Юлашки вӑхӑтра кӑшӑлвирусран вилекенсем сахалланнӑ. Стационара сипленме выртакансем те кӑштах чакнӑ. Анчах чирлекенсен шучӗ кунсерен ӳссе пырать.
Иртнӗ талӑкра республикӑра 630 ҫын инфекциленнӗ. Кун пекки ку таранччен пулман. 137 ҫынна пульницӑна вырттарнӑ. Сывалакансем нумаййӑн пулнӑ: 204 ҫын. 2 ҫын чире парӑнтараймасӑр пурнӑҫран уйрӑлнӑ.
Пандеми пуҫланнӑранпа республикӑра 51067 ҫын кӑшӑлвируспа чирленӗ. Вӗсенчен 42768-шӗ сывалнӑ. Ку 83,7 процентпа танлашать. Пӗтӗмпе 4198 ҫын кӑшӑлвируса пула вилнӗ.
Танлаштармашкӑн: иртнӗ эрнере 25 ҫын пурнӑҫран уйрӑлнӑ. Кӑрлач уйӑхӗн пӗрремӗш эрнинче 136 ҫын кӑшӑлвируса парӑнтарайман.
Юлашки вӑхӑтра кӑшӑлвируспа чирлекенсен йышӗ нумайланса пынине кура республикӑри икӗ пульница ковид-госпиталь пек ӗҫлеме пуҫланӑ. Кун пирки ЧР сывлӑх сыхлавӗн министрӗ Владимир Степанов оперштаб ларӑвӗнче пӗлтернӗ.
Хулари 2-мӗш пульницӑра кӑшӑлвируспа чирлисем валли 80 койка хатӗрленӗ. Республикӑри кардиологи диспансерӗнче тепӗр 30 койка пур.
Хальхи вӑхӑтра ковид-госпитальсенче пӗтӗмпе 1146 койка хатӗрленӗ. Кӑрлач уйӑхӗн 27-мӗшӗ тӗлне стационарсенче кӑшӑлвируспа чирлӗ 1011 ҫын выртнӑ. Вӗсенчен 191-шӗн сывлӑх йывӑр. 25-шӗн сывлӑхӗ пушшех те йывӑр. Вӗсем ИВЛпа сывлаҫҫӗ.
Резервра – тепӗр 2 пин койка. Кирлӗ пулсан вӗсене те хута яраҫҫӗ.
Ӗнерхипе танлаштарсан, паян республикӑра кӑшӑлвируспа чирлекенсен йышӗ 90 ҫын ытларах пулнӑ. Юлашки талӑкра 548 ҫын ҫак вируспа аптӑранине палӑртнӑ.
Юлашки талӑкра 143 ҫынн пульницӑна вырттарнӑ. 91 ҫын вара сывалнӑ. Вилекенсен йышӗ унчченхи пек нумай мар темелле: иртнӗ талӑкра 3 ҫын чире парӑнтараймасӑр пурнӑҫран уйрӑлнӑ.
Ку таранччен регионта 50437 ҫын инфекциленнӗ. Вӗсенчен 42564-шӗ сывалнӑ. Ку 84,4 процентпа танлашать.
Палӑртмалла: 600 пин ытла ҫын вакцинацие вӗҫленӗ. Республикӑр коллектив иммунитечӗ 52,4 процентпа танлашать.
Пӗлтӗр, 2021 ҫулта, Чӑваш Енре ялти пульницӑсене 74 «земство тухтӑрӗсене» ӗҫе вырнаҫтарнӑ. Вӗсен йышӗнче 49 тухтӑр, 25 медӗҫчен.
Ку енӗпе Шупашкар, Канаш, Патӑрьел районӗсем малти вырӑнта пыраҫҫӗ. «Земство фельдшерӗ» программӑпа килӗшӳллӗн 106 медӗҫчене ӗҫе вырнаҫтарнӑ.
Аса илтерер: ялти пульницӑна ӗҫлеме каякан тухтӑрсене – 1 миллион, фельдшерсене 500 тенкӗ параҫҫӗ. Пӗлтӗрхи кӑрлач уйӑхӗн 1-мӗшӗнченпе кӗрсе тухма йывӑр яла ӗҫлеме каякансене 1,5 миллион тенкӗ пама йышӑннӑ. Ку – тухтӑрсем валли. Фельдшерсен вара 750 пин тенкӗ илме май пур.
Каласа хӑварар: «Земство тухтӑрӗ» программа пирӗн республикӑра 2012 ҫултанпа ӗҫлет. Унтанпа 568 тухтӑр яла ӗҫлеме кайнӑ.
Шупашкарта онкологи диспансерӗн тепӗр корпусӗ пулӗ. Тӗп зданипе ӑна ятарлӑ каҫӑ ҫыхӑнтарӗ. Эппин, вӑл хальхи диспансер ҫывӑхӗнче пулӗ.
Кун пирки паян ЧР Элтеперӗ Паташлӑх Канашне янӑ Ҫырура каланӑ. Олег Николаев Республикӑри клиника пульницин инфекци корпусӗ пирки те аса илнӗ. Вӑл Шупашкарти «Солнечный» микрорайонта пулӗ.
Палӑртмалла: онкодиспансерӑн халӗ поликлиника пур ӗнтӗ. Ҫавӑн пекех хирурги, икӗ радиологи, диагностика корпусӗсем ӗҫлеҫҫӗ. Хирурги корпусне 2016 ҫулхи кӗркунне хута янӑ.
Рекорд ҫӗнелсех пырать. Сӑмах кӑшӑлвирус пирки пырать. Юлашки талӑкра республикӑри 334 ҫын ковидпа чирленине палӑртнӑ.
Пульницӑна сипленме выртакансен йышӗ те ӳссех пырать. Ӗнер 121 ҫынна вырттарнӑ тӑк паян 135. Ҫавна май пульницӑсенче хушма койкӑсем хатӗрлеҫҫӗ.
Юлашки талӑкра 134 ҫын сывалнӑ. Ку таранччен республикӑра 49431 ҫын кӑшӑлвируспа чирленӗ. Вӗсенчен 42316-шӗ сывалнӑ. Ку 85,6 процентпа танлашать. Пандеми пуҫланнӑранпа 4190 ҫын каварлӑ чире парӑнтарайман. Юлашки талӑкра 4 ҫын ковида пула пурнӑҫран уйрӑлнӑ.
Чӑваш Енӗн Элтеперӗн Администрацийӗнче ҫынсене вӑхӑтлӑха йышӑнма пӑрахӗҫ. Кун пирки Ҫынсен ыйтӑвӗсемпе тата общество тӗрӗслевӗн субъекчӗсемпе ҫыхӑну тытакан управлени ӗнер, кӑрлач уйӑхӗн 26-мӗшӗнче, пӗлтернӗ.
Граждансене йышӑнма пӑрахни эпидемиологи лару-тӑрӑвӗ кӑткӑссипе ҫыхӑннӑ. Унсӑр пуҫне кӑшӑлвирус инфекцийӗ те алхасать.
Чӑваш Енри тӳре-шара патне ҫырусене ҫак адреспа ярса пама пулать: 428004, Чӑваш Республики, Шупашкар хули, Президент бульварӗ, 10-мӗш ҫурт. Унсӑр пуҫне интерактивлӑ йышӑну пӳлӗмӗ те ӗҫлет. Ҫырусене Чӑваш Енӗн влаҫ органӗсен официаллӑ порталӗнче «Обращения граждан» ярӑмра йышӑнаҫҫӗ.
Чӑваш Республикин тава тивӗҫлӗ артисчӗ Валентина Молодцыгина паян, кӑрлач уйӑхӗн 27-мӗшӗнче, 70 ҫул тултарнӑ.
Вӑл Шӑмӑршӑ районӗнчи Анат Чаткасси ялӗнче 1952 ҫулхи кӑрлач уйӑхӗн 27-мӗшӗнче ҫуралнӑ. 1972 ҫулта Шупашкарти культурӑпа ҫутӗҫ училищинчен хӑй тӗллӗн вӗреннӗ театр коллективӗсен режиссёрӗ пулма вӗренсе тухнӑ.
Валентина Молодцыгина пурнӑҫне, чӑн та, театрпа ҫыхӑнтарнӑ. Вӑл Чӑваш пукане театрӗнче, 1975-2007 ҫулсенче Чӑваш патшалӑх ҫамрӑксен театрӗнче актёрта, 2008 ҫултанпа Чӑваш патшалӑх академи драма театрӗнче администраторта ӗҫленӗ.
Юбиляр йывӑр чире пула, шел те, икӗ ҫул каялла пӗр урисӗр тӑрса юлнӑ.
Хальхи вӑхӑтра Валентина Молодцыгинан ывӑлӗ Андрей ашшӗпе (Валерий Молодцыгин та артист пулнӑ, анчах пурнӑҫран ҫамрӑклах уйрӑлса кайнӑ) амӑшӗн ӗҫне малалла тӑсать.
Ӗнер, кӑрлач уйӑхӗн 25-мӗшӗнче, Чӑваш Республикин тава тивӗҫлӗ юрисчӗ, Ф.Н. Плевако ячӗллӗ ылтӑн тата кӗмӗл медаль лауреачӗ Юрий Кручинин куҫне ӗмӗрлӗхе хупнӑ. Усал хыпара Александр Белов журналист Фейсбукра пӗлтернӗ. Юрий Сергеевич ковидпа чирленӗ-мӗн, унӑн ӳпки 90 процент шыҫнӑ иккен.
Юрий Кручинин Раҫҫейри адвокатсен гильдийӗн пӗрремӗш вице-президенчӗ, «Мускаври юридици центрӗ» адвокатсен коллегийӗн президиумӗн председателӗн пӗрремӗш заместителӗ, Вырӑсла калаҫакан адвокатсен пӗтӗм тӗнчери ассоциацийӗн президиумӗ членӗ пулнӑ.
Мари Элта ҫуралса ӳснӗ Юрий Кручининпа ҫак йӗркесен авторӗ вӑл Чӑваш Енре этем правине хӳтӗлекен уполномоченнӑйра ӗҫленӗ чухне паллашнӑччӗ. Унпа республикӑн Патшалӑх Канашӗн «Республика» хаҫачӗ валли анлӑ интервью хатӗрленӗччӗ. Ҫав калаҫура Юрий Сергеевич ӑслӑ та анлӑ тавракурӑмлӑ ҫын ҫеҫ мар, вӑл тӗрӗсмарлӑха тӳсме пултарайманни питех те аван сисӗннӗччӗ. Каярах унтан пӗр ыйтупа пулӑшу та ыйтма тивнӗччӗ... Халӗ вара йывӑр тӑпри ҫӑмӑл пултӑр тесси ҫеҫ юлать...
Юлашки кунсенче кӑшӑлвируспа чирлекенсен йышӗ нумай ӳссе пырать. Юлашки талӑкра 297 ҫын инфекциленнине палӑртнӑ. Хальччен унашкалли пулман. Ӗнер кӑна рекорд – 235 ҫын – пулнӑччӗ. 124 ҫынна пульницӑна вырттарнӑ.
Ку таранччен республикӑра 48715 ҫын кӑшӑлвируспа чирленӗ. Вӗсенчен 42086-шӗ сывалнӑ. Ку 86,4 процентпа танлашать. 4285 ҫын кӑшӑлвируса пула вилнӗ. Ку 8,6 процентпа танлашать.
Юлашки талӑкра 6 ҫын каварлӑ вируса парӑнтарайман. Ӗнер те ҫавӑн чухлех пациент пурнӑҫран уйрӑлнӑ.
+34.3 °C