Паян Шупашкарти нумай хваттерлӗ ҫуртсенчен пӗринче пушар тухнӑ. Инкек сӑлтавне специалистсем палӑртӗҫ.
Ҫулӑм паян, кӑрлач уйӑхӗн 3-мӗшӗнче, Ленин проспектӗнчи 21-мӗш ҫуртра алхаснӑ. Инкек пирки «Про Город» хаҫата халӑх корреспонденчӗ пӗлтернӗ.
Хыпара РФ Инкеклӗ ӗҫсен министерствин республикӑри управленийӗн пресс-службинче те ҫирӗплетнӗ.
«Хваттер ҫунма пуҫлани пирки 11 сехет те 30 минутра пӗлтернӗ. Пушара сӳнтерме икӗ автоцистернӑпа тата пусмапа усӑ курнӑ. 12 сехет те 4 минутра сӳнтернӗ», — тесе хыпарланӑ унта.
Ҫӗнӗ Шупашкарта пурӑнакансем хулари икӗ ҫурт шӑпине татса парӗҫ.
Унти прикладной биотехнологи техникумӗн тата «Атӑл» кинотеатрӑн ҫурчӗсем пушӑ ларнине Чӑваш Ен Элтеперне Олег Николаева пресс-конференци вӑхӑтӗнче пӗлтерчӗҫ. Республика ертӳҫи ҫуртсен шӑпине халӑхпа татса пама май пуррине пӗлтерчӗ. Тӗслӗх евӗр Шупашкарти Правительствӑн кивӗ ҫуртне илсе пачӗ. Аса илтерер: вӑл культура эткерлӗхӗ шутланать, анчах темиҫе ҫул ӗнтӗ пушӑ ларать. Правительствӑн унчченхи ҫуртне юсамалла. Унӑн шӑпине халӑх шухӑшне шута илсе татса парӗҫ.
Ҫавӑн пек меслете ҫӗнӗ шупашкарсем те суйласа илнӗ. Сасӑлава ҫитес ҫул пуҫламӑшӗнче ирттерӗҫ. Ҫакӑн пирки хула администрацийӗн пуҫлӑхӗ Павел Семенов пӗлтернӗ.
Паян Чӑваш Ен Элтеперӗ ҫумӗнчи право йӗркине тивӗҫтерес енӗпе ӗҫлекен координаци канашлӑвӗн черетлӗ ларӑвӗ иртнӗ. Унта тӑлӑхсене хваттерпе тивӗҫтерес ыйтӑва пӑхса тухнӑ.
Ашшӗ-амӑшӗн хӳттисӗр юлнисене патшалӑхӑн хваттерпе тивӗҫтермелле. Чылай яшпа хӗр ӑна чылай ҫул кӗтет.
Тӑлӑхсене хваттерпе вӑхӑтра тивӗҫтерме йывӑррин сӑлтавӗ пӗр тӑваткал метршӑн патшалӑх 36 пин тенкӗ ҫеҫ панипе те ҫыхӑннӑ. Шупашкарта, сӑмахран, хваттерӗн пӗр тӑваткал метрӗ 46 пин тенкӗ тӑрать. Маларах асӑннӑ виҫене пирӗн республикӑра юпа уйӑхӗнче ӳстерме йышӑннӑ. Ҫавна май Шупашкарта тӑлӑхсем валли 48 хваттер илес шанчӑк тупӑннӑ.
Саккунпа ҫыхӑннӑ йывӑрлӑха пирӗн ҫӗршывра ҫитес пилӗк ҫулта татса парас шанчӑк пур-мӗн. Кун пирки Чӑваш Ен Элтеперӗ Олег Николаев пӗлтернӗ.
Чӑваш Енӗн унчченхи Правительство ҫурчӗн шӑпине халӑхпа татса парӗҫ. Унпа епле усӑ курасси пирки сасӑлава хутшӑнма республикӑра пурӑнакансене сӗннӗ. Кун пирки Строительство, архитектура тата ҫурт-йӗрпе коммуналлӑ хуҫалӑх министерстви пӗлтерет.
Халӑх сасӑлавӗ «Контактра» халӑх ушкӑнӗн «Чӑваш Республики» пабликӗнче иртет.
Унччен Правительство ҫурчӗ пулнӑскерте Чӑваш патшалӑх университечӗн вӗренӳ корпусӗ йӗркелеме сӗннӗ е тата — ача-пӑча учрежденийӗ, сӑмахран, шкул. Коммерци структурисем валли е администраци ҫурчӗ евӗр те усӑ курма пулать. Ҫынсем хӑйсен вариантне те сӗнме пултараҫҫӗ.
1940 ҫулта хӑпартса лартнӑ ҫурт федераци пӗлтерӗшлӗ историпе культура палӑкӗ тата культура эткерлӗхӗн ҫурчӗ шутланнӑ.
Чӑваш Енре коммуналлӑ пулӑшушӑн тӳлемелли хаксем ҫитес ҫулхи утӑ уйӑхӗн 1-мӗшӗнчен ӳсӗҫ. Ҫакӑн пирки республикӑри тӳре-шара ӗнерхи брифингра пӗлтернӗ.
Ҫутӑшӑн ҫитес ҫулхи хула ҫыннисем хальхинчен 12 пус ытларах тӳлеме тытӑнӗҫ, хак 3 тенкӗ те 60 пуса ҫитӗ, ялтисемшӗн тата ҫутӑ плитисемпе усӑ куракансемшӗн хак 8 пус ӳссе 2 тенкӗ те 52 пуспа танлашӗ.
Ҫутҫанталӑк газӗ пӗр куб метршӑн 6 тенкӗ те 6 пуса ларӗ.
Йӑлари хытӑ каяша турттарнишӗн хула ҫыннисем хальхинчен 2 тенкӗ те 13 пус нумайрах тӳлеме тытӑнӗҫ, ҫак тӑкак виҫи 64 тенкӗ те 89 пуса ҫитӗ; ялта 51 тенкӗ те 71 пус пулӗ е 1 тенкӗ те 69 пус хакланӗ.
Хусанти пысӑк суту-илӳ центрӗсем Чӑваш Енри бетонпа усӑ курӗҫ. Ҫакӑн пирки «ЖБК № 9» тулли мар яваплӑ обществӑн гендиректорӗ республикӑн строительство комплексӗнче ӗҫлекенсемпе ирттернӗ канашлура пӗлтернӗ.
«Пирӗн савутӑн продукцине республика тулашӗнче те аван пӗлеҫҫӗ. Кӑҫал эпир хамӑр продукцине сутассине анлӑлатрӑмӑр. Ӑна халӗ Мурманскра иа туянаҫҫӗ. Унччен Хусанпа ӗҫленӗ. Асӑннӑ хулари «Леруа Мерлен», «Икея» организацисем, «Wildberries» пысӑк логистика центрӗ туяннӑ», – пӗлтернӗ тимӗр-бетон предприятийӗн пуҫлӑхӗ.
Ҫӗрпӳри нумай хваттерлӗ ҫурта республика хысни шучӗпе юсӗҫ. Кун пек йышӑнӑва республикӑн Правительствин Пуҫлӑхӗ Олег Николаев чӳк уйӑхӗн 30-мӗшӗнче алӑ пуснӑ. Унта республика бюджетӗнчен Ҫӗрпӳ район администрацине трансферт уйӑрас пирки каланӑ. Укҫана республика Правительствин резерв фондӗнчен уйӑрма палӑртнӑ. Укҫа Ҫӗрпӳри Никитин урамӗнчи 10-мӗш ҫуртӑн стенисене ҫирӗплетме кайӗ.
Нумай хваттерлӗ ҫурта 1990 ҫулта тунӑ. Вӑл пилӗк хутлӑ. Унӑн пӗтӗмӗшле лаптӑкӗ – 4487.50 тӑваткал метр. Нумай хваттерлӗ ҫурта «Мой дом» управляющи компани 2004 ҫулхи авӑн уйӑхӗн 1-мӗшӗнченпе тытса тӑрать.
Шупашкар хулинчи Эгер бульварӗнче пурӑнакансем 48-мӗш ҫурт ҫумӗнче нумай хваттерлӗ ҫурт хӑпартассине хирӗҫ-мӗн. Хулана ертсе пыракансем ҫынсен шухӑшне пӗлес тесе халӑхпа сӳтсе явнӑ. Кун пирки хула администрацийӗн пуҫлӑхӗ Алексей Ладыков паян Фейсбукра пӗлтернӗ.
«Эпир халӑхпа сӳтсе яврӑмӑр, проектлакансем хӑйсен проекчӗпе паллаштарчӗҫ, строительсем ӗҫ технологийӗ ҫинчен каласа кӑтартрӗҫ», – тесе ҫырнӑ сити-менеджер.
Алексей Ладыков пӗлтернӗ тӑрӑх, сӳтсе явма ҫывӑхри ҫуртсенче пурӑнакансем хастар хутшӑннӑ. Тӗрлӗрен шухӑшлакансем тупӑннӑ, ытларахӑшӗ – хирӗҫ. Апла пулсан хула администрацийӗ ҫынсен шухӑшне тӗпе хурӗ.
Чӑваш Енре пурӑнакан «вӑрҫӑ ачисене» патшалӑх ҫурт-йӗршӗн тата коммуналлӑ тӑкаксемшӗн тӳлеме пулӑшасшӑн.
Аса илтерер: асӑннӑ категорие кӗрекенсемпе ҫыхӑннӑ саккуна пирӗн тӑрӑхра кӑҫалхи ака уйӑхӗнче йышӑннӑччӗ. Анчах вӑл саккунта укҫа-тенкӗ енчен пулӑшма пӑхса хӑварманччӗ. Республика Элтеперӗ Олег Николаев пулӑшу мерисем пирки шухӑшласа пӑхма ун чухнех шантарнӑччӗ.
Чӑваш Енӗн Ӗҫ тата социаллӑ хӳтлӗх министерстви, ҫавӑн пекех Финанс министерстви «вӑрҫӑ ачисене» ҫурт-йӗршӗн тата коммуналлӑ хуҫалӑхшӑн ҫӑмӑллӑх пама сӗннӗ. Ку ыйтӑва паян иртнӗ Министрсен Кабинечӗн ларӑвӗнче тишкернӗ.
Ҫӗрпӳ хулинче культура эткерлӗхне юсаҫҫӗ.
Ӗнер, чӳк уйӑхӗн 20-мӗшӗнче, Ҫӗрпӳ районӗнче Чӑваш Енӗн культура, национальноҫсен ӗҫӗсен тата архив ӗҫӗн министрӗ Светлана Каликова пулнӑ. Министр хулари ача-пӑча ӳнер шкулне те ҫитнӗ. Асӑннӑ вӗренӳ учрежденийӗн ҫурчӗ XIX ӗмӗрӗн 2-мӗш ҫурринчи культура эткерлӗхӗ шутланать. Ҫурта тулаш енчен юсанӑ, ҫивиттине сарнӑ. Акт залне, пӳлӗмсене, урайсене, ӑшӑ пӑрӑхӗсене ҫӗнетнӗ, котельнӑя юсанӑ, алӑксене улӑштарнӑ.
Ҫӗрпӳри историпе таврапӗлӳ музейӗн ҫурчӗ – XVIII ӗмӗрӗн пӗрремӗш ҫурринчи культура эткерлӗхӗ. Ӑна та юсаҫҫӗ.
Шупашкарта ҫывӑх вӑхӑтра (11.10.2024 15:00) сайра пӗлӗтлӗ ҫанталӑк, атмосфера пусӑмӗ 759 - 761 мм, 3 - 5 градус ӑшӑ пулӗ, ҫил 3-5 м/ҫ хӑвӑртлӑхпа хӗвелтухӑҫ енчен вӗрӗ.
| Вдовина Ираида Григорьевна, паллӑ чӑваш юрӑҫи ҫуралнӑ. | ||
| Пушкай Леонид Иванович, чӑваш сӑвӑҫи, драматургӗ ҫуралнӑ. | ||
| Афанасьев Алексей Андриянович, чӑваш сӑвӑҫи, ҫыравҫи, тӑлмачӗ ҫуралнӑ. | ||
| Виталий Енӗш, чӑваш сӑвӑҫи, ҫыравҫи, тӑлмачӗ ҫуралнӑ. | ||
| Исаева Людмила Сергеевна, сӑвӑҫ, тӑлмач ҫуралнӑ. | ||
| Краснов-Асли Василий Иванович, чӑваш ҫыравҫи ҫут тӗнчерен уйрӑлса кайнӑ. | ||
| Василий Краснов-Асли, чӑваш ҫыравҫи ҫут тӗнчерен уйрӑлса кайнӑ. | ||
| Романов Борис Александрович, чӑваш сӑвӑҫи вилнӗ. | ||
| Чӑваш АССРӗ вырӑнне Чӑваш Совет Социаллӑ Республики пулса тӑнӑ. | ||
Пулӑм хуш... |