Шупашкарта дача вӑрри ҫакланнӑ.
Ют ҫын пурлӑхне ҫав ҫын ҫуркуннех иленнӗ-ха. Пӗри патне кӗрсе ҫаратнӑ, тепри патне. Вӗрен темле тӑсӑлсан та вӗҫӗ пулать теҫҫӗ-и-ха?..
Юнашар вырнаҫнӑ пахча юлташлӑхӗсенчен полицие пурӗ 6 заявлени ҫитсе выртать. Вӗсем пурте вӑрра пула шар курнӑ.
Ака уйӑхӗн 7-мӗшӗнче 44 ҫулти арҫын хӑйӗн дачине ҫитет те, ҫурта такам чӳречерен кӗнине ӑнланса илет. Дача ҫуртӗнчи телевизор ҫухалнӑ. Ҫав уйӑхӑн 20-мӗшӗнче 63 ҫулти арҫын пакунлисенчен пулӑшу ыйтать — унӑн дача ҫуртне ҫакӑнса тӑракан ҫӑрана ватса такам кӗнӗ, бензинпа ӗҫлекен пӑчкӑна йӑтса тухса кайнӑ.
Вӑрлаканни унччен те ҫын пурлӑхне тытма юратнӑ 38 ҫулти арҫын пулнӑ иккен. Ҫавӑншӑн ӑна унччен темиҫе хутчен те явап тыттарнӑ.
Ҫӗнӗ Шупашкарти арҫын кредиткӑпа усӑ курман, анчах унтан унӑн укҫи ҫухалнӑ. 33 пин тенкӗпе такам усӑ курнӑ.
Йӗрке хуралҫисем ҫав ҫынна тупма пулӑшнӑ. Ака уйӑхӗнче вӑл йӑлара усӑ курмалли техника туяннӑ. Уншӑн тӳленӗ чухне телефонӗнче тӗнче тетелӗ тытман та вӑл пӗлӗшне пулӑшма ыйтнӑ. Лешӗ кредиткӑна хӑйӗн телефонӗ ҫине ҫирӗплетнӗ, анчах каялла илмен. Хайхискер, унччен те вӑрланӑшӑн судпа айӑпланнӑ 20 ҫулти каччӑ, ҫав карттӑпа 2 уйӑх усӑ курнӑ: лавккара, кафере, хупахра. Ҫапла вӑл 33 пин тенкӗ тӑкакланӑ.
Пӗлтӗр ҫулталӑк вӗҫӗнче Ҫӗмӗрле районӗн арҫынни автомобилӗн ҫуллахи резинине сутма тесе тӗнче тетелӗнче пӗлерӳ вырнаҫтарнӑ. Илекен часах тупӑннӑ.
Хайхи ҫын укҫана банк картти ҫине куҫарма сӗннӗ. Вӑл сутуҫа каҫӑ ярса панӑ. Лешӗ унта банк карттин даннӑйӗсене ҫырнӑ та укҫасӑр тӑрса юлнӑ: счечӗ ҫинчи мӗнпур укҫине "хырса" кайнӑ. Пӗтӗмпе - 8 пин тенкӗ ытла.
Вӑрра тытса чарнӑ. Вӑл - Удмурт Республикинчи пӗр техникум студентки, 17 ҫулта кӑна. Укҫана хӗр каялла тавӑрса панӑ.Ӳ
Шупашкарти Введени кафедра соборӗнчен алка-эреше вӑрлани пирки ҫу уйӑхӗн 7-мӗшӗнче пӗлтернӗ. Такам чиркӗве кӗрсе Хусан Турӑ Амӑшӗн турӑшне уҫнӑ та унта упраннӑ алка-эреше йӑкӑртнӑ. Вӗсене вара чиркӗве ҫӳрекенсем илсе килнӗ пулнӑ.
Йӗрке хуралҫисем ҫак ӗҫе кам тума пултарнине палӑртнӑ. Вӑл - Ҫӗрпӳ районӗнчи 23 ҫулти арҫын. Вӑл унччен те ҫакнашкал ӗҫшӗн судпа айӑпланнӑ. Алка-эреше вӑл ломбарда панӑ. Вӗсене унтан илсе каялла чиркӗве тавӑрса панӑ.
Арҫын тӗлӗшпе пуҫиле ӗҫ пуҫарнӑ.
Пӗлтӗрхи кӗркунне Шупашкарти пӗр арҫын 8 пин тенкӗ тӑракан телефонне ҫухатнӑ. 33 ҫулти арҫын Энтузиастсен урамӗнчи гараж комплексӗнче пулнӑ. Телефона водитель алӑкне питӗрсе илмен машинӑри прибор панелӗ ҫинче 20 минутлӑха хурса хӑварнӑ.
Хаклӑ япалана Етӗрне районӗнчи 25 ҫулти каччӑ вӑрласа кайнӑ иккен. Вӑло ӑна телефон юсакан ӑстана сутса янӑ.
Телефона халӗ хуҫине тавӑрса панӑ.
Вӑрӑ ӗҫӗпе унччен те пӑтӑрмаха темиҫе хутчен ҫакланнӑ каччӑ тӗлӗшпе пуҫиле ӗҫ пуҫарнӑ.
Красноармейски районӗнчи халӑхӑн социаллӑ ыйтӑвӗсене тивӗҫтерекен центр ӗҫченӗ ватӑ ҫыннӑн укҫине кӗсьене пӗтӗрсе чикнӗ тесе шухӑшлаҫҫӗ. Тӳрех палӑртса хӑварар: халӗ ҫав этем социаллӑ учрежденире ӗҫлемест ӗнтӗ.
Асӑннӑ учрежденире пай заведующийӗнче тӑрӑшнӑ ҫын аллинче ватӑ ҫыннӑн банк картти пулнӑ. Вӑл ун ҫинчен 119 пин тенкӗ ытла вӑрланӑ. Тӗпчевҫӗсем шухӑшланӑ тӑрӑх, укҫана 2020 ҫулхи ҫурла уйӑхӗнчен тытӑнса 2021 ҫулхи ака уйӑхӗччен хӑйӗн туса пурӑннӑ.
Пӑтӑрмах ҫиеле тухнӑ хыҫҫӑн РФ Следстви комитечӗн Чӑваш Енри ӗҫченӗсем пуҫиле ӗҫ пуҫарнӑ.
Пӗлтӗрхи раштав уйӑхӗн 19-мӗшӗнче Шупашкар хулинче пурӑнакан пӗр хӗрарӑм хӑйӗн йыттине ҫухатнине Чӑваш халӑх сайчӗ пӗлтернӗччӗ.
Аса илтерер: хӗрарӑм хаски йытта хӑй ӗҫлекен кафе умне кӑкарса хунӑ. Кайран пӑхать те — йытӑ ҫук. Хӗрарӑм йытӑ ҫухлани пирки пакунлисене пӗлтерет, лешсем пуҫиле ӗҫ пуҫараҫҫӗ.
Ҫав йытта Трактор тӑвакансен проспектӗнчи полици уйрӑмӗ умӗнче асӑрханӑ, ӑна пакунлисем хӑйсем патне илсе кӗртнӗ.
Кӑкарса хунӑ йытта пӗрле пурӑнакан ҫулланнӑ пӗр хӗрарӑмпа арҫын вӗҫертсе кайнӑ. Киле вӗсем таксипе каяс тенӗ. Машина кӗтсе тӑнӑ хушӑра йытӑ тарса ҫухалнӑ.
Хӗрарӑм судра ӑнлантарса панӑ тӑрӑх, йытта вӑл нушалантараҫҫӗ тесе шухӑшланӑ пулать.
Суд арҫынпа хӗрарӑма 5-шер пин тенкӗ штраф хурса панӑ.
Шупашкарти спорт шкулӗсенчен пӗринче иртнӗ баскетбол матчӗ хыҫҫӑн Шупашкарти аслӑ шкулсенчен пӗринче вӗренекен ҫамрӑкӑн наушник ҫухалнӑ.
8 пин тенкӗ ытла тӑракан хаклӑ япалана студент раздевалкӑра хӑварнӑ. Унтан чи кайран унпа пӗрле вӗренекен каччӑ тухнӑ.
Япала ҫухатнӑ ҫын тӗшмӗртни тӗрӗсех пулнӑ. Чӗмпӗрти каччӑ наушника комисси лавккине кайса панӑ. 21 ҫулти каччӑ унччен судпа айӑпланман. Тӑкака вӑл пӗтӗмпех саплаштарнӑ. Суд каччӑна 7 пин тенкӗлӗх штрафлама йышӑннӑ.
Улатӑр районӗнче пурӑнакан арҫынна мотоцикл вӑрланӑшӑн суд тунӑ. Унӑн халӗ 15 пин тенкӗ штраф тӳлеме тивӗ.
Ҫак арҫын хӑйне никам та курманнипе усӑ курса 20 пин тенкӗ тӑракан мотоцикл туяннӑ.
Судра арҫын айӑпне йышӑннӑ. Вырӑнтан характеристика лайӑх пулнипе, полицие хӑй пынипе суд ӑна 15 пин тенкӗ штраф тӳлеттерме йышӑннӑ.
Елчӗк районӗнче пурӑнакан 44 ҫулти арҫын хӗлле никам та пурӑнман ҫурта чӳрече ҫӗмӗрсе кӗнӗ. Унтан вӑл электроплита, тимӗр профильсем тата пӑтасем вӑрланӑ. Пӗтӗмпе - 3 пин тенкӗлӗх. Хайхискер урайне пирус тӗпӗсем пӑрахса хӑварнӑ. Ку кӑна мар, вӑл "пысӑккипе" ҫавӑнтах тула кайнӑ.
Ҫак биологи материалӗсемпе шыраса тупнӑ та ҫав арҫынна. Экспертиза ку ӗҫе вӑл тунине ҫирӗплетнӗ.
Арҫын судра айӑпне йышӑннӑ. Вӑл пӗтӗм тӑкака саплаштарнӑ.
+11.3 °C