Шупашкарта суя правапа ҫула тухнӑ арҫынна тытса чарнӑ.
Патшалӑхӑн ҫул-йӗр хӑрушсӑрлӑхӗн инспекцийӗн ӗҫченӗсем авӑн уйӑхӗн 29-мӗшӗнче хулари Ашмарин урамӗнчи 85-мӗш ҫурт тӗлӗнче «Ford Focus» автомобиле чарнӑ. 33 ҫулти арҫыннӑн водитель удостоворенийӗ суя пулнӑ. Вӑл тунса тӑман — тӗнче тетелӗнче 20 пин тенкӗпе права туяннине йышӑннӑ. Хӑйӗн вара водитель прави нихӑҫан та пулман-мӗн.
Суя правапа ҫӳренӗ арҫын тӗлӗшпе пуҫиле ӗҫ пуҫарнӑ.
Чӑваш Енӗн Элтеперӗ Олег Николаев муниципалитетсен информаци уҫӑмлӑхӗн рейтингне йӗркелеме хушнӑ. Кун пирки вӑл наркотикпа кӗрешекен комиссин ӗнер иртнӗ ларӑвӗнче каланӑ.
РФ Шалти ӗҫсен министерствин Наркотик ҫаврӑнӑшне тӗрӗслесе тӑракан управлени пуҫлӑхӗ Сергей Наумов наркотикпа кӗрешекен комиссисем вырӑнти хӑй тытӑмлӑх органӗсен сайчӗсенче ятарлӑ баннерсене туллин тултарса пымаҫҫӗ тесе пӗлтернӗ. Унта ӗҫ планӗ тата кӑтартӑвӗ пирки ҫителӗксӗр ҫыраҫҫӗ имӗш. Муниципалитетсен тӗнче тетелӗ валли хут ҫырассине лайӑхлатма тивӗ.
Шупашкарта пурӑнакан 49 ҫулти хӗрарӑм банк карттине ҫухатнӑ. Унтан укҫа ҫухалма тытӑнсан, юпан 2-мӗшӗнче, вӑл полицие пынӑ.
Йӗрке хуралҫисем видиокамерӑсене пӑхнӑ. Унта ҫакӑ паллӑ: икӗ арҫын лавккара тавар туяннӑ, вӗсенчен пӗри тупнӑ карттӑпа тӳленӗ. Ҫапла вӑл ют ҫын картти ҫинчи 3 пин тенке тӑкакланӑ.
Ҫав арҫын – 60 ҫулта, Шупашкарти пӗр управляющи компанийӗнче ӗҫлет. Ун тӗлӗшпе уголовлӑ ӗҫ пуҫарнӑ.
Чӑваш Енре 43 ҫулти хӗрарӑм авӑн уйӑхӗн 24-мӗшӗнче ҫухалнӑ. Вал паянхи кун та килте ҫук.
Светлана Андреева ҫав кун Муркаш районӗнчи усламҫӑ патӗнче ҫӗр ҫырли пуҫтарнӑ. Ун чухне вӑл тӗттӗмрех куртка, сарӑ кофта, тӗттӗм кӑвак тӗслӗ шӑлавар, хура кеда тӑхӑннӑ пулнӑ, хура кутамкка ҫакнӑ.
Хӗрарӑма «Лиза Алерт» хастарӗсем шыраҫҫӗ. Вӑл ҫухалнине ШӖМ те ҫирӗплетет.
Светлана Андреева пирки мӗн те пулин пӗлетӗр тӗк 112 номерпе шӑнкӑравламалла.
Шупашкар районӗнчи упӑшкипе арӑмӗ маркӑламан пирус сутнине палӑртнӑ. Ҫапла пӗлтерет ШӖМ.
Вӗсене электронлӑ пирус курупкинче упранӑ. Ӑна вара, саккунпа килӗшӳллӗн, маркӑламалла мар. Ҫапла майпа вӗсем ултава пытарас тенӗ ахӑртнех.
Мӑшӑр ҫак пируссене Шупашкарти, Ҫӗнӗ Шупашкарти тата ытти хулари суту-илӳ вырӑнӗсенче сутнӑ. Ведомство тӗрӗслев ирттернӗ вӑхӑтра складра 100 пин ытла пачка пирус тупнӑ. Пӗтӗмпе – 10 миллион ытла тенкӗлӗх.
Халӗ йӗрке хуралҫисем ҫак маркӑламан пируса ӑҫтан кӳрсе килниен уҫӑмлатаҫҫӗ.
Шупашкарта пурӑнакан 37 ҫулти арҫын хитре телефон номерӗ илес тенӗ те ултавҫӑсене укҫа куҫарса панӑ. Кун пирки ШӖМ пӗлтерет.
Ҫак арҫын халӑх тетелӗнче хитре телефон номерӗ сутнине курнӑ. Ӑна илес тесе вӑл палламан ҫынна 4 пин те 400 тенкӗ куҫарса панӑ. Кун хыҫҫӑн ҫав ҫын ҫыхӑнӑва тухма пӑрахнӑ. Кун хыҫҫӑн тин вӑл ултавҫӑ серепине лекнине ӑнланнӑ, полицие кайса пӗлтернӗ.
Кун тӗлӗшпе пуҫиле ӗҫ пуҫарнӑ.
Ҫурла уйӑхӗн 25-мӗшӗнче Шупашкар районӗнчи Илпеш ялӗ патӗнче ҫул-йӗр патрулӗн инспекторӗсем вӑрмантан тухакан «Хендай-Солярис» машинӑна тӗрӗслеме чарнӑ.
Салонта 44 ҫулти водитель тата 37 ҫулсенчи икӗ пассажир пулнӑ. Сӑнран пӑхсан вӗсем наркотик астивнӗ пек туйӑннӑ. Салонта темле пӗчӗк хутаҫ выртнӑ. Арҫынсем экспертиза тухма килӗшмен, вӗсене ШӖМӗн Шупашкар районӗнчи пайне илсе кайнӑ.
Хутаҫри япалана йӗрке хуралҫисем туртса илнӗ, ӑна экспертизӑна янӑ. Чӗркемре, чӑн та, наркотик пулнӑ.
Арҫынсене пурне те явап тыттарӗҫ, ҫав шутра водителе те.
«Руль умӗнче» портал пӗлтернӗ тӑрӑх Чӑваш Республикин Элтепер автобазин механикӗ тӗлӗшӗпе административлӑ ӗҫ пуҫарнӑ — ӗҫпе усӑ куракан Genesis G90 машшин ҫине мӗлтлетмӗшсене саккуна пӑсса вырнаҫтарнишӗн явап тыттарӗҫ.
Элтепере илсе ҫӳрекен машинӑра хӗрлӗ-кӑвак тӗслӗ мӗлтлетмӗшсемпе усӑ курнине ҫынсем асӑрханӑ та ШӖМе йӗрке пӑсни пирки ҫыру янӑ. Шалти ӗҫсен министерстви ыйтӑва пӑхса тухнӑ хыҫҫӑн К375РК21 номерлӗ машшин ҫине унашкал мӗлтлетмӗшсем вырнаҫтарма ирӗк паманнине тупса палӑртнӑ. Унсӑр пуҫне, «Руль умӗнче» портал палӑртнӑ тӑрӑх, ҫул-йӗр правилисем хӗрлӗ-кӑвак тӗслӗ мӗлтлетмӗшсене граждансен машшинисем ҫине вырнаҫтарма чараҫҫӗ. Вӗсене право хӳтӗлекен органсен транспорчӗ ҫине ҫеҫ (ШӖМ, Росгварди, ФХС, ФСБ тата Ҫар полицийӗ) лартма юрать.
Палӑртмалла, К375РК21 номерлӗ Genesis G90 машшинпа Олег Николаева турттарма усӑ кураҫҫӗ. Ӑна тара илнӗ.
Шупашкарти экономикӑпа технологи колледжӗнче пулас йӗрке хуралҫисене вӗрентсе кӑларма тытӑнӗҫ.
«Правӑна сыхлас ӗҫ-хӗл» специальноҫпа икӗ ушкӑн вӗренме тытӑннӑ.
Колледжра пулас полицейскисене хатӗрлеме тытӑнма республикӑн Шалти ӗҫсен министерстви пулӑшнӑ.
Малтанласа пӗр ушкӑн кӑна йӗркелеме шухӑшланӑ. Анчах 25 ача вырӑнне 50 ҫамрӑк йӗрке хуралҫи пулма вӗренме кӑмӑл тунӑ. Ҫапла вара колледжра икӗ ушкӑн йӗркеленӗ.
Ҫӗмӗрле районӗнчи Мисчӗ ялӗнче амӑшӗ машинӑпа тапранса кайма хатӗрленнӗ чухне 2 ҫулти ывӑлӗ ҫине кӗрсе кайнӑ. Юрать-ха, ача чӗрех юлнӑ. Анчах ӑна, суранланнӑскере, пульницӑна илсе кайнӑ. Кун пирки ШӖМ пӗлтерет.
Ку инкек ӗнер, ҫурла уйӑхӗн 19-мӗшӗнче, каҫхи 6 сехет ҫурӑра пулнӑ. 34 ҫулти хӗрарӑм ВАЗ-2111 машина рулӗ умне ларсан каялла чакма пуҫланӑ та ывӑлӗ ҫине кӗрсе кайнӑ. Вӑл ӳсӗр пулманни паллӑ.
+20.3 °C