Авӑн уйӑхӗн 13-мӗшӗнче пирӗн ҫӗршывра пӗрлехи суйлав кунӗ тесе йышӑннӑ. Ун чухне Чӑваш Ен Элтеперне тата муниципалитсенчи депутатсене суйлӗҫ.

Кӑшӑлвирус инфекцийӗнчен шкиленнипе, ӑна сарасран асӑрханас тӗллевпе суйлава виҫӗ кун хушши ирттерӗҫ. Кун пирки Чӑваш Енӗн Тӗп суйлав комиссийӗ ӗнер йышӑннӑ. Ҫапла вара сасӑлава авӑн уйӑхӗн 11 тата 12-мӗшӗсенче те ирттерӗҫ. Тӗп суйлав кунӗ ҫапах та 13-мӗшӗнче пулӗ тесе пӗлтернӗ.

Аса илтерер: республика Элтеперӗн суйлавне 5 кандидат хутшӑнать. Вӗсенчен тӑваттӑшӗ — парти сӗннӗ кандидатсем: Сергей Матвеев («Раҫҫей патриочӗсем»), Николай Степанов («Пенсионерсен социаллӑ тӗрӗслӗхӗшӗн партийӗ»), Александр Андреев (Раҫҫей Федерацийӗн коммунистсен партийӗ), Константин Степанов (либерал-демократсен партийӗ). Республика ертӳҫин тивӗҫне хальхи вӑхӑтра пурнӑҫлакан Олег Николаев хӑйӗн кандидатурине хӑй тӗллӗн тӑратнӑ.

Кӑҫалхи авӑн уйӑхӗнчи суйлав вӑхӑтӗнче хӑрушсӑрлӑх мерисене туллин пӑхӑнмалла. Ҫакӑн пирки Чӑваш Ен Правительствин ҫуртӗнче тунтикунхи планерка ирттернӗ чухне республика Элтеперӗн тивӗҫӗсене вӑхӑтлӑх пурнӑҫлакан Олег Николаев сӑмах хускатнӑ.

Яваплисен кӑшӑлвирус сарӑлнипе кӗрешекен республикӑри оперштабӑн эрнекунхи ларӑвӗ тӗлне сӗнӳсем хатӗрлемелле. Ҫав шутра — республикӑн Тӗп суйлав комиссийӗн те. Ҫавсене шута илсе татӑклӑ йышӑну тӑвӗҫ. Хӑрушсӑрлӑх валли хушма укҫа кирлӗ пулсан уйӑрӗҫ, суйлав комиссийӗсен пайташӗсене вӗрентмелле пулсан вӗрентӗҫ.

Аса илтерер: кӑҫалхи авӑн уйӑхӗн 13-мӗшӗнче эпир республика Элтеперне тата вырӑнти хӑй тытӑмлӑх орагнӗсен депутачӗсене суйлӑпӑр.

Шупашкар хулинче, Хусанкай урамӗнчи шкул ҫывӑхӗнче, ҫул урлӑ каҫнӑ ҫӗрте светофор вырнаҫтарнӑ. Анчах вӑл ыттисенчен уйрӑлса тӑрать. Светофора хӗвел энергийӗпе ӗҫлемелле тӑнӑ. Ҫуран ҫӳрекенсем каҫнине, машинӑсен хӑвӑртлӑха чакармаллине светофор выляса тӑракан сарӑ ҫутӑпа асӑрхаттарать.

Специалистсем каланӑ тӑрӑх, шкултан инҫех мар светофор вырнаҫтарни инкексенчен асӑрханма пулӑшӗ. Светофор хӗвел энергийӗпе ӗҫленӗрен ун валли ҫутӑ кирлӗ мар. Вӑл кӑнтӑрла та, каҫпа та пӗр пек ӗҫлейрет.

Шупашкар хула администрацийӗн ҫурт-йӗрпе коммуналлӑ хуҫалӑх тата хӑтлӑх кӗртекен управленийӗнче пӗлтернӗ тӑрӑх,

хӗвел энергийӗпе ӗҫлекен светофорсене ытти вырӑнта та вырнаҫтарма пулать.

Ҫул урлӑ каҫнӑ чухне асӑрханмалла тата тимлӗ пулмалла. Ҫакна аса илтерес тесе Шупашкарта «Говорящие переходы» (чӑв. Ҫул урлӑ каҫмалли калаҫакан выӑнсем) акци пуҫарнӑ.

Ӑна ҫул-йӗр хӑрушсӑрлӑхӗн инспекторӗсем, Шупашкарти Депутатсен пухӑвӗн депутачӗ Елена Нестерова тата «Вместе» (чӑв. Пӗрле) халӑх организацийӗн пайташӗ Дмитрий Кудряшов пуҫарнӑ.

Шупашкар хулин кӑнтӑр-хӗвеланӑҫ районӗнчи ҫул урлӑ каҫмалли вырӑнсенче аслисемпе ачасем валли ятарлӑ чӗнӳсем ҫырса хурӗҫ. Вӗсем шкулсем, ача пахчисем, социаллӑ пӗлтерӗшлӗ объектсем ҫывӑхӗнчи тротуарсем ҫинче пулӗҫ.

«Наушника кӑлар», «Телефонтан тух», «Велосипед ҫинчен ан», «Ачана ҫавӑт» йышши асӑрхаттарусем ҫул урлӑ каҫнӑ чух тимлӗ пулмаллине аса илтерӗҫ.

Чӑваш Енӗн Транспорт тата ҫул-йӗр хуҫалӑхӗн министерстви пассажирсене тата багажа хулапа хула хушшинче турттарассине унчченхилли йӗркепе ҫӗнӗрен пуҫарма йышӑннӑ. Ҫапла тӑвассине кӑшӑлвирус сарӑлассине хирӗҫ ӗҫлекен республикӑри оперативлӑ штабӑн ларӑвӗнче ырланӑ.

Ҫапла вара ҫӗртме уйӑхӗн 8-мӗшӗ хыҫҫӑн муниципалитетсем хушшинчи маршрутсем реестрти расписанипе килӗшӳллӗн ӗҫлӗҫ.

Аса илтерер: республикӑра хальхи вӑхӑтра ятарлӑ санитарипе эпидемиологи режимӗ вӑйра. Ҫавӑ ҫӗнӗ кӑшӑлвирус инфекцийӗ алхаснипе ҫыхӑннӑ. Автобуссем унчченхиллех ҫӳреме тытӑнсан та хӑрушсӑрлӑх мерисене пӑхӑнмалла мар тесе асӑрхаттарать ЧР Транспорт тата ҫул-йӗр хуҫалӑхӗ. Транспортра тата чарӑнусенче маска тӑхӑнмалла.

Сӗнтӗрвӑрри районӗнче автомашина водителӗ пӑши ҫине пырса кӗнӗ. Инкек ҫӗртме уйӑхӗн 2-мӗшӗнче 21 сехет те 10 минутра пулса иртнӗ. «ВАЗ-21124» машина умне пӑши сиксе тухнӑ. Пырса ҫапӑннипе чӗрчун вилнӗ. Автомашинӑн водителӗ тата пассажир аманман. Ҫул-йӗр хӑрушсӑрлӑхӗн водителӗсем ҫулта-йӗрте асӑрханса ҫӳреме сӗнеҫҫӗ. Уйрӑмах – «Дикие животные» (чӑв. Тискер чӗрчунсем) паллӑ тӗлӗнче. Ҫул ҫинче е ҫул хӗрринче чӗрчуна курсан машина хӑвӑртлӑхне чакармалла. Пиклеттерсе е фарӑпа ҫутатса чӗрчуна хӑратма кирлӗ мар. Ун пек тусан вӑл хӑраса кайнипе хӑйне епле тытассине пӗлме ҫук. Таса уйпа пынӑ чух тата хирӗҫ машинӑсем килмен чух аякрине кӑтартакан фарӑна ҫутма сӗнеҫҫӗ.

Ҫӗртме уйӑхӗн 1-мӗшӗнчен Шупашкартан Мускава самолетсем вӗҫме тытӑннине эпир пӗлтернӗччӗ ӗнтӗ. Аса илтерер: икӗ уйӑх ӗҫлемен хыҫҫӑн аэропорт ҫӗртме уйӑхӗн 1-мӗшӗнче ҫӗнӗрен уҫӑлчӗ. Ҫавӑн хыҫҫӑн Мускавран килнӗ пӗрремӗш самолет тулли пулнӑ. Паян унтан черетлӗ рейс килмелле, 21 сехет те 45 минутра вӑл каялла вӗҫсе каймалла. Ҫапла, хальлӗхе самолетсем пӗр кун урлӑ ҫӳреҫҫӗ.

Шупашкарти аэропортри лармалли зал пӗчӗккине кура авиапассажирсене перрона тухмалли тепӗр зонӑра самолет кӗтме май туса панӑ. Маска тӑхӑнмаллине те аса илтереҫҫӗ. Кирлӗ пулсан ӑна аэропортра сутаҫҫӗ.

Хӑрушсӑрлӑх мерисене аэропорт ӑнланса йышӑнма ыйтать. Аэровокзал пӗчӗккине кура пассажирсене ӑсатма пыракансемсӗр пыма сӗнеҫҫӗ.

Шупашкарта ҫӑлавҫӑ-матроссем ӗҫе кӳлӗннӗ. Ӗнер, ҫӗртме уйӑхӗн 1-мӗшӗнче, вӗсем пӗрле пухӑннӑ. Тӳрех палӑртар: ятарлӑ хушу тухиччен Шупашкарти пляжсем ӗҫлемӗҫ. Кӑшӑлвирусран шикленнипе шыва кӗме те чараҫҫӗ. Тепӗр тесен, шыва кӗме ҫанталӑк та май паман-ха. Шупашкар хула администрацийӗн ЖКХ, энергетика, транспорт тата ҫыхӑну управленийӗ хула администрацийӗн сайтӗнче ҫырнӑ тӑрӑх, пляжа пыракансен маска тата перчетке тӑхӑнмалла, социаллӑ инҫӗше пӑхӑнмалла.

Шыва кӗмелли тапхӑр валли Шупашкарта тӑватӑ пляж хатӗрленӗ: тӗп пляжа, Афанасьев урамӗнчине, Ҫӗнӗ саларине тата Атӑлӑн сулахай ҫыранӗ енчине. Пляжсене тирпейлесе тасатнӑ. Шыв тӗпне ҫӑлавҫӑсем тӗрӗсленӗ.

turproezdka.ru сӑнӳкерчӗкӗ

Туристсен инҫе похода каяс тесен Инкеклӗ ӗҫсен министерствин Чӑваш Енри тӗп управленине вӑхӑтра пӗлтермелле. Вӗсен ҫула тухиччен 10 кунран маларах хӑйсен маршручӗ пирки систермелле. Ҫакна туристсен хӑрушсӑрлӑхӑшӗн тунӑ йышӑну тесе пӗлтереҫҫӗ. Ҫулта-йӗрте тем сиксе тухсан шыраса тупса пулӑшу кӳрес тӗллевпе ҫапла ыйтаҫҫӗ.

Тристсен ушкӑнӗсен заявкӑсене МЧС сайтӗнче https://forms.mchs.ru/service/registration_tourist_groups хӑварма май пур. Унти ятарлӑ формӑра ҫула миҫе ҫын тухассине, ӑҫта каяссине, хӑҫан таврӑнассине, пӗлтерӗшлӗ ытти информацие ҫырмалла. Похода каякансене телефон номерӗсене те кӑтартма ыйтаҫҫӗ. Ку вӑл ҫыхӑнма кирлӗ.

Чӑваш Ене виҫӗмкун экран евӗр хӳтлӗх хатӗрӗсем килсе ҫитнӗ. Кун пирки «Фармаци» патшалӑхӑн хысна предприятийӗ хыпарлани тӑрӑх республикӑн Сывлӑх сыхлав министерстви паян пӗлтернӗ.

Пластик хӳтлӗх хатӗрсене «Фармаци» предприятин аптека базине кӳрсе килнӗ. Пурӗ 700 экран. Вӗсене Чулхулари уйрӑм ҫын предприятийӗсенчен пӗринче туса кӑлараҫҫӗ. Хӳтлӗх хатӗрӗсене «Фармаци» предприяти республикӑн медицина организацийӗсене валеҫӗ.

Пластик хӳтлӗх хатӗрӗсене тухтӑрсене чирлӗ ҫынсемпе ҫывӑх хутшӑннӑ чух тӑхӑнма парӗҫ. Экрансене антиспектикпа тасатма пулать. Ҫӑмӑл. Вӗсене темиҫе хут та тӑхӑнма май килӗ.

Сӑмах май, пирӗн республикӑра та ун пек хатӗрсем туса кӑларма пуҫланине пӗлтернӗччӗ.