ЧР Транспорт министерстви виҫӗ маршурт валли перевозчик шыранине пӗлтернӗ. Ку «Шупашкар – Ҫӗнӗ Шупашкар» маршрута пырса тивет.
Тӳре-шара 101С, 234, тата 270-мӗш маршуртсем тӗлӗшпе уҫӑ конкурс ирттеме йышӑннӑ. Унта хутшӑнса ҫӗнтерекенӗн маршрута пысӑк тата вӑтам класлӑ автобуссем кӑлармалла.
Заявкӑсене утӑ уйӑхӗн 12-мӗшӗччен йышӑнаҫҫӗ. Сӑмах май, 101, 65, 3, 22, 30 тат 33-мӗш маршрутсем валли те перевозчик шыраҫҫӗ.
Шупашкарта хӗрарӑм больницӑран тухса кайнӑ та ҫухалнӑ. Вӑл опараци хыҫҫӑн пулни паллӑ. Хӗрӗ амӑшӗ ҫухални пирки ҫав кунах йӗрке хуралне пӗлтернӗ.
71 ҫулти Шабашова Надежда Захаровна Гладков урамӗнчи Республикӑри кардиологи диспансерӗнче сипленнӗ. Паян вӑл унтан тухса кайнӑ. Вӑл хӗрлӗ халат тата ҫутӑ кӑвак сланца тӑхӑннӑ пулнӑ.
Надежда Шабашова 149 сантиметр ҫӳллӗш, имшеркке. Ун пирки мӗн те пулин пӗлсен ҫак номерсемпе шӑнкӑравламалла: 8 (800) 700-54-52 е 112
Шупашкарти В.М. Краснов ячӗллӗ олимп резервӗн училищине юсама шухӑшлаҫҫӗ. Республикӑн тариф служби проект документацине хатӗрлекене палӑртма аукцион ирттернӗ.
Реконструкци валли укҫа-тенке республика хыснинчен уйӑрӗҫ. Аукциона хутшӑнас кӑмӑллисем пилӗккӗн тупӑннӑ. 29,6 миллиона яхӑн тенкӗ тӑракан контракта Дон ҫинчи Ростоври «КС-Девелопмент» общество выляса илнӗ.
Компанин кӑҫалхи раштавӑн 10-мӗшӗччен инженер ӗҫӗсене пурнӑҫламалла, проект тата ӗҫ документацине хатӗрлемелле.
Шупашкарти В.М. Краснов ячӗллӗ олимп резервӗн училищи Шкул проездӗнчи 3-мӗш ҫуртра вырнаҫнӑ. Унӑн 3 хутлӑ вӗренӳ корпусӗ тата 4 хутлӑ общежити пур.
Шупашкар хулинчи йӗрке хуралҫисем ҫын хутаҫне йӑтса кайнӑ хӗрарӑма шыраҫҫӗ.
Чӑваш Ен Шалти ӗҫсен министерствинче пӗлтернӗ тӑрӑх, хутаҫра 500 пин тенкӗ укҫа пулнӑ.
Пӑтӑрмах паян, ҫӗртме уйӑхӗн 11-мӗшӗнче, кӑнтӑрла, Карл Маркс урамӗнчи кредит учрежденийӗнче пулса иртнӗ.
Ҫур миллион тенкӗ чикнӗ хутаҫ 71 ҫулти арҫыннӑн пулнӑ. Ӑна вӑл айккинелле хурса янӑ.
Вӑхӑтлӑха хуҫасӑр выртнӑ хутаҫа ҫулланнӑ хӗрарӑм йӑтса тухса кайнӑ. Сӑнпа пӑхсан ҫав хӗрарӑм 55-60 ҫулсенче, унӑн ҫӳллӗшӗ 160-170 сантиметр, тӗреклӗ хул-ҫурӑмлӑ, ҫӳҫӗ ҫутӑ, ӑна кӗске кастарнӑ. Хӗрарӑм ҫутӑ хӗрлӗ платье тӑхӑннӑ.
Ҫак ҫынна уйӑрса илнисене 24-20-03 е 102 номерпе полицие шӑнкӑрӑвласа пӗлтерме ыйтаҫҫӗ.
Ҫӗртме уйӑхӗн 9-мӗшӗнче Украинӑра Чӑваш Ен ҫыннипе, Совет Союзӗн Паттӑрӗпе, летчикпа Михаил Карпеевпа сыв пуллашнӑ. Пирӗн ентеш Харьков хулинче пурӑннӑ. 98 ҫула кайса пурнӑҫран уйрӑлнӑскере ӗнер юлашки ҫула ӑсатнӑ.
Фронтра вӑл 300 ытла хутчен вӗҫеве тухнӑ. Летчиксем унӑн ячӗпе Харьковри пӗр урам ятне пама ыйтнӑ. Михаил Карпеев вилсен Украинӑра пысӑк награда тивӗҫнӗ ветерансем пачах юлман.
Михаил Карпеев Якимово ялӗнче /халӗ вал Шупашкара кӗнӗ ӗнтӗ/ ҫуралнӑ.
Шупашкара Хусанпа ҫыхӑнтаракан юханшыв маршрутне уҫнӑ хыҫҫӑн (унта «Валдай» кимӗ ҫӳрӗ) Тутарстан влаҫӗсем те асӑннӑ маршрутпа хӑйсен пассажир карапне яма шухӑшлани пирки пӗлтернӗ. Кун пирки Чӑваш Ен Пуҫлӑхӗ Олег Николаев «Советская Чувашия» кӑларӑма панӑ интервьюра пӗлтернӗ.
Чӑваш Ен Элтеперӗ журналистсен ыйтӑвне хуравланӑ май икӗ республикӑн тӗп хули хушшинче ҫӗртме уйӑхӗ вӗҫӗнче ҫӳреме пуҫлакан «Валдайсем» ҫинче билет хакӗ автобусринчен уйрӑлса тӑмӗ тесе пӗлтернӗ. Маршрутра хальхи вӑхӑтра Сӗнтӗрвӑрринче тата Куславккара чарӑнусене пӑхса хӑварнӑ, Сӗве ялӗнче те чарӑну тӑвасси пирки шухӑшлаҫҫӗ.
Кунсӑр пуҫне Олег Алексеевич юханшыв маршрутне Тутарстан влаҫӗсем те уҫма шухӑшлани пирки пӗлтернӗ. Кун валли вӗсем хальхи вӑхӑтра Ешӗл Варти А.М. Горький ячӗллӗ савутра тума пуҫланӑ «Чайка» караппа усӑ курасшӑн. Пахалӑхӗсене танлаштарсан ку карапсем «Валдайсенчен» миҫе ҫынна турттарма пултарассипе (176 ҫынна хӑйпе илейрет; «Валдай» вара 45 ҫеҫ) ирттереҫҫӗ, анчах хӑвӑртлӑх енӗпе вӗсем япӑхрах. «Чайка» сехетре 18 ҫухрӑма яхӑн хӑвалама пултарать пулсан, «Валдай 45-Р» шывай ҫунатлӑ кимӗ сехетре 65 ҫухрӑм таран вӗҫтерме пултарать.
Ҫӗртме уйӑхӗн 7-мӗшӗнче Шупашкарта каллех ҫын ҫӳллӗ хутран ӳкнӗ. Кун пирки «Про Город» хаҫата халӑх корреспонденчӗ пӗлтернӗ.
Инкек 17 сехет те 40 минутра пулнӑ. Арҫын 9-мӗш Пилӗкҫуллӑх проспектӗнчи 24-мӗш ҫуртӑн 9-мӗш хутӗнчен ӳкнӗ.
Куракансем каланӑ тӑрӑх, арҫын ҫӳллӗшӗнчен ӳксенех сывлама пӑрахнӑ. Вӑл 27 ҫулта пулнӑ. РФ Следстви комитечӗн Чӑваш Енри следстви органӗсем ӗҫ-пуҫа уҫӑмлатаҫҫӗ, кун хыҫҫӑн тивӗҫлӗ йышӑну тӑвӗҫ.
Чӑваш Ен Элтеперӗ Олег Николаев Чӑваш Енре ҫуралнӑ, «Forbes» журнал малашлӑхлӑ тесе шухӑшлакан Георгий Соловьевпа тӗл пулнӑ.
Георгий Skyeng онлайн-шкул йӗркелесе янӑ. Проекта тӑван кӗтесре пурнӑҫа кӗртме каччӑна Шупашкарти 3-мӗш лицейре физика учителӗ пулса ӗҫленӗ Валерий Горбенко хавхалантарнӑ.
«Валерий Викторович мана нумай вӗрентнӗ. Ӑна пула эпӗ физика енӗпе пӗтӗм Раҫҫейри олимпиадӑра ҫӗнтертӗм. Хӑй вилес умӗн вӑл мана кунта та физика вӗрентекен кирлӗ тесе каланӑччӗ, килсе пулӑшма ыйтнӑччӗ. Ҫавна май эпӗ Шупашкарти 3-мӗш лицейра ачасемпе преподавательсем валли курс йӗркелес шухӑш тытрӑм», — каласа кӑтартнӑ ҫамрӑк.
Георгий Соловьев Шупашкарти 3-мӗш лицейре вӗреннӗ. 2007 ҫулта Мускаври физикӑпа техника институтне вӗренме кӗнӗ. Ҫавӑн хыҫҫӑн вӑл программист пулса ӗҫлеме тытӑннӑ.
Чӑваш Енре пурӑнакан пӗр арҫын Патшалӑхӑн ҫул-йӗр хӑрушсӑрлӑхӗн инспекцине ӗҫе вырнаҫма ӗмӗтленнӗ. Пули-пулми илес ҫук тесе шухӑшланӑран ултавҫӑ-хӗрарӑм капкӑнне ҫакланнӑ.
Шупашкарта пурӑнакан 32 ҫулти хӗрарӑм хӑйӗнпе паллаштарнӑ чухне автоинспекцире тӑрӑшатӑп тесе тыттарнӑ. Ҫынна пулӑшма килӗшенҫи пулнӑ вӑл.
Арҫынран вӑл 21 пин тенкӗ ыйтнӑ. Ара, тӑкӑксӑр май ҫук: судпа айӑпланманни ҫинчен справка тутармалла, медицина тӗрӗслевӗ витӗр тухмалла, ӗҫре кирлӗ тумтире туянмалла, ШӖМӗн Чулхулари академийӗнче вӗренмелле.
Чӑннипе хӗрарӑм ҫынсене унччен те пӗрре кӑна мар улталаннӑ иккен. Халӗ ӑна РФ Пуҫиле кодексӗн 159-мӗш статйин 2-мӗш пайӗпе явап тыттарӗҫ. Ҫынна улталанӑшӑн 5 ҫул таран хупса хума пултараҫҫӗ.
Ҫӗртме уйӑхӗн 12-мӗшӗнче Чулхуларан Шупашкара Атӑл тӑрӑх «Валдай 45Р» карап ҫӳреме тытӑнӗ. Ҫав кун транспорт сӑнавлӑ мелпе ҫула тухӗ. Ку хыпара Инстаграмри «Стратегии развития Нижегородской области» (чӑв. Чулхула облаҫӗн аталанӑвӗн стратегийӗ) страницӑра пӗлтернӗ.
Шыв ҫийӗн ҫӳрекен транспорт Чулхуларан ирхи 6 сехетре хускалмалла. Ҫул ҫинче вӑл 5 сехете яхӑн килӗ. Шупашкарта туристсем уҫӑлса ҫӳрӗҫ, кунти паллӑ вырӑнсемпе паллашӗҫ. Чулхулана «Валдай45Р» 15 сехет те 30 минутра тухса кайӗ, унти Рождественский пристане 20 сехет те 30 минута ҫитӗ. Юханшывпа уҫӑлса ҫӳренӗшӗн билет хакӗ 2500 тенкӗпе танлашӗ.
⠀
-0.7 °C