Шупашкарта ҫӗнӗ больница тӑвасшӑн. Ҫак темӑна республика Элтепере Олег Николаев Мускавра пулнӑ чухне Раҫҫейӗн строительство министрӗпе Ирек Файзуллинпа тӗл пулсан хускатнӑ.
Шупашкарта Республикӑн клиника больницин ҫӗнӗ комплексне тӑвасшӑн. Проектпа пӑхҫа хӑварна тӑрӑх, больницӑн корпусне, Президент перинаталь центрне, Васкавлӑ пулӑшу больницине тата Республикӑн судпа медицина бюровӗн экспертизин тата Инкексен тата васкавлӑ медицина пулӑшӑвӗн медицинин республикӑри центрӗн окрпусӗсене тӑвасшӑн. Комплексӑн пӗтӗмӗшле хӑвачӗ 1424 койкӑпа танлашӗ.
«Патшалӑх тата муниципалитет пулӑшӑвне кӳрекен нумай ӗҫ тӑвакан центр» автономи учрежденине Марина Романова ертсе пыма тытӑннӑ. Кун ҫинчен калакан йышӑнӑва ӗнер, пуш уйӑхӗн 10-мӗшӗнче, республикӑн Министрсен Кабинечӗн Председателӗн тивӗҫне вӑхӑтлӑх пурнӑҫлакан Сергей Артамонов алӑ пуснӑ.
Асӑннӑ учреждени республикӑн Экономика аталанӑвӗн тата пурлӑх хутшӑнӑвӗсен министерствине пӑхӑнать.
Пирӗн республикӑри патшалӑх служащийӗсем валли ҫӗнӗ вӗренӳ порталӗ ӗҫлеме тытӑннӑ. Унта тӳре-шара хӑйӗн професси шайне ӳстерме пултарӗ.
Чӑваш Ен Элтеперӗ Олег Николаев Правительство ҫуртӗнчи тунтикунхи канашлура палӑртса хӑварнӑ тӑрӑх, ӗҫ вырӑнӗсене хамӑр ҫӗршыври программӑсем ҫине куҫараҫҫӗ. Ку вӑл патшалӑх тата муниципалитет шайӗнче ӗҫлекен 4700 ытла ҫынна пырса тивӗ.
Кӑрлач уйӑхӗ тӗлне республикӑри 1271 ӗҫ вырӑнӗнчен 641-шне «Windows» операци тытӑмӗнчен хамӑр ҫӗршыври программистсем шухӑшласа кӑларнӑ «Astra Linux» программа ҫине куҫарнӑ.
Ҫӗнӗ вӗренӳ порталӗ «Astra Linux» тата «P7-Офис» программӑсемпе ӗҫлеме вӗрентет.
Кӑҫалхи нарӑс уйӑхӗн 21-мӗшӗнченпе Шупашкарпа Ҫӗнӗ Шупашкар хулисене 61-мӗш номерлӗ маршрутпа ҫыхӑнтарчӗҫ. Республикӑн Транспорт министерствинче пӗлтернӗ тӑрӑх, унтанпа вӑл 71 пин пассажира турттарма ӗлкернӗ.
Асӑннӑ ведомствӑн ертӳҫи Максим Петров ҫӗнӗ маршрут епле ӗҫленине тӗрӗслеме хӑй ҫула тухнӑ.
Максим Петров журналистсемпе калаҫнӑ чухне республика Элтеперне ырласа хӑварнӑ: 2020 ҫултанпа 221 ҫӗне троллейбус, 47 автобус туяннине пӗлтернӗ. Министерство ертӳҫи пӗтӗмлетнӗ тӑрӑх, ку маршрут питех те кирлӗ.
ЧР Элтеперӗн пресс-секретарьне Борис Краснова должноҫрен кӑларни пирки унччен пӗлтернӗччӗ. Вӑл халӗ мӗн ӗҫлесе пурӑнать? Кун пирки халӑх тӗтелӗнче пӗлтернӗ вӑл.
Борис Краснов И.Я. Яковлев ячӗллӗ Чӑваш патшалӑх педагогика университетӗнче студентсене антикризис пиарӗ енӗпе вӗрентет. Вӑл хӑй те унта ют чӗлхесен факультетӗнче ӑс пухнӑ. Халӗ филологи, истори, управлени тата право факультетӗнче студентсене вӗрентет.
Сӑмах май, Борис Краснов Элтепер пресс-секретарӗнче 2021 ҫулхи ҫу уйӑхӗнченпе кӑҫалхи кӑрлаччен ӗҫленӗ.
Дмитрий Моисеева Чӑваш Енӗн патшалӑхӑн ветеринари службин ертӳҫин ҫумӗнчен хӑтарнӑ.
Дмитрий Иванович аслӑ пӗлӗве Чӑваш патшалӑх ял хуҫалӑх академийӗнче (халӗ аграри университечӗ ушутланать) илнӗ. Унта вӑл бухгалтер учечӗ, анализ тата аудит енӗпе специалиста вӗренсе тухнӑ.
Чӑваш Енӗн ял хуҫалӑх министрне Сергей Артамонова Чӑваш Енӗн Министрсен Кабинечӗн Председателӗн тивӗҫне пурнӑҫлама шаннӑ.
Кун пек йышӑнӑва Чӑваш Енӗн Конституцийӗн 72-мӗш статйипе килӗшӳллӗн алӑ пуснӑ. Сергей Геннадьевич унччен Председателӗн ҫумӗ пулнӑ.
Хушӑва Олег Николаев Элтепер нарӑс уйӑхӗн 28-мӗшӗнче алӑ пуснӑ.
ЧР Элтеперӗн ҫамрӑксен политики енӗпе ӗҫлекен управленине халӗ урӑх ҫын ертсе пырать. Вӑл – Кирилл Лукин.
Унччен ку вырӑнта Иван Филиппов пулнӑ. Вӑл ятарлӑ ҫар операцине тухса кайнӑ, «Каскад» ГРОМ» пилотсӑр авиаци бригадинче ҫар тивӗҫне пурнӑҫлать. Кирилл унӑн ҫумӗ пулнӑ. Вӑл ку дожноҫе пӗлтӗр ҫу уйӑхӗнче ӗҫлеме килнӗ.
Кирилл Лукин «Сывӑ наци» общество организацийӗн председателӗ те пулнӑ.
Чӑваш Енри икӗ ҫынна Чӑваш Республикин Хисеп грамотипе чыслама йышӑннӑ.
Вӗсенчен пӗри — Сергей Муравьев. Сергей Иванович Шупашкарти «Стандарт» тулли мар обществӑра техника директорӗ (тӗп инженерӗ) пулса ӗҫлет. Тепри вара — Юлия Стройкова. Юлия Викторовна – Чӑваш Енен Элтеперӗн Администрацийӗнче пресс-службӑпа протокол управленийӗн пуҫлӑхӗ.
Юлия Стройкова хӑй вӑхӑтӗнче республикӑн цифра аталанӑвӗн министрӗн ҫумӗ пулса тӑрӑшнӑччӗ, унтан маларах вара — Чӑваш Енӗн Наци телекуравӗнче директор ҫумӗнче.
ЧР строительство министрӗ пулнӑ Михаил Коледа ЧР Элтеперне Олег Николаева суда панӑ. Тавӑҫа Шупашкарти Ленин районӗн судне нарӑсӑн 5-мӗшӗнче тӑратнӑ.
Михаил Коледа ӗҫрен кӑларса янипе мар, «шанчӑкран тухнӑ» тенипе суда панӑ. Аса илтерер: кӑрлачӑн 16-мӗшӗнче Олег Николаев Михаил Коледана шанӑҫран тухнӑ тесе ӗҫрен кӑларнӑ.
Суд ларӑвӗ ака уйӑхӗн 2-мӗшӗнче пулӗ.
+15.3 °C