Нарӑс уйӑхӗн 2-мӗшӗнче 7 сехет те 40 минутра «Энӗш» ҫул ҫинче, Канаш районӗнчи Хучел ялӗ ҫывӑхӗнче, авари пулнӑ. Унта ҫыннӑн пурнӑҫӗ татӑлнӑ. Йӗрке хуралҫисем айӑплине тытса чарнӑ.
Иномарка ҫул пӑрӑнӑшӗнче «Калина» ҫине пырса кӗнӗ. «Калинӑри» 73 ҫулти пассажир, хӗрарӑм, вилнӗ. Руль умӗнче ларнӑ упӑшки суранланнӑ.
Иномаркӑри пассажир та аманнӑ. Вӑл - машина хуҫи. Анчах руль умӗнче вӑл мар, урӑх ҫын ларнӑ. Лешӗ вара, 25 ҫултискер, ӳсӑр пулнӑ, унӑн права та ҫук /руль умне ӳсӗрле ларнӑшӑн туртса илнӗ/. Ҫак арҫын авари вырӑнӗнчен тарса ҫухалнӑ. Анчах йӗрке хуралҫисем ӑна ҫийӗнчех тытса чарнӑ. Ун чухне те вӑл ӳсӗр пулнӑ.
Шупашкар хулинче ҫул-йӗре юртан тасатма кансӗрлекен машинӑсене эвакуацилессине пӗлтереҫҫӗ.
Ҫул-йӗре тытса тӑракан организацисен ҫил-тӑман хыҫҫӑн ҫеҫ мар, юр самай ҫума тытӑнсанах ҫула тасатмалла. Ку вӑл — хӑйсем пуҫ тӗллӗн хӑтланакан утӑм мар. Вӗсене ҫапла тума ятарлӑ нормативсем хистеҫҫӗ. Анчах ҫул хӗррипе лартса тухнӑ машинӑсем ҫул-йӗр техникине ӗҫлеме чӑрмав кӑларса тӑратаҫҫӗ. Шупашкар хулин Калинин районӗн администрацийӗн сайтӗнче пӗлтернӗ тӑрӑх, ятарлӑ техникӑна ӗҫлеме кансӗрлекен автомобильсене урӑх ҫӗре илсе кайса лартӗҫ.
Кӑрлач уйӑхӗн 23-мӗшӗнче Чӑваш Ене ҫӗнӗ авиакомпани вӗҫме пуҫланине эпир унччен пӗлтернӗччӗ-ха. Аса илтерер: унта сӑмах «RedWings» пирки пыратчӗ.
Авиакомпани Чӑваш Енри авиапассажирсене Санкт-Петербурга турттарать. Малтанласа «RedWings» Питӗре Шупашкартан эрнере икӗ хутчен: юнкунсерен тата вырсарникунсерен вӗҫме, Чӑваш Енӗн тӗп хулинчен самолёт 9 сехет те 40 минутра хускалма палӑртса хунӑччӗ.
Халӗ вара Шупашкара самолётсем вӗҫтерекен ҫӗнӗ авиакомпани расписание ылмаштарассине пӗлтернӗ. 100 пассажир лармалӑх суперджет нарӑс уйӑхӗн 3-мӗшӗнчен Шупашкартан Питӗре кӗҫнерникунпа шӑматкунсерен вӗҫме тытӑнӗ. Ҫула вӑл 20 сехет те 40 минутра тухӗ.
Шупашкарти «Кӗрӗк» фабрика патӗнче тума пуҫланӑ каҫӑ пирки ҫӗршывӗпе пӗлеҫҫӗ. Тӗрӗсрех, ҫав каҫҫа халӗ те туса пӗтерейменнине пӗлеҫҫӗ. Халӑх фрончӗн федераци организацийӗ каҫӑ пирки соцсетьсенчи хӑйӗн страницисенче хыпарланӑ.
Ҫынсене автоҫул урлӑ ҫӳлтен каҫса ҫӳремеллине 2014 ҫултах туса пӗтерме палӑртнӑ. Унтанпа Атӑлта сахал мар шыв-шур юхса иртнӗ. Хула ертӳҫисемпе республикӑна ертсе пыракансем те улшӑннӑ, анчах лав вырӑнтан хускалман. Халӑх фрончӗн республикӑри хастарӗсем каҫӑ ыйтӑвӗпе республика ертӳҫи Олег Николаев патне 2021 ҫулх юпа уйӑхӗнче ҫитнӗ-мӗн-ха. Тен, халӗ, ҫав калаҫӑва федераци шайӗнче хусчкатнӑ хыҫҫӑн, ыйту татӑлӗ...
Тунтикун Правительство ҫуртӗнче иртнӗ планеркӑра ЧР Элтеперӗ Олег Николаев республикӑна кӗнӗ ҫӗрте вырнаҫтарнӑ паллӑсем, стеллӑсем, ҫӗтӗк-ҫатӑк пулнӑшӑн кӑмӑлсӑрланнине палӑртнӑ.
«Чӑваш Республикине кӗнӗ ҫӗрти «Чувашская Республика» палла улӑштарӑр тархасшӑн. Вӑл питӗ хитре мар курӑнать, ҫӗтӗк. Ҫӗнӗ дизайн кирлӗ тӗк тӑвӑр. Вӗсем нумай вӑхӑт ҫакӑнса тӑмалла пулччӑр», - тенӗ Олег Алексеевич.
Элтепер ҫак стеллӑсем ҫул-йӗр ҫинчи хӑрушлӑха витӗм кӳменнине, ҫӑпах эстетика лайӑххи ҫул ҫинче ҫапах паха пулнине палӑртнӑ.
Ӗнер, кӑрлач уйӑхӗн 22-мӗшӗнче, 19 сехет ҫурӑра М-7 автоҫулӑн 601-мӗш ҫухрӑмӗнче авари пулнӑ. Шел те, унта ҫынсен пурнӑҫӗ татӑлнӑ. Кун пирки ҪҪХПИ пӗлтерет.
Авари Етӗрне районӗнчи Урпаш ялӗ ҫывӑхӗнче пулнӑ. Малтанлӑха пӗлтернӗ тӑрӑх, «Гранта» транспорт хирӗҫ килекен ҫул ҫине тухса кайнӑ та йывӑр тиевлӗ икӗ машинӑпа ҫапӑннӑ. Аварире виҫӗ ҫыннӑн пурнӑҫӗ татӑлнӑ: ҫӑмӑл машина водителӗ тата унти икӗ пассажир. Пӗри ача пулнӑ.
Паян, кӑрлач уйӑхӗн 23-мӗшӗнче, Чӑваш Ене ҫӗнӗ авиакомпани вӗҫме пуҫланӑ. Вӑл – «RedWings». Шупашкара вӑл ҫӗнӗ самолётпа килсе ҫитнӗ.
Авиакомпани Чӑваш Енри авиапассажирсене Санкт-Петербурга турттарӗ. Кунтан самолёт 9 сехет те 40 минутра хускалӗ. «RedWings» авиакомпани Питӗре Шупашкартан эрнере икӗ хутчен: юнкунсерен тата вырсарникунсерен – вӗҫӗ.
Маларах палӑртни патне таврӑнса ҫакна каласа хӑвармалла: RedWings хӑйӗн авиапаркне ҫак кунсенче ҫеҫ ҫӗнетнӗ. Суперджетра сӑрӑ шӑрши те уҫӑлса пӗтеймен-ха. RA-89184 регистраци номерӗллӗ суперджетра – 100 пассажир лармалӑх вырӑн. Кӑҫалхи кӑрлач уйӑхӗнче туяннӑ самолёт кӑрлач уйӑхӗн 21-мӗшӗнче Мускаври «Жуковский» аэропортран «Пулково» никӗс аэропортне вӗҫсе кайнӑ. Асӑннӑ борт Питӗртен виҫӗ ҫӗнӗ хулана: Шупашкара, Саратова тата Кирова – вӗҫӗ.
«ИрАэро» авиакомпани Шупашкартан пассажирсене ҫӗршывӑн тӗрлӗ хулине турттарма тытӑннӑ. Ҫапла вара асӑннӑ авиакомпани самолёчӗсемпе пирӗн республикӑран Краснодар, Минеральные Воды, Ҫӗнӗ Уренгой тата Дон ҫинчи Ростов хулисене ҫитме пулать.
Ҫула «Sukhoi Superjet 100» суперджетсем тухаҫҫӗ. Ҫӗнӗ Уренгойран самолёт эрнекун вӗҫсе килет. Вӑл унтан 12 сехетре хускалать, кунта 16 сехет те 50 минутра ҫитет. Краснодара пирӗн республикӑн тӗп хулинчен эрнекунсерен 17 сехет те 50 минутра тухса каять, 19 сехет те 50 минута ҫитерет.
Краснодартан Шупашкара шӑматкунсерен килме пулать. Унтан суперджет 7 сехет те 25 минутра ҫула тухса Шупашкара 9 сехет те 35 минутра ҫитерет. Ҫав кунах самолёт Дон ҫинчи Ростов хулине 11 сехетре вӗҫсе каять, унта 13 сехете ҫитет те каялла килме 14 сехетре тухать. Дон ҫинчи Ростоври пассажирсем Шупашкара 16 сехете ҫитеҫҫӗ. 17 сехетре самолёт кунтан Минеральные Воды хулине вӗҫсе каять, унта 2 сехетрен ҫитерет.
Минеральные Воды хулинчен Шупашкара самолётпа вырсарникунсерен килме пулать. Унтан самолёт 7 сехет те 40 минутра хускалса 9 сехет те 40 минута ҫитерет. Ҫав кунах самолётпа Ҫӗнӗ Уренгоя тухса кайма пулать.
Паян, кӑрлач уйӑхн 21-мӗшӗнче, Шупашкарти Сӗнтӗрвӑрри шосси ҫинче харӑсах темиҫе машина пӗр-пӗринпе пырса ҫапӑннӑ.
«Безопасный город» (чӑв. Хӑрушсӑр хула) аппаратпа программа комплексӗн ӗҫченӗсем пӗлтернӗ тӑрӑх,
Малтанласа шухӑшланӑ тӑрӑх, «Е377ТВ 21» номерлӗ «Гранта» ҫула май пыракан «Патриот» хӑваласа ҫитнӗ те унран иртес тесе хирӗҫ ҫул ҫине тухнӑ, унтан «Тойотӑпа» ҫапӑннӑ. «Тойота» «Соляриспа» тата «Нивӑпа» ҫапӑннӑ.
Инкекре никам та аманман. Инкекшӗн айӑплин хуҫи машинӑна страхламан пулнӑ-мӗн.
Шупашкар хулинче васкавлӑ пулӑшу машини ҫил-тӑман ҫунӑ хыҫҫӑн вӑхӑтра тасатман ҫул ҫинче путса ларнӑ. Чӑваш Енӗн патшалӑх телерадокомпанийӗнче кӑрлач уйӑхӗн 19-мӗшӗнче пӗлтернӗ тӑрӑх, тухтӑрсен машини «Байконур» микрорайонта лакса ларнӑ. Ӑна ҫынсем тӗксе кӑларнӑ.
Тележурналистсем шухӑшланӑ тӑрӑх, коммуналлӑ служба ӗҫченӗсем ҫуркуннене ҫитессе е юр ирӗлтерекен машина ӗҫлесе каясса кӗтеҫҫӗ курӑнать. Ҫав вӑхӑтрах хула ҫыннисен ӗҫе е вӗренӳ заведенине вӑхӑтра куллен ҫитмелле-ҫке, анчах ҫакӑ хӑш чухне чӑрмавлӑ пулса тухать. Маларах асӑннӑ васкавлӑ пулӑшу машинине тӗксе кӑларма хӑтланса, сӑмахран, ҫур сехет иртсе кайнӑ. Ӑна вара чирлӗ ҫын кӗтнӗ...
-2.7 °C