Ӗнертен пуҫласа ҫу уйӑхӗн 21-мӗшӗччен Шупашкарти Тӗп пасарта кӑшӑлвирусран вакцинаци тума пулать. Тухтӑрсем 11-17 сехетсенче ӗҫлеҫҫӗ.
Ку ӗҫе Хулари тӗп пульница специалисчӗсем пурнӑҫлаҫҫӗ. 18 ҫултан иртнӗ кирек мӗнле ҫын та прививка тӑваять. Ҫумра паспорт, СНИЛС, страхлав полисӗ пулмалла.
Хулари тӗп пульницӑра та кунсерен вакцинаци тӑваҫҫӗ. Вӑл Ленин проспектӗнчи 1-мӗш тата 12-мӗш ҫуртсенче, Ҫырла тӑкӑрлӑкӗнчи 2-мӗш ҫуртра вырнаҫнӑ. Ыйтса пӗлмелли телефон: 23-45-63, 26-00-33, 23-46-69, 35-03-55.
Чӑваш Енре виҫӗ ҫын кӑшӑлвирусӑн Британӗ штамӗпе чирленине палӑртнӑччӗ. Паянхи куна вӗсен йышӗ ӳснӗ – 9 ҫынна ҫитнӗ.
Анчах питех хӑрамалли ҫук-мӗн. ЧР сывлӑх сыхлавӗн министерӗ Владимир Степанов пӗлтернӗ тӑрӑх, хӑрушӑ вируса сарӑлма паман, вӑхӑтра изоляци тунӑ. Чирлисем хутшӑннӑ ҫынсемпе профилактика ӗҫӗсем ирттернӗ.
Ҫапах япӑх хыпар та пӗлтернӗ: Чӑваш Ене Кӑнтӑр Африкӑри тата Индири штамсем килес хӑрушлӑх пур.
Министр пӗлтернӗ тӑрӑх, ҫӗнӗ штамсем хӑрушӑрах, вӗсем япӑх сипленеҫҫӗ, вилекенсем вара нумайрах. Чирлес мар тесен прививка тумалли, дистанцие пӑхӑнмалли, маска тӑхӑнмалли пирки каланӑ.
Ҫулталӑк пуҫланнӑ чухне ЧР Элтеперӗ Олег Николаев нарӑс уйӑхӗнче кӑшӑлвирусран прививка тӑвасси пирки каланӑччӗ. Анчах вӑл ҫакна ака уйӑхӗн 24-мӗшӗнче ҫеҫ тунӑ.
Паян Правительство ҫуртӗнче иртнӗ планеркӑра Олег Николаев вакцинӑн иккӗмӗш компоненчӗпе прививка тутарнине пӗлтернӗ.
Элтепер каланӑ тӑрӑх, вӑл пӗрремӗш хутӗнче те, халӗ те хӑйне лайӑхах туйнӑ. «Иртнӗ канмалли кунсенче вакцинӑн иккӗмӗш компонентне тутартӑм, хама лайӑхах туятӑп, пӗрремӗш компонентне тутарнӑ чухне те ҫаплахчӗ. Ҫавӑнпа пурне те ҫапла тума сӗнетӗп», - тенӗ Олег Алексеевич.
Чӑваш Енре кӑшӑлвируспа ҫыхӑннӑ тепӗр йӗркене ҫемҫетме йышӑннӑ. Халӗ шӑпах ача пахчисенче шкул ӳсӗмне ҫитнӗ шӑпӑрлансен уявӗсем иртеҫҫӗ. ЧР Вӗренӳ министерстви пӗлтернӗ тӑрӑх, мероприятие ашшӗ-амӑшне те кӗртӗҫ.
Анчах, паллах, йӗркене пӑхӑнмалла. Уявсем ача пахинче ушкӑнра иртӗҫ, ашшӗ-амӑшӗн унта кӗме юрать, анчах хӑрушсӑрлӑх мерисене пӑхӑнмалла. Сӑн тата видео ӳкерекенсене, ытти ҫынна вара уява чӗнме юрамасть.
Сӑмах май, ӗнрехи кун тӗлне республикӑри ача пахчисенче кӑшӑлвируспа чирленӗ 3 тӗслӗхе ҫеҫ шута илнӗ.
Чӑваш Енре юлашки талӑкра 50 ҫын кӑшӑлвируспа чирленӗ. Сывалакансем 47-ӗн пулнӑ. Кун пирки федераци информаци центрӗ пӗлтерет.
Ку таранччен республикӑра 24878 ҫын кӑшӑлвируспа чирленӗ. Вӗсенчен 22694-шӗ сывалнӑ. Юлашки талӑкра 2 ҫын каварлӑ вируса парӑнтарайман. Ку таранччен 1394 ҫын ҫак чире пула вилнӗ. Палӑртмалла: юлашки вӑхӑтра кӑшӑлвирусран вилекенсем сахалланнӑ. Ака уйӑхӗн 22-мӗшӗнчен кашни кун 50 ытла ҫын чирленине палӑртнӑ.
Хальхи вӑхӑтра килте амбулатори мелӗпе тата стационарта 791 пациент сипленет.
Ҫу уйӑхӗн 9-мӗшӗнче Шупашкарта Ҫӗнтерӳ парачӗ иртнӗ. Паян Правительство ҫуртӗнче иртнӗ планеркӑра ҫакна сӳтсе явнӑ.
ЧР сывлӑх сыхлавӗн министрӗ Владимир Степанов пӗлтернӗ тӑрӑх, парада хутшӑнма палӑртнӑ икӗ ҫыннӑн кӑшӑлвирус пулнӑ. Сӑмах май, унта 1027 ҫын хутшӑннӑ. Вӗсенчен кашниех вирус пуррипе ҫуккине палӑртакан анализ панӑ. Икӗ ҫыннӑн организмӗнче кӑшӑлвирус пурри палӑрнӑ. Телее, вӗсене вӑхӑтра изоляци тунӑ. Халӗ вӗсем сипленеҫҫӗ. Кун пирки сывлӑх сыхлавӗн министрӗ Владимир Степанов пӗлтернӗ.
Ҫавӑн пекех министр ҫу уйӑхӗнчи канмалли кунсенче пульницӑсем яланхи пекех ӗҫленине палӑртнӑ.
Ку лайӑх хыпар темелле: иккӗмӗш кун ӗнтӗ Чӑваш Енре кӑшӑлвирусран 1 ҫын вилет. Ҫу уйӑхӗн пуҫланнӑранпа 22 ҫыннӑн пурнӑҫӗ ҫак вируса пула татӑлнӑ. Пандеми пуҫланнӑранпа республикӑра 1388 ҫын вилнӗ.
Паянхи кун тӗлне 24730 ҫын инфекциленнӗ. Вӗсенчен 22561-шӗ сывалнӑ. Юлашки талӑкра 49 ҫын чирленине палӑртнӑ, сывалакансем 65-ӗн пулнӑ.
Паянхи куна илес тӗк, стационарта тата килте амбулатори мелӗпе кашӑлвирусран 781 ҫын сипленет.
Чӑваш Енре 123 шкулта 19 класс кӑшӑлвируса пула карантина кайнӑ. Кун пирки вӗренӳ министрӗ Алла Салаева хыпарланӑ.
Ку кӑна мар-ха. Тӑватӑ техникумра тата ултӑ ача пахчинчи сакӑр ушкӑн та ҫак вируса пула карантина хупӑннӑ. Ӗнерхи кун тӗлне Чӑваш Енре 22 класри 520 ача дистанци мелӗпе вӗреннӗ. Ҫакӑн пек мелпех техникумри 75 студент тата аслӑ шкулсенчи 107 ҫамрӑк ӑс пухаҫҫӗ.
Палӑртмалла: эпидеми пуҫланнӑранпа республикӑра ОРВИпе чирленӗ 18 ҫул тултарман 44360 ачана тухтӑрсем сипленӗ.
Чӑваш Енре виҫӗ ҫыннӑн кӑшӑлвирусӑн Британи штамӗ пулнине палӑртнӑ. Кун пирки Роспотребнадзорӑн Чӑваш Енри управленийӗн ертӳҫин тивӗҫӗсене пурнӑҫлакан Вера Головач оперштаб ларӑвӗнче пӗлтернӗ.
Тин кӑна республикӑра ҫак вируспа чирлесси чакса пыратчӗ. Халӗ ку кӑтарту тата вӑрахланнӑ. Юлашки эрнере чирлесси 13 процент ӳснӗ, талӑкне 46-60 ҫын инфекциленет.
Кӑшӑлвирус сарӑлассине чакарас тӗллевпе ведомство республика правительствине тата муниципалитетсене массӑллӑ меропряитисене пӑрахӑҫлама сӗннӗ.
Пандеми пуҫланнӑранпа пирӗн республикӑра 1357 пациент кӑшӑлвируса пула ҫут тӗнчерен уйрӑлнӑ. Юлашки талӑкра 5 ҫыннӑн пурнӑҫӗ татӑлнӑ. Кун пирки федераци информаци центрӗ пӗлтерет.
Паянхи кун тӗлне Чӑваш Енре 24055 ҫын каварлӑ вируса ҫаклатнӑ. Вӗсенчен 21906-шӗ сывалнӑ. Юлашки талӑкра сывалакансем, чирленисемпе танлаштарсан, нумайрах пулнӑ: 55-ӗн инфекциленнӗ, 58-ӑн чире парӑнтарнӑ. Сӑмах май, ӗнер те ҫавӑн чухлех ҫын чирленине палӑртнӑ.
Хальхи вӑхӑтра республикӑри стационарсенче тата килте амбулатори мелӗпе 792 ҫын кӑшӑлвирусран сипленет.
+16.3 °C