ШӖМӗн лини ҫинчи пайӗн сӑнӳкерчӗкӗ

Атӑлта пӗр арҫын сӗрекепе пулӑ тытнӑ. 1987 ҫулта ҫуралнӑ арҫынна транспорт полицейскийӗсем ака уйӑхӗн 2-мӗшӗнче асӑрханӑ. Вӗсем юханшыв тӑрӑх рейда тухнӑ. Ку хыпара Шалти ӗҫсен министерствин Атӑлҫи федераци округӗнчи Транспорт ҫинчи управленийӗн пресс-служби хыпарланӑ.

Браконьер сӗрекепе тӗрлӗ йышши 20 пулӑ тытма ӗлкӗрнӗ. Унӑн пуллине тата сӗрекине туртса илн.

Хальхи вӑхӑта тӗрӗслев пырать, пуҫиле ӗҫ пуҫарассипе пуҫармассине палӑртӗҫ.

shumer.cap.ru сӑнӳкерчӗкӗ

Ҫӗмӗрле район администрацийӗн пуҫлӑхӗнче ӗҫленӗ Лев Рафинов тӗлӗшпе пуҫарнӑ пуҫиле ӗҫ суд чарса лартнӑ. Анчах вырӑнти прокуратура кун пек йышӑнупа килӗшесшӗн мар иккен.

Лев Рафинов ӗҫ вырӑнӗпе усӑ курнине сакӑр тӗслӗх тупса палӑртнӑ. Тӗпчевҫӗсем шухӑшланӑ тӑрӑх, 2018 ҫулхи раштав уйӑхнчен пуҫласа 2019 ҫулхи раштав уйӑхӗччен вӑл тӑлӑх ачасене валли Ҫӗмӗрлере 7 хваттер сутас пирки килӗшӗве алӑ пуснӑ. Анчах хваттерсем пушар хӑрушсӑрлӑхӗ, санитари норми тата ытти енчен саккун ыйтнине тивӗҫерсе тӑман. Тӑкак виҫи 9,5 миллион тенкӗпе анлашнӑ. Рафинов ҫавна тӗпчев пынӑ вӑхӑтах саплаштарнӑ. Ун пурлӑхне те арестленӗ.

Районти суд пуҫлӑх пулнӑ ҫыннӑн ӗҫне тимсӗрлӗх статья ҫине куҫарнӑ, пуҫиле ӗҫшӗн явап тытарма вӑхӑт иртсе кайнӑ тесе ӗҫе хупса хунӑ. Вырӑнти прокуратура кун пек йышӑнупа килӗшесшӗн мар, вӑл приговор тӗлӗшпе ҫӑхав ҫырасшӑн.

"Про Город" сайтри сӑн

Паян Вӑрнар муниципалӑ округӗнче Кивкассипе Пуканкасси ялӗсен хушшинче апат-ҫимӗҫ тиенӗ Газель аварие лекнӗ. Вӑл ҫулран пӑрӑнса кювета чӑмнӑ.

Ҫакна курнӑ ҫынсем каланӑ тӑрӑх, грузовик водителӗ тепӗр машинӑпа ҫапӑнас мар тесе руле пӑрнӑ та кювета чӑмнӑ. Машина ҫаврӑнса ӳкнӗ. Водитель шар курман. Вырӑна Росгварди, ҪҪХПИ инспекторӗсем ҫитнӗ.

grozny-inform.ru сайтри сӑн

Архангельск хулинче пирӗн ентеше тытса чарнӑ. Вӑл ҫынна вӑрлама тӑнӑ тесе шутлаҫҫӗ.

43 ҫулти ҫак арҫын судпа унччен те айӑпланнӑ. Ун чухне ҫынна вӗлернӗшӗн тӗрмере ларнӑ. Хальхинче вӑл 22-ри хӗре тапӑннӑ. Следстви версийӗ тӑрӑх, вӑл ун патне пынӑ, сумка йӑтса пулӑшма ыйтнӑ. Унӑн пилӗкӗ ыратать-мӗн.

Хайхискерсем подъезда кӗнӗ. Унта вара арҫын хӗре лифта сӗтӗрсе кӗнӗ, хӑйӗн хваттерне илсе кӗме хӑтланнӑ. Юрать-ха, кӑшкӑрашнине участковӑй илтнӗ, вӑл пулӑшма ҫитнӗ.

Халӗ арҫынна татса чарнӑ. Следовательсем ӗҫе малалла тишкереҫҫӗ.

Андрей Чибисӑн телеграм-каналӗнчи сӑн

Ӗнер Мурманск облаҫӗн кӗпӗрнаттӑрне Андрей Чибиса 42 ҫулти Александр Б. ҫӗҫӗпе тапӑннӑ. Кун хыҫҫӑн тӳрене операци тунӑ, вӑл халӗ реанимацире.

Андрей Чибис – пирӗн ентеш. Вӑл 1979 ҫулта Шупашкарта ҫуралнӑ. 2001 ҫулта Шупашкарти коопераци техникумӗнче вӗреннӗ. Мурманск облаҫӗн кӗпӗрнаттӑрӗнче вӑл 2019 ҫултанпа ӗҫлет.

Ӗнер Мурманскри «Строитель» культура ҫуртӗнче кӗпӗрнаттӑр халӑхпа тӗл пулнӑ. Ҫавӑн хыҫҫӑн тапӑннӑ та ӑна Александр, хырӑмӗнчен ҫӗҫӗпе чикнӗ. Хураха Росгварди ӗҫченӗ ураран персе амантнӑ, Александра тытса чарнӑ.

Ҫак арҫын йӗрке хуралҫисене каланӑ тӑрӑх, вӑл Чибиспа куҫа-куҫӑн тӗл пулса калаҫса курман, ҫывӑх пулман, анчах темшӗн ӑна килӗштермен. Унччен вӑл ҫын сывлӑхне ҫӑмӑл сиен кӳнӗшӗн явап тытнӑ пулнӑ. Халӗ следстви малалла пырать.

Инкеклӗ лару-тӑру министерстви тунӑ сӑн

Инкеклӗ лару-тӑру министерстви ака уйӑхӗн 2-3-мӗшӗсенчи сводкӑпа паллаштарнӑ.

Акан 2-мӗшӗнче 23 сехетре Елчӗк муниципаллӑ округӗнчи Аслӑ Елӗкре йывӑҫ ҫурт ҫуннӑ. Юрать-ха, инкекре аманнисем пулман.

Ака уйӑхӗн 3-мӗшӗнче Шупашкар муниципаллӑ округӗнчи Хурӑнлӑх ялӗнче 2 хутлӑ ҫурт ҫуннӑ. Вӑл 83 ҫулти арҫыннӑн пулнӑ. Пушар 200 тӑваткал метр лаптӑк ҫинче алхаснӑ. Шел те, ҫурт йӑлтах ҫунса кӗлленнӗ. Ҫӑлавҫӑсем пушара кӳршӗ ҫуртсем ҫине куҫма паман.

vladtime.ru сӑнӳкерчӗкӗ

Йӗпреҫ тӑрӑхӗнче почта уйрӑмне ертсе пынӑ ҫын тӗлӗшпе пуҫиле ӗҫ пуҫарнӑ.

Канашри почтамта пӑхӑнса тӑракан почта ҫыхӑнӑвӗн уйрӑмӗсенчен пӗрин пуҫлӑхӗнче тӑрӑшнӑ хӗрарӑм сутма панӑ таварпа тата ӑна сутса тунӑ укҫапа хӑй пӗлнӗ пек хуҫаланнӑ. Вӑл 200 пине яхӑн тенке хӑйӗн кӗсйине пӗтӗрсе чикнӗ.

Пуҫиле ӗҫе тӗпченӗ май хӗрарӑмӑн килӗнчен полицейскисем 150 пин тенкӗ укҫа илсе тухса кайнӑ, ӑна шар курнӑ ене тӑкака саплаштарма панӑ.

Пуҫиле ӗҫе Йӗпреҫ районӗнчи суда ярса панӑ.

triptonkosti.ru сӑнӳкерчӗкӗ

Шупашкар хулинчи Калинин районӗнчи прокуратура ача канализаци шахтине кӗрсе ӳкнӗ текен хыпара тӗрӗслет.

Тӗнче тетелӗнчи ҫӑлкуҫсенчен пӗринче хыпарланӑ тӑрӑх, Шупашкарти «Ҫӗнӗ хула» микорайонта ача канализаци шахтине ӳкнӗ.

Надзор органӗн ӗҫченӗсем вырӑна тухса тӗрӗсленӗ чухне яваплисем темиҫе канализаци люкне тивӗҫлипе тытса тӑманнине палӑртнӑ та ӗнтӗ. Тӗрӗслев малалла пынӑ май ача шӑтӑка чӑннипех те кӗрсе ӳкнипе ӳкменнине палӑртӗҫ. Пӑтӑрмаха ҫирӗплетсе парсан яваплисене пуҫран шӑлмӗҫ.

gas-kvas.com сӑнӳкерчӗкӗ

Красноармейски районӗнчи прокуратура васкавлӑ пулӑшу машини Вӑрманкасси ялӗнчи пӗр кил патне ҫитеймен тесе тӗнче тетелӗнче пӗлтернӗ хыпара тӗрӗслет.

Тӗнче тетелӗнче ҫырнине ӗненсен, васкавла пулӑшу тухтӑрӗсем чирлӗ ҫын патне ҫитеймен.

Надзор органӗ ҫак хыпара тӗрӗсленӗ май вырӑнти хӑй тытӑмлӑх органӗ ҫула епле тытса тӑнине хак парӗ. Кӑлтӑк пулсан явап тыттарасси пирки асӑрхаттарнӑ.

21.мвд.рф сӑнӳкерчӗкӗ

Чӑваш Енре кашни иккӗмӗш преступление тенӗ пек информаципе телекоммуникаци технологийӗпе усӑ курса тӑваҫҫӗ. Кун пирки республикӑн шалти ӗҫсен министрӗ Виктор Шметков канашлура пӗлтернӗ. Чӑваш Ен Элтеперӗ эренесерен ирттерекен канашлура финанс енчен улталакансене хирӗҫ тӑрас ыйтӑва сӳтсе явнӑ.

Кӑҫалхи кӑрлач-нарӑс уйӑхӗсенче регистрациленӗ 1969 преступленирен 974-шне, е 49,5 процентне, информаципе телекоммуникаци технологийӗпе усӑ курса тунӑ. Пӗлтӗр ҫавӑн пек майпа тунӑ преступленисенчен 30-а яхӑн тӗслӗхре ултавҫӑсем хӑйсемпе банк ӗҫченӗ е прав тытӑмӗнче тимлекен тесе улталанӑ. Тӗнче тетелӗнче тавар туяннӑ чухне улталаннисем — 14 процент, телефон е банк карттине ҫухатнӑран шар курнисем — 10 процент, валюта тата криптовалюта биржисенче улталаннисем — 7 процент.

Юлашки вӑхӑтра ҫул ҫитмен ачасем те улталанаҫҫӗ.