Раҫҫейри 1250 вӗрентекен Владимир Путин президентӑн премине – 200 пин тенке – тивӗҫнине, вӗсенчен 11-шӗ Чӑваш Енрен, 2-шӗ чӑваш чӗлхипе литературин вӗрентекенӗ пулнине тин кӑна пӗлтернӗччӗ.
Ҫак йышпа туллин паллаштарӑр. Премие тивӗҫнисен хушшинче — Ҫӗнӗ Шупашкарти 17-мӗш шкулти Екатерина Ананьева, Шупашкарти 5-мӗш шкулти Малека Гасанова, Куславккари 3-мӗш шкулти Лариса Гладкова, Елчӗк шкулӗнчи Алексей Данилов, Шупашкарти 2-мӗш лицейри Ольга Данилова, Ҫӗнӗ Шупашкарти 12-мӗш шкулти Василиса Егорова, Шупашкарти сывлӑх енчен хавшак ачасен 2-мӗш шкулӗнчи Ираида Мартьянова, Вӑрнар районӗнчи Пӑртас шкулӗнчи Татьяна Петрова, Улатӑрти 2-мӗш шкулти Елена Селезнева, Ҫӗмӗрлери 1-мӗш шкулти Татьяна Соколова, Шупашкарти 40-мӗш шкулти Александр Степанов.
Ӗнер, ҫурла уйӑхӗн 13-мӗшӗнче, Улатӑр лесничествинче вӑрман ҫунма пуҫланӑ. Кун пирки пушарнӑйсене 18 сехетре пӗлтернӗ.
Ҫулӑм тухнине Эйпеҫ тӑрӑхӗнче вӑрман инспекторӗ асӑрханӑ. Пушара ҫур сехетрен сӳнтернӗ. Ҫулӑм 0,1 гектар ҫӗр ҫинче алхаснӑ. Телее, вӑл вӑрман хуҫалӑхне тӑкак кӳмен.
Халӗ пушар мӗне пула тухнине тӗпчеҫҫӗ.
Улатӑрта 8 ҫулти арҫын ача пиҫсе кайнӑ. Ӑна пульницӑна илсе ҫитернӗ. Тухтӑрсем палӑртнӑ тӑрӑх, унӑн ӳчӗ самай пиҫсе кайнӑ, сиенленнӗ лаптӑк 1-2-мӗш степеньпе танлашнӑ.
Мӗн пулса иртнӗ-ха? Ҫурла уйӑхӗн 8-мӗшӗнче каҫхине вӗсем тусӗсемпе «Стрелка» микрорайонта ҫунакан шӗвекпе усӑ курса кӑвайт чӗртме тӑнӑ. Ҫулӑм вара арҫын ачан тумтирӗ ҫине куҫнӑ.
Палӑртмалла: ҫулталӑк пуҫланнӑранпа республикӑра 932 пушар пулнӑ, вӗсенче 38 ҫыннӑн пурнӑҫӗ татӑлнӑ.
Йывӑрлӑха лекнӗ хӗрарӑмсене пулӑшассине Чӑваш Енре анлӑлатасшӑн.
Пурнӑҫри йывӑр лару-тӑрӑва лекнисене пулӑшакан сакӑр центртан тӑракан сеть йӗркелесшӗн. Ӑна пирӗн республикӑра 2025 ҫул тӗлне ӗҫлеттерсе ярасшӑн.
Паянхи куна ун пек нумай функциллӗ центрсем Шупашкарта тата Ҫӗмӗрлере пур. 2023 ҫул вӗҫне Шупашкарпа Канашра ӗҫлеттерсе ярасшӑн. 2025 ҫул тӗлне ун пеккисене тата тепӗр тӑваттӑ йӗркелесшӗн: Шупашкарта, Вӑрмарта, Улатӑрта, Ҫӗнӗ Шупашкарта.
Асӑннӑ центрсен сетьне Чӑваш Енӗн Ӗҫ тата социаллӑ хӳтлӗх министерстви, халӑха социаллӑ пулӑшу паракан комплекслӑ центрсен уҫмалла.
2005-2015 ҫулсенче Улатӑр хулин администрацийӗн пуҫлӑхӗ пулнӑ Михаил Марискина Улатӑр хулин хисеплӗ ҫыннин ятне панӑ.
2018 ҫулта ӑна коррупцишӗн судпа айӑпланӑ. Следстви тата суд палӑртнӑ тӑрӑх, вӑл подряд организацине нимшӗн-мӗншӗн хыснаран 1,1 миллион тенкӗ куҫарса панӑ. Лешӗ хӑйӗн ӗҫне пурнӑҫламан та. Кунсӑр пуҫне вӑл ҫӗрпе ҫыхӑннӑ ултавшӑн та айӑпланнӑ. Суд Михаил Марискина юсанмалли колоние 2 ҫул та 8 уйӑхлӑха яма йышӑннӑ.
Канашри, Тӑвай районӗнчи таврапӗлӳ музейӗсене кӑҫал юсӗҫ, Улатӑрти таврапӗлӳ музейӗн экспозицине ҫӗнетӗҫ
ЧР Культура министерстви пӗлтернӗ тӑрӑх, Канашри музейӗн тӑррине тата фасадне ҫӗнетме 6 млн тенкӗ ытла уйӑрнӑ. Тавай районӗнчи музейӗн шалтине юсама вара 15,6 млн тенкӗ пӑхса хунӑ.
Улатӑрти музея кирлӗ хатӗр-хӗтӗрпе тивӗҫтерме 28,3 млн тенкӗ уйӑрӗҫ. Унта "Вырӑс провинцийӗн дизайнӗ" проект пурнӑҫланать.
Улатӑрти Киров урамӗнчи 36, 38 тата 60-мӗш, Ленин урамӗнчи 43-мӗш ҫуртра пурӑнакансем видео ӳкерсе Чӑваш Ен влаҫӗнчен пулӑшу ыйтнӑ. 2 ҫул каялла вӗсем хӑйсем укҫа пухса ачасем валли вылямалли лапам тунӑ, тӑвайкки вырнаҫтарнӑ. Ӑна хӑйсем пӑхса тӑраҫҫӗ, унта чечексем лартаҫҫӗ.
Анчах ҫак илем ҫывӑхра пурӑнакан пӗр хӗрарӑма чӑрмантарать. Ачасем шавлаҫҫӗ-мӗн. Ҫавӑнпа вӑл прокуратурӑна заявлени ҫырнӑ. Ведомство вара суда тавӑҫ тӑратнӑ.
Ҫынсем ача-пача лапамне пӑстарасшӑн мар, ҫавӑнпа пулӑшу ыйтаҫҫӗ те. Унта ытти микрорайонти ачасем те выляма килеҫҫӗ.
Утӑ уйӑхен 21-мӗшӗнче Кире вӑрман хуҫалӑхӗнче вӑрман касакансем тупӑшнӑ. Вӗсем 5 хӑнӑхтарура вӑй виҫнӗ.
Конкурса Чӑваш Енри пӗртен-пӗр вӑрман касакан хӗрарӑм Галина Климина хутшӑннӑ. Вӑл регион, Раҫҫей тата тӗнче шайӗнчи чемпионатсенче пӗрре мар ҫӗнтернӗ.
Вӑрман касакан профессионалсен йышӗнче Сергей Субботин пӗрремӗш вырӑн йышӑннӑ. Иккӗмӗш вырӑнта - Андрей Климин, виҫҫӗмӗшӗнче - Брянск облаҫӗнчи Владимир Буянов. Профессионал маррисен хушшинче Йӗпреҫ лесничествинчи Владимир Борисов, Канаш лесничествинчи Сергей Кириллов, Улатӑр лесничествинчи Сергей Фадеев малти вырӑнсене йышӑннӑ.
Иркутск облаҫӗнче иртекен Раҫҫей чемпионатне Артём Шашков, Сергей Субботин, Андрей Климин тата Галина Климина кайӗҫ.
Кӑҫал нарӑс уйӑхӗнче Улатӑрти хут хапрӑкӗнче платник 4 метр ҫӳллӗшӗнчен бетон урайне персе аннӑ. Вӑл каярахпа, темиҫе эрнерен, пульницӑра вилнӗ. Платник ӳкнӗ чухне ӳсӗр пулни паллӑ.
Ӳсӗр арҫынна ӗҫлеме ирӗк панӑ ҫынна, ертӳҫе, явап тыттарнӑ. Утӑ уйӑхӗн 20-мӗшӗнче суд пулнӑ. Ӑна тӗрмене хупмасӑр ҫулталӑк ҫурӑлӑха айӑпланӑ.
Ертӳҫӗ хӑйӗн айӑпне йышӑннӑ. Вӑл вилнӗ платникӑн ҫемйине кӑмӑл-сипет тӗлӗшӗнчен сиен кӳнӗшӗн укҫан саплаштарнӑ.
Улатӑрти 78 ҫулти Светлана Васильевна пуҫ ҫаврӑннине, вӑй ҫуккине, ури шыҫӑннине туйнӑ. Чӗри пӗр минутра 30 хутчен кӑна тапнӑ. Ӑна пӗр тӑхтамасӑр санавиаци вертолечӗпе Шупашкара илсе ҫитернӗ. Унта унӑн чӗрине хамӑр ҫӗршывра туса кӑларнӑ электрокардиостимулятор вырнаҫтарнӑ.
Паянхи кун 78 ҫулти хӗрарӑм хӑйне лайӑх туять. Вӑл тепӗр эрнерен киле таврӑнма хатӗрленет. Унта ӑна ывӑлӗн ҫемйи, икӗ мӑнукӗ кӗтеҫҫӗ. Светлана Васильевна пурнӑҫне ҫӑлнӑ тухтӑрсене чун-чӗререн тав тунӑ.
+20.3 °C