Ҫӗнӗ Шупашкарта ҫул урлӑ каҫакан арҫынна машина ҫапса хӑварнӑ.
Юпа уйӑхӗн 2-мӗшӗнче 21 сехет те 50 минутра пӗр арҫын хулари автовокзал тӗлӗнче ҫур урлӑ каҫнӑ. Пули-пулми вырӑнта мар. Пассажирсене иртсе ҫӳремелли ятарлӑ вырӑнта. Арҫын ҫине «Нива» автомобиль пырса кӗнӗ.
Аманнӑ аҫынна васкавлӑ пулӑшу тухтӑрӗсем пульницӑна илсе кайнӑ.
Юпа уйӑхне хӗрарӑмсен кӑкӑр ракӗпе кӗрешмелли пӗтӗм тӗнчери уйӑхлӑх тесе йышӑннӑ.
Республикӑн онкологи диспансерӗнче пӗлтернӗ тӑрӑх, пирӗн ҫӗршывра ҫак органӑн усал шыҫҫине ҫулсерен 70 пин хутчен тупса палӑртаҫҫӗ. Юлашки 15 ҫулта ку чирпе чирлекенсен шучӗ икӗ хут ытла ӳснӗ.
Чӑваш Енре кӑкӑр ракне ҫулсерен 400 ытла хутчен тупса палӑртаҫҫӗ. Кӑҫалхи ҫур ҫулта палӑртнӑ 252 тӗслӗхрен 185-шӗнче чир 1-2-мӗш стадире пулнӑ.
Хӗрарӑмсен кӑкӑр ракне тупса палӑртассипе ҫак уйӑхра пирӗн республикӑра тӗрлӗ мероприяти ирттерӗҫ.
Юпа уйӑхӗн 1-мӗшӗнче пӗтӗм тӗнчере Ваттисен кунне уявлаҫҫӗ те, Чӑвашстат ҫавӑн умӗн пирӗн республикӑри ватӑ ҫынсен йышне тишкернӗ.
2022 ҫул пуҫламӑшӗ тӗлне пирӗн республикӑра пурӑнакансен 24 проценчӗ, е 290 пин ҫын, аслӑ ӑрурисем шутланнӑ. Карчӑксен йышӗ арҫынсенчен 2,4 хут ытларах.
Раҫҫей Пенси фончӗн Чӑваш Енри уйрӑмӗ хыпарланӑ тӑрӑх, тивӗҫлӗ канурисен шучӗ 358 пинпе танлашать. Вӗсенчен 5 пине яхӑн ҫын – 90-99 ҫулсенчисем. Вӑрӑм ӗмӗрлисем Шупашкарта, Патӑрьел, Елчӗк тата Сӗнтӗрвӑрри районӗсенче йышлӑ. 100 ҫултан иртнисен шучӗ – 47.
Аслӑ ӑрурисем те ҫемье ҫавӑраҫҫӗ. Иртнӗ ҫул 88 ватӑ мӑшӑрланнӑ.
Стопкоронавирус.рф пӗлтернӗ тӑрӑх, авӑн уйӑхӗнче республикӑра 14 ҫын вилнӗ. Танлаштармашкӑн: ҫурла уйӑхӗнче – 9, утӑ уйӑхӗнче – 3, ҫӗртмере 13 ҫын ҫак чире пула пурнӑҫран уйрӑлнӑ.
Юлашки талӑкра 215 ҫын инфекциленнӗ. Иртнӗ талӑкра 328 ҫын пульницӑран сывалса тухнӑ. 25 ҫынна вара пульницӑна сипленме вырттарнӑ.
Пандеми пуҫланнӑранпа республикӑра 4677 ҫын вилнӗ. Ҫапла чирленӗ кашни 21-мӗш ҫын пурнӑҫран уйрӑлнӑ.
Авӑн уйӑхӗн 28-мӗшӗнче 19 сехет те 20 минутра Шупашкарти Мускав проспектӗнче «Audi Q8» водителӗ ҫын ҫине пырса кӗнӗ. 33 ҫулти хӗрарӑм светофорӑн симӗс ҫутипе каҫнӑ пулнӑ.
Хӗрарӑм пуҫне амантнӑ. Ӑна пульницӑна илсе кайнӑ.
Ҫуран ҫӳрекенсем ҫине машинӑсем авӑн уйӑхӗнче кӑна 38 хутчен пырса кӗнӗ. Инкексенче 2 ҫын вилнӗ, 36-ӑн суранланнӑ.
Шупашкарти тухтӑрсем аллергипе аптӑранӑ 7 ҫулти арҫын ача пурнӑҫне ҫӑлнӑ. Хулари ача-пӑча клиника пульницин специалисчӗсем пӗлтернӗ тӑрӑх, вӑл консервантсене пула шар курнӑ.
Амӑшӗ каланӑ тӑрӑх, ывӑлӗ ӗнер каҫхине лавккаран туяннӑ кекс ҫинӗ. Унра вара консервант нумай пулнӑ. Паян ирхине те ӑна ӑша янӑ.
Тухтӑрсем ӑнлантарнӑ тӑрӑх, каҫхине ачан организмӗнче антителӑсем пулнӑ. Паян ирхине вара вӗсем организма хӳтӗлеме пуҫланӑ. Ҫавна май ача шыҫӑннӑ, ӳчӗ кӗҫӗтме пуҫланӑ. Унӑн юн пусӑмӗ тӑрук анса ларнӑ, пуҫӗ ҫаврӑннӑ, вӑйӗ чакнӑ.
Ача халӗ пульницӑра сипленет. Сывлӑхӗ йӗркеленсен ӑна ахаль палатӑна куҫарӗҫ.
Стопкоронавирус.рф сайт пӗлтернӗ тӑрӑх, юлашки талӑкра республикӑра 79 ҫын кӑшӑлвируспа чирленӗ. Аса илтерер: юлашки вӑхӑтра инфекциленнисен йышӗ нумайланнӑччӗ.
Сывалакансем самай пулнӑ: 435 ҫын. Вилекенсем пулман. Пульницӑна 24 ҫынна сипленме вырттарнӑ.
Пандеми вӑхӑтӗнче пирӗн республикӑра 4675 ҫын вилнӗ. Кашни 21-мӗш ҫын инфекцие парӑнтараймасӑр пурнӑҫран уйрӑлнӑ. Авӑн уйӑхӗнче Чӑваш Енре 12 ҫын кӑшӑлвируса пула вилнӗ.
Паян ирхи ҫичӗ сехет ҫурӑсенче Ҫӗнӗ Шупашкарти Совет урамӗнчи 36-мӗш ҫуртра пӗри тӑххӑрмӗш хутри чӳрече янаххинчен ҫакӑнса тӑнӑ. Ҫавна хирӗҫ ҫуртра пурӑнакансем асӑрханӑ, вӗсемех йӗрке хуралҫисене пӗлтернӗ.
Вырӑна пырса ҫитнӗ пакунлисем кирлӗ хваттере часах шыраса тупнӑ. Алӑка пӗр каччӑ уҫнӑ. Вӑл хӑйӗнпе пурӑнакан 18 ҫулти хӗре унччен хваттере туртса кӗртме ӗлкӗрнӗ.
Йӗрке хуралҫисем тухтӑрсене чӗнсе илнӗ, психоневрологи диспансерӗнче учетра тӑракан пикене вӗсем пульницӑна илсе кайнӑ. Йӗрке хуралҫисем вара хваттерте тентлӑ контейнер асӑрханӑ. Унта кил хуҫисем кантӑр ӳстернӗ.
Шупашкарта пурӑнакан 25-ри хӗрарӑм амӑшне вӗлерме тӑнӑ.
Авӑн уйӑхӗн 16-мӗшӗнче 15 сехетре хайхискерпе 48 ҫулти амӑшӗ хирӗҫсе кайнӑ. Пӑтӑрмах хулари Граждан урамӗнчи нумай хваттерлӗ пӗр ҫуртра пулса иртнӗ. Тарӑхса кайнӑ хӗрӗ алла ҫӗҫӗ ярса илсе амӑшне хырӑмӗнчен тата ҫурӑмӗнчен 7 хутран кая мар ҫӗҫӗпе чикнӗ. Унтан вӑл килӗнчен тухса утнӑ.
Суранланнӑ хӗрарӑм хваттертен тухма пултарнӑ, унтан вӑл кӳршисенчен пулӑшу ыйтнӑ, лешсем васкавлӑ пулӑшу тухтӑрӗсене чӗнсе илнӗ.
Амӑшӗпе хирӗҫнӗ хыҫҫӑн 25-ри хӗр хулари кафесенчен пӗрне кайнӑ, унта пынисемпе хирӗҫме тытӑннӑ. Унтан ӑна йӗрке хуралҫисем тытса кайнӑ.
Хӗре хальлӗхе психиатри больницине вырнаҫтарнӑ. Амӑшне вӗлерме тӑнӑшӑн ун тӗлӗшпе пуҫиле пуҫарнӑ.
6 ҫал каялла хӗрарӑмӑн ҫӑмарталӑхӗнче усал мар шыҫӑ аталаннине палӑртнӑ. Анчах пациентка утанпа пульницӑна кайса тӗрӗсленмен.
Унӑн хырӑмӗ ӳссех пынӑ, ҫавна май хӗрарӑм лайӑх сывлайман, ҫиеймен, утайман. Вара тин вӑл тухтӑрсем патне килнӗ.
Ҫав шыҫӑ пӗтӗм хырӑмне йышӑннӑ иккен. Тухтӑрсем операци тумаллине палӑртнӑ. Хӗрарӑмӑн варӗнчен 40 сантиметр тӑршшӗ, 35 килограмм таякан шыҫӑ касса кӑларнӑ. Тухтӑрсем кунашкаллине пӗрремӗш хут курнӑ. Шыҫҫа амалӑхпа, ҫӑмарталӑхпа пӗрле касса кӑларнӑ.
Хӗрарӑм вӑхӑтра тухтӑрсем патне каймасӑр пысӑк йӑнӑш тунине халь тин ӑнланнӑ.
+16.3 °C