Ҫу уйӑхӗн 25-мӗшӗнче Шупашкарти Мускав районӗн сучӗн ҫуртне кӗнӗ арҫын картлашка ҫине ларнӑ та тӑнне ҫухатнӑ. Хуралҫӑ часрах васкавлӑ медпулӑшу чӗннӗ. Вӗсем ҫитиччен вӑл 56-ри арҫыннӑн чӗрине массаж тунӑ.
Килсе ҫитнӗ реанимаци бригади пациентӑн миокард инфаркчӗ пулнине палӑртнӑ. Бригада реанимаци туса пацинта клиника вилӗмӗнчен кӑларнӑ. Халӗ пациент Республикӑри клиника пульницинче выртать.
Реанимаци бригади йышӗнче Олег Косов тухтӑр, Владимир Матюшкин медбрат тата Елена Ефимова медсестра пулнӑ.
Юлашки вӑхӑтра кӑшӑлвирус пирки калаҫма пӑрахрӗҫ. Анчах статистика чир ҫухалманнине кӑтартать.
Ҫу уйӑхӗнче республикӑра кӑшӑлвирусран 30 пациент вилнӗ. Юлашки виҫӗ кунра пӗр ҫын та ку амака пула пурнӑҫран уйрӑлман.
Юлашки талӑкра 43 ҫын чирленине палӑртнӑ, 70 ҫын сывалнӑ. 58 ҫынна пульницӑна вырттарнӑ.
Ку таранччен республикӑра 80 пине яхӑн ҫын кӑшӑлвируспа чирленӗ. Вӗсенчен 74,7 пинӗшӗ сывалнӑ. Пандеми пуҫланнӑранпа 4637 ҫын кӑшӑлвируса парӑнтарайман.
2021 ҫулхи кӑтартӑва илес тӗк, Чӑваш Енре ҫынсен вӑтам пурнӑҫ тӑршшӗ пӗчӗкленнӗ. Кун пирки ЧР Сывлӑх сыхлавӗн министерстви пӗлтерет.
Ведомство хатӗрленӗ докладра палӑртнӑ тӑрӑх, пӗлтӗр республикӑра вӑтам пурнӑҫ тӑршшӗ 69,99 ҫулпа танлашнӑ. 2020 ҫулта 71,03 пулнӑ, 2021 ҫулта - 73,44.
Пӗлтӗр ҫынсем ытларах юн ҫавранӑшӗн чирӗсене, усал шыҫҫа, нерв тытӑмӗн амакӗсене, сывлав тата апат ирӗлтерекен органӗсен чирӗсене пула вилнӗ. Сывлӑх сыхлавӗн министерствин пандеми пуҫланиччен шанчӑксем пысӑк пулнӑ: 2024 ҫул валли ҫынсен вӑтам пурнӑҫ тӑршшӗ 78 ҫула ҫитессе шаннӑ, 2030 ҫул валли - 80 ҫула.
Улатӑр районӗнчи пациенткӑн сывлӑхӗ питӗ начар пулнӑ. Чӗри минутра 20 хут ҫеҫ тапнӑ.
Хӗрарӑма санавиаци вертолечӗпе Республикӑри кардиологи диспансерне илсе ҫитернӗ. Тепӗр 10 минутран ӑна вӑхӑтлӑх электрокардиостимулятор лартнӑ. Тепӗр кунхине, сывлӑхӗ лайӑхлансан, стимулятора улӑштарнӑ.
Юнкун Елчӗк районӗнчи пациенткӑна вертолетпа Шупашкара илсе килнӗ. Ҫул ҫинче 40 минут ҫеҫ иртнӗ. Халӗ хӗрарӑма реаниматологсем пӑхса тӑраҫҫӗ, операци тума хатӗрленеҫҫӗ.
Чӑваш Енре Республикӑн клиника больницин ҫӗнӗ комплексӗн проектне 2023 ҫул вӗҫӗнче туса пӗтермелле. Ӑна хатӗрлессине Раҫҫейӗн сывлӑх сыхлав министрӗ Михаил Мурашко ырланӑ.
Ырланӑ проектпа смета документацине 2023 ҫулхи раштав уйӑхӗнче хатӗрлесе ҫитерӗҫ. Раҫҫейӗн Сывлӑх сыхлав министерстви ҫӗршывӑн Стройминне асӑннӑ проекта 2023-2025 ҫулсенчи федерацин адреслӑ инвестици программине кӗртме сӗннӗ.
Ҫӗнӗ комплексра 1300 койка пулӗ. Проект валли бюджетра 174 миллион тенкӗ пӑхса хӑварнӑ.
Ҫӗнӗ комплекс Шупашкарти Солнечнӑй микрорайонта пулӗ.
Ҫулталӑк пуҫланнӑранпа республикӑра ҫынсен ӳтне сӑвӑс кӗрсе ларнӑ 26 тӗслӗхе шута илнӗ. Пӗлтӗрхи ҫак тапхӑрпа танлаштарсан, 12,6 хут сахалрах.
Сӑмах май, пӗлтӗр те, 2020 ҫулхипе танлаштарсан, сӑвӑс тапӑннӑ тӗслӗх сахалланнӑ. Роспотребнадзор ҫу уйӑхӗн 16-27-мӗшӗсенче энцефалит профилактики ыйтӑвӗсемпе тата ӳте сӑвӑс кӗрсе ларнӑ тӗлӗшпе хӗрӳ лини ирттерет. Унта ҫак номерсемпе шӑнкӑравласа ҫитме пулать: (8352) 58-67-74, 58-25-88. Хӗрӳ лини 9-16 сехетсенче пулӗ.
Шупашкар хулинче паян, ҫу уйӑхӗн 16-мӗшӗнче, ҫул урлӑ каҫакан хӗрарӑма машина ҫапса кайнӑ.
Пӑтӑрмах Ленин проспектӗнчи 31-мӗш ҫурт патӗнче, «Читай-город» лавккаран инҫех мар ҫӗрте, пулса иртнӗ. Ҫуран ҫӳрекенсене каҫса ҫӳремелли ятарлӑ вырӑнпа каҫакан хӗрарӑм ҫине ГАЗель пырса кӗнӗ.
Инкек самантне ӳкерсе илнӗ видеотӑрӑх хакласан, хӗрарӑм малалла мечӗк пек ывтӑнса кайнӑ.
Хӗрарӑма пульницӑна ӑсатнӑ.
Пӑтӑрмах пирки хыпар вырнаҫтарнӑ ҫӑлкуҫра ҫуран ҫӳрекенсен те питӗ тимлӗ пулмалла тесе калакансем сахал мар.
РФ Следстви комитечӗн Чӑваш Енри управленийӗн тӗпчевҫисем кондитер фабрикинче ӗҫлекен хӗрарӑм аманнӑ тӗслӗхпе пуҫиле ӗҫ пуҫарнӑ. Вӗсем палӑртнӑ тӑрӑх, предприятире ӗҫ хӑрушсӑрлӑхӗн правилисене пӑхӑнман.
Инкек кӑҫалхи ака уйӑхӗн 5-мӗшӗнче 15 сехет те 20 минутра пулнӑ. Шупашкарти предприятисенчен пӗринчи кондитер цехӗнчи газ кӑмакин операторӗ вафли кӑмакине тасатнӑ. Хӗрарӑм аллине кӑмакана чиксе ярсан сылтӑм ал лапписӗр тӑрса юлнӑ.
Ҫывӑх вӑхӑтра суд экспертизисем иртӗҫ, кӳнтеленсенчен ыйтса пӗлеҫҫӗ. Пуҫиле ӗҫе малалла тӗпчеҫҫӗ.
СПИДран вилнисене асӑнмалли кун ҫывхарнӑ май ыран Шупашкарти "Каскад" суту-илӳ центрӗнче ҫак чир тата ВИЧ пуррипе ҫуккине тӗрӗслӗҫ. Унта кашниех пырса анализ пама пултарать. Йӑлтах анонимлӑ тата тӳлевсӗр.
Анализа 13 сехет ҫурӑран пуҫласа 15 сехет ҫурӑччен илӗҫ. Республикӑри СПИД центрӗн консультанчӗсем ыйтусене хуравлӗҫ, ВИЧ пирки, ӑна мӗнле майпа ертме палтарни ҫинчен каласа кӑтартӗҫ.
Чӑваш Енри тухтӑрсем телемедицина мелӗпе тӑтӑшах канашлаҫҫӗ, ҫавна май вӗсем ҫынсене вилӗмрен те ҫӑлса хӑвараҫҫӗ.
Кӑҫалхи 4 уйӑхра 1500-е яхӑн телемедицина консультацийӗ ирттернӗ. Районсенчи тухтӑрсем республикӑрисемпе канашлаҫҫӗ, республикӑрисем — федераци клиникисенчисемпе.
Пысӑк шайри пултаруллӑ тухтӑрсем хӑйсен ӗҫтешӗсене видеомелпе тӗрлӗ канаш параҫҫӗ. Хӑш-пӗр чухне медицина консилиумӗсем пухаҫҫӗ.
Телемедицина пулӑшӑвӗ аталаннине пула пациента тепӗр больницӑна илсе кайса кӑтартма хӑтланмалла мар.
+1.3 °C