zr.ru сайтри сӑн

Ака уйӑхӗн 13-мӗшӗнче арҫын шыравҫӑсенчен пулӑшу ыйтнӑ. Ҫав кун унӑн амӑшӗ ҫухалнӑ. Вӑл 18 сехетре килтен тухнӑ та таврӑнман. Ывӑлӗ каланӑ тӑрӑх, вӑл амӑшӗн тыткаларӑшӗнче улшӑнусем асӑрхаман. Вӗсем яланах пӗрле пӗр вырӑнсенче уҫӑлса ҫӳренӗ.

Шыравҫӑсем ҫак ватӑ хӗрарӑма унччен те, кӑрлач уйӑхӗнче, шыранине аса илнӗ. Хальхинче те кинемей ҫав тумах тӑхӑнса тухса кайнӑ. Юрать-ха, ӑшӑ тумланнӑ.

Шыравҫӑсем чи малтан кинемей уҫӑлса ҫӳренӗ вырӑнсене тӗрӗсленӗ, ҫур ҫӗр иртсен пульницӑсене шӑнкӑравланӑ. Ирхине тӑванӗсене пытарнӑ ҫӑва ҫине те, дачӑсене те ҫитсе килнӗ. Кинемей ниҫта та курӑнман. Ӑна ака уйӑхӗн 14-мӗшӗнче каҫхине ҫеҫ тупнӑ. 17 сехетре таксист шӑнкӑравланӑ, кинемее полицие илсе кайнине пӗлтернӗ.

ШӖМ тунӑ видео скринӗ

Пуш уйӑхӗн 25-мӗшӗнчен пуҫласа акан 9-мӗшӗччен Шупашкарта полицие автомобильти видеорегистраторсем ҫухални пирки тӑхӑр заявлени килсе выртнӑ. Преступлени йӗрӗ пӗр евӗрлех пулнӑ, урамсен ячӗсем ҫеҫ улшӑнса пынӑ: Кадыков, Пролетари, Энгельс, Шумилов, стрелоксен 324-мӗш дивизийӗн урамӗ, Эгер бульварӗ.

Йӗрке хуралҫисем вӑрӑ йӗрӗ ҫине часах ӳкнӗ. Ӑна Павлов мичман урамӗнче черетлӗ автомобиле ҫаратнӑ хыҫҫӑн тытса чарнӑ.

Шупашкарта пурӑнакан, унччен судпа пӗрре мар айӑпланнӑ арҫын 10 преступлени туни пирки каласа кӑтартнӑ. Ун тӗлӗшпе пуҫиле ӗҫ пуҫарнӑ. Следстви пынӑ вӑхӑтра арҫын килти арестра пулӗ.

zen.yandex.ru сайтри сӑн

Шупашкарта пурӑнакан 22 ҫулти каччӑ вӑхӑта ирттермелли майра шыраса ултавҫӑсен аллине лекнӗ. Вӗсене вӑл 150 пин тенкӗ куҫарса панӑ.

Каччӑ полицие каласа кӑтартнӑ тӑрӑх, вӑл тӗнче тетелӗнче "вӑхӑт ирттермелли майра" номерне тупса шӑнкӑравланӑ. Малтан ӑна укҫан пӗр пайне тӳлесе хума ыйтнӑ. Унтан страховкӑшӑн куҫарма каланӑ. Тӗрлӗ сӑлтав тупса унран 150 пин тенкӗ сӑптӑрнӑ. Кун хыҫҫӑн тин вӑл ултавҫӑсен аллине лекнине ӑнланнӑ.

Кун тӗлӗшпе пуҫиле ӗҫ пуҫарнӑ.

Ака уйӑхӗн 11-мӗшӗнче Шупашкарта пурӑнакан 28 ҫулти хӗрарӑм полицие пынӑ та унӑн банк картти ҫинчен 10 пин ытла тенкӗ ҫухалнине пӗлтернӗ. Полицейскисем ҫак укҫана пӗтернӗ ҫынна часах тупса палӑртнӑ. Вӑл - 55 ҫулти хӗрарӑм.

Хӗрарӑм тунман: вӑл банк карттине тупнӑ та лавккасене кайса унпа 16 хутсен тавар туяннӑ. Ун тӗлӗшпе пуҫиле ӗҫ пуҫарнӑ. Следстви пынӑ вӑхӑтра хӗрарӑмӑн ниҫта та тухса кайма юрамасть

i.ytimg.com сайтри сӑн

Ака уйӑхӗн 10-мӗшӗнче каччӑ Атӑл ҫине, Шупашкарти Волжский-3 микрорайон ҫывӑхне, пулӑ тытма кайнӑ. Ларсан-ларсан хайхискер пӑр ҫурӑлнӑ сасӑ илтнӗ. Каччӑ ҫыран хӗррине утса тухма шикленнӗ, ҫавӑнпа ҫӑлавпа шырав службине шӑнкӑравланӑ.

Ҫалавҫӑсем ун патне аэрокимӗпе ҫула тухнӑ. Ун патне кайнӑ чухне вӗсем те пӑр ҫурӑлкаланине туйнӑ. Ҫӑлавҫӑсем каччӑна ҫыран хӗррине илсе тухнӑ.

Аса илтерер: нумаях пулмасть Шупашкар районӗнчи Ертукассинче арҫын пулла кайсан путса вилнӗ.

Шупашкар хула администрацийӗ 42-мӗш маршрут перевозчикӗпе, «Крокус Автопа», килӗшӗве пӑрахӑҫлӗ. Администраци кун пирки уведомлени янӑ.

Тӳре-шара ӑнлантарнӑ тӑрӑх, перевозчик ака уйӑхӗн 6-мӗшӗнченпе ӗҫлеме хирӗҫленӗ, 4 автобуса маршрута кӑларма пӑрахнӑ. Ҫапла майпа вӑл килӗшӳ условийӗсене пӑсать.

Ҫитес вӑхӑтра администраци урӑх перевозчик тупас тӗллевпе конкурс ирттерӗ. Конкурс пуличчен вӑхӑтлӑх перевозчик пулӗ-и е ҫук-и – паллӑ мар.

life.ru сайтри сӑн

Шупашкарта пурӑнакан каччӑ вӑйӑ приставкине тара илнӗ те ӑна сутса янӑ. Ӑна тупнӑ. Каччӑ тӗлӗшпе вара пуҫиле ӗҫ пуҫарнӑ.

Вӑйӑ приставкин хуҫи полицие каласа кӑтартнӑ тӑрӑх, вӑл ӑна палламан ҫынна тара панӑ. Анчах каччӑ ҫухалнӑ, приставкӑна тавӑрса паман. Ку полицие кайса пулӑшу ыйтнӑ.

Йӗрке хуралҫисем ҫак ӗҫе тунӑ 25 ҫулти арҫынна тытса чарнӑ. Вӑл унччен те судра явап тытнӑ. Хальхинче те хӑйӗн айӑпне йышӑннӑ. Вӑл приставка хуҫине 25 пин тенкӗлӗх тӑкак кӳнӗ.

saratov.doctorbormental.ru сайтри сӑн

Ҫӗнӗ Шупашкарта пурӑнакан арҫын ултавҫӑсен серепине ҫакланнӑ. Унӑн полицирен пулӑшу ыйтма тивнӗ.

Акӑ мӗнле пулса иртнӗ: 45 ҫулти арҫын патне палламан арҫын шӑнкӑравланӑ. Вӑл банк ӗҫченӗ имӗш. «Пирӗн банкра кредит заявки хӑварман-и эсир?» - тесе ыйтнӑ унран. Арҫыннӑн ят-шывне те тӗрӗс каланӑ. Лешӗ заявка хӑварманнине пӗлтернӗ. Хайхискер «юмах» ҫаптарма пуҫланӑ: эппин, унӑн ячӗпе такам заявка хӑварнӑ, укҫа-тенке «хӑрушсӑр счет» ҫине куҫарма сӗннӗ. Палламан ҫын Ҫӗнӗ Шупашкар арҫыннине полицие, банка каймалла марри пирки асӑрхаттарнӑ. Ӑна банкра ӗҫлекен ҫынсем улталама пултарнӑ имӗш.

Арҫын кредит картти ҫинчен 426 пин тенкӗ илсе палламан ҫын каланӑ счет ҫине куҫарнӑ. Каҫхине вӑл кун пирки пӗлӗшне каласа кӑтартнӑ. Ҫавӑн чухне тин вӑл ултавҫӑ аллине лекнине ӑнланнӑ.

Ака уйӑхӗн 2-мӗшӗнче Шупашкарти пӗр кафери кассӑран укҫа ҫухални пирки полицие пӗлтернӗ. Ҫак ӗҫе кам тунӑ? Йӗрке хуралҫисем йӗр ҫине часах тухнӑ.

Вырӑна тӗрӗсленӗ хыҫҫӑн ҫакӑ палӑрнӑ: кафене палламан арҫын кӗнӗ. Вӑл кассӑна уҫнӑ та укҫана йӑтса тухса кайнӑ.

Ҫак арҫынна тытса чарнӑ. Вӑл – унччен те судпа айӑпланнӑ 42 ҫулти ҫын, Шупашкарта пурӑнать. Хайхискер укҫа вӑрланине тунман. Хӑй ӑнлантарнӑ тӑрӑх, касса патӗнче никам та пулман, ҫавӑнпа вӑл укҫана йӑтса тухса кайнӑ. Нухрата вӑл каялла тавӑрса панӑ. Ҫапах судра унӑн явап тытма тивӗ.

Ҫӗнӗ Шупашкарти ҫӳп-ҫап тиекен станцире ӗҫлекенсем ӑнсӑртран чӗрӗп тупнӑ. Телее, вӑл кӑшт ҫеҫ аманнӑ, унта вӑй хуракансем унӑн суранӗсене сипленӗ. Ҫӑва тухиччен чӗрӗпе станцире ӗҫлекен пӗр ҫын хӑйӗн патӗнче усрӗ.

Ҫитес вӑхӑтра чӗрчуна ветеринар патне тӗрӗслеме илсе кайӗҫ. Хальлӗхе чӗрӗп хӗл ыйхинчен вӑранман-ха. Ӑшӑтсанах ӑна ялти пахчана кайса ярӗҫ.

Сӑмах май, ҫак станцире пӗлтӗр кушак ҫури тупнӑ, ӑна ҫӑлнӑ. Телее, вӑл чӗрех юлнӑ. Унта ӗҫлекенсем ӑна Босс ят панӑ.