Раҫҫейри хӑш-пӗр регион, ҫав шутра Чӑваш Ен те, коронавируса пула йышӑнма сӗннӗ мерӑсене пурнӑҫламан-мӗн. Регионти влаҫсене кинотеатрсене, ачасен вылямалли пӳлӗмӗсене, каҫхи клубсене, йышпа канмалли ытти вырӑна пуш уйӑхӗн 23-мӗшӗнчех хупма каланӑ иккен.
Ҫакна 38 регионта ҫийӗнчех пурнӑҫланӑ, ыттисем ку ыйтӑва вӑхӑтра татса паман. Ҫав шутра – Чӑваш Ен те.
Кинотеатрсен харпӑрҫисен ассоциацийӗ ҫак ыйтӑва вӑхӑтра татса паман хуласен списокне хатӗрленӗ. Унта ҫаксем кӗнӗ: Белгород, Волгоград, Йошкар-Ола, Астрахань, Иркутск, Новосибирск, Ярославль тата Шупашкар. Палӑртмалла: ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев кинотеатрсене пуш уйӑхӗн 25-мӗшӗнче хупма сӗннӗ.
Кун пекех пулсан Шупашкарти аэропортӑн вӑхӑтлӑх хупӑнасси ҫеҫ юлать пулӗ. Аса илтерер: паянтан, пуш уйӑхӗн 28-мӗшӗнчен, Nordwind Airlines (ку компани «Северный ветер» тулли мар яваплӑ общество ятпа регистрациленнӗ) Шупашкара вӗҫме пӑрахӗ.
Халӗ тата «Победа» лоукостер авиапассажирсене пӑшӑрхантарнӑ. Ӗнер, пуш уйӑхӗн 27-мӗшӗнче, компани кун пирки сайтӗнче пӗлтернӗ. Ҫавна пассажирсене те вӑл электрон ҫырупа хыпарланӑ. Туянса хунӑ билет укҫине туллин тавӑрса пама шантарнӑ.
Лоукостер самолетсене ака уйӑхӗн 1-мӗшӗнчен вӗҫтерме пӑрахӗ. Ку мера ҫу уйӑхӗн 31-мӗшӗччен пырӗ. Самолетсене авиакомпани ҫӗршывӗпех ҫӳретме чарӗ. Ҫак мера Раҫҫей Правительствин йышӑнӑвӗпе килӗшсе тӑнине пӗлтернӗ.
Шупашкара хальхи вӑхӑтра Мускавран икӗ, Питӗртен пӗр компани ҫеҫ хутланине шута илсен аэропортӑн вӑхӑтлӑх хупӑнасси ҫеҫ юлать пулӗ.
Коронавирус сарӑлнине кура РФ Президенчӗ Владимир Путин ҫӗршывра пурӑнакансене пӗр эрне ӗҫе тухмасӑр канма сӗннӗ. Кун пирки сайтра пушӑн 26-мӗшӗнче пӗлтернӗччӗ.
Владими Владимирович сӗннипе чылайӑшӗ пуш уйӑхӗн 30-мӗшӗнчен пуҫласа акан 5-мӗшӗччен ӗҫе тухмӗ, килте ларӗ. Ку улшӑнусем общество транспортне те пырса тивеҫҫӗ – вӑл вырсарникунхи графикпа ӗҫлӗ. Эппин, Шупашкарта транспорт йышӗ ахаль чухнехинчен сахалрах пулӗ.
Владимир Путин кунашкал йышӑнӑва коронавируспа чирлисен йышӗ тӑрук нумайрах пуласран тунӑ.
Паян Шупашкарта Чукунҫул вокзалӗнче коронавируспа чирлеме пултарнӑ арҫынна васкавлӑ медпулӑшупа пульницӑна илсе кайнӑ. Унпа пӗрле купере виҫӗ ҫын пулнӑ, вӗсене те пульницӑна вырттарнӑ.
Ҫав арҫын чикӗ леш енчен Шупашкара Мускав урлӑ килнӗ, унӑн температура пулнӑ. Ӑна тата купере килнӗ ҫынсене икӗ васкавлӑ медпулӑшу бригади эвакуациленӗ. Вакун пассажирӗсенчен, проводниксенчен тата пуйӑс пуҫлӑхӗнчен – пӗтӗмпе 32 ҫынран – анализ илнӗ.
Чикӗ леш енчен килнӗ арҫынна Васкавлӑ медпулӑшу пульницине уйрӑм бокса вырнаҫтарнӑ, тепӗр виҫӗ пассажира – инфекци пульницине. Вакунри 16 ҫынна киле янӑ, вӗсем урама тухмӗҫ.
Чӑваш Енре те, Раҫҫейри пекех, 65 ҫултан аслӑрах ҫынсем карантинра лараҫҫӗ. Ку коронавирус сарӑлнипе ҫыхӑннӑ, мӗншӗн тесен специалистсем вирус ытларах ваттисене ернине палӑртнӑ.
Италире те халӗ ҫирӗп карантин пырать. Унта ҫынсем балкон ҫинче юрӑ шӑрантарнине МИХсенче те ҫырнӑччӗ. Шупашкарта пурӑнакан, халӗ килте карантинра ларакан кинемей те вӗсенчен тӗслӗх илнӗ. Октябрь: 50 ҫул урамра иртсе пыракансем ватӑ хӗрарӑм юрланине илтсен ҫакна телефон ҫине видео ӳкернӗ.
Хайхи кинемей купӑс каласа чӑвашла юрланӑ. Тӗнче тетелне вырнаҫтарнӑ ҫак видеона паянхи кун тӗлне 3 пине яхӑн ҫын пӑхнӑ.
Раҫҫейре коронавирус сарӑлнӑ май мерӑсем йышӑнаҫҫӗ. Чӑваш Енре те ку енӗпе ӗҫлеҫҫӗ. Сӑмах май, хальлӗхе республикӑра 1 ҫын коронавируспа чирлет.
Шупашкар хула администрацийӗ ҫитес вӑхӑтра нумай хваттерлӗ ҫуртсен подъезчӗсене дезинфекцилеме хушнӑ. Ҫак ӗҫе управляющи компанисен тата ТСЖсен тумалла. Урая хлоркӑпа ҫумалла, лифтри пускӑчсене сӑтӑрмалла, алӑк хӑлӑпӗсемпе перилӑсене тасатмаллла.
Управляющи компнийӗсем подъездсенче уйӑхра пӗр хутчен тусан сӑтӑраҫҫӗ, коронавирус сарӑлнӑ май халӗ ав дезинфекцилеме те тивӗ.
Сӑмах май, Шупашкарта троллейбуссене те кунне икӗ хутчен дезинфекцилени пирки ҫырнӑччӗ.
Таксистсем улталанни пирӗн тӑрӑхра унччен те пулкаланӑ-ха. Хальхинче Шупашкарта пурӑнакан 61 ҫулти таксиста шӑнман пӑрпа лартса янӑ. 30 пин тенкӗлӗх. Тата пӗр курупкӑ канихветпа коньяклӑх. Юлашкинчен асӑннине хӑй те ӗҫсе ҫиейӗ-ха. Ӑна вӑл ют ҫынна тыттарса ӗлкӗрмен.
Такси чӗнсе шӑнкӑравланӑ ҫын Патшалӑх ҫул-йӗр хӑрушсӑрлӑхӗн инспекцийӗн республикӑри управленийӗ патне пыма ыйтнӑ. Ҫула май канихветпа коньяк туянма сӗннӗ. Аэропорта, самолет ҫине, васканине ӗнентернӗ. Инҫе ҫула пуҫтарӑннӑ ҫын унсӑр пуҫне телефон номерӗ ҫине 30 пин тенкӗ укҫа хурса пама ыйтнӑ. Таксист итленӗ. Пылак ҫимӗҫпе хаяррине туяннӑ. Укҫана телефон номерӗ ҫине куҫарнӑ. Лешӗ ҫине-ҫинех шӑнкӑравланӑ. Васкатанҫи тунӑ.
Палӑртнӑ вырӑна таксист ҫитет те хӑйне никам та кӗтсе тӑманнине ӑнланса илет. Телефона та тытакан тупӑнман.
Nordwind Airlines (ку компани «Северный ветер» тулли мар яваплӑ общество ятпа регистрациленнӗ) Шупашкара вӗҫме пӑрахӗ. Ҫӗршывӑн тӗп хулинчен килекен юлашки авиарейса вӑл пуш уйӑхӗн 28-мӗшӗнче пурнӑҫлӗ. Ҫапла вара Шупашкартан Мускава, Мускавран Шупашкара «Победа» лоукостер ҫеҫ ҫӳрӗ.
Маларах асӑннӑ авиакомпани пирӗн республикӑна кӑрлач уйӑхӗнчех вӗҫме чарӑнасшӑн пулнӑ. Шупашкарти аэропортра пӗлтернӗ тӑрӑх, авиакомпани халӑх сахал ҫӳренипе сӑлтавланӑ. Ун чухне расписание ылмаштарса пӑхма йышӑннӑ. Анчах расписание ылмаштарни те нимех те улӑштарайман. Халӗ тата ансат мар эпидеми лару-тӑрӑвӗ те витӗм кӳнӗ.
Шупашкарти аэропорт авиакомпани хӑҫан та пулсан Шупашкара каллех вӗҫме пуҫласса шаннине палӑртнӑ.
Чӑваш Енри тата тепӗр строительство оргнаизацийӗ панкрута тухнӑ. Ҫак йӗркесен авторне Росреестрӑн Чӑваш Енри управленийӗн пресс-службинче паян пӗлтернӗ тӑрӑх, хальхинче «Три АсС» тулли мар яваплӑ обществӑна республикӑн Арбитраж сучӗ панкрута кӑларма йышӑннӑ. Ҫак организацире халӗ пӗр ҫуллӑха конкурс управленийӗ туса хунӑ. Конкурс управляющийӗ пулма Александр Сапёрова палӑртнӑ.
2019 ҫулхи ҫу уйӑхӗнченпе пирӗн республикӑра виҫҫӗмӗш стройорганизаци панкрута тухнӑ. Росреестрӑн Чӑваш Енри управленийӗн пуҫлӑхӗ Екатерина Карпеева унччен ҫавӑн шӑпа «Суор» тата «Алза» тулли мар яваплӑ обществӑсене пырса тивнине аса илтерет.
«Три АсС» Шупашкарти «Три богатыря» (чӑв. Виҫӗ пӑхаттир) тата «Восточный экспресс» (чӑв. Хӗвелтухӑҫ экспресӗ) ҫурт-йӗр комплексӗсене, Ҫӗнӗ Шупашкарти Симӗс бульварти 2-мӗш позицире ҫурт тума пуҫланӑ.
Асӑннӑ предприятипе ҫыхӑннӑ ыйтусене (8352) 31-71-05, 34-67-55 телефон номерӗсемпе шӑнкӑравлса уҫӑмлатмалла.
Шупашкар хулинче Росгварди ӗҫченӗсем ҫынна ҫапса кайнӑ водителе тытса чарнӑ.
Усал хыпар пирки вӗсене, патруле тухнӑскерсене, шӑнкӑравласа систернӗ. Водитель Шупашкарти Кадыков урамӗнче ҫынна ҫапса хӑварнӑ, инкек вырӑнӗнчен хӑй тапса сикнӗ. Ҫапларах пӗлтернӗ вӗсене.
Росгвардин пресс-службинче пӗлтернӗ тӑрӑх, «Перехват» (чӑв. Тытса чарни) план палӑртса хунӑ. Ҫакӑ пуҫтах водителе шыраса тупма тата ӑна тытса чарма кирлӗ пулнӑ.
Ведомствӑн мар хурал пайӗн ӗҫченӗсем машинӑна кӗҫех Федоров академик урамӗнче асӑрхаҫҫӗ.
Водителе тытса чарса ҫул-йӗр хӑрушсӑрлӑхӗн инспекцийӗн ӗҫченӗсене пӗлтернӗ. Ҫул ҫинчи инкеке лексе вырӑнтан тарнӑ ҫынпа ҫыхӑннӑ пӑтӑрмаха яваплисем тӗпчеҫҫӗ, вӗсемех тивӗҫлӗ йышӑну тӑвӗҫ.
-1.7 °C