Ҫӗршывра кӑшӑлвирус инфекцийӗ пысӑк хӑвӑртлӑхпа сарӑлнӑран РФ Сывлӑх сыхлавӗн министерстви харӑсах ковидран тата грипран прививка тума ирӗк панӑ. Кун пирки ведомствӑн пресс-служби пӗлтерет.
«Ку улшӑнусене «Спутник V» вакцинӑпа усӑ курмалли инструкцие кӗртнӗ», - ҫапла пӗлтернӗ министерство. Ведомство хыпарланӑ тӑрӑх, «Спутник V»-на грипран хӳтӗленмелли вакцинӑпа пӗрле тутарсан иммуногенноҫ сыхланса юлать.
Прививкӑсене кӗлеткен тӗрлӗ пайне тума юрать. Тӗслӗхрен, сылтӑм тата сулахай хулпуҫҫирен.
Юпа уйӑхӗнче кӑшӑлвирусран сывалакансен хисепӗ тӑрук чакрӗ. Вилекенсем вара нумай. Ҫак уйӑхра республкӑра 327 ҫын сывалайман. Юлашки талӑкра 14 ҫын кӑшӑлвируса пула вилнӗ. Ку таранччен 2640 ҫын пурнӑҫран уйрӑлнӑ.
Паянхи кун тӗлне 36669 ҫын чирленӗ. Вӗсенчен 32126-шӗ сывалнӑ. Юлашки талӑкра 98 ҫын сывалнине палӑртнӑ. Чирлекенсем вара юлашки талӑкра 144 ҫын пулнӑ.
Хальхи вӑхӑтра стационарсенче тата килте амбулатори мелӗпе кӑшӑлвирусран 1903 ҫын сипленет.
Республикӑра лару-тӑру йывӑрланнӑран юпа уйӑхӗн 30-мӗшӗнчен пуҫласа чӳк уйӑхӗн 7-мӗшӗччен чылай предприятипе организацие ӗҫлеме чарӗҫ. Сӑмах суту-илӳ центрӗсем, вӑйӑ пӳлӗмӗсем, фитнес-клубсем, общепит пирки пырать.
Апат-ҫимӗҫ лавккисем, аптекӑсем, куллен кирлӗ япаласен лавккисем ӗҫлӗҫ. Ҫаксене Роспотребнадзорӑн Чӑваш Енри управленийӗн пуҫлӑхӗ Надежда Луговская сӗннӗ. Олег Николаев кунпа килӗшнӗ.
Олег Алексеевич ковид-фри режимра ӗҫлеме май пур общество апатланӑвӗн предприятийӗсене хупмалла маррине палӑртнӑ.
Чӑваш Енре кӑшӑлвирус енчен лару-тӑру питӗ япӑх. Ҫавна май тӳре-шара ҫӗнӗ йышӑнусем тӑвать.
Палӑртмалла: пиллӗкмӗш эрне ӗнтӗ ковидпа чирлекенсен йышӗ ӳссе пурать. Хальхи вӑхӑтра республикӑри пульницӑсенче 3500 яхӑн ковид-койка хатӗрленӗ. Ҫапах вӗсен 4,5 проценчӗ ҫеҫ пушӑ.
Юлашки кунсенче лару-тӑру йывӑрланнӑран Хӗрлӗ Чутай районӗнче те хушма койкӑсем йӗркеленӗ. Хӗрлӗ Чутай районӗн тӗп пульницинче кӑшӑлвируспа чирлисем валли 100 койка хатӗрленӗ.
Шупашкар хулинчи Тӗп хула пульницинче аслисем валли респиратор центрӗ уҫасшӑн. Ку ӗҫе кӑҫалхи чӳк уйӑхӗн 1-мӗшӗнче пуҫӑнма палӑртнӑ, ӗҫе раштав уйӑхӗн 31-мӗшӗнче вӗҫлемелле.
Респиратор центрӗ уҫассине «Паллиативлӑ медицина пулӑшӑвӗ парассин тытӑмне аталантарасси» программӑра пӑхса хӑварнӑ. Документа кӑҫалхи юпа уйӑхӗн 20-мӗшӗнче улшӑну кӗртнӗ.
Программӑра палӑртнӑ тӑрӑх, 2024 ҫул вӗҫне аслисене паллиативлӑ медицина пулӑшӑвӗ кӳрекен 10 пӳлӗм ӗҫлеттерме тытӑнӗҫ. Ҫав тӗллевпе Ҫӗнӗ Шупашкарти хула пульницинче, Шупашкарти Васкавлӑ медицина пулӑшӑвӗн пульницинче, Канашри тата Ҫӗмӗрлери территорисем хушшинчи медцина центрӗсенче, Патӑрьел тата Елчӗк районӗсенчи тӗп пульницӑсенче ҫавӑн пек тата тепӗр 6 кабинет уҫӑлмалла.
Юлашки талӑкра республикӑра 146 ҫын кӑшӑлвируспа чирленӗ. Ӗнер ку кӑтарту 137 ҫынпа танлашнӑ. Кунашкалли тахҫантанпах пулман.
Юлашки талӑкра 10 ҫын кӑшӑлвируса пула вилнӗ. Пӗтӗмпе 2585 ҫын чире парӑнтарайман. Ку таранччен 36233 ҫын инфекциленнӗ, вӗсенчен 31899-шӗ сывалнӑ.
Сывалса пыракансем вара пачах сахал. Юлашки талӑкра 16 ҫын ҫеҫ чире парӑнтарнӑ. Паянхи кун тӗлне стационарсенче тата килте амбулатори мелӗпе 1749 пациент кӑшӑлвирусран сипленет. Кун пек кӑтарту пӗлтӗрхи ҫурла уйӑхӗнченпе пулман.
Роспотребнадзорӑн Чӑваш Енри управленийӗ кӑшӑлвирусран прививка тумаллисен списокне анлӑлатас шухӑшлӑ. Республикӑн Экономика аталанӑвӗн тата пурлӑх хутшӑнвӗсен министерстви те ку сӗнӗве ырлать иккен.
Роспотребнадзорӑн Чӑваш Енри управленийӗн ертӳҫин ҫумӗ Вера Головач пӗлтернӗ тӑрӑх, «хӑш-пӗр регионта обществӑлла апатлану предприятийӗсем ҫеҫ мар, мӗнпур суту-илӳ сфери QR-кодсене тӗрӗслет». Тепӗр майлӑ каласан, суту-илӳ центрӗсене те тӗрӗслесе кӗртеҫҫӗ. Тавар туянакансен е ковидран вакцинациленнине ҫирӗплетсе памалла, е кӑшӑлвируспа чирленӗренпе ҫур ҫул иртменнине кӑтартса паракан справка кирлӗ, е ковид ерменнине ӗнентерекен ПЦР-тест ыйтаҫҫӗ.
Прививка тутарма никама та ӳкӗте кӗртме хӑтланмалла мар, вакцинаци тутармаллисен списокне анлӑлатмалла. Ҫапларах татса каланӑ республикӑн экономика аталанӑвӗн тата пурлӑх хутшӑнӑвӗсен министрӗн ҫумӗ Денис Спирин Роспотребнадзор сӗнӗвӗпе килӗшнине палӑртса.
Кардиологи диспансерӗнче кӑшӑлвируспа йывӑр чирленӗ ача амӑшне сиплеҫҫӗ. Унӑн ӳпки 100 проценчӗпех сиенленнӗ.
Ҫамрӑк хӗрарӑм кӑшӑлвируспа ача кӗтнӗ чухне чирленӗ. Сывлӑхӗпе йывӑрлӑхсем сиксе тухнӑран ӑна вӑхӑтсӑр ҫураттарнӑ. Хӗрарӑма пурнӑҫне тытса пыракан аппаратпа сывлаттараҫҫӗ.
Халӗ ӑна талӑкӗпех тухтӑрсем сӑнаса тӑраҫҫӗ. Палӑртмалла: хӗрарӑм кӑшӑлвирусран прививка тутарман. Аса илтерер: юпа уйӑхӗнче ача кӗтекен хӗрарӑмсене 22 эрне хыҫҫӑн вакцинациленме ирӗк панӑ.
Хальлӗхе «кӑшӑлвирус» диагноз лартнӑ 1526 ҫын стационарсенче тата килте амбулатори мелӗпе сипленет. Юлашки вӑхӑтра стационартан сывалса тухакансем сахалланнӑ. Юлашки талӑкра ав 9 ҫын чире парӑнтарнӑ. Вилекенсем вара икӗ хут нумайрах пулнӑ: 18 ҫын.
Ку таранччен 35953 ҫын кӑшӑлвируспа чирленӗ, вӗсенчен 31867-шӗ сывалнӑ. Пӗтӗмпе республикӑра 2560 ҫын кӑшӑлвирусран вилнӗ. Ҫапла чирленӗ кашни 14-мӗш ҫын пурнӑҫран уйрӑлнӑ. Ку статистикӑна пневмонипе, кӑшалвирус хыҫҫӑн сывлӑх хавшанипе вилнӗ ҫынсем кӗмен.
Юлашки талӑкра 131 ҫын чирленине палӑртнӑ. Юлашки вӑхатра кӑтарту пысӑклансах пырать.
Ҫӗршывӑн вице-премьерӗ Татьяна Голикова Раҫҫей ҫыннисене юпа уйӑхӗн 30-мӗшӗнчен тытӑнса чӳк уйӑхӗн 7-мӗшӗччен кантарасшӑн. Ку сӗнӳпе вӑл Владимир Путин Президент патне тухас кӑмӑллине пӗлтернӗ. Ҫакӑн пирки вӑл кӑшӑлвируспа кӗрешес енӗпе ӗҫлекен координаци канашӗн президиумӗн паянхи ларӑвӗнче пӗлтернӗ.
Ҫӗршыв Правительствин Председателӗн заместителӗ каланӑ тӑрӑх, хӑш-пӗр регионта кану кунӗсене юпа уйӑхӗн 23-мӗшӗнченех йышӑнмалла.
РФ Правительствин Председателӗ Михаил Мишустин хӑйӗн заместителӗ сӗннипе килӗшнӗ. Ку ыйтӑва ыранхи канашлура Владимир Путин патне ҫитерӗҫ.
+20.3 °C