Паян, юпа уйӑхӗн 17-мӗшӗнче, Крым Республикинчи Керчь хулинчи пӗр колледжра сирпӗнӳ пулнӑ. Сирпӗннӗ хатӗре хальлӗхе палӑртайман.
Инкекре пурӗ 19 ҫын вилнӗ, 52 ҫын суранланнӑ. 20 ҫынна пульницӑна илсе кайнӑ. Сирпӗнӳ вырӑнӗнче васкавлӑ медпулӑшу бригадисем, ИӖМ тата ФСБ ӗҫченӗсем ӗҫлеҫҫӗ.
Колледжа сирпӗтни пирки РФ Президентне Владимир Путина пӗлтернӗ. Владимир Владимирович аманнисене ҫӗршыври чи лайӑх медицина центрӗсене илсе ҫитерме хушнӑ. Следстви комитечӗ кун тӗлӗшпе пуҫиле ӗҫ пуҫарнӑ.
Инкек пулнӑ вырӑна Крым пуҫлӑхӗ Сергей Аксенов ҫитнӗ. ИӖМӗн «Ил-76» самолечӗ те Керчь хулине вӗҫнӗ.
Маттур та хитре пике Полина Яковлева И.Н.Ульянов ячӗллӗ ЧПУн юридици факультетӗнче вӗренет. Вӑл «Раҫҫейри студентсен мисӗ» конкурс коронине ҫӗнсе илнӗ. Пӗтӗм Раҫҫейри конкурс авӑн уйӑхӗн 24-29-мӗшӗсенче Севастопольте иртнӗ.
Университет сайтӗнче хыпарланӑ тӑрӑх, ҫӗршыв шайӗнчи конкурса юрист профессине алла илекен тепӗр студент та Александр Изоркин хутшӑннӑ. Вӑл та маттур пулнӑ: «Интеллект мистерӗ» номинацире мала тухнӑ. Полина вара коронӑна ҫӗнсе илнисӗр пуҫне «Пултарулӑх мисӗ» ята та тивӗҫнӗ.
Ҫитес ҫул «Студентсен мисӗ тата мистерӗ» конкурс И.Н.Ульянов ячӗллӗ Чӑваш патшалӑх университетечӗ ҫумӗнче иртӗ. Кун пирки финалта пӗлтернӗ.
«Верь в свой народ — тихо его люби» (чӑв. Ӗнен хӑв халӑхна — шӑппӑн ӑна юрат) ятпа «Литературная Россия» хаҫатра Марина Карягинӑпа интервью пичетленнӗ.
Унта Марина Фёдоровна Карягина – чӑваш поэтесси, прозаикӗ, драматургӗ, журналисчӗ тесе паллаштарнӑ. Вӑл 1969 ҫулта Чӑваш Енре ҫуралнине, 1992 ҫулта Чӑваш патшалӑх университетӗнчен вӗренсе тухнӑранпах Чӑваш патшалӑх телерадиокомпанийӗнче корреспондентра ӗҫленине тата «Ирхи тӗпел» автор программине тӳрӗ эфирта ертсе пынине пӗлтернӗ. Марина Карягина Чӑваш Енӗн литературӑпа ӳнер енӗпе патшалӑх премине тивӗҫнине те, ЧР искусствӑсен тава тивӗҫлӗ ӗҫченӗ пулнине те каланӑ. Вӑл — 20 ытла кӗнеке авторӗ. Унӑн сӑввисене швед, акӑлчан, турккӑ, вырӑс чӗлхисене куҫарнӑ. Паллӑ журналистӑн тата ҫыравҫӑн ӗҫӗсем «Антология современной литературы народов России. Поэзия» кӗнекене кӗнӗ.
РФ Патшалӑх Думи паян пенси реформипе ҫыхӑннӑ саккуна йышӑннӑ. Тивӗҫлӗ канӑва тухма хатӗрленекен ҫынсене ӗҫе илменшӗн штраф тӳлеттерӗҫ. Сахал мар: 200 пин тенкӗрен кая мар.
Ку шухӑш пирки РФ Президенчӗ Владимир Путин та пӗлтернӗччӗ. Малашне Уголовлӑ кодексра тепӗр статья пулӗ. Ӳсӗмне кура ҫынна ӗҫе илменшӗн е кӑларса янӑшӑн ӗҫпе тивӗҫтерекене пуҫран шӑлмӗҫ.
Пенси реформине йышӑнма хатӗрленнӗ май ватӑрах ҫынсен ӗҫе вырнаҫас енӗпе йывӑрлӑхсем сиксе тухма пултараҫҫӗ. Чылайӑшӗ пенсие тума хатӗрленекен ҫынсене ӗҫе илесшӗн мар вӗт. Ҫакна шута илсе йышӑннӑ та ҫак саккуна.
Унччен социаллӑ ыйтусемпе ӗҫлекен вице-премьер Татьна Голикова ҫак саккун Уголовлӑ кодексӑн 145-мӗш статйи пекрех пулнине каланӑ (ача кӗтекен, пепки 3 ҫул тултарман хӗрарӑма ӗҫе илменни е ӗҫрен кӑларса яни).
РФ Социаллӑ ыйтусемпе ӗҫлекен вице-премьер Татьяна Голикова «РИА Новости» информагентствӑна интервью панӑ. Вӑл унта 20 ҫултан кӗҫӗнрех ҫамрӑксене эрех-сӑра сутма чарас ыйтӑва та ҫӗкленӗ.
«Йӑлтах чару пуласси пирки никам та каламасть. Ҫапах алкогольпе кӗрешес ӗҫре пӗтӗм тӗнчери опыт пур. Эпир унпа яланах усӑ курма, хамӑр лару-тӑрупа танлаштарма пултаратпӑр. Ахальтен мар чылай ҫӗршыв эрех-сӑрана 18-тан мар, 20 е 21 ҫултан сутма юрани пирки йышӑну тӑвать. Ҫамрӑкрах чухне эрех-сӑрана часрах хӑнӑхни пирки иккӗленӳ ҫук, ачасем сывлӑхне пӗтереҫҫӗ», - тенӗ Татьяна Голикова.
Раҫҫей Правительстви те ку енӗпе улшӑнусем кӗртесшӗн. Вице-премьер каланӑ тӑрӑх, йӑлтах тарасапа виҫӗҫ. «Халӗ мӗн пулса иртнине курса эпӗ кунашкал йышӑну пирки шухӑшлӑттӑм. Анчах 21 ҫултан мар, 20-рен», - палӑртнӑ Татьяна Голикова.
Шупашкарти пӗр компанин графика дизайнерӗ Мария Франк офис ӗҫченӗсен хушшинче ирттерекен Пӗтӗм тӗнчери илем конкурсне хутшӑнать. Кунашкалли Чӑваш Енре – пӗрремӗш хут.
Мария ҫурмафинала тухмашкӑн кастинг витӗр тухнӑ ӗнтӗ. Чӑваш Ен пикине пулӑшас килет тӗк ҫак сайта кӗрсе уншӑн сасӑлама май пур: www.missoffice.ru. Тӗнче тетелӗнчи сасӑлав юпа уйӑхӗн 7-мӗшӗччен иртӗ. Конкурс йӗркипе килӗшӳллӗн, сайта кӗрсен пӗр талӑкра килӗшекен 3 пикене суйлама ирӗк пур.
Ҫак тапхӑр вӗҫленсен 30 пике юлӗ. Вӗсем «Офис мисӗ – 2018» конкурсӑн финалне хутшӑнӗҫ. Вӑл Мускавра раштавӑн 1-мӗшӗнче иртӗ. Ҫӗнтерӳҫе корона тата 2 миллион тенкӗ парӗҫ.
Конкурсҫӑсене общество деятелӗ Ирина Хакамада хаклӗ.
Роспотребнадзор Кемӗр облаҫӗнчи пӗр предприятире ҫын сывлӑхӗшӗн хӑрушлӑх кӑларса тӑратакан крем туса кӑларнине тупса палӑртнӑ. Пите тата алла сӗрмелли крем хӑрушсӑрлӑх требованийӗсемпе килӗшсе тӑмасть-мӗн. Кун пирки Роспотребнадзорӑн Чӑваш Енри управленийӗн пресс-служби хыпарлать.
Тӗрӗслев вӑхӑтӗнче пите тата алла сӗрмелли крема, «M Solo Active» ятлӑскере, туртса илнӗ. Ӑна «Кристал Косметик» туса кӑларнӑ. Вӑл микробиологи кӑтартӑвӗсемпе хӑрушсӑрлӑх требованийӗсемпе килӗшсе тӑмасть.
Ку кӑна та мар, предприятире туртса илнӗ кремра синегнойлӑ патак тупса палӑртнӑ.____
Шупашкарти 130-мӗш ача пахчине ҫӳрекен Лев Гренадёрский Максим Галкин ертсе пыракан «Лучше всех» кӑларӑма хутшӑннӑччӗ. Кӑларӑм ака уйӑхӗн 1-мӗшӗнче эфира тухнӑ. Халӗ 5 ҫулти ача Пӗтӗм Раҫҫейри конкурсра «Гид любитель. До 18 лет» номинацире тупӑшать.
Конкурса Раҫҫейри географи обществи йӗркелет. Унта хутшӑнакансен икӗ минута тӑсӑлакан ролик-видеоэкскурси ӳкерсе ярса памалла. Лев хутшӑнакан номинацие 600 ытла заявка панӑ.
5 ҫулти ача видеора Шупашкарти паллӑ вырӑнсем пирки сӑвӑласа каласа кӑтартать. Ӑна вӗсем амӑшӗпе ҫырнӑ. Лев Гренадёрские ҫӗнтерме пулӑшас килет-и? Youtube-канала кӗрсе курӑр. Жюри ҫӗнтерӳҫе палӑртнӑ чухне ролике миҫе ҫын пӑхнине, мӗнле хак панине шута илӗ.
Олег Долгов 1976 ҫулта Шӑмӑршӑ районӗнче ҫуралнӑ. Каярахпа унӑн ҫемйи Самар облаҫне куҫса кайнӑ. Ҫара кайсан вӑл Дагестанри Кизляр хулине лекнӗ. Ун чухне унта шӑпах ҫапӑҫусем пынӑ. Шел те, Чӑваш Ен каччин ӗмӗрӗ кӗске пулнӑ – вӑл 1996 ҫулта спецоперацире паттӑрла вилнӗ. Ӑна кун хыҫҫӑн Раҫҫей Геройӗн ятне панӑ.
Нумаях пулмасть Чӑваш Енре ҫуралнӑ каччӑ ячӗпе Раҫҫей почти марка кӑларнӑ. Унта Олег Долговӑн портретне, «Ылтӑн Ҫӑлтӑр» медале сӑнланӑ. Маркӑна 115 пин тиражпа кӑларнӑ, вӑл 27 тенкӗ тӑрать.
Шӑмӑршӑ районӗн каччи 20 ҫул та тултарса ӗлкӗреймен. Паттӑрӑн ятне ҫапла хисеп туни чӑннипех те мӑнаҫлӑх туйӑмӗ ҫуратать.
Пӗрремӗш каналпа пыракан «Ырӑ ир» каларӑмра Чӑваш Енри Кулибин пирки кӑтартнӑ. Вӑл сусӑрсем валли хатӗр шухӑшласа кӑларнӑ.
Кӑларӑм ҫурла уйӑхӗн 21-мӗшӗнче эфира тухнӑ. Унта Раҫҫейри Кулибинсем пирки каласа кӑтартнӑ. Вӗсен йышне Шупашкарти Вячеслав Васильев та кӗнӗ.
Вӑл шухӑшласа кӑларнӑ хатӗр пушмака алӑсӑрах хывма май парать. Пӗшкӗнмелле те мар. Хатӗр урана пылчӑкпа вараласран та сыхлать.
+2.3 °C