m.progorod62.ru сайтри сӑн

Раштав уйӑхӗн 9-мӗшӗнче Ҫӗнӗ Шупашкарти ҫӳп-ҫап уйӑракан комплексра ӗҫлекенсем хӑрушлӑх кӑларса тӑратакан япала тупнӑ. Вӑл – мина.

Вырӑна экстреннӑй служба ӗҫченӗсем ҫитнӗ. Комплексри хатӗр-хӗтӗре ӗҫлеме чарнӑ. «Чӑваш Ен» Патшалӑх телерадиокомпанийӗ пӗлтернӗ тӑрӑх, йӗрке хуралҫисем лару-тӑрӑва уҫӑмлатаҫҫӗ.

Сӑмах май, кӑҫал ҫулла шӑрӑх ҫанталӑка пула ҫӳп-ҫап куписем ҫуннӑччӗ.

Евгения Фёдорова Фейсбукра вырнаҫтарнӑ сӑнӳкерчӗксем

Шупашкарти «Ҫӗнӗ хула» микрорайонта пурӑнакан хӑш-пӗр ҫынна стена ҫине ӳкерни килӗшмен. Ку хыпара унта тӗпленнӗ Евгения Фёдорова Фейсбукра пӗлтернӗ.

Асӑннӑ микрорайонта Гарри Поттер ҫинчен ҫырнӑ хайлава тӗпе хурса граффити йӗркеленӗ. Анчах халӗ вӑл ҫук. Кӗтмен-туман ҫӗртен ҫухалнӑ. Сӑнӳкерчӗке сӑрӑ тӗслӗ сӑрӑпа хупласа хунӑ.

«Тискер сӑнарсем» тӗлӗшпе ушкӑнпа ҫӑхавлакансем пулнӑ имӗш. Миҫе ҫынна килӗшменни пирки паллӑ мар. «Пирӗн компанире ҫӑхава куракан пулман. Граффти хатӗрлессине шӑпах эпир пуҫарнӑ тата укҫа тӳленӗ», — тесе ҫырнӑ маларах асӑннӑ Евгения.

65-мӗш шкул патӗнчи подстанци ҫинчи граффитие Александр Назаретский художник ӳкернӗ. Сӑмах май, вӑл тата Покрас Лампас Мускав облаҫӗнчи Королёв хулинче те ҫавӑн пек мелпе хитрелетнӗ.

Раштав уйӑхӗн 5-мӗшӗнче Шупашкарти Богдан Хмельницкий урамӗнчи 109-мӗш ҫуртра вырнаҫнӑ «Магнит» лавккара пӗр арҫын ҫӳлӗксем ҫинчи эрехсене урайне вӑркӑнтарнӑ. Ку каҫхи 9 сехетре пулнӑ.

Арҫын 275 кӗленче ҫӗмӗрнӗ. Эрех хаклӑ йышши пулнӑ. Тӑкак 200 пин тенкӗрен те иртнӗ. Арҫын эрех кӗленчисене ҫӗмӗрни камера ҫине лекнӗ.

Хураха Росгварди ӗҫченӗсем тытса чарнӑ та ӑна полицие панӑ. Арҫын 37 ҫулта. Вӑл каланӑ тӑрӑх, сутуҫӑсем ӑна ӳсӗрри пирки асӑрхаттарни тарӑхтарса янӑ. Кӗленчесене ӑнсӑртран, ҫӳлӗк ҫине таянсан, ҫӗмӗрнӗ имӗш. Пуҫиле ӗҫе хальлӗхе пуҫарман. Полици лару-тӑрӑва уҫӑмлатать.

Шупашкарта ҫитес ҫул ҫулла Эльгер урамӗнче фермер пасарӗ тума палӑртнӑ. Ӑна «Московский» ят парасшӑн.

Ку тӗллевпе «Агро-Инноваци» тата «Тимӗр хула» килӗшӳ алӑ пуснӑ. Аукциона раштав уйӑхӗн 1-мӗшӗнче пӗтӗмлетнӗ. Малтанхи хак 9,2 миллион тенкӗ пулнӑ, унта хутшӑнакансем ӑна 6,025 миллион тенке чакарнӑ.

«Тимӗр хула» 20 кунра дизайн-проектӑн сахалтан та 3 тӗслӗхне хатӗрлемелле. Проекта алӑ пусса ҫирӗплетсен компанин 2022 ҫулхи ҫу уйӑхӗн 30-мӗшӗччен пасар туса лартмалла.

cap.ru сӑнӳкерчӗкӗ

ЧР Элтеперӗ Олег Николаев «Ӗмӗтсен чӑрӑшӗ» ҫинчен пӗр юр пӗрчине илнӗ те унта Шупашкарти Рома Кожевниковӑн ӗмӗчӗ пулнӑ. Эппин, Олег Алексеевичӑн ӑна пурнӑҫламалла. Аса илтерер: ҫӑк ятпа акци иртет.

4 ҫулти Рома пуйӑссемпе, чукун ҫулпа кӑсӑкланать. Вӗсене ӳкернӗ кӗнекесене вӑл сехечӗ-сехечӗпе пӑхса ларма пултарать. Ҫавна май ЧР Элтеперӗ ӑна пультпа ҫӳретме май пур чукун ҫул парнеленӗ. Олег Алексеевич Ромӑн аппӑшне Софийӑна та парне панӑ. Хӗрача бисерпа тӗрлемелли хатӗршӗн, пылак ҫимӗҫсемшӗн тата кӗнекешӗн питӗ савӑннӑ.

София Шупашкарти 65-мӗш шкулта вӗренет. Амӑшӗ Татьяна Леонидовна ача ҫуратмалли ҫуртра медсестрара тӑрӑшать. Ашшӗ Илья Вадимович ача пӑхассипе отпускра ларать.

"На связи" сайтри сӑн

Шупашкарти Пролетари урамӗнчи 15-мӗш ҫуртра пурӑнакан икӗ пӳлӗмлӗ хваттере ҫӳп-ҫап купине ҫавӑрнӑ. Анчах вӗсене унтан ниепле те кӑларса яраймаҫҫӗ, мӗншӗн тесен хваттерте ачасем пропискӑра тӑраҫҫӗ.

Амӑшӗпе ывӑлӗ эрехпе иртӗхеҫҫӗ, коммуналлӑ тӑкаксемшӗн тӳлемеҫҫӗ. Ҫитменнине, вӗсем пӗр кӗтӳ кушак усраҫҫӗ, ҫӳп-ҫап контейнерӗсенчен ӑпӑр-тӑпӑр киле сӗтӗреҫҫӗ. Ҫав хваттерте кил хуҫи хӗрарӑмӗн хӗрӗ тата мӑнукӗсем пропискӑра тӑнӑран вӗсене унтан кӑларса яраймаҫҫӗ. Лешсем вара Мускавра пурӑнаҫҫӗ.

Суд амӑшӗпе ывӑлне килте тирпейлеттерме йышӑннӑ. Ҫурт-йӗр фончӗ ҫӳп-ҫапа илсе тухма пулӑшнӑ, икӗ КамАЗ ӑпӑр-тапӑр илсе тухнӑ. Анчах тепӗр ҫултанах хваттер каллех ҫӳп-ҫаппа тулнӑ, парӑм 500 пин тенкӗрен иртнӗ. Кӳршисем ку хваттерпе мӗн те пулин тума ыйтаҫҫӗ. Халӗ Шупашкар хула администрацийӗ Калинин районӗн судне хваттере кӗме ирӗк ыйтса тавӑҫ тӑратнӑ.

____

Назовем одну из улиц Чебоксар в честь профессора М.И. Скворцова!

Вот уже пять лет, как с нами нет нашего коллеги – ученого и педагога доктора филологических наук, профессора Михаила Ивановича Скворцова. Его не стало 1 декабря 2016 года.

М.И. Скворцов свою трудовую деятельность начал как журналист: после окончания Казанского государственного университета трудился в республиканских газетах «Хӗрлӗ ялав» (Казань), «Коммунизм ялавӗ», Чувашском радиокомитете. Но вскоре понял, что ему предназначено связать судьбой свою жизнь с наукой, и всерьез занялся изучением родного чувашского языка. Систематизация его лексики, составление и редактирование двуязычных словарей, разработка теории русско-чувашского и чувашско-русского перевода стали основой его научной деятельности на долгие годы. М.И. Скворцов – автор свыше 200 публикаций, в т.ч. 4 монографий, боле 30 словарей.

Михаил Иванович проявил себя и как замечательный педагог: преподавал студентам Чувашского госуниверситета, читал лекции учителям на курсах повышения квалификации в Чувашском республиканском институте образования.

Малалла...

"Про Город" сайтри сӑн

Паян, раштав уйӑхӗн 4-мӗшӗнче, Шупашкарта «Лента» микрорайонта «зебра» патӗнче ҫул урлӑ каҫакан хӗре машина ҫапса кайнӑ. Ку пӑтӑрмах 17 сехет тӗлӗнче Асламас урамӗнчи 3-мӗш ҫурт ҫывӑхӗнче пулнӑ.

«Тойота» водителӗ ҫул урлӑ каҫакан хӗр ҫине пырса кӗнӗ. Васкавлӑ медпулӑшу бригади вырӑна хӑвӑртах ҫитнӗ. Ҫавӑн пекех полици килнӗ.

«Про Город» хаҫата халӑх корреспонденчӗ пӗлтернӗ тӑрӑх, хӗре пульницӑна илсе кайнӑ.

nk-online.ru сайтри сӑн

Шупашкарти 12 ҫулти хӗрача тӑлӑха юлнӑ. Вӑл амӑшӗпе пурӑннӑ, анчах ҫывӑх ҫынни вилнӗ. Ҫавна май ун валли ҫӗнӗ ҫемье шыраҫҫӗ. Кун пирки Шупашкарти Мускав районӗн администрацийӗн пресс-служби пӗлтерет.

Хӗрарӑм 12-ри хӗрне пӗчченех ӳстернӗ. Анчах вӑл вӑхӑтсӑр вилнӗ. Тӑванӗсен хушшинче вара ачана ҫемьене илес кӑмӑллисем пулман.

Пресс-служба пӗлтернӗ тӑрӑх, хӗрача ҫынпа хутшӑнма юратать, хастар. Ӑна ашшӗ-амӑшӗн юратӑвӗ кирлӗ. Ыйтса пӗлмелли телефон: 23-52-18, 23-52-33.

Фейсбукри Тимӗр Тяпкин страницинчен илнӗ сӑнӳкерчӗк

Республикӑмӑрӑн тӗп хули Ҫӗнӗ ҫула хатӗрленме пуҫӑннине хула ҫыннисемпе хӑнисем асӑрхарӗҫ пулӗ ӗнтӗ. Чӑваш хастарӗ Тимӗр Тяпкин Фейсбукра пӗлтернӗ тӑрӑх, «Шупашкарти Хӗрлӗ лапамра хӗле хирӗҫ тухья хӑйӗн вырӑнне» таврӑннӑ.

Аса илтерер: асӑннӑ кӳлепене пӗлтӗр пуҫласа вырнаҫтарнӑччӗ. Кайран хулана ҫуркунне валли хатӗрленӗ май тухьяна кӳлмекрен илсе кайнччӗ. Халӗ, ав, вӑл каллех хӑйӗн вырӑнне таврӑннӑ. Ун патне пырса хула ҫыннисемпе хӑнисем сӑн ӳкерӗнейӗҫ. Тухья аякран килнӗ ҫынсене те хӑй патне илӗртӗ.