Комсомольски округӗнчи Асанкасси ялӗнче арҫын путса вилнӗ. Ку инкек иртнӗ эрнере пулнӑ.
Эрнекун, ҫӗртме уйӑхӗн 21-мӗшӗнче, 52 ҫулти арҫын пӗвере шыва кӗнӗ те путнӑ. Унӑн виллине ҫӑлав службин ӗҫченӗсем кӑларнӑ. Палӑртмалла: арҫын ятарласа хатӗрлемен выранта шыва кӗнӗ.
Сӑмах май, ҫулталӑк пуҫланнӑранпа республикӑра 14 ҫын путса вилнӗ. Ҫав йышра – 3 ача. Чылай чухне ҫынсем юраман вырӑнта тата ӳсӗрле шыва кӗрсе путнӑ.
Шупашкарта пурӑнакан 36 ҫулти хӑйӗн кушакне Архангельск облаҫне ӑсатасшӑн пулнӑ. Ун пек пулӑшма килӗшекене вӑл халӑх тетелӗсенчен пӗринче тупнӑ.
Кушак аҫине ӑсатма килӗшекене вӑл 5 пин тенке яхӑн укҫа куҫарса панӑ. Ҫавӑн хыҫҫӑн тӗнче тетелӗнчи ҫав ҫын ҫухалнӑ.
Пӑтӑрмах хыҫҫӑн кушак аҫин хуҫи пакунлисенчен пулӑшу ыйтнӑ. Улталаканни Ставрополь крайӗнчи 25 ҫулти ҫамрӑк пулнӑ. Ӑна пирӗн патри йӗрке хуралҫисем вырӑна тухса кайса тытса чарнӑ. Анчах ӑна хупса хуман. Следстви пынӑ вӑхӑтра хайне йӗркеллӗ тытмалли, таҫта тухса кайма юраманни ҫинчен асӑрхаттарнӑ.
Шупашкар ҫывӑхӗнчи Лапсарти кайӑк-кӗшӗк фабрикинче ҫӗртме уйӑхӗн 21-мӗшӗнче пушар тухнӑ. Чӑваш Енри Инкеклӗ ӗҫсен министерствинче пӗлтернӗ тӑрӑх, вут-ҫулӑм усӑ курман ҫуртра тухнӑ. Ҫулӑм 2 пин тӑваткал метр ҫинче алхаснӑ.
Аса илтерер: унччен асӑннӑ фабрика «Юрма» ятлӑ пулнӑ, унӑн хуҫи Владимир Ермолаевчӗ. Кайран хуҫа улшӑннӑ хыҫҫӑн «МЕГАМИКС» ятлӑ пулса тӑчӗ.
Ҫӗрпӳ хулинче стройкӑра рабочи башня кранӗ ҫинчен ӳксе вилнӗ. Халӗ ку ӗҫе РФ Следстви комитечӗн Чӑваш Енри специалисчӗсем тӗрӗслеҫҫӗ. Вӗсем тӗпчеве РФ Пуҫиле кодексӗн 143-мӗш статйин 2-мӗш пайӗпе пуҫарнӑ.
Пӑтӑрмах ҫӗртме уйӑхӗн 17-мӗшӗнче Ҫӗрпӳри строительство организацийӗн территорийӗнче пулса иртнӗ. 57 ҫулти арҫын техникӑна ӗҫе хатӗрлессипе тӑрӑшнӑ чухне ҫӳлтен персе анса кранӑн тимӗр лаптӑкӗ ҫине ӳкнӗ. Вӑл вырӑнтах висле кайнӑ.
Шупашкар хулинче таксист ватӑ хӗрарӑма ултавҫӑсен капкӑнӗнчен ҫӑлса хӑварнӑ.
Ҫӗртме уйӑхӗн 18-мӗшӗнче такси водителӗ заказпа пырса ҫитнӗ. Кинемей хӑйӗн ӑҫта каймаллине каланӑ, анчах адрес приложенире кӑтартнипе тӳр килментен таксист ӑҫта каймаллине уҫӑмлатас тенӗ. Ватӑ ҫын ӑҫта каймаллине калайман. Адреса улӑштараймассине, машинӑна хӑй чӗнменнине пӗлтернӗ, кам такси чӗннине те каламан.
Таксист сисчӗвленнӗ, машинӑна чӗнсе илнипе телефонпа калаҫса пӑхма шухӑш тытнӑ. Телефонпа калаҫаканни хӑйӗнпе кинемейӗн мӑнукӗ тесе паллаштарнӑ, водитель тата ыйту парсан вӑл тарӑхма пуҫланӑ.
Водитель ватӑ ҫынпа калаҫма пуҫланӑ. Анчах хӗрарӑм калама хӑрани сиссен водитель йӗрке хуралҫисем патне шӑнкӑравланӑ. Вара кинемей хӑйӗн патне палламан ҫынсем банкран тесе шӑнкӑравланине, укҫана хӑрушсӑр счет ҫине куҫарма хушнине пӗлтернӗ.
Ултавҫӑсем пӗр талӑкра Чӑваш Енри икӗ тухтӑра улталанӑ.
Ҫӗнӗ Шупашкарти врач патне больницӑри заведующи шӑнкӑравланӑ, вӑл ӑна право хуралӗн органӗсенчен шӑнкӑравлӗҫ тесе асӑрхаттарнӑ. Ют ҫын, чӑн та, шӑнкӑравланӑ. Ҫавӑнпа медицина ӗҫченӗ Федерацин хӑрушсӑрлӑх службин ӗҫченӗпе пуплетӗп пуль тесех калаҫнӑ. Ҫав этем хушнипе арҫын тӗрлӗ банкри хӑйӗн укҫине, пурӗ 2 миллион тенкӗ ытла, тӗрлӗ банкомат урлӑ куҫарнӑ.
Шупашкарти медицина сестри вара ӗҫтешне пулӑшас тенӗ. Лешӗ укҫине интернет-биржӑна хунине пӗлтернӗ. Улитавҫӑсем лешне укҫана каялла илес тесен поручитель карттин реквизичӗ кирлӗ тесе ӗнентернӗ. Банк карттин ревизитне пӗлнӗ хыҫҫӑ ултавҫасем инҫеит ҫыхӑну мелӗпе медсестар ячӗпе 1,5 миллион тенкӗ ытла кредит илнӗ, укҫана хӑйсен счёчӗ ҫине куҫарнӑ.
Шупашкарта вӑйпитти арҫын тӑххӑрти ачана ҫаратнӑ. Вӑл унӑн 750 тенкине туртса илнӗ. Преступлени кӑҫалхи кӑрлач уйӑхенчех пулса иртнӗ-ха. Халӗ вӑйпиттие явап тытарнӑ.
Усал шухӑшлӑ арҫын хулари Уруков урамӗнчи лавккара пӗр ачана тавар туяннӑ хыҫҫӑн сутуҫӑ укҫа каялла панине асӑрханӑ. Ҫавӑн хыҫҫӑн вӑлм ача хыҫҫӑн йӗрлесе кайнӑ. Ача кӑшкӑрсан та, укҫана парасшӑн пулмасан та 750 тенке туртса илнӗ. Унпа лавккана эрех илме кайнӑ.
Судпа унччен темиҫе хутчен те айӑпланнӑ 33 ҫулти арҫынна кӗҫех тытса чарнӑ. Тӑкака вӑл саплаштарнӑ-ха. Ҫапах та суд ӑна пӗр ҫул ӗҫлесе юсанмалла, ӗҫ укҫин 10 процентне патшалӑха тытса юлмалла йышӑну кӑларнӑ.
Ҫӗнӗ Шупашкарта пӗрин телефонне вӑрланӑ. Кун пирки Таджикистанран Чӑваш Ене килнӗ 25 ҫулти арҫын йӗрке хуралҫисене пӗлтернӗ.
Вӑл хулари Терешкова урамӗнчи кану учрежденийӗ умӗнче ют ҫынсемпе пӑтӑрмах пулса иртнине пӗлтернӗ. Ӑна лешсем хӗненӗ, кӗсйинчи телефонне вӑрттӑн кӑларса илнӗ.
Йӗрке хуралҫисем 19 ҫулти каччӑна тытса чарнӑ. Вӑл Чӑваш Ене Узбекситанран килнӗ иккен. Пакунлисем ҫав каччӑ телефона вӑрланӑ тесе шухӑшлаҫҫӗ. Пирӗн патра яш патентпа ӗҫленӗ. Ун тӗлӗшпе халӗ пуҫиле ӗҫ пуҫарнӑ. Ӗҫе судра пӑхса тухнӑ хыҫҫӑн каччӑна тӑван тӑрӑхне кӑларса ярӗҫ.
Ӗнер республикӑра икӗ ҫын путса вилнӗ. 16 сехет тӗлӗнче Улатӑр округӗнчи Алтышево ялӗ ҫывӑхӗнчи пӗвере Вӑрмар округӗнчен килнӗ арҫын виллине кӑларнӑ. Вӑл 40 ҫултан иртнӗ кӑна-ха.
Икӗ сехетрен Шупашкар округӗнчи Самукасси ялӗ ҫывӑхӗнче пӗвере 38 ҫулти арҫын путса вилнӗ. Вӑл 38 ҫулта пулнӑ.
Аса илтерер: нумаях пулмасть Шупашкарти тӗп пляжра 13 ҫулти хӗрача, 14-ри тата 15-ри арҫын ачасем путса вилнӗ.
Ку пӑтӑрмах 5 кун каяллах пулнӑ-ха. Ҫӗртме уйӑхӗн 12-мӗшӗнче ирхине Атӑлта кимӗ ҫаврӑнса ӳкнӗ. Кун пирки ҫӑлавҫӑсем патне ирхи 4 сехет те 25 минутра шӑнкӑравласа пӗлтернӗ.
Кимӗ Йӑлӑм ҫывӑхӗнче ҫаврӑнса ӳкнӗ. Ҫав кун икӗ байдарка ҫине ларса виҫӗ ҫын тренировкӑна тухса кайнӑ. Вӑйлӑ хум кимӗсенчен пӗрне ҫавӑрса ҫапнӑ. Шар курнисем ҫӑлавҫӑсем патне шӑнкӑравлама пултарнӑ.
Республикӑн шыравпа ҫӑлав службин ҫӑлавҫисем «Беркут» мотор кимми инкек вырӑнне вӗҫтернӗ. Ҫӑлав жилечӗ тӑхӑннӑ ҫамрӑксене вӗсем ҫывӑхри кимӗ станцине илсе ҫитернӗ.
+18.3 °C