Патшалӑх Думин депутачӗ Анатолий Аксаков Хула кунне Раҫҫейри паллӑ юрӑҫа Шамана илсе килесси пирки пӗлтернӗччӗ. Патшалӑх Канашӗн депутачӗ Константин Степанов вара ҫӗршывшӑн ҫӑмӑлах мар тапхӑрта укҫана перекетлеме сӗннӗ - Аксаков юрӑҫа хыснари мар укҫапа илсе килме шантарсан та.
Степанов депутат Хула кунне вырӑнти тата кӳршӗ регионсенчи юрӑҫсене чӗнме сӗннӗ. Ҫавна май вӑл Шупашкар хулин пуҫлӑхӗн тивӗҫӗсене пурнӑҫлакан Владимир Доброхотов патне ҫырупа тухнӑ, уяври тӑкаксене тепӗр хут пӑхса тухма ыйтнӑ.
Сӑмах май, Шаман юрӑҫа чӗнме вӑтамран 12 миллион тенкӗ тӑрать.
Кӑҫал пӗтӗм чӑвашсен Акатуйне ҫӗртме уйӑхӗн 15-мӗшӗнче ирттерме палӑртнӑ. Ӑна Мускаври «Раҫҫей» куравра йӗркелӗҫ.
Телеграмри «Чӑваш Ен калаҫать» каналта пӗлтернӗ тӑрӑх, программа ҫапларах:
— Акатуйра тӑван халӑхӑмӑра Чӑваш патшалӑх юрӑпа ташӑ ансамблӗ, «Ҫавал» ансамбль, фольклор ушкӑнӗсем савӑнтарӗҫ.
— «Чӑваш туйӗ», «Симӗс ылтӑн», «Ака-суха ӗҫӗн уявӗ» чӑваш йӑли-йӗркисемпе паллашма пулӗ.
— Республикӑшӑн, тӑван халӑхшӑн тӑрӑшакансене тав хучӗсемпе чыслӗҫ.
— Спорт ӑмӑртӑвӗсенче регион чысне хӳтӗлесе малти вырӑнсем илекенсене наградӑсемпе хавхалантарӗҫ.
- «Ҫӑпата ҫыхасси», «Чӑваш тӗррине тӗрлесси» ӑсталӑх лаҫҫисем ӗҫлеҫҫӗ.
- Пултарулӑх ҫӑлкуҫне тарӑнлатакансем вара тӑван чӗлхепе сӑвӑсем вулама пултараҫҫӗ.
- Тӗп хуламӑрӑн юбилейӗн презентацийӗпе паллаштараҫҫӗ.
- Хӑнасене чӑваш эстрада ҫӑлтӑрӗсем, пултарулӑх ушкӑнӗсем савӑнтараҫҫӗ.
- Лапамсенче йӗркелӳҫӗсем парнесем выляттарӗҫ.
- Акатуйра наци кӗрешӗвӗсем иртӗҫ.
- Чӑн чӑваш апат-ҫимӗҫне тутанса пӑхма май пулӗ.
Акатуйра тӗл пуличчен!
Ҫӗнтерӳ кунӗ тӗлне Шупашкарта чӑвашла баннерсем вырнаҫтарма палӑртнӑ. Акӑ вӗсенчен пӗри. Унта Тӑван ҫӗршывӑн аслӑ вӑрҫин ветеранӗ Анна Иванова сӑнарланнӑ.
101 ҫулти кинемей Зинаида Воронова модельер ӑсталанӑ чӑваш наци кӗпипе. Кун пирки Елизавета Долгова «Контактра» халӑх тетелӗнчи хӑйӗн страницинче пӗлтернӗ.
Ун пек баннерсене республикӑри «Хастар» ушкӑн пуҫарӑвӗпе хатӗрлеҫҫӗ. Вӗсене Ҫӗнтерӳ кунӗ тӗлне Шупашкарта вырнаҫтарӗҫ.
Ака уйӑхӗ кану кунӗсемпе вӗҫленӗ. Акан 28-мӗшӗнче канмалли кунсем пуҫланӗҫ. 28-мӗшӗнче кӗске ӗҫ кунӗ пулмӗ, мӗншӗн тесен вӑл уяв умӗнхи мар. Анчах унччен шӑматкун, акан 27-мӗшӗнче, ӗҫлеме тивӗ.
Акан 28-мӗшӗнчен пуҫласа ҫу уйӑхӗн 1-мӗшӗччен, юнкунччен, канӑпӑр. Ҫу уйӑхӗн 2-3-мӗшӗсенче ӗҫлемелле. Унтан каллех - кану кунӗсем.
Ҫу уйӑхӗн 6-8-мӗшӗсенче ӗҫлемелле те тепӗр 4 кун ӗҫе тухмалла мар: ҫу уйӑхӗн 9-12-мӗшӗсенче канӑпӑр.
Чӑваш Енре наци кӗрешӳ енӗпе пӗрремӗш хут ӑмӑрту иртӗ. Ӑна Республика кунне халалласа йӗркелӗҫ.
Тупӑшӑва Комосомольскинче ирттерме палӑртнӑ. Унччен кӗрешӳ ӑмӑртӑвӗсен ятарлӑ статус пулман. Ӑна ытларах чухне Акатуйра ирттернӗ.
Кӗрешӗве республикӑри спортсменсем хутшӑнӗҫ. Ҫавӑн пекех регионсенчи диаспорӑсенчи кӗрешӳҫӗсем килмелле.
Ӑмӑрту ҫӗртме уйӑхӗнче иртӗ.
Паян — социаллӑ ӗҫӗн пӗтӗм тӗнчери кунӗ. Соцаллӑ ӗҫчен пулса пур ҫын та ӗҫлеймест. Хӑшӗсем яваплӑх пирки тӗплӗнрех ыйтса пӗлсенех хӑраса ӳкеҫҫӗ, теприсен чӑтӑмлӑхӗ темиҫе уйӑхран пӗтет. Анчах Шупашкарта пурӑнакан 49 ҫулти Галина Кузьмина пеккисем те пур.
И.Н. Ульянов ячӗллӗ Чӑваш патшалӑх университетӗнче вӗреннӗскер чылай ҫул ача пахчинче тӑрӑшнӑ. «Ӗҫӗм питӗ килӗшетчӗ. Анчах атте чирлесе ӳкнӗ хыҫҫӑн ватӑсене пулӑшмаллине ӑнланса илтӗм», — аса илет Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта тӑрӑшакан Галина Владимировна.
Ҫак ҫула суйласа илнӗшӗн Галина Кузьмина пӗртте ӳкӗнмен. «Ӑна ватӑсем питӗ юратаҫҫӗ. Кашни пымассерен ӑшшӑн кӗтсе илеҫҫӗ. Тем туса та пулӑшать вӑл», — каласа кӑтартаҫҫӗ маларах асӑннӑ социаллӑ центрта.
Этем ӗҫпе кӑна пурӑнаймасть. Галина Владимировнӑн чун киленӗҫӗ — пулла ҫӳресси. Унта вӑл упӑшкипе Борис Валерьевичпа ҫул тытать. Каҫ выртамалла та каяҫҫӗ.
Паян уяв умӗн ҪҪХПИ ӗҫченӗсем чи лайӑх троллейбус водительне Тав ҫырӑвӗ тата чечек ҫыххи парнеленӗ. Кӑҫалхи икӗ уйӑха пӗтӗмлетнӗ тӑрӑх вара ку ята Надежда Князева тивӗҫнӗ.
Надежда троллейбус управленине 5 ҫул каялла ӗҫе вырнаҫнӑ. Унтанпа вӑл 1-мӗш маршрутпа ҫӳрекен троллейбус водителӗнче ӗҫлет. Надежда Князева Тав ҫырӑвне ҫул-йӗр правилисене пӑсмасӑр ҫӳренӗшӗн тивӗҫнӗ.
Чӑваш Енӗн Наци вулавӑшӗн «Мерчен» музыка хӑна пӳлӗмӗнче «Весенняя капель» (чӑв. Ҫурхи тумлам). музыкӑпа поэзи каҫӗ иртӗ.
Ҫуркуннехи пӗрремӗ уявпа Чӑваш патшалӑх симфони капелли саламлӗ. Хормейстерӗ — Чӑваш Республикин культурӑн тава тивӗҫлӗ ӗҫченӗ Татьяна Давыдова.
Уява Илья Резник поэтӑн «Гимн семье» хайлавӗпе уҫӗҫ. Уявра тӑван ҫӗршыв эстрадин ылтӑн хичӗсем тата классика музыки янӑрӗ, кинофильмсенчи юрӑсемпе авторсен композицийӗсем пулӗҫ.
Музыкӑпа поэзи каҫӗ ыран, пуш уйӑхӗн 6-мӗшӗнче, 18 сехетре, пуҫланӗ.
Чӑваш академи драма театрӗнче Йӗпреҫ ентешлӗхӗ хӑйӗн черетлӗ уявне ирттерчӗ. Ӑна ҫемье ҫулталӑкне халалланӑ.
Пухӑннисене ентешлӗх ертӳҫи, Чӑваш Республикин тава тивӗҫлӗ артистки А. Краснова, Йӗпреҫ муниципаллӑ округӗн администраци ертӳҫи И. Семенов, Чӑваш патшалӑх Канашӗн ялхуҫалӑх ыйтӑвӗсемпе ӗҫлекен комитет ертӳҫин ҫумӗ Р. Алексеев, Республикӑри театр ӗҫченӗсен пӗрлӗхӗн председателӗ С. Павлов, ветерансене пӗрлештерсе тӑракан обществӑлла организацисен тата тӗрлӗ ентешлӗхсен представителӗсем ӑшшӑн саламларӗҫ, ентешлӗх ӗҫне хастар хутшӑнакансене, салтак амӑшӗсемпе мӑшӑрӗсене тата ӗҫре палӑрнисене Хисеп хучӗсем тата парнесем парса чысларӗҫ.
Уявра Йӗпреҫ поселокӗнчен, Хурамал, Туҫа, Кӗлемкасси, Ирҫе Ҫармӑс тата ытти ялсенчен килнӗ пултарулӑх ушкӑнӗсем, Йӗпреҫри ачасен музыка шкулне ҫӳрекенсем чӑваш, вырӑс, ирҫе юрри-ташшипе куракансене савӑнтарчӗҫ.
Шел пулин те, пухӑннисене калаҫтарнӑ пӗр ҫитменлӗх пирки те каласа хӑвармалла. Халиччен республикӑри ентешлӗх уявӗсем тӑван чӗлхепе иртекенччӗ. Хальхинче Йӗпреҫсем ҫак хӑнӑхнӑ йӑлана уясшӑн пулмарӗҫ.
Кӑҫал Чӑваш Енӗн тӗп хули 555 ҫулхи юбилея кӗтсе илме хатӗрленет. Ҫав ятпа Шупашкарта «Русские авиационные гонки» (чӑв. Вырӑс авиаци ӑмӑртӑвӗ) мероприяти пуҫласа иртӗ.
Ҫурла уйӑхӗн 15-мӗшӗнчен пуҫласа 18-мӗшӗччен ҫӗршыври чи маттур пилотсен хӑйсен пултарулӑхне пирӗн патӑмӑрта кӑтартӗҫ.
Ӑмӑртӑвӑн ҫулӗ шыв ҫийӗн пулӗ, шывран 20-25 метр ҫӳллӗшӗнче. Пилонсене Атӑл юханшывӗн хӗрринче, Мускав ҫыранӗ ҫумӗнче ирттерӗҫ.
+8.3 °C