Чӑваш Енре кӗмӗл волонтёрсен конкурсӗ иртет. Ӑна республикӑн Ӗҫ тата социаллӑ хӳтлӗх министерстви йӗркеленӗ.
«Ҫӗнтерӳ волонтёрӗ» номинацие Раҫҫей ҫарне пулӑшакан, гуманитари пулӑшӑвӗ кӳрекен ватӑсем хутшӑнма пултараҫҫӗ.
«Волонтёр-наставник» номинацие — ачасене пӑхса пулӑшакансем, ватӑсене пулӑшу кӳрекенсем; «Эко-волонтёр» номинацие — ҫутҫанталӑка хӳтӗлессипе тӑрӑшакансем; «Социаллӑ экспреса» — тӗрлӗ мероприятие хастар хутшӑнакансем.
Документсене mintrud@cap.ru электрон адреспа ярса памалла. Вӗсене авӑн уйӑхӗн 23-мӗшӗччен йышӑнӗҫ.
Ҫӗнтерӳҫӗсене «Кӗмӗл Чун» республикӑри форумра чыслӗҫ.
Шупашкар валли каллех тӗп архитектор шыраҫҫӗ. Хула администрацийӗн архитектура тата хула строительствин управленийӗ конкурс ирттерессине пӗлтернӗ.
Кандидатсенчен ҫаксене ыйтаҫҫӗ: архитектура енӗпе аслӑ пӗлӳ пулмалла, саккунсене пӗлмелле, компьютерпа, документсемпе ӗҫлемелле, патшалӑх тата вырӑнти органсемпе калаҫу йӗркелемелле.
Документсене авӑн уйӑхӗн 2-мӗшӗччен йышӑнаҫҫӗ. Конкурс авӑнӑн 9-мӗшӗнче пулӗ.
Сӑмах май, унчченхи тӗп архитектор Павел Корнилов Строительство министерствине ӗҫлеме кайнӑ, Чӑваш Енӗн тӗп архитекторӗ пулса тӑнӑ.
«Чӑваш Ен» Издательствӑпа полиграфи комплексӗ валли директор шыраҫҫӗ. ЧР Экономика министерстви кандидатсенчен заявленисем ыран йышӑнма пуҫлать. Авӑн уйӑхӗн 5-мӗшӗччен ӗлкӗрмелле. Ӑна аслӑ пӗлӳ илнӗ, ертӳҫӗ должноҫӗнче ӗҫленӗ ҫынсенчен кӑна йышӑнаҫҫӗ. Кунсӑр пуҫне обществӑн аталану программине тӑратмалла.
Палӑртмалла: Издательствӑпа полиграфи комплексне 2021 ҫулхи утӑ уйӑхӗнчен Алексей Ключников ертсе пырать. Ҫурлан 5-мӗшӗнченпе вӑл тӗп директор тивӗҫне вӑхӑтлӑх пурнӑҫлать тесе палӑртнӑ.
Ҫамрӑк ӳнерҫӗ Ксения Кокель Шупашкарти Хевеш урамӗнчи 30-мӗш ҫурт ҫине ӳкернӗ муралпа Атӑлҫи федераци округӗнче иртекен стрит-арт конкурсне хутшӑннӑ. Унтан лайӑх хыпар ҫитнӗ: вӑл 2-мӗш вырӑн йышӑннӑ.
Аса илтерер: Ксения ҫурт стени ҫине «Манӑн кил – манӑн крепоҫ» ӗҫе пурнӑҫланӑ. Унта чӑваш хӗрарӑмне сӑнланӑ. Унпа вӑл «ФормART» конкурса хутшӑннӑ.
Пӗрремӗш вырӑна Чӗмпӗр облаҫӗнчи Марат Петров тивӗҫнӗ. Виҫҫӗмӗш вырӑна Саратов облаҫӗнчи Юлия Чиженькова йышӑннӑ. Ҫӗнтерӳҫӗсене хӑйсен пултарулӑхне аталантарма грант параҫҫӗ. Ксения Кокель 150 пин тенке тивӗҫнӗ.
Шупашкарта «Общественное признание» (чӑв. Халӑх хисепӗ) конкурса пӗтӗмлетнӗ. Ҫӗнтерӳҫӗсене тӗрлӗ номинацире чысланӑ.
«Ҫемье йӑли-йӗрки — Шупашкар историйӗ» номинацире тӗп парнене Николай Семёнов режиссёр ҫемйи тивӗҫнӗ. Алевтина мӑшӑрӗпе вӑл 5 ача ҫитӗнтерет. «Чӑваш Ен» ПТРКра пӗлтернӗ тӑрӑх, хула, республика, ҫӗршыв шайӗнче иртекен конкурссенче Семёновсем пӗрре мар палӑрнӑ. Мускавра «Раҫҫей» куравра «Знатоки Родины» конкурсра ҫӗнтернӗ. Ҫавӑн пекех республика чысне ҫемье форумӗнче тивӗҫлӗ хӳтӗленӗ.
Семёновсем Шупашкар муниципаллӑ округӗнчи Апаш тӑрӑхӗнчен.
Шупашкарта иртнӗ «АвтоЛеди» конкурса пӗтӗмлетнӗ. Унта хамӑр регионти тӗрлӗ округри хӗрарӑм водительсем хутшӑннӑ.
«АвтоЛеди» ята Мария Петрова тивӗҫнӗ. Иккӗмӗш вырӑна Ирина Захарова-Рахмина йышӑннӑ. Виҫҫӗмӗш вырӑнта вара – Александра Савельева.
Водительсене ытти номинацире те палӑртнӑ. «Сарӑ ҫӳҫлӗ хӗр – руль умӗнче» номинацире Марина Айкина ҫӗнтернӗ. «Альянс-Авто» мисӗ» Настя Федорова пулса тӑнӑ. «Хускану пурнӑҫ» мисӗ ята Женя Артемьева илнӗ. «Автоҫул сасси» номинацире – Мария Антипова, «Гаишник ӗмӗчӗ» номинацире Оксана Антонова мала тухнӑ.
«Раҫҫей миссисӗ» конкурса пирӗн ентеш Оксана Гаус хутшӑнасси пирки пӗлтернӗччӗ. Пӗтӗмлетӳсем паллӑ.
Оксана конкурсра «Раҫҫей спорчӗн королеви» номинацире палӑрнӑ. Каласа хӑварар: Оксана Гаус – 43 ҫулта, 3 ача ӳстерет. Ҫавӑн пекех вӑл – ӑнӑҫлӑ коуч. Оксана 2022 ҫулта «Чӑваш Ен илем миссисӗ» пулнӑ, пӗлтӗр «Ҫулталӑк персони»/«Ҫулталӑк хӗрарӑмӗ» премие илнӗ.
Питӗ хастар хӗрарӑм вӑл. Оксана ҫӑмӑл атлетика енӗпе тӗнче класлӑ спорт мастерӗ, йӗтре тӗкес тата диск ывӑтас енӗпе Чӑваш Ен рекордсменки.
Паян Шупашкарта Пӗтӗм Раҫҫейри конкурсра чи лайӑх троллейбус водительне палӑртнӑ. Ҫак ята Самар хулинчи водитель Сергей Василенко тивӗҫнӗ.
Иккӗмӗш вырӑна Санкт-Петербургри Игорь Корнилов тухнӑ. Виҫҫӗмӗш вырӑна вара пирӗн ентеш, Эдуард Арсентьев, йышӑннӑ. Вӑл троллейбус водителӗнче 28 ҫул ӗҫлет. Унӑн «Аварисӗр ӗҫленӗшӗн» кӑкӑр палли те пур. Ҫӗнтерӳҫе - 300 пин, 2-мӗш, 3-мӗш вырӑнсене йышӑннисене 150 тата 50 пин тенкӗ панӑ.
Шупашкар хулине йӗркеленӗренпе 555 ҫул ҫитнине халалласа «Чебоксарский хит» (чӑв. Шупашкар хичӗ) юрӑ конкурсӗ иртессине эпир унччен пӗлтернӗччӗ-ха. Аса илтерер: конкурса хутшӑнакансен хӑйсен ӗҫӗсене е вырӑсла, е чӑвашла тӑратмалла пулнӑ.
Унта «Сказки Гримм» ушкӑнӑн тата Ольга Журавлёван композицийӗ ҫӗнтернӗ. Уншӑн 524 ҫын, е сасӑлава хутшӑннисенчен 24,83 проценчӗ, сасӑланӑ.
Ҫӗнтерӳҫӗ-юрӑпа артистсем Шупашкар 555 ҫул тултарнине халалланӑ гала-концертра сцена ҫине тухӗҫ.
Шупашкарта Пӗтӗм Раҫҫейри «Туризм мисӗ» илем конкурсӗ иртнӗ. Чиперккесене паллӑ актер, парикмахер, шоумен, юрӑҫ тата телеертӳҫӗ Сергей Зверев хакланӑ.
Конкурса 30 регионти хӗр хутшӑннӑ. Чӑваш Ен чысне Дарья Чучелина, Ксения Димитриева, Алла Кадеева, тата Ника Апалеева хӳтӗленӗ.
Палӑртма кӑмӑллӑ: «Раҫҫейри бикини мисӗ» номинацире Алла Кадеева виҫҫӗмӗш вырӑн йышӑннӑ. Сӑмах май, вӑл кӑҫал «Чӑваш Ен мисӗ» пулнӑ.
+7.3 °C