Ҫӗмӗрле муниципаллӑ округӗнчи Егоркино ялӗнче ҫуралса ӳснӗ Илья Сафонов Пӗтӗм Раҫҫей шайӗнче иртнӗ «Сырӑш» конкурсра ҫӗнтернӗ. Экологи конкурсне йывӑҫпа ӗҫлекен 1500 ытла ӑста хутшӑннӑ. Ӑна «Экологи» наци проекчӗн «Таса ҫӗршыв» федераци проекчӗпе килӗшӳллӗн ирттернӗ.
Финала 10-шӗ кӑна тухнӑ. Вӗсен йышӗнче - Илья Сафонов та. Вӑл - ЧР Культура министерствин специалисчӗ.
Илья юманран пӗр пӑтапа та усӑ курмасӑр сырӑш ӑсталанӑ. Ун ҫине вӑл «Пашалӑх сыхлать» тесе ҫырнӑ.
Раҫҫейре «Мама и дети в национальных костюмах» (чӑв. Амӑшӗ тата ачисем наци тумӗпе) 5-мӗш юбилейлӑ пӗтӗм тӗнчери фотоконкурс иртӗ. Ӑна Федерацин национальноҫсен ӗҫӗпе тӑрӑшакан агентстви йӗркелет.
Заявкӑсене кӑрлач уйӑхӗн 5-мӗшӗнчех йышӑнма тытӑннӑ. Ӑна тӗрлӗ халӑхӑн хӑйне евӗрлӗхне упраса хӑварас тӗллевпе ирттереҫҫӗ. Кӑҫал пирӗн ҫӗршывра Ҫемье ҫулталӑкӗ тесе йышӑннӑран конкурс вӑхӑтӗнче йӑлана кӗнӗ ҫемье пахалӑхне те кӑтартӗҫ.
Фотоконкурса амӑшӗсемпе ачисем те, ашшӗсемпе аслашшӗ-кукашшӗсем те хутшӑнма пултарӗҫ. Кӑҫал «Тӑван чӗлхепе сӑпка юрри» ҫӗнӗ номинаци те пӑхса хӑварнӑ. Юрӑсене ethno-photo-vocals@yandex.ru электрон почтӑпа йышӑнӗҫ.
Шупашкарта чи лайӑх класс ертӳҫине суйланӑ. Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, ӑмӑртӑва 20 педагог хутшӑннӑ.
«Вӗсем ачасемпе класс сехечӗ ирттернӗ. Унсӑр пуҫне ашшӗ-амӑшӗпе ачасен хутшӑнӑвӗсенче класс ертӳҫи епле вырӑн йышӑннине палӑртакан лекци йӗркеленӗ», — хыпарланӑ маларах эпир асӑннӑ ҫӑлкуҫра.
Пӗрремӗш вырӑна Шупашкарти 59-мӗш шкулта тӑрӑшакан Андрей Гарифуллин тухнӑ, иккӗмӗшӗнче — 45-мӗш шкулти Любовь Салмина, виҫҫӗмӗшӗнче — 43-мӗш шкулти Алёна Львова. Хулари 27-мӗш шкулта тӑрӑшакан Светлана Михайловӑна тата 2-мӗш гимназири Ольга Ярукинӑна лауреат ят панӑ.
Паллӑ чӑваш поэчӗ Ҫеҫпӗл Мишши ҫуралнӑранпа 125 ҫул ҫитнине халалласа «Поэзи ҫеҫпӗлӗ» конкурс иртӗ. Унта чӑвашла сӑвӑсене илемлӗ вулакансем хутшӑнӗҫ.
Пултарулӑх ӑмӑртӑвне Чӑваш наци музейӗпе Чӑваш наци конгресӗ ирттерӗҫ.
Регионсем хушшинчи конкурса икӗ номинаципе йӗркелӗҫ: «Ҫеҫпӗл Мишшин чӑвашла хайлавӗсем» тата «Ҫеҫпӗл Мишшине халалласа ҫырнӑ сӑвӑсем».
Ача-пӑча валли тӗрлӗ халӑх чӗлхипе юрӑ ҫыракансен конкурсӗ иртет.
«Новые детские песни» (чӑв. Ача-пӑча валли ҫырнӑ ҫӗнӗ юрӑсем) проекта ача-пӑча музыка контентне йӗркелес тӗллевпе пуҫарса янӑ. Унта тутар, вырӑс, чӑваш, ҫармӑс, удмурт, мӑкшӑсемпе ҫармӑссен чӗлхисемпе ҫырнӑ юрӑсене йышӑнаҫҫӗ.
Чи лайӑх ӗҫен гала-концерчӗ Хусанта иртӗ.
Суйлмалли тура заявкӑсене пуш уйӑхӗн 31-мӗшӗччен talant16ru@mail.ru электрон почтӑпа йышӑнаҫҫӗ.
Чӑваш Енре Пичет кунӗ умӗн журналистсен премине тивӗҫ калем ӑстисене палӑртнӑ.
Ҫемен Элкер ячӗллӗ журналистсен премине «Чӑваш Ен» НТРКра тӑрӑшакан Родион Архипова пама йышӑннӑ. Радиожурналист «Присягая Родине» ҫарпа патриотизм кӑларӑмӗсен ярӑмне йӗркелесе пыать.
Леонид Ильин ячӗллӗ журналистсен премине «Хыпар» издательство ҫурчӗн «Ҫамрӑксен хаҫатӗнче» тӑрӑшакан Ирина Ивановӑна экологипе тата ял хуҫалӑхӗпе ҫыхӑннӑ ҫивӗч ыйтусене хускатнӑшӑн парас тенӗ.
Чӑваш кӗнеке издательстви «Чӑваш романӗ» литература конкурсне ирттерессине эпир унччен пӗлтернӗччӗ-ха.
Аса илтерер: ӗҫсене ярса пама кая юлман-ха. Вӗсене 2024 ҫулхи юпа уйӑхӗн 1-мӗшӗччен fed_ol@mail.ru электрон адреспа йышӑнаҫҫӗ. Е Шупашкарти Чӑваш кӗнеке издательствине илсе ҫитерсе памалла.
Конкурса тӑратнӑ ӗҫсем чӑвашла пулмалла. Конкурса халиччен пичетленмен хайлавсемпе хутшӑнмалла. Вӗсен тематики ирӗклӗ. Калӑпӑшӗ А4 форматпа 700 страницӑран ытла мар пулмлала мар.
Ҫитес ҫул республикӑра - Экологи тата ҫутҫанталӑкпа перекетлӗ усӑ курмалли ҫулталӑк. Унӑн логотипӗ мӗнле пуласси паллӑ.
Варринче - ватӑ чӑваш юманӗ. Сӑмах май, кӑҫал Муркаш тӑрӑхӗнчи Ильинкӑри чи ватӑ юман Раҫҫейри «Ҫулталӑк йывӑҫӗ» конкурсра ҫӗнтернӗ. Логотип тавра ҫулталӑк ятне вырӑсла ҫырнӑ.
«Пирӗн йӑх-несӗл чӑваш орнаментӗнче сывлӑша, шыва, ҫӗре, ҫулӑма кӑтартма тӑрӑшнӑ. Чӑваш Енри ӳнерҫӗсен пӗрлӗхӗ те Мария Фомирякова ертсе пынипе логотипра ҫаксене кӑтартма тӑрӑшнӑ», - тенӗ Олег Николаев Элтепер.
Чӑваш Ен туризма аталантарма субсиди илесшӗн. Раҫҫейӗн Экономика аталанӑвӗн министерстви ирттерекен конкурса пирӗн регион пӗрлехи субсиди илме ҫак енсемпе заявка панӑ:
пляжсене аталантарасси тата хӑтлӑлатасси,
туризм инфраструктурине (прокат пункчӗсем, апатлану точкисем, турист оборудованийӗ тата ытти те);
кемпинг йӗркелесси;
пулӑмсемпе ҫыхӑннӑ мероприятисем ирттересси;
хула центрӗн турист кочӗ валли.
Паян, раштавӑн 15-мӗшӗнче республика шайӗнче иртнӗ «Ҫулталӑк ҫемйи» конкурса пӗтӗмлетнӗ. Чи лайӑх ҫемьесене ЧР Элтеперӗ Олег Николаев чысланӑ.
Кӑҫал «Ҫулталӑк ҫемйи» конкурсра Ҫӗмӗрлере пурӑнакан Зайцевсем тивӗҫнӗ. Вӗсен 4 ача ҫитӗнет. Алексей Михайловичпа Татьяна Сергеевна 20 ҫул пӗрле пурӑнаҫҫӗ. Ачисем маттур: шахматпа кӑсӑкланаҫҫӗ, ӑс-тӑн олимпиадисене хутшӑнаҫҫӗ, спорта юратаҫҫӗ, кӗнеке вулаҫҫӗ…
Зайцевсем ҫитес ҫул Чӑваш Ен чысне Раҫҫей шайӗнчи «Ҫулатлак ҫемйи» конкурсра хӳтӗлӗҫ.
+0.3 °C