Шупашкар хулинче троллейбус водительне ҫул-йӗр правилине пӑснӑшӑн явап тыттарнӑ.
Пӑтӑрмах кӑҫалхи ҫуркунне, ака уйӑхӗн 7-мӗшӗнче, кӑнтӑрла пулса иртнӗ. Пассажирсене 1-мӗш маршрутпа турттаракан троллейбус «Ҫурҫӗр клиники» чарӑнуран хускалса кайнӑ чухне пӗри алӑкран тухса пӗтейменнине асӑрхаман. 83 ҫулти кинемей ҫапла вара алӑк хушшине хӗсӗнсе ларнӑ. Унтан троллейбус чарӑнса алӑка уҫсан ватӑ ҫын урама тухса ӳкнӗ. Вӑл аллине хытах амантнӑ.
Троллейбус рульне тытса пынӑ хӗрарӑм хӑйӗн айӑпне пӗртте тунса тӑман. Ӑна суд тӗрмене хупса хумасӑр ҫулталӑклӑха ирӗкрен хӑтарма йышӑннӑ.
Чӑваш Енре пурӑнакан ҫынсем кӗркунне ҫитсен кӑмпана ҫӳреме юратаҫҫӗ. Анчах вӑрмана кӗрсен вӗсем ҫухалса каяҫҫӗ. Первомайски посёлокӗнче пурӑнакан арҫын, ав, юпа уйӑхӗн 1-мӗшӗнче тӑр кӑнтӑрла вӑрмана тухса кайнӑ, анчах вӑл унта ҫӗтсе кайнӑ.
Пӑтӑрмах пирки Шупашкар районӗнчи йӗрке хуралҫисене каҫхи пилӗк сехетсенче хыпарланӑ.
69 ҫулти арҫын ҫухални пирки хайхи тусӗ хыпарланӑ.
Арҫынна ҫӑлавҫӑсемпе нимеҫӗсем, йӗрке хуралҫисем икӗ сехет ытла шыранӑ хыҫҫӑн вӑйран кайнӑ ватта шыраса тупнӑ.
Ҫав кунах вӑрманта 68 ҫулти хӗрарӑм ҫухалса кайнӑ. Ӑна та ҫӑлавҫӑсемпе нимеҫӗсем шыраса тупнӑ.
Юпа уйӑхӗн 1-мӗшӗнче пӗтӗм тӗнчере Ваттисен кунне уявлаҫҫӗ те, Чӑвашстат ҫавӑн умӗн пирӗн республикӑри ватӑ ҫынсен йышне тишкернӗ.
2022 ҫул пуҫламӑшӗ тӗлне пирӗн республикӑра пурӑнакансен 24 проценчӗ, е 290 пин ҫын, аслӑ ӑрурисем шутланнӑ. Карчӑксен йышӗ арҫынсенчен 2,4 хут ытларах.
Раҫҫей Пенси фончӗн Чӑваш Енри уйрӑмӗ хыпарланӑ тӑрӑх, тивӗҫлӗ канурисен шучӗ 358 пинпе танлашать. Вӗсенчен 5 пине яхӑн ҫын – 90-99 ҫулсенчисем. Вӑрӑм ӗмӗрлисем Шупашкарта, Патӑрьел, Елчӗк тата Сӗнтӗрвӑрри районӗсенче йышлӑ. 100 ҫултан иртнисен шучӗ – 47.
Аслӑ ӑрурисем те ҫемье ҫавӑраҫҫӗ. Иртнӗ ҫул 88 ватӑ мӑшӑрланнӑ.
Вӑрнарти пӗр хваттерте пушар тухсан 1945 ҫулта ҫуралнӑ кинемей, кил хуҫи, ӑна хӑйех сӳнтерме хӑтланнӑ. Ҫав вӑхӑтра Росгварди ӗҫченӗ Алексей Одинцов прапорщик службӑна кайнӑ. Хваттерте пушар тухнине асӑрханӑ вӑл.
Прапорщик алӑкӗ уҫах пулнипе хваттере кӗнӗ. Кинемей пушара хӑй сӳнтернине курсан Алексей Одинцов ӑна урама тухма ӳкӗте кӗртнӗ. Тӗтӗме пула ватӑскер хӑйне япӑх туйма пуҫланӑ.
Прапорщик кил хуҫи хӗрарӑмӗнчен килте урӑх кам пуррипе кӑсӑкланнӑ. Никам та ҫуккине пӗлсен часрах пушарнӑйсене, васкавлӑ медпулӑшу чӗннӗ.
Вӗсем ҫитиччен Алексей Одинцов ҫуртра пурӑнакан ытти ҫынна эвакуациленӗ.
Кунашкал акцие Шупашкарта кашни ҫулах ирттереҫҫӗ. Пӗтӗм тӗнчери ваттисен кунӗнче, юпа уйӑхӗн 1-мӗшӗнче, парикмахерсем ватӑ ҫынсен ҫӳҫне йӳнӗрех хакпа касӗҫ.
Акцие 60 ҫултан аслӑраххисем хутшӑнма пултараҫҫӗ. Кӑҫал ӑна икӗ кун ирттерме палӑртнӑ: авӑнӑн 30-мӗшӗнче тата юпа уйӑхӗн 1-мӗшӗнче. 60-тан аслӑраххисен ҫӳҫ касас тесен маларах ҫырӑнмалла.
Ансат прическӑна 150 тенкӗпе тӑвӗҫ. Акцие Шупашкарти 22 парикмахер хутшӑнӗ.
Кӑҫалхи утӑ уйӑхӗн 27-29-мӗшӗсенче Шупашкарти темиҫе ватӑ ултавҫӑсен капкӑнне ҫакланнӑ. Шар курнисем — 84-87 ҫлсенчи 5 кинемей.
Вӗсене тӑванӗсем ҫул-йӗр ҫинчи инкеке лекнӗ, ҫавсене пулӑшма укҫа кирлӗ тесе тыттарнӑ. Укҫана кинемейсем курьер урлӑ парса янӑ. Ҫапла вара вӗсем пӗтӗмпе 1 миллион та 300 пин тенкӗ укҫасӑр тӑрса юлнӑ.
Оперативлӑ шырав ӗҫченӗсем Шупашкарта пурӑнакан, Камчатка облаҫӗнче ҫуралнӑ хӗр улталанине палӑртнӑ. 25 ҫултискерӗн банк карттине, телефонне туртса илнӗ. Хайхи хӗр мессенджерсенчен пӗринче шар курнисен адресне тата ытти информацие пухса пынӑ.
Пуҫиле ӗҫе малалла тӗпчеҫҫӗ.
Шупашкар хулинче пурӑнакан 73 ҫулти хӗрарӑм иртнӗ эрнере ултавҫӑсен аллине чутах ҫакланман. Капкӑна ҫакланасран хӗрарӑма карас ҫыхӑнӑвӗн лавккинче ӗҫлекенсем вӑхӑтра тытса чарнӑ.
Карчӑк патне ҫав кун ултӑ сехет хушшинче 18 номертан шӑнкӑравланӑ. Паллӑ мар ҫынсем кинемее банкри укҫана ултавҫӑсенчен «сыхласа хӑварма» тупрана урӑх счёт ҫине куҫарма ӳкӗте кӗртме хӑтланнӑ.
Хӗрарӑм ӗненнӗ, банкри 500-е яхӑн пин тенке илнӗ те Калинин урамӗнчи суту-илӳ центрӗнчи карас ҫыхӑнӑвӗн лавккине укҫа куҫарма кайнӑ. Анчах унта ӗҫлекенсем хӗрарӑма ултавран тытса чарнӑ.
Карчӑка улталама хӑтланнӑ тӗслӗхпе йӗрке хуралҫисем пуҫиле ӗҫ пуҫарнӑ.
Авӑн уйӑхӗн 21-мӗшӗнче каҫхине Шупашкарти тӗп урамра дежурствӑра тӑракан полицейски патне макӑракан кинемей чупса пынӑ. Вӑл пуйӑсран юлать-мӗн, тапранса кайиччен 10 минут кӑна юлнӑ. Кинемей пуйӑса ӗлкӗрес тесе кӑнтӑр-хӗвеланӑҫ районӗнчен иртерех тухнӑ, общество транспортне ларнӑ та пӑкка лекнӗ.
Ҫул-йӗрпе патруль службин уйрӑм батальонӗн взвочӗн командирӗ Евгений Данилов ҫухалса кайман, кинемее часрах вокзала илсе ҫитернӗ. Вӑл хӗрарӑма пуйӑса лартсах янӑ
Авӑн уйӑхӗн 23-мӗшӗнче полицейскисем Кӳкеҫ ҫывӑхӗнче, М-7 ҫул ҫинче, арҫын ҫул хӗррипех утнине асӑрханӑ. Вӑл хӑй ӑҫта пулнине ӑнланманни палӑрнӑ.
Пакунлисем ватӑ арҫынна полици уйрӑмне илсе ҫитернӗ.
64 ҫулти арҫыннӑн ҫумра телефон пулман. Вӑл ӑҫтан пулнине ыйтса пӗлнӗ. Хайхискер Карачураран иккен. Вӑл каҫхине тӑванӗсене каламасӑр килтен тухса кайнӑ. Полицейскисем ӑна киле илсе ҫитернӗ.
Тӑванӗсем каланӑ тӑрӑх, арҫын ӑс-тӑнӗ арпашӑннипе аптӑрать. Эппин, пакунлисем ӑна вӑхӑтра пулӑшнӑ.
Атӑлҫи тӑрӑхӗнчи маньяка 30 ытла ҫынна вӗлернӗ тесе шухӑшлаҫҫӗ. Хусанта пурӑнакан 40 ҫулти Радик Тагиров тӗлӗшпе пуҫарнӑ пуҫиле ӗҫе РФ Следстви комитечӗн ӗҫченӗсем тӗпчесе пӗтернӗ.
Вӑйпитти 30 ытла ҫынна вӗлернӗ, 3 хутчен вӗлерме тӑнӑ, ватӑ ҫынсене хурахла тапӑнса 30 хут ытла ҫаратнӑ.
Пуҫтаха чылай вӑхӑт тытса чарайман. 10 пин ытла ҫынна тӗрӗсленӗ, 5 пин ытла эксперт тӗрӗслевӗ ирттернӗ.
Преступление ҫав арҫын 2011 ҫулхи пуш уйӑхӗнчен тытӑнса 2012 ҫулхи юпа уйӑхӗччен тунӑ. Арҫын Хусан, Нижнекамск, Волжск, Ижевск, Чулхула, Шупашкар, Ӗпхӳ, Перӗм, Екатеринбург, Сарӑту, Иваново, Киров, Самар, Челепи, Мускав хулисенче пурӑнакан кинемейсене шар кӑтартнӑ. Вӑл ватӑсене коммуналлӑ служба ӗҫченӗ тесе ӗнентерсе вӗсен килне кӗнӗ. Кайран кинемейсене тапӑнса пӑвса вӗлернӗ, карчӑксен укҫине илсе тухса кайнӑ. Хусан арҫынни Шупашкарти икӗ кинемее вӗлернӗ.
Ҫывӑх вӑхӑтра арҫынна суд тӑвӗҫ.
+0.3 °C