Электронлă вулавăш

1

Ларать хура çул хĕрринче лаштра юман — ват паттăр,

эп унăн тĕлĕнчен иртсе çӳреттĕм ачаран.

Вăл маншăн пĕлĕш çын пекех пит çывăх çавăнпа та:

утать пек шăппăн асатте уй-хир курса çарран.

 

Тен, çул çинче ĕшеннипе канма та шухăш пур ун?

Ăçта ларам-ши тенĕнех пăхать пек таврана.

Тен, çил шăхлич сассипеле хирте пуçланă юррăн

асамлăхĕ, утма чарсах, халь тыткăнлать ăна.

 

Ман çамрăклăх ĕмĕчĕсен пĕрремĕш çавраçилĕ

çул тытрĕ çак тĕлтен тахçан — юман çаплах ларать.

Иртет хуллен ун умĕнчен ачалăх, яшлăх, ватлăх.

 

Ана лăсканă тăвăлсем — паян çунатсăр, вилĕ!

Çук, йывăç мар пуль, ешерсе, хăй çулçине сарать —

çĕршывăмран тапса тăран юратупа тăванлăх!

 

2

Юман! Эс демон пек хальхаççăн чĕмсĕрленнĕ,

хуралнă кӳлепӳ аçа çапнипеле.

Сив шухăша путса, пăхан инçетелле:

эс çĕр пилне манса, ху шăпуна çилленнĕ.

 

Ма кӳренен ăна? Ырра та усала

эс курнă сахал мар — çапла тĕнче саккунĕ.

Ашăтаймасть пулас сана янра çу кунĕ:

тен, кайнă çавăнпа тарăхăву шала.

 

Кун евчине — çиле, çук, йышăнмарăн эс:

епле сан кăмăлна юрасшăн ачашланчĕ!

Çырлахтармасть сана юравлă çил чĕлхи.

 

Тип туратту çинче пĕртен-пĕр çулçă çеç

сан шавлă вăхăтна асилнĕн çапкаланчĕ,

эс ху та, хăрăкскер, çав иртнĕ кун мĕлки.

 

3

Хĕл çитрĕ çăварне карса каллех,

ват юмана касса çын шаршанларĕ:

«Хирте пĕччен ан лартăр ахалех,

хăй ăшшипе мана вăл усă парĕ».

 

Кăмакара кĕрлет хĕрӳллĕ вут,

Чалт! сирпĕнет хĕлхемĕ — хĕрлĕ çăлтăр.

Ашра ялан юман вутта çеç хут,

ан лартăр пăрланса вăл — юр ан шăлтăр.

 

Кил, кăмака хĕвелĕпе туслаш!

Ума татти-сыпписĕр ĕмĕр тăнăн —

Экран çинчи пек курăнать, куçать.

 

Лаштра юман çынпа каллех юлташ:

пĕренесем çине ӳкет те сăнĕ,

ем-ешĕл хум пырса çапать куçа.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн