Паян, авӑн уйӑхӗн 24-мӗшӗнче, Чӑваш Енри паллӑ композитор, педагог, Раҫҫей композиторсен союзӗн пайташӗ Лолита Чекушкина 55 ҫул тултарать.

Лолита Чекушкина 2011 ҫулта Чӑваш Республикин тава тивӗҫлӗ ӳнер ӗҫченӗ ята тивӗҫнӗ. 2012-мӗш ҫулта вӑл Чӑваш Республикин патшалӑх парнин лауреачӗ пулса тӑнӑ. 2001, 2008, 2009, 2010, 2013 ҫулсенче вӑл республикӑри театр ӳнерӗн «Чӗнтӗрлӗ чаршав» конкурсӗн лауреачӗ ята тивӗҫнӗ.

Пулас композитор 1984 ҫулта Шупашкарти музыка училищинче тата Чулхулари патшалӑх консерваторийӗнче вӗреннӗ. Вырӑс драма театрӗнче музыка пайӗн заведующийӗнче, Г.С. Лебедев ячӗллӗ лицей-интернатра композици преподавателӗнче, Ҫӗнӗ Шупашкарти ача-пӑча ӳнер шкулӗнче ӗҫленӗ. Симфони оркестрӗ, камера оркестрӗ валли хайлавсем, ача-пӑча фортепьяно пьесисем ҫырнӑ, спектакльсем валли музыка хайлать.

Чӑваш кӗнеке издательствинче икӗ чӗлхеллӗ ҫӗнӗ кӗнеке пичетленнӗ. «Паттӑр юмахӗсем» ятлӑ кӑларӑм «Чӑваш халӑх пултарулӑхӗ» ярӑмпа кун ҫути курнӑ.

Кӗнекене чӑваш юмахӗсене классификацилесе кӗртнӗ. Унта вӗсене унта ӑнлантарса пани те пур. Кӗнекене Чӑваш патшалӑх гуманитари ӑслӑлӑхӗсен институчӗн архивӗнче упранакан ал ҫырусенчен хатӗрленӗ материалсем кӗнӗ. Кӑларӑмра оригинал текстпа пӗрлех вырӑсла куҫарнисем те пур. Кӗнеке издательствинче пӗлтернӗ тӑрӑх, вӗсене текста ҫывӑх куҫарма тӑрӑшнӑ.

Текстсене Надежда Ильина пухса хатӗрленӗ тата вырӑсла куҫарнӑ.

Шупашкарти аэропорт самолетсене пирӗн патран халиччен вӗҫмен хуласене ҫӳретме тытӑнасшӑн. Кун пирки аэровокзалӑн пресс-служби пӗлтернӗ.

Шухӑшланӑ пек пулса пырсан Чӑваш Ен тӗп хулинчен самолетсем Екатеринбурга, Минеральные Воды и Ҫӗнӗ Уренгой хулисене 2021 кӑрлач уйӑхӗнче вӗҫме тытӑнӗҫ.

Аэропортӑн пресс-службинче хыпарланӑ тӑрӑх, ҫӗнӗ авиамаршрутсем уҫас ыйтӑва республика правительствипе, тата, паллах, авиакомпанисемпе сӳтсе явнӑ. Эпир пӗлнӗ тӑрӑх, «ИрАэро» тата «Руслайн» асӑннӑ хуласене самолетсене Шупашкартан ҫӳретме хирӗҫ мар. Анчах тӑкаксене хыснаран субсидилесен.

Кунта сӑмах регионсем хушшинчи авиарейссене субсидилессипе ҫыхӑннӑ федераци программи ҫинчен пырать. Унта лекме тӑрӑшмалла, лексен вара федераци бюджетӗнчен укҫа уйӑрасса ҫеҫ кӗтсе лармалла мар, регионтан та субсидилемелле.

Авӑн уйӑхӗн 21-мӗшӗнче «Улатӑр – Шӑмӑршӑ – Алтышево» ҫулӑн 30-мӗш ҫухрӑмӗнче «Лада Гранта» малта пыракан трактор прицепӗ ҫине пырса тӑрӑннӑ. Прицеп ҫинче вара пӗренесем пулнӑ.

ҪҪХПИ пӗлтернӗ тӑрӑх, авари 19 сехет те 35 минутра пулнӑ. «Лада Гранта» рулӗ умӗнче 64 ҫулти арҫын ларнӑ. Вӑл урӑ пулнӑ. Ҫавӑн пекех унпа салонра 74 ҫулти пассажирка пулнӑ.

Прицеп ҫине пырса тӑрӑнсан пӗрене салона шӑтарса кӗнӗ. Аварире 74-ри хӗрарӑм аманнӑ. Шел те, вӑл пульницӑра суранӗсене пула вилнӗ.

Малтанлӑха пӗлтернӗ тӑрӑх, «Лада Гранта» водителӗ дистанцие пӑхӑнман.

Чӑваш Ен Элтеперне ларнӑ хыҫҫӑн Олег Николаев кӑларнӑ хушусенчен пӗри патшалӑх наградӑласси ҫинчен. Ӑна вӑл паян, авӑн уйӑхӗн 23-мӗшӗнче, алӑ пуснӑ. 240-мӗш номерлӗ хушупа республика ертӳҫи орден, орден медалӗ, Хисеп грамоти тата тава тивӗҫлӗ ятсем пама йышӑннӑ.

Хисепе тивӗҫнӗ ҫынсем хушшинче чӑваш тӗнчин сумлӑ шурсухалӗ те пур. Вӑл – паллӑ педагог, публицист, общество ӗҫченӗ, ӑсчах, филологи ӑслӑлӑхӗсен кандидачӗ, таврапӗлӳҫӗ Виталий Станьял. Ӑна республика Элтеперӗ Олег Николаев «Чӑваш Республики умӗнче тунӑ тава тивӗҫлӗ ӗҫсемшӗн» орден медалӗпе чыслама йышӑннӑ.

Дарья Жевалюкова Шупашкарти 64-мӗш шкулта вӗренет. Маттур хӗрача WorldSkills Russia-2020 Наци чемпионатӗнче «Повар ӗҫӗ» компетенцире малти вырӑна йышӑннӑ.

Виҫӗ куна тӑсӑлнӑ ӑмӑртура ҫамрӑксем ӑсталӑхне кӑтартнӑ. Вӗсем виҫӗ сехет хушшинче виҫӗ блюдо хатӗрленӗ. Кӑҫал пандемие пула ӑмӑрту Кузбасс хулинче онлайн режимпа иртнӗ, ҫавна май дегустаци пулман. 16 ҫулти Дарья заданисене веб-камера умӗнче пурнӑҫланӑ.

Экспертсем Шупашкар хӗрӗ пӗҫернӗ апат-ҫимӗҫе пысӑка хурса хакланӑ. Дарья ку конкурс питӗ кирлӗ пулнине, вӑл пурнӑҫри ҫула, малашнехи профессие суйлама пулӑшнине палӑртнӑ.

chgtrk.ru сайтри сӑн

Вӑрнар районӗнчи Нурӑс сали ҫывӑхӗнчи пӗвере пулӑҫ путса вилнӗ. Авӑн уйӑхӗн 20-мӗшӗнче Ҫӗрпӳре пурӑнакан арҫынна шырава панӑ. Тӑванӗсем каланӑ тӑрӑх, вӑл пулла кайсан ҫухалнӑ.

Авӑнӑн 22-мӗшӗнче унӑн виллине Вӑрнар районӗнчи Нурӑс ялӗ ҫывӑхӗнчи пӗвере, масартан инҫех мар, тупнӑ. Арҫыннӑн кӗлетки ҫинче пусмӑрласа вӗлернӗ йӗр ҫук.

Следстви комитечӗ пӗлтернӗ тӑрӑх, ҫак тӗслӗх тӗлӗшпе тӗрӗслев иртет, ӗҫ-пуҫ мӗнле пулса иртнине уҫӑмлатаҫҫӗ.

Паян Чӑваш Ен Правительствине ҫӗнӗрен йӗркелеме пуҫланӑ. Аса илтерер: ӗнер, авӑн уйӑхӗн 22-мӗшӗнче, Олег Николаев Чӑваш Ен Элтеперӗн должноҫне йышӑнчӗ. Ҫавӑн хыҫҫӑн вӑл республикӑн Правительствине отставкӑна ячӗ. Ҫавӑн пек тума саккун хистет.

Паян Олег Николаев чылай министра ҫӗнӗрен ҫирӗплетнӗ. Ҫав вӑхӑтрах пукансӑр юлнисем те пур. Вӗсем хальлӗхе иккӗн: вӗренӳ тата ҫамрӑксен политикин министрӗ пулнӑ Сергей Яковлев тата культура, национальноҫсен ӗҫӗсен тата архив ӗҫӗн министрӗнче ӗҫленӗ Роза Лизакова. Вӗренӳ министрӗн тивӗҫӗсене пурнӑҫлама Алла Салаевӑна, культура министрӗн тивӗҫӗсене пурнӑҫлама Светлана Каликовӑна шаннӑ.

«2020 ҫулхи Раҫҫейри йывӑҫ» пӗтӗм ҫӗршыври конкурса чӑваш юманӗ хутшӑннине эпир маларах пӗлтернӗччӗ. Аса илтерер: хӑватлӑ та мӑнаҫлӑ ҫак йывӑҫшӑн rosdrevo.ru сайтра сасӑлама пулать. Унӑн номерӗ — тӑваттӑ.

Юмана тӑван халӑхӑмӑр атте тесе каланӑ. Конкурса хутшӑнакан лаштра юман Муркаш районӗнчи Ильинкӑри вӑрман хуҫалӑхӗнче ӳсет. Унӑн ҫӳллӗшӗ – 24 метр, вуллин сарлакӑшӗ – 182 сантиметр. Вӑл 369 ҫулта.

Сасӑлав https://rosdrevo.ru/russian-tree-of-the-year/ сайтра иртет. Вӑл юпа уйӑхӗн 1-мӗшӗнче вӗҫленет. Хальлӗхе чӑваш юманӗ иккӗмӗш вырӑн йышӑнать.

ведомостинсо.рф сӑнӳкерчӗкӗ

Нумай хваттерлӗ ҫуртсенче пурнӑкансенчен 2014 ҫултанпа тӗплӗ юсавшӑн укҫа пуҫтарма тытӑнчӗҫ. Унӑн виҫи хваттер лаптӑкӗнчен килет. Чи малтанах, саккун вӑя кӗрсенех, пӗр тӑваткал метршӑн 5 тенкӗ те 20 пус кӑларса хумаллаччӗ. Кайран хак 6 тенкӗ те 30 пуса ҫитрӗ. Ҫитес ҫул хака 3,7 процент ӳстерсе 6 тенкӗ те 53 пуса ҫитересшӗн.

Паян Чӑваш Ен Министрсен Кабинечӗн ларӑвӗ иртнӗ. Унта тухса калаҫнӑ строительство, архитектура тата ҫурт-йӗрпе коммуналлӑ хуҫалӑх министрӗн тивӗҫӗсене пурнӑҫлакан Александр Героев сӗннипе Правительство пайташӗсем килӗшнӗ, вӗсем хака ӳстерес тенӗ. Тӗплӗ юсав укҫине юлашки икӗ ҫулта ӳстерменнине те палӑртмалла.