Питӗр хулинчи «Стройлайн» тулли мар яваплӑ общество Шупашкарти Чапаев ячӗллӗ производство пӗрлешӗвне панкрута кӑларма ыйтса Арбитраж судне тавӑҫпа тухнӑ. Ку хыпара арбитраж ӗҫӗсен картотекинче ҫырса хунӑ. Шупашкарти савутран пурӗ 8 миллион тенкӗ шыраса илесшӗн. Заявление пуш уйӑхӗн 22-мӗшӗнче панӑ. Ку хыпара МИХсем хыпарланӑ вӑхӑтра суд тавӑҫа производствӑна йышӑнман.
Ҫав вӑхӑтрах Чапаев ячӗллӗ савут директорӗ Михаил Резников журналистсене пӗлтернӗ тӑрӑх, Питӗрти предприяти умӗнче парӑм ҫук, ӑна тӳлесе татнӑ.
Шупашкар районӗнче пурӑнакан 22 ҫулти хӗрарӑма пӗчӗк ачине тивӗҫлӗ воспитани паманшӑн явап тыттарнӑ. Вӑл пепкине хӑварнӑ, хӑй юлташӗсемпе савӑнса ҫӳренӗ.
Ҫакӑ паллӑ: хӗрарӑм ҫур ҫулти ывӑлне Красноармейски районӗнче пурӑнакан пиччӗшӗ патӗнче хӑварнӑ, хӑй тухса кайнӑ та вӑхӑта тусӗсемпе ирттернӗ.
Ача вара 6 сехет ытла, хӗрарӑмӑн пиччӗшӗ киле киличчен, пӗччен тӑрса юлнӑ. Кун пирки ҫамрӑк хӗрарӑм питӗ лайах пӗлнӗ. Амӑшӗ ывӑлӗ патне темиҫе кунран ҫеҫ таврӑннӑ.
Судра вӑл айӑпне йышӑннӑ, ӳкӗннӗ. Суд ӑна 300 сехет ӗҫлеттерме йышӑннӑ.
Чӑваш Ен Арбитраж сучӗ «СУ-56» предприятин тавӑҫне пӑхса тухса пӗр пайне тивӗҫтерме йышӑннӑ. Асӑннӑ организаци «Сычуань-Чувашия агропромышленность суту-илӳ компанийӗ» тулли мар яваплӑ общество тӗлӗшпе тавӑҫ шӑрҫаланӑ.
Элӗк районӗнчи предприяти тавӑҫра 5,3 миллион тенкӗ шыраса илес кӑмӑллине палӑртнӑ. Суд 1 миллион та 566 пин тенке неустойка евӗр шыраса пама килӗшнӗ.
Асӑннӑ организаци Пӑрачкав районӗнчи йывӑҫ-тӗмлӗ ҫӗрсене тасатса пулӑшнӑ. Ҫак ӗҫе вӑл подрядчик евӗр пурнӑҫланӑ. Маларах вӑл «Сычуань-Чувашия» предприятирен 25 миллион тенкӗ шыраса илме пултарнӑ.
Хӗрлӗ Чтуай районӗнче пурӑнакан 50 ҫулти арҫынна кӗҫех суд тӑвӗҫ. ЧР прокуратури пӗлтернӗ тӑрӑх, вӑл ачана хур кӑтартнӑ.
Следстви версийӗ тӑрӑх, 2019 ҫулхи раштав варринчен пуҫласа пӗлтӗрхи юпан 26-мӗшӗччен вӑл пӗрле пурӑнакан хӗрарӑмӑн ачине хӗненӗ. Ача вӑл хур кӑтартма пуҫланӑ самантра 11 ҫулта пулнӑ.
Мӗн хистенӗ-ха ӑна ун ҫине алӑ ҫӗклеме? Ача уншӑн «йывӑр тиев» пулнӑ-мӗн. Ӑна пӑхма укҫа кирлӗ-ҫке.
Арҫын тӗлӗшпе пуҫарнӑ пуҫиле ӗҫе Хӗрлӗ Чутай районӗн 1-мӗш суд участокӗн миравай судйине пӑхса тухма ярса панӑ. Вӑл куншӑн тӗрмене 7 ҫуллӑха ларма пултарӗ.
Комсомольски районӗнче пурӑнакан арҫын тӑванӗсенчен, банкран кивҫен илсе тултарнӑ. Пӗтӗмпе 1 миллион ытла тенкӗ пухӑннӑ. Унӑн халӗ явап тытма тивӗ.
2018 ҫулта 66-ри арҫын тӑванӗсенчен 800 пин ытла тенкӗ кивҫен илнӗ. Тӗрлӗ сӑлтав шутласа тупнӑ вӑл, ҫав шутра – ӗне ферми уҫассине те. Кредит организацийӗнчен те ҫак сӑлтавпа 375 пин тенкӗ кивҫен илнӗ. Хӑйӗн татман кредитсем пуррине каламан, уйӑхсерен тӳлеме пултарассине ӗнентернӗ.
Анчах арҫын укҫана тавӑрса пама васкаман. Вӑл нимӗнле услам та уҫман, нухрата урӑх тӗллевпе пӗтернӗ.
Ун тӗлӗшпе пуҫарнӑ пуҫиле ӗҫе кӗҫех Елчӗк районӗн сучӗ пӑхса тухӗ.
Шупашкарта пурӑнакан 8 ҫулти ачана ашшӗсӗр юлнӑшӑн пенси пама пӑрахнӑ. Прокуратура пулӑшнипе ҫеҫ парӑма тавӑрма май килнӗ. Тӳлеве вара малалла тӑсаҫҫӗ.
Ҫакӑ паллӑ: 2018 ҫулта суд ачан ашшӗ ҫухалнине палӑртнӑ. Ҫавна май ӑна пенси тӳлемелле тунӑ. Анчах 2019 ҫулхи авӑн уйӑхӗнче Пенси фончӗ пенсие куҫарса пама пӑрахнӑ. Ведомствӑна ачан ашшӗ ӗҫлени пирки хыпар ҫитнӗ-мӗн. Пенси фончӗ тӳлеве пӑрахӑҫлама ыйтса суда тавӑҫ тӑратнӑ. Анчах суд ӑна тивӗҫтермен.
Анчах кун хыҫҫӑн та пенси куҫарман. Кун хыҫҫӑн прокуратура Пенси фондне суда панӑ. Суд ӑна тивӗҫтернӗ. Халӗ ачашӑн пенчи куҫать, унчченхи парӑма та – 116 пин тенке – куҫарса панӑ.
ЧР Аслӑ сучӗ «Суор» строительство компанийӗн экс-директорӗ тӗлӗшпе пуҫарнӑ пуҫиле ӗҫе пӑхса тухнӑ. Кун пирки «Коммерсантъ» пӗлтерет.
Пуҫиле ӗҫе Ермолаев тӗлӗшпе пуҫарнӑ. Вӑл пенисене тата штрафсене шута илсе пӗтӗмпе 108 миллион ытла тенкӗ парӑма татнӑ. Аслӑ суд ҫакна шута илнӗ, приговора ҫемҫетмелли сӑлтав вырӑнне йышӑннӑ.
Ермолаев Аслӑ судран айӑплава тӗрмене лартмасӑр пурнӑҫлама ирӗк ыйтнӑ. Анчах суд хирӗҫленӗ. Экс-директора колонире 2,5 ҫул лармалла тунӑ. Срокран ҫур ҫул катнӑ.
Аса илтерер: Ермолаева пӗлтӗр налук тӳлеменшӗн пӗтӗмӗшле режимлӑ колоние ӑсатнӑ.
Куславкка районӗнчи прокуратура ашшӗ-амӑшне хӳтӗлесе район администрацине ҫырупа тухнӑ тата суда тавӑҫ хатӗрленӗ.Надзор органӗ ачисене апатлантарма тӑкаканнӑшӑн 100 ытла ҫынна бюджетран саплаштарма ыйтать.
Прокуратура тӗрӗслевӗ вӑхӑтӗнче шкулсенчи нормативлӑ актсенче чылай кӑлтӑк тупса палӑртнӑ. Тӗрӗсрех каласан, хутсене йӗркеллӗ хатӗрлеменни палӑрнӑ. Ҫӑмӑллӑхлӑ майпа ачасен хӑш категорине тивӗҫтерессине уҫӑмлатман. Апатшӑн Куславкка район администрацийӗн вӗренӳ управленийӗнчен компенсаци куҫарса парас йӗркене кирлӗ пек йӗркелемен.
Сахал тупӑшлӑ, нумай ачаллӑ ҫемьесенчи, сусӑр ачасене ӳстерекенсене компенсаци пама пӑхса хӑварнӑ-ха, анчах ҫав енӗпе парӑм 100 ытла ҫемье умӗнче 200 пин тенкӗрен иртнӗ. Парӑма прокуратура суд урлӑ шыраса илесшӗн.
Шупашкарта пӗр арҫын 9 ҫулти хӗрача ҫумне ҫулӑхнине Чӑваш халӑх сайчӗ пӗлтернӗччӗ. Аса илтерер: пӑтӑрмах пӗлтӗрхи юпа уйӑхӗн 2-мӗшӗнче пулса иртнӗ. Палламан этем 9-мӗш пилӗк ҫуллӑх урамӗнчи ҫуртри лифтра хӗрача ҫумне ҫулӑхнӑ.
Пӑтӑрмах хыҫҫӑн 12 сехетрен арҫынна хӑйӗн килӗ умӗнче тытса чарнӑ. Вӑл 46 ҫулта. Судпа унччен темиҫе хут та айӑпланнӑ. Юлашки хутчен ирӗке вӑл 2019 ҫулхи юпа уйӑхӗнче тухнӑ.
Халӗ ун тӗлӗшпе черетлӗ хутчен суд пулнӑ. Арҫынна ҫирӗп режимлӑ колоние 13 ҫуллӑха ӑсатма йышӑннӑ, ун хыҫҫӑн та вӑл тепӗр ҫулталӑк хушши ирӗклӗн унта-кунта ҫӳреймӗ, мӗншӗн тесен суд ун ирӗкне чакарма йышӑннӑ.
Шупашкар хулинчи Кадыков урамӗнчи лавккасенчен пӗринче пӗр арҫын хӗрарӑмӑн телефонне вӑрланӑ. Хӗрарӑм лавккара ача пӳмипе пулнӑ. Ҫыхӑну хатӗрне вӑл унта хунӑ. Ача амӑшӗ тавар суйланӑ самантпа усӑ курса арҫын телефона вӑрласа тарнӑ.
Пӑтӑрмах пӗлтӗрхи чӳк уйӑхӗн 15-мӗшӗнчех пулса иртнӗ. Вӑрланӑ самант видеона лекнӗ.
Пакунлисем вӑрра чылай вӑхӑт шыранӑ. Ҫав ҫын 44 ҫулти арҫын пулнӑ. Вӑл унччен темиҫе хут та тӗрмере ларнӑ икккен. Кирпӗч шутласа тухнӑранпа вӑхӑт нумаях та иртмен — каллех усал ӗҫ тунӑ.
7 пине яхӑн тӑракан смартфона арҫын полицейскисене тавӑрса панӑ. Пуҫиле ӗҫе суда ярса панӑ.
+27.3 °C