Ҫӗнӗ Шупашкарти 18-мӗш лицейри историпе обществознани вӗрентекенӗ Артем Максимов Раҫҫей шайӗнче иртекен «Ҫулталӑкри вӗрентекен» конкурсра Чӑваш Ен чысне хӳтӗлет.
Конкурс пуҫланнӑ. Пӗрремӗш тур Саратов хулинче иртет. Артем Владимирович унта обществознанипе урок ирттернӗ, ачасем кӑсӑклӑ ыйтусене сӳтсе явнӑ. Халӗ унӑн «Педагогпа – интервью» тапхӑр витӗр тухмалла: унта жюри пайташӗсемпе калаҫӗҫ. Кайран 20 вӗрентекен иккӗмӗш тура хутшӑнӗ.
Конкурс ҫӗнтерӳҫисене Вӗрентекен кунӗнче, юпан 5-мӗшӗнче, чыслӗҫ.
Чӑваш Енри электрик Дмитрий Николаев «Профессипе чи лайӑххи» Раҫҫейри конкурсра мала тухса 1 миллион тенкӗлӗх сертификата тивӗҫнӗ. Вӑл 550 балран 531,5-шне пухнӑ.
Жюри пайташӗсем Дмитрий ыттисенчен самай иртсе кайнине палӑртнӑ. Конкурса пӗтӗмпе 42 специалист хутшӑннӑ.
Палӑртса хӑварар: Дмитрий Николаев Шупашкарти ГЭСра ӗҫлет. Вӑл конкурса хутшӑнни уншӑн паха опыт пулнине палӑртнӑ.
Ольга Кошелева Пӗтӗм Раҫҫейри «Профессипе чи лайӑххи» конкурса иккӗмӗш вырӑн йышӑннӑ. Вӑл «Чи лайӑх сыр пӗҫерекен» номинацире палӑрнӑ.
Конкурса 34 регионти сыр пӗсерекен 45 ӑста хутшӑннӑ. Кашниех хӑйӗн ӗҫӗпе паллаштарнӑ. Ольга Кошелева 500 пин тенкӗлӗх сертификата тивӗҫнӗ.
Палӑртмалла: Ольга сырӑн 20 ытла тӗсне хатӗрлет. Ку енӗпе вӑл малалла аталанасшӑн.
Тӑвай округӗнчи Татьяна Юркина сыр пӗҫерес енӗпе чӑн-чӑн ӑста. Качотта, сулугуни, халуми, ламбер… Тӗрлӗрен сыр хатӗрлет вӑл.
Татьяна Пӗтӗм Раҫҫейри «Ӗҫ ҫыннисем» конкурса хутшӑнма заявка панӑ. Вӑл «Ӗҫлӗ хӗрарӑм» номинацире тупӑшӗ.
Татьяна Юркина хӑйӗн ӗҫне аталантарма патшалӑхран пулӑшу илнӗ. 2023 ҫулта унӑн предприятийӗнче 800 килограма яхӑн сыр тунӑ. Кӑҫал вара ку кӑтартӑва тата пысӑклатасшӑн. Унӑн сырӗсене Вӑрмар, Тӑвай, Канаш Ҫӗрпӳ, Патӑрьел округӗсенче, Шупашкарта, Ҫӗнӗ Шупашкарта пурӑнакансем юратса ҫиеҫҫӗ.
Республикӑра «Халӑх участковӑйӗ» конкурс иртет. Кӑҫал унта ШӖМ тытӑмӗнче ӗҫлекен 26 ҫын хутшӑнать. Вӗсенчен 6-шӗ - хӗрарӑмсем.
Пӗрремӗш тапхӑр авӑнӑн 20-мӗшӗччен иртет. Онлайн сасӑлавпа чи лайӑххине палӑртӗҫ. Юпан 7-16-мӗшӗсенче регион шайӗнчи тапхӑр пулӗ. Унта онлайн сасӑлавра ҫӗнтернӗ участковӑй республика чысне Раҫҫей шайӗнче хӳтӗлӗ. Вӑл чӳк уйӑхӗн 1-10-мӗшӗсенче иртӗ.
Сӑмах май, 2016, 2021 тата 2022 ҫулсенче чи лайӑх участковӑй пулнӑ Сергей Ипатьев кӑҫал та конкурса хутшӑнать.
Шупашкарта Раҫҫейри паллӑ юрӑҫ Олег Газманов хатӗрленӗ «РодникиЛаб» проекта хутшӑнма суйлав иртет. Унта 7-17 ҫулсенчи ачасем хутшӑнма пултараҫҫӗ.
Ҫӗнӗ Шупашкарти кадет лицейӗнче вӗренекен Анна Долгорукова суйлав витӗр ӑнӑҫлӑ тухнӑ. Вӑл вокал вӗренет, илем конкурсне хутшӑнса пӗрре мар ҫӗнтернӗ, фитнесджампинг енӗпе иртнӗ чемпионатра призер пулнӑ.
Олег Газмановӑн проекчӗ ҫамрӑк юрӑҫсене тупса палӑртма пулӑшать. 2025 ҫулхи пуш уйӑхӗнче Шкпашкарта финал концерчӗ пулӗ. Унта «РодникиЛаб» те хутшӑнӗ
Ҫӗнӗ Шупашкарти фольклор ансамблӗ «Теветкел» тӗнче шайӗнчи икӗ конкурсра лауреат пулса тӑнӑ: Хусанта иртнӗ «Культурӑсен пӗрлешӗвӗ» тата Питӗрте пулнӑ «Нева проспекчӗсем» конкурссенче. Иккӗшӗнче те пӗрремӗш вырӑн йышӑннӑ.
Ансамбле 2010 ҫулта «Химик» культура ҫуртӗнчи чӑваш халӑх театрӗ ҫумӗнче Альбина Алексеева пуҫарӑвӗпе йӗркеленӗ. Паянхи кун унӑн репертуарӗ пуян: 50 ытла юрӑпа ташӑ, вӗсем – тӗрлӗ жанрлӑ.
Ансамбль малашне те ҫулҫӳревсене тухасшӑн, чӑваш халӑх этнокультурипе паллаштарасшӑн.
Чӑваш кӗнеке издательстви «Чӑваш кӗнеки. Пултаруллӑ ҫамрӑксем» регионсем хушшинче вун виҫҫӗмӗш хут иртекен конкурса хутшӑнма йыхравлать. Кун пирки издательство халӑх тетелӗнчи хӑйӗн пабликӗнче пӗлтернӗ.
Ӗҫсене ҫурла уйӑхӗн 30-мӗшӗнче йышӑнма пуҫланӑ, вӗсене юпа уйӑхӗн 31-мӗшӗччен йышӑнӗҫ. Конкурс тӑватӑ номинаципе иртет. «Юратнӑ кӗнеке ҫинчен ҫырнӑ чи лайӑх хаклав» номинацие аслисен те хутшӑнма юрать иккен. Унта хутшӑнакансен Чӑваш кӗнеке издательствинче тухнӑ кӑларӑма вуланӑ хыҫҫӑн ҫуралнӑ шухӑш-кӑмӑла уҫса памалла. Хаклава fed_ol@mail.ru электрон почтӑпа ярса пама юрать. Ҫырӑва ӑсатнӑ чухне «Чӑваш кӗнеки. Пултаруллӑ ҫамрӑксем» конкурса» тесе палӑртма ыйтаҫҫӗ.
«Юратнӑ хайлаври чи интереслӗ самант» темӑпа хатӗрленӗ ӳкерчӗк» номинацире хутшӑнакансен кӗнекери пӗр-пӗр саманта ӳкерсе парӗҫ.
Кӑҫал Ҫеҫпӗл Мишши чӑваш классикӗ ҫуралнӑранпа 125 ҫул ҫитнине шута илсе «Ҫеҫпӗл Мишши хайлавӗсем тӑрӑх хатӗрленӗ ӳкерчӗк» номинаци те пур.
«Ача хатӗрленӗ чи лайӑх кӗнеке» номинацире ачан хӑй шухӑшласа кӑларнӑ хайлава кӗнеке пек хатӗрлесе памалла.
Чӑваш Ен Наци вулавӑшӗ «Литература Чӑваш Енӗ: 2023 ҫулти кӗнеке конкурс» ирттерет. Фестиваль-конкурса йӗркелеме Чӑваш Енӗн Культура министерстви пулӑшать. Ҫавӑн пекех Чӑваш Енри Профессионал писательсен союзӗ, Чӑваш кӗнеке издательстви, Чӑваш патшалӑх гуманитари ӑслӑлӑхӗсен институчӗ хутшӑнать.
Конкурса ҫак номинацисемпе ирттереҫҫӗ: «Чи лайӑх ӑслӑлӑх кӗнеки (гуманитари енӗпе)»; «Тӑван тӑрӑх ҫинчен чи лайӑх кӗнеке»; «Илемлӗ прозин чи лайӑх кӗнеки», «Чи лайӑх поэзи кӗнеки», «Ачасемпе ҫамрӑксем валли чи лайӑх кӗнеке», «Чи хитре илемлетнӗ кӗнеке», «Чи вулакан кӗнеке».
Чӑваш Енре кӗмӗл волонтёрсен конкурсӗ иртет. Ӑна республикӑн Ӗҫ тата социаллӑ хӳтлӗх министерстви йӗркеленӗ.
«Ҫӗнтерӳ волонтёрӗ» номинацие Раҫҫей ҫарне пулӑшакан, гуманитари пулӑшӑвӗ кӳрекен ватӑсем хутшӑнма пултараҫҫӗ.
«Волонтёр-наставник» номинацие — ачасене пӑхса пулӑшакансем, ватӑсене пулӑшу кӳрекенсем; «Эко-волонтёр» номинацие — ҫутҫанталӑка хӳтӗлессипе тӑрӑшакансем; «Социаллӑ экспреса» — тӗрлӗ мероприятие хастар хутшӑнакансем.
Документсене mintrud@cap.ru электрон адреспа ярса памалла. Вӗсене авӑн уйӑхӗн 23-мӗшӗччен йышӑнӗҫ.
Ҫӗнтерӳҫӗсене «Кӗмӗл Чун» республикӑри форумра чыслӗҫ.
+0.3 °C