Инкеклӗ лару-тӑру министерстви тунӑ сӑн

Паян Ҫӗрпӳ округӗнчи Виҫикассинче 9 ҫулти арҫын ача путса вилнӗ. Вӑл путни пирки ҫӑлав службине 15 сехет те 45 минутра пӗлтернӗ.

Ачан виллине пӗр сехетрен тӑванӗсем шыраса тупса ҫыран хӗррине илсе тухнӑ. Халӗ ӗҫ-пуҫа уҫӑмлатаҫҫӗ.

Аса илтерер: кӑҫал ҫулла Шупашкарта Атӑлта 13-ри хӗрача, 14-15 ҫулсенчи икӗ арҫын ача путса вилнӗ.

r21.fssp.gov.ru сӑнӳкерчӗкӗ

Шупашкарта пурӑнакан пӗр хӗрарӑм финанс организацийӗсен умӗнчи тата налук парӑмне вӑхӑтра татман. Парӑм 1,1 миллион тенкӗрен иртсе кайнӑ.

Суд приставӗсем хӗрарӑма куҫма пурлӑхсӑр юласси пирки асӑрхаттарнӑ. 52 ҫулти хӗрарӑмӑн банкри мӗнпур счетне суд приставӗ арестленӗ, чикӗ леш енне кайма, пурлӑха хӑйӗн ячӗпе регистрацилеме чарнӑ.

Унсӑр пуҫне суд приставӗ дача ҫуртне тата ҫӗр лаптӑкне арестлесси пирки асӑрхаттарнӑ. Ҫавӑн хыҫҫӑн хӗрарӑм парӑма тӳлесе татнӑ. Унсӑр пуҫне унӑн суд приставӗсене ӗҫшӗн 80 пин тенкӗ ытла тӳлеме тивнӗ.

r21.fssp.gov.ru сӑнӳкерчӗкӗ

Элӗк районӗнчи пӗр ялта пурӑнакан 41 ҫулти арҫын хӗрӗпе ывӑлне алимент тӳлесшӗн пулман. Парӑм 200 пинрен иртсе кайнӑ. Явапсӑр ашшӗпе ҫыхӑннӑ ӗҫ суда ҫитнӗ.

Вырӑнти суд приставӗсен протоколне унта пӑхса тухнӑ хыҫҫӑн арҫынна ӗҫлеттермелле йышӑну кӑларнӑ. Икӗ ача ашшӗ урама тирпейлесе тӑрӗ.

Унсӑр пуҫне арҫынна транспорт рулӗ умне ларма чарнӑ. Суд йышӑнӑвӗпе 50 сехет ӗҫлеттернӗ хыҫҫӑн та парӑма татмасан арҫын тӗлӗшпе пуҫиле ӗҫ пуҫарма пултарӗҫ.

chuvashia.sledcom.ru сӑнӳкерчӗкӗ

Чӑваш Енӗн Ипотека корпорацийӗн гендиректорӗ Алексей Антонов тӗлӗшпе пуҫиле тата тепӗр ӗҫ пуҫарнӑ. Вӑл ӗҫ вырӑнӗпе хӑйшӗн усӑ курнӑ тесе шухӑшлаҫҫӗ.

Тӗпчевҫӗсем шухӑшланӑ тӑрӑх, 2022 ҫулхи авӑн уйӑхӗнче Чӑваш Енӗн Ипотека корпорацийӗ застройщик-организаципе Вӑрмарта нумай хваттерлӗ ҫурт хӑпартма килӗшӳ тунӑ. Хваттерсенчен хӑшӗсем социаллӑ тӗллевлӗ пулнӑ: ҫынсене ишӗлекен ҫуртран куҫарма тата тӑлӑх ачасем валли.

Чӑваш Енӗн Минстройӗ тӗрӗслев ирттернӗ чухне тӗрлӗ кӑлтӑк тупса палӑртнӑ, апла пулин те Антонов строительство ӗҫне ҫитменлӗхе пӗтермесӗрех тӑсма хушнӑ-мӗн.

Ӳлӗмрен ҫав ҫурта хута ярайман. Пурӑнма май килмен ҫурта сӳтме тивнӗ. Ҫавна пула Антонов 40 миллион тенке яхӑн тӑкак кӳнӗ тесе шухӑшлаҫҫӗ. Ҫурт хӑпартнӑ чух укҫа хывнӑ ҫынсем тата тӑлӑхсем хваттерлӗ пулайман.

Гендиректор тӗлӗшпе пакунлисем унччен те пуҫиле ӗҫ пуҫарнӑ.

Кандинский нейросеть сӑнӳкерчӗкӗ

Шупашкарта пӗр хӗрарӑм ҫынна хӗнесе телефон туртса илнӗ. Пӑтӑрмах утӑ уйӑхӗн 16-мӗшӗнче пулнӑ. Эгер бульварӗнчи ҫуртсенчен пӗрин картишӗнче пӗрне-пӗри сахал пӗлекен ҫынсем эрех ӗҫсе ларнӑ. Кайран вӗсем хирӗҫсе кайнӑ.

29 ҫулти хӗрарӑма пӗри кӳрентермелле сӑмах калани питех те тарӑхтарса янӑ. Арҫынна вӑл сак ҫинчен сирпӗтсе антарнӑ та унӑн телефонне туртса илнӗ. Пуҫтахаланаканни судпа унччен темиҫе хутчен те айӑпланнӑскер иккен.

Йӗрке хуралҫисем хӗрарӑма тата унӑн пӗлӗшӗсене тытса чарнӑ ҫӗре лешсем телефона ломбарда пама ӗлкӗрнӗ. Хӗрарӑм тӗлӗшпе пуҫиле ӗҫ пуҫарнӑ.

Инкеклӗ лару-тӑру министерстви тунӑ сӑн

Ӗнер 56 ҫулти арҫын Ҫӗнӗ Шупашкартан инҫех мар Атӑлта пулӑ тытнӑ. Вӑл ӳсӗр пулнӑ. Шыва кӗрсе чӑмнӑ та... тухайман.

Ӑна ӗнерех шырама тытӑннӑ. Паян унӑн виллине тупнӑ. Ҫӑлавҫӑсем унӑн виллине Ҫӗнӗ Шупашкартан инҫех мар ҫыранран 200 метр аякра асӑрханӑ.

Палӑртмалла: ҫулла пуҫланнӑранпа республикӑра 22 ҫын путса вилнӗ. Вӗсен йышӗнче - 3 ача. Аса илтерер: утӑ уйӑхӗн 13-мӗшӗнче Етӗрне округӗнче 4 ача амӑшӗ путнӑ.

Кандинский нейросеть сӑнӳкерчӗкӗ

Шупашкарта пурӑнакан 21 ҫулти хӗр ҫула май лартса каякан машина шыранӑ май мессенджерсенчен пӗринче ҫыру ҫырса янӑ. Кӗҫех унпа пӗри ҫыхӑннӑ. Пикене ҫав ҫын ятарлӑ каҫӑ ярса панӑ, ун тӑрӑх машинӑра вырӑн йышӑнса хума сӗннӗ.

Асӑннӑ каҫӑпа иртсе хӗр хӑйӗн банк карттин даннӑйӗсене те кӑтартнӑ, кӗҫех карттӑ ҫинчи 15 пине яхӑн тенкӗ ҫухалнӑ.

Ҫавӑн хыҫҫӑн хӗр йӗрке хуралҫисенчен пулӑшу ыйтнӑ. Пӑтӑрмах тӗлӗшпе пуҫиле ӗҫ пуҫарнӑ.

"ПроГород" сӑнӳкерчӗкӗ

Чӑваш Енрен Мускава ӗҫлеме кайнӑ 52 ҫулти Евгений Подъячев ҫухални пирки эпир пӗлтернӗччӗ-ха. Аса илтерер: вӑл арӑмӗпе утӑ уйӑхӗн 11-мӗшӗнче 10 сехет те 30 минутра телефонпа, видеоҫыхӑну мелӗпе, калаҫнӑ. Ун чухне арҫын Мускаври Щелково автовокзалӗ ҫывӑхӗнче пулнӑ.

Утӑ уйӑхӗн 15-мӗшенче арҫын тупӑннӑ. Вӑл арӑмне ӗнентернӗ тӑрӑх, тусӗпе палламан ҫынсен машинине кӗрсе ларнӑ та вӗсене лешсем ҫаратнӑ, Мускав облаҫӗнче антарса хӑварнӑ.

Арҫын Мускавра ӗҫленӗ чух пурӑннӑ вырӑна ҫитнӗ, унтан арӑмӗпе ҫыхӑннӑ. Ҫывӑх вӑхӑтар вӑл Чӑваш Ене таврӑнӗ.

Кандинский нейросеть сӑнӳкерчӗкӗ

Красноармейски муниципаллӑ округӗнчи пӗр шкул директорӗ хӑйне пӑхӑнакансене пӗр алӑпа преми панӑ та тепринпе туртса илнӗ.

2021 ҫулхи ака уйӑхӗнчен пуҫласа 2023 ҫулхи ҫу уйӑхеччен хӗрарӑм ӗҫченсенчен пӗрне преми (хавхалантармалли тӳлев) панӑ та унӑн пӗр пайне хӑйне куҫарса пама ыйтнӑ. Ҫав вӑхӑтра пурӗ 130-а яхӑн пин тенке ҫапла майпа хӑйне илнӗ. Укҫапа директор хӑй усӑ курнӑ.

Шкул директорне РФ Пуҫиле кодексӗн 159 статйин 3-мӗш пайӗпе килӗшӳллӗн явап тыттарнӑ. Хӗрарӑм укҫана саплаштарнӑ. Суд ӑна 80 пин тенкӗ штраф тӳлеттерме йышӑннӑ.

21.мвд.рф сӑнӳкерчӗкӗ

Ӗнер, утӑ уйӑхӗн 15-мӗшӗнче, Шупашкарта пурӑнакан 46 ҫулти хӗрарӑм пурнӑҫӗ сарӑмсӑр татӑлнӑ.

Чӑваш Енӗн Шалти ӗҫсен министерствин пресс-службинче пӗлтернӗ тӑрӑх, вӑл «Атӑл» М-7 автомобиль ҫулӗн 647-мӗш километрӗнче ҫул урлӑ каҫма тӑнӑ. Ҫынсене ятарласа каҫмалли вырӑна темшӗн ҫитсе пӗтмен-ҫке.... Хӑй тата тӗксӗм ҫипуҫпа пулнӑ.

Хӗрарӑм ҫине «Лада Ларгус» автомобиль пырса кӗнӗ. Йывӑр суранланнӑ ҫын инкек вырӑнӗнчех вилнӗ. 43 ҫулти водитель урах пулнӑ.