Республикӑн клиника больницин пульмонологи уйрӑмӗнертӳҫине Петр Павлова Раҫҫей Президенчӗ Владимир Путин тав тунӑ.
Кӑшӑлвируспа кӗрешекен тухтӑрсене самай йывӑр тивет. Республикӑн Сывлӑх сыхлав министерствин штатра тӑман тӗп специалисчӗ-эксперчӗ – пульмонологӗ Петр Павлов медицинӑра 20 ҫул ӗҫлет. Вӑл ертсе пыракан пульмонологи уйрӑмӗ ӳпкен йывӑр чирӗсемпе ӑнӑҫлӑ кӗрешет. Петр Ивановича ӗҫтешӗсем ҫеҫ мар, пациентсем те хисеплеҫҫӗ. Вӑл телемедицина мелӗпе республикӑри больницӑсенчи тухтӑрсене сӗнӳ-канашпа пулӑшать.
Шупашарта ҫак кунсенче икӗ пульница ҫӗнелнӗ хыҫҫӑн уҫӑлнӑ. Кӑнтӑр поселокӗнчи Хулари клиника пульницин 4-мӗш поликлиники тата Хулари ача-пӑча клиника пульницин 1-мӗш поликлиникин филиалӗ алӑкӗсене уҫнӑ.
4-мӗш поликлиникӑра Кӑнтӑр поселокӗнчи тата Алькешри 22 пин ытла ҫын сипленет. Унта 12 терапевт, хирург, уролог, невролог, окулист тата эндокринолог ӗҫлеҫҫӗ. Ҫавӑн пекех рентген пӳлӗм, УЗИ тумалли аппаратсем, эндоскопи пӳлӗмӗ пур.
Ача-пӑча поликлиникинче ҫын нумай пухӑнтӑр тесе приема кунсемпе палӑртнӑ, тӗрлӗ этажра пулнине те шута илнӗ.
Шупашкарти 1-мӗш клиника пульницин 3-мӗш акушер стационарӗнче 57 ача ҫуралнӑ.
Асӑннӑ стационар респиратор вирусӗпе, гриппа, кӑшӑлвирус инфекцийӗпе чирлисене ҫур ҫул ытла йышӑнать. Ҫав вӑхӑтра кӑшӑлвируспа чирлӗ 165 хӗрарӑма пулӑшнӑ, 57 ача ҫуралнӑ.
3-мӗш акушер стационарӗн акушер уйрӑмӗн заведующийӗ Эльвира Васильева каланӑ тӑрӑх, тухтӑрсемшӗн чи хакли – тав сӑмахӗ калани.
Тав сӑмахӗ калакансем йышлӑ. Калӑпӑр, Людмила ятлӑ хӗрарӑм ҫурла уйӑхӗн 18-мӗшӗнче ҫӑмӑлланнӑ. Тухтӑрсем ҫине тӑнипе унӑн ачи таса сывӑ ҫуралнӑ. Вӑл – ҫемьери иккӗмӗш пепке. Хӗрарӑм Александр Белебенцев анестезиолог-реаниматолога уйрӑмах тав тӑвать.
Чӑваш Енри пульницӑсем кӑшӑлвируспа чирлисене йышӑнма хатӗр. Паянхи кур тӗлне республикӑри 10 пульницӑра COVID-19 диагнозӗллисем, гриппа тата ӳпке шыҫҫипе чирлекенсем валли 1462 койка хатӗрленӗ, пушӑ койкӑсен шучӗ – 186.
Ырантанпа Шупашкарти иккӗмӗш хула пульницинче тепӗр 135 койка уҫӑлӗ. Чӑваш Ен Сывлӑх сыхлав министерствинче пӗлтернӗ тӑрӑх, кирлӗ пулсан 48 сехетре тата тепӗр 358 койка уҫма хатӗр.
Кӑшӑлвируспа чирлисем валли «Вӑрман юмахӗ» санаторире обсерватор ӗҫлет. Унта 140 вырӑн пур. Кирлӗ пулсан тепӗр 154 койка хатӗрлеме пултараҫҫӗ.
Шупашкар районӗнче икӗ пульницӑна тӗплӗн юсама палӑртнӑ. Ку хыпара республикӑн Сывлӑх сыхлав министерстви паян пӗлтернӗ.
Ӗнер Шупашкар районӗнче сывлӑх сыхлав министрӗ Владимир Степанов пулнӑ. «Перекетлӗ поликлиника» наци проектне пурнӑҫа кӗртнӗ май район пульницинчи стационарта тивӗҫлӗ ӗҫсем туса ирттермелле. Министр пульницӑн путвалӗнче юсав ӗҫӗсем епле пынипе те паллашнӑ.
Маларах асӑннӑ наци проекчӗпе килӗшӳллӗн Ишлейри 2-мӗш номерлӗ район пульницине тата Тутаркассинчи участокри пульницӑна та тӗплӗн юсаса ҫӗнетме палӑртнӑ.
Сирӗн Смешарикпа Айболита курас килет-и? Эппин, Ҫӗнӗ Шупашкара ҫитӗр. Унта ача-пӑча поликлиники умне ҫак сӑнарсене туса лартнӑ.
Мультфильмри сӑнарсене сквера хӑтлӑлатнӑ май вырнаҫтарнӑ. Ку ӗҫе «Благоустройство» тулли мар яваплӑ общество 3,3 миллион тенкӗпе пурнӑҫланӑ. Аукциона вӑл ҫеҫ хутшӑннӑ.
Скульптурӑсене бетонран тунӑ. Скверта «Смешарики» мультфильмри Нюша, Крош, Бараш, Ежик вырӑн тупнӑ. Ҫавӑн пекех Айболитпа упӑте, попугай вырӑн тупнӑ.
Пульница умне тротуар та хунӑ, машинӑсем валли парковка та пур.
ҪҪХПИн Шупашкарти экипажӗ Елчӗк районӗнче водителе тытса чарнӑ. Хӑйсемпе пӗрле алкотестер пулман. Вӑл урӑ е ӳсӗр пулнине палӑртма районти тӗп пульницӑна илсе кайнӑ.
Пульницӑра алкотестер пулнӑ-ха, арҫын сывланӑ, анчах экран ҫинчи кӑтартӑвне вӗсем пичетлеймен. Алкотестер юсавсӑр пулнӑ-мӗн.
Водителе урӑх алкотестерпа сывлаттарнӑ-и е ҫук-и – пӗлтермен. Анчах ҫакӑ паллӑ: прокуратура тӗп тухтӑр тӗлӗшпе представлени ҫырнӑ. Халӗ пульницӑн ҫӗнӗ алкотестер туянмалла пулӗ.
Шупашкарти Васкавлӑ медпулӑшу корпусне, «Ҫурҫӗр» клиника пулнӑскере, каллех кӑшӑлвируспа чирлисене йышӑнма пуҫлӗ.
Ҫӗртме уйӑхӗнче ҫак пульница ку енӗпе ӗҫленӗ ӗнтӗ. Кӑшӑлвируспа чирлекенсем сахалланма тытӑнсан вӑл хӑйӗн ӗҫӗ-хӗлӗ патнех таврӑннӑ. Халӗ ав пульницӑн каллех кӑшӑлвируспа чирлисене йышӑнма тивӗ. Унта халӗ сипленнӗ пациентсене албулатори сиплевӗ ҫине куҫарнӑ. Хӑшӗ-пӗрне, ЧР Сывлӑх сыхлавӗн министерстви пӗлтернӗ тӑрӑх, профильлӗ уйрӑмсене куҫарнӑ.
«Ҫурҫӗр» клиника пулнӑ пульница пациенчӗсене халӗ пурӑнакан вырӑнти терапевтран пулӑшу ыйтса сӗнеҫҫӗ.
Нумаях пулмасть Республикӑри вӑрҫӑ ветеранӗсен клиника госпиталӗнчен 66 ҫулти хӗрарӑм сывалса тухнӑ. Вӑл ура ҫине тӑрасса тухтӑрсем малтанласа, тен, шанман та пулӗ. Апла пулин те вӗсем хӑйсен тивӗҫне тӳрӗ кӑмӑлпа тата таса чунпа пурнӑҫланӑ.
Республикӑн аякри районӗсенчен пӗринче пурӑнакан хӗрарӑм кӑшӑлвируспа чирленӗ. Унран та ытларах — сахӑр диабечӗ те пулнӑ унӑн, мӑнтӑр пирки те нушаланнӑ, чӗрепе юн тымарӗсен чирӗсем асаплантарнӑ. Хӗрарӑмӑн пневмоние пула ӳпки 100 проценчӗпе шыҫнӑ. Йывӑр чирлӗскере анестезиологипе реанимаци уйрӑмне вырттарнӑ. Унта уйӑх ытла сипленӗ. Хӗрарӑм пурнӑҫне ҫӑлса хӑварнӑ-хӑварнах.
Тухтӑрсем вируспа инфекци чирӗсенчен асӑрханма чӗнсе калаҫҫӗ.
Авӑн уйӑхӗн 28-мӗшӗнче 18 сехетре Шупашкрата «Богданкӑра», «Кошкино» чарӑну ҫывӑхӗнче, 8 ҫулти арҫын ачана ВАЗ-2110 машина ҫапса кайнӑ.
Арҫын ача светофор хӗрлӗ ҫутнӑ вӑхӑтра ҫул урлӑ чупса каҫнӑ. Ун ҫине машина пырса кӗнӗ. Вырӑна васкавлӑ медпулӑшу килнӗ. Тухтӑрсем ачана малтан вырӑнтах пулӑшнӑ. Кайран тӑнне ҫухатнӑ арҫын ачана пульницӑна илсе кайнӑ.
Васкавлӑ медпулӑшу пресс-служби пӗлтернӗ тӑрӑх, арҫын ача чӗрӗ, анчах сывлӑхӗ унӑн питӗ йывӑр.
+22.3 °C