирӗҫ ҫул ҫине тухса кайса маршрутка ҫине пырса кӗнӗ.
Аварире пӗр ҫын шар курнӑ. Вырӑнта тухтӑрсем, ҫӑлавҫӑсем ӗҫленӗ.
Ытларикун каҫхине Канашра арҫын пуйӑс айне пулнӑ. Машинист рельссем ҫинче ҫын пулнине асӑрхасан пуйӑса чарма хӑтланнӑ. Анчах ӗлкӗреймен. Арҫын вилмеллех суранланнӑ. Халӗ следстви умӗнхи тӗрӗслев иртет.
Аса илтерер: нумаях пулмасть Ҫӗмӗрле районӗн сучӗ арҫынна ашшӗшӗн компенсаци тӳлеттермелле тунӑ. Унӑн ашшӗ 2023 ҫулхи юпа уйӑхӗнче пуйӑс айне пулса вилнӗ.
Пая Но 16 сехет те 45 минутра «Атӑл – Сӗнтӗрвӑрри» автоҫул ҫинче авари пулнӑ. Инкекре икӗ ҫын пурнӑҫӗ татӑлнӑ.
Малтанлӑха пӗлтернӗ тӑрӑх, «Лада Калина» хирӗҫ ҫул ҫине тухнӑ та унта «Рено Сандерӑпа» ҫапӑннӑ. Аварире «Ладӑри» 43-ри водитель тата иномаркӑри 81 ҫулти кинемей вилнӗ. Иномаркӑри тепӗр ватӑ ҫынна пульницӑна илсе кайнӑ. «Ренори» водитель урӑ пулнӑ. Вӑл ватӑ ашшӗ-амӑшне Сӗнтӗрвӑрринчен Ҫӗнӗ Шупашкара илсе кайма тухнӑ.
Шупашкарта ҫывӑх вӑхӑтра (03.04.2025 03:00) уяр ҫанталӑк, атмосфера пусӑмӗ 746 - 748 мм, 2 - 4 градус ӑшӑ пулӗ, ҫил 2-4 м/ҫ хӑвӑртлӑхпа кӑнтӑр-хӗвеланӑҫ енчен вӗрӗ.
| Воронцова Галина Михайловна, медицина ӑслӑхӗсен докторӗ ҫуралнӑ. | ||
| Раман Иринкки, ҫамрӑк чӑваш ҫыравҫи ҫуралнӑ. | ||
![]() | Пулӑм хуш... |