ҪҪХПи тунӑ сӑн

Шупашкартана Сосновкӑна ҫӳрекен автобус паян Атӑл леш енче аварие лекнӗ. Унта 3 ҫын пурнӑҫран уйрӑлнӑ.

Инкек «Астраханка» чарануран инҫех марп улнӑ. Аварире вилнӗ ҫынсем - ҫӑмӑл машинӑра пулнӑскерсем. Малтанлӑха пӗлтернӗ тӑрӑх, «Киа спектра» хирӗҫ ҫул ҫине тухса кайса автобуспа ҫапӑннӑ. Автобусри пассажирсем пурте чӗрех, хӑшӗ-пӗри аманнӑ. Мари Элти ҪҪХПИ пӗлтернӗ тӑрӑх, унашкаллисем – 6 ҫын.

Шупашкарта сусӑрсене кӗмелли ҫурт умӗнче инвалидсем валли парковка пулман.

Прокуратура палӑртнӑ тӑрӑх, Чулхула урамӗнче вырнаҫнӑ Чӑваш Республикинчи медицинӑпа экспертиза тӗп бюровӗнче инвалидсем медицинӑпа социаллӑ экспертиза тухаҫҫӗ. Анчах ҫав учреждени умӗнче сусӑрсен машинине лартма парковка пулман.

Асӑннӑ ҫурт умӗнхи территори Шупашкар администрацийӗн шутланать. Апла пулсан инвалидсем валли парковка тӑвассишӗн те вӑл яваплӑ. Халӗ кӑлтӑка пӗтернӗ.

Кандинский сӑнӳкерчӗкӗ

Шупашкар муниципаллӑ округӗнче почтальона хӗненӗ арҫынна суд тӑвӗҫ. Ҫӗньял ялнче пурӑнакан 45 ҫулти арҫын тӗлӗшпе РФ Пуҫиле кодексӗн 115-мӗш стайин 2-мӗш пайӗн «а» пункчӗпе пуҫиле ӗҫ пуҫарнӑ. Ку статьяпа пуҫтах тӗллевпе сывлӑха ҫӑмӑл сиен кӳрекенсене явап тыттараҫҫӗ.

Кӑҫалхи нарӑс уйӑхӗн 1-мӗшӗнче почтальон Ҫӗньял ялӗнче корреспонденци валеҫсе ҫӳренӗ. Тӗп урамри ҫуртсенчен пӗринчи подъездра ун ҫумне ӳсӗр арҫын ҫулӑхнӑ. Эс почтальон мар, наркотик хурса ҫӳретӗн тесе чӑркӑшланнӑ. Почтальон ҫумӗнче ӗҫре кирлӗ япаласем пурри те ӳсӗр ҫынна лӑплантарайман, вӑл ӑна хӗнеме пуҫланӑ. Почтальонӑн пичӗн шӑммине амантнӑ.

Пуҫиле ӗсе халӗ суда ярса панӑ.

Кандинский нейросетьпе усӑ курса хатӗрленӗ сӑнӳкерчӗк

Канашри пӗр ҫемьере ҫиччӗри хӗрача амӑшне укҫасӑр хӑварнӑ. Сумми ытла пысӑках мар та, ҫапах та...

Пӗррӗмӗш класра вӗренекен ача виртуаллӑ вӑйӑ выляса ларнӑ чухне палламан ҫынпа ҫыру урлӑ калаҫма тапранса кайнӑ. Лешӗ ачана виртуаллӑ валюта туянма сӗннӗ. Ун валли амӑшӗн банк карттинчен тӳлеме май пуррине пӗлтернӗ. Хӗрача амӑшӗн банк карттине илсе унӑн банк приложенине кӗрсе кайнӑ. Унтан 41 пин те 200 тенкӗ куҫарса панӑ.

Укҫа ҫухалнине пӗлсен 46-ри хӗрарӑм, ҫиччӗри хӗрача амӑшӗ, йӗрке хуралҫисем патне пулӑшу шыраса кайнӑ.

21.мвд.рф сӑнӳкерчӗкӗ

Утӑ уйӑхӗн 3-9-мӗшӗсенче пирӗн республикӑра полици, Федерацин хӑрушсӑрлӑх службин, Раҫҫейӗн Шалти ӗҫсен министерствин лини пайӗн ӗҫченӗсем ют ҫӗршыв ҫыннисемлӗ 1,5 пин ытла объекта тӗрӗсленӗ.

Тӗрӗслеве пурӑнмалли ҫуртсенче тата хостелсенче, транспортра, стройкӑра, суту-илӳ тата общество апатланӑвӗн учрежденийӗсенче ирттернӗ.

Операци вӑхӑтӗнче правӑна пӑснӑ 125 тӗслӗхе тупса палӑртнӑ, вӗсенчен чылайӑшӗнче – пирӗн ҫӗршывра саккуна пӑсса пурӑнни. 17 ҫынна тӑван тӑрӑхне кӑларса яма йышӑннӑ, 8-шне вӑхӑтлӑх пурӑнмалли центра вырнаҫтарнӑ, унтан вӗсене те тӑван ҫӗршывӗсене ӑсатӗҫ.

Миграци учётне тӑратнӑ 12 тӗслӗхе тупса палӑртнӑ, пӗр эрнере пуҫиле 2 пуҫарнӑ.

cap.ru сайтри сӑн

Шел те, каллех хурлӑхлӑ хыпар: Ҫӗмӗрле хулинче 35 ҫулти хӗрарӑм путса вилнӗ. Ку инкек ӗнер, ҫӗртме уйӑхӗн 13-мӗшӗнче, пулнӑ.

Унӑн виллине водолазсем шыранӑ. Ӑна паян кӑна ҫыран хӗррине илсе тухнӑ. Халӗ хӗрарӑм мӗнле майпа путнине тӗпчеҫҫӗ.

Палӑртмалла: шыва кӗмелли сезон пуҫланнӑранпа Чӑваш Енре 8 ҫын путса вилнӗ. Аса илтерер: ӗнер Шупашкарти тӗп пляжра 13 ҫулти хӗрача путса пурнӑҫран уйрӑлнӑ.

"На связи" форумри сӑн

Ӗнер 16 сехет тӗлнелле Шупашкарти тӗп пляжра инкек пулнӑ - 13 ҫулти хӗрача путса вилнӗ. Вӑл унта амӑшӗпе, тӑванӗсемпе шыва кӗме килнӗ.

Ача ытлашши шала та ишсе кӗмен - вӑл буйкӑсем патӗнче путнӑ. Вырӑна ҫитнӗ медиксем ӑна реанимаци тума хӑтланнӑ, анчах, шел те, усӑсӑр.

Халӗ Мускав районӗн прокуратури тӗрӗслев ирттерет.

Ӗнер Ҫӗрпӳ округӗнче 43-ри арҫын путса вилнӗ. Ҫӗмӗрлере вара 1970 ҫулта ҫуралнӑ арҫын шыв айне анса кайса пурнӑҫран уйрӑлнӑ.

cap.ru сайтри сӑн

Ӗнер, ҫӗртме уйӑхӗн 12-мӗшӗнче, Атӑл леш енче вӑрманта аҫа ҫапнӑ. Юлашки вӑхӑтра ку – виҫҫӗмӗш тӗслӗх.

Ҫулӑм тухнине 17 сехет тӗлнелле авиопатруль вӑхӑтӗнче асӑрханӑ. Вырӑна пӗр тӑхтамасӑр 4 пушар автоцистерни, 2 МЛПК, 3 трактор, 1 вездеход, 24 ҫын тухнӑ. Пушара 22 сехет те 10 минутра тӗппипех сӳнтернӗ.

Аса илтерер: унччен ҫӗртме уйӑхӗн 5-мӗшӗнче Шӑмӑршӑ тата ҫӗртмен 10-мӗшӗнче Улатӑр вӑрман хуҫалӑхӗсенче аҫа ҫапнине пула пушар тухнӑ.

Кандинский нейросеть сӑнӳкерчӗкӗ

Ҫӗмӗрлере пурӑнакан 47 ҫулти хӗрарӑм эрнере 2 миллион ытла тенкӗсӗр тӑрса юлнӑ.

Ниҫта та ӗҫлемен хӗрарӑм интернет-лапамсенчен пӗринче реклама курнӑ, унта инвестици хывса укҫа ӗҫлесе илме май пуррине пӗлтернӗ. Кун валли уйрӑм менеджерпа канашлама сӗннӗ, вӑл ӑс-тӑн парассине ӗнентернӗ.

«Консультантпа» калаҫа-калаҫа хӗрарӑм пӗр эрнере тӗрлӗ банкра 2 миллион ытла тенкӗ кредит илсе тултарнӑ, укҫана паллӑ мар счётсем ҫине куҫарса янӑ.

minpriroda.cap.ru сӑнӳкерчӗкӗ

Улатӑр муниципаллӑ округӗнче вӑрман ҫунма пуҫланӑ. Пӑтӑрмах сӑлтавӗ — аҫа ҫапни.

Инкеке ӗнер, ҫӗртме уйӑхӗн 10-мӗшӗнче, 15 сехетре асӑрханӑ. Ҫалавҫӑсем пушар вырӑнне вӑхӑтра пырса ҫитсе вут-ҫулӑма ытлашши сарӑлса кайма паман, васкавлӑн сӳнтернӗ.

Эйпеҫ вӑрман хуҫалӑхӗнчи вӑрманти йывӑҫа аҫа ҫапнине пула пушар 0,035 гектар ҫинче алхаснӑ. Вут-ҫулӑма ҫур сехетрен сӳнтернӗ, мӗнпур ӗҫе 17 сехет те 30 минутра вӗҫленӗ.

Ҫак ӗҫе Вӑрман хуралӗн 5 ӗҫченӗ тата вӑрман хуҫалӑхӗнче тӑрӑшакан 10 специалист хутшӑннӑ. Вӗсем техникӑпа, ҫав шутра, плуглӑ тракторпа, ӗҫленӗ.