forum.na-svyazi.ru сӑнӳкерчӗкӗ

Шупашкар хула администрацийӗнчи Ҫурт-йӗрпе коммуналлӑ хуҫалӑх тата хӑтлӑх кӗртессипе ӗҫлекен управление ертсе пыма шаннӑ ҫын виҫӗ эрне хыҫҫӑн ӗҫрен кайнӑ.

Федор Андреева асӑннӑ управленин ертӳҫи пулма ака уйӑхӗн 25-мӗшӗнче шаннӑ. Унччен вӑл Шупашкар хула администрацийӗн Ленин районӗн администрацийӗнче пуҫлӑх ҫумӗ пулса ӗҫленӗ.

Ӑна Ҫурт-йӗрпе коммуналлӑ хуҫалӑх управленине ертсе пыма лартсан ҫав ҫыннӑн тӗп тивӗҫӗсен шутӗнче хулари программӑсене пурнӑҫласси тата Граждан урамне юсаса ҫӗнетессине вӗҫлесси тесе Денис Спирин сити-менеджер

палӑртса хӑварнӑ. Тилхепене тыттарнӑранпа уйӑх ҫитиччен Федор Андреев ятне маларах эпир асӑннӑ управлени сайтӗнчи структурӑран кӑларса ҫапнӑ. Вӑл текех пуҫлӑх маррине управленин пресс-службинче те халӗ журналистсене ҫирӗплетсе панӑ.

forum.zarulem.ws сӑнӳкерчӗкӗ

Шупашкар хулинче паян, ҫу уйӑхӗн 16-мӗшӗнче, ҫул урлӑ каҫакан хӗрарӑма машина ҫапса кайнӑ.

Пӑтӑрмах Ленин проспектӗнчи 31-мӗш ҫурт патӗнче, «Читай-город» лавккаран инҫех мар ҫӗрте, пулса иртнӗ. Ҫуран ҫӳрекенсене каҫса ҫӳремелли ятарлӑ вырӑнпа каҫакан хӗрарӑм ҫине ГАЗель пырса кӗнӗ.

Инкек самантне ӳкерсе илнӗ видеотӑрӑх хакласан, хӗрарӑм малалла мечӗк пек ывтӑнса кайнӑ.

Хӗрарӑма пульницӑна ӑсатнӑ.

Пӑтӑрмах пирки хыпар вырнаҫтарнӑ ҫӑлкуҫра ҫуран ҫӳрекенсен те питӗ тимлӗ пулмалла тесе калакансем сахал мар.

favim.ru сайтри сӑн

Шупашкарти Мускав районӗнче Светозар ятлӑ арҫын ачана регистрациленӗ. Вӑл ака уйӑхӗн вӗҫенчех ҫут тӗнчене килнӗ

Светозар - ҫемьери виҫҫӗмӗш ача. Ун валли ашшӗ-амӑшӗ хӑйне евӗр ят суйланӑ. Ҫак ятпа пирӗн несӗмӗлсем тӗне кӗмен чухнех усӑ курнӑ-мӗн.

Светозар "ҫутӑ сапалакан" тенине пӗлтерет. Аса илтерер: Шупашкарта Космос ятлӑ ача та пур.

патриотам.рф сайтри сӑн

Ҫу уйӑхӗн 9-мӗшӗнче тумтир сутакан ҫын полицие пынӑ. Ӑна тавар туянакансем улталаса хӑварнӑ-мӗн.

51 ҫулти сутуҫӑ каланӑ тӑрӑх, унӑн павильонне хӗрпе каччӑ пынӑ, арҫын курткипе джинс шӑлавар суйланӑ. Хайхискерсем укҫа тӳленӗ чухне ӑна онлайн мелпе куҫарса панӑ, 4 пин тенкӗлӗх суя чек кӑтартнӑ та ҫав вырӑнтан ҫухалнӑ.

Ултавҫӑсене часах тупнӑ. Ҫак ӗҫе Шупашкарта пурӑнакан 28 ҫулти каччӑпа унӑн савнийӗ тунӑ-мӗн.

Йӗрке хуралҫисем пуҫиле ӗҫ пуҫарнӑ. Каччӑна тытса чарнӑ.

Шупашкарта пурӑнакан 35 ҫулти арҫыннӑн ака уйӑхӗн 24-мӗшӗнче юбилейне паллӑ тума укҫа пулман. Вӑл никамӑн та мар тесе шухӑшланӑ машинӑна, «копейкӑна», тимӗр-тӑмӑра пама шутланӑ. Машина Мир проспектӗнче унӑн килӗнчен инҫех мар ларнӑ.

«Копейка» ҫухалнине хуҫи ҫу уйӑхӗн 10-мӗшӗнче асӑрханӑ та полицие пӗлтернӗ. Йӗрке хуралҫисем пуҫиле ӗҫ пуҫарнӑ.

Вӑрра тӳрех тытса чарнӑ. Следстви пынӑ вӑхӑтра унӑн ют ҫӗре тухса ҫӳреме юрамасть.

cheb.ru сайтри сӑн

Паян Шуппашкарти Президент бульварӗнче вырнаҫнӑ Правительство ҫуртӗнчен ҫынсене эвакуациленӗ. Кӑнтӑрла электронлӑ почтӑна унта бомба хуни пирки ҫыру ҫитнӗ.

Правительство ҫуртӗнче ӗҫлекен ҫынсене, унта килнисене - пӗтӗмпе 450 яхӑн ҫынна - урама кӑларнӑ. Телее, "бомба хунӑ" тесе килнӗ хыпар суя пулнӑ.

Аса илтерер: кӑҫал нарӑс тата пуш уйӑхӗсенче электронлӑ почтӑсене бомба хуни пирки хыпар килнӗ тесе чылай ача пахчипе шкула, суту-илӳ центрӗсене эвакуациленӗ. Кашнинчех ку суя хыпар пулнӑ.

cap.ru сӑнӳкерчӗкӗ

Ӗнер Шупашкарта иртнӗ "Вилӗмсӗр полк" акцие 27 пине яхӑн ҫын хутшӑннӑ. Унта Донбасран эвакуациленнисем килнӗ. Пӗр ҫемье, тӗслӗхрен, Тӑван ҫӗршывӑн Аслӑ вӑрҫине хутшӑннӑ тӑванӗн портретне йӑтса утнӑ. Салтак Чӑваш Енре ҫуралнӑскер пулнӑ, Совет Союзӗн Паттӑрӗн ятне тивӗҫнӗ.

Аса илтерер: пандемие пула икӗ ҫул Ҫӗнтерӳ кунӗнче мероприятисем онлайн мелпе иртмен. Кӑҫал парад та пулнӑ, салют та янӑ, ытти мероприяти те иртнӗ.

"Про Город" сайтӗнчи сӑн

Шупашкарта 17-мӗш маршрутпа ҫӳрекен троллейбусра кондуктор та кирлӗ мар. Унта стационар валидаторӗ вырнаҫтарнӑ.

Вӑл пулӑшнипе банк карттипе е ЕТКпа тӳлесе билет туянма пулать. Пассажирӑн укҫа кӑна пулсан ӑна водитель билет парать.

Палӑртмалла: хӑш-пӗр троллейбусра валидатор вырнаҫтарасси пирки пӗлтернӗччӗ. Ку сӑнав проекчӗ пек пулнӑ.

proprikol.ru сайтри сӑн

Шупашкарти Тӑван ҫӗршывӑн Аслӑ вӑрҫин ветеранӗсене, сусӑрӗсене, вӑрҫӑ вӑхӑтӗнче юлашки призыва хутшӑннисене таксипе тӳлевсӗр илсе ҫӳрӗҫ.

Ветеранӑн е унӑн официаллӑ представителӗн телефон номерне Пенси фондӗнче регистрацилемелле. Такси чӗнмешкӗн ветеран ҫумне ҫирӗплетнӗ соцӗҫчен патне шӑнкӑравламалла.

Пӗр ҫын пуҫне 3 пин тенкӗ таран субсиди уйӑрса парӗҫ. Акци ҫу уйӑхӗн 6-мӗшӗнче пуҫланнӑ, ҫулталӑк вӗҫлениччен парнӑҫланӗ.

Ҫу уйӑхӗн 8-мӗшӗнче Шупашкарти «Ҫӗнӗ хула» микрорайонта пӑши чупса ҫӳренӗ. Ӑна унта пурӑнакансем видео ӳкернӗ.

Пӑши шкул умӗнче чупса ҫӳренӗ, ниҫта кайма пӗлмесӗр тимӗр карта ҫине те пырса тӑрӑннӑ.

Кайран ҫак пӑшие водительсем Сӗнтӗрвӑрри ҫулӗ ҫинче те курнӑ. Сӑмах май, нумаях пулмасть Улатӑр тата Шупашкар районӗсенче пӑшисене машина ҫапса кайнӑ.