Шупашкартан Мускава кайса килме ҫывӑх кунсенче тата меллӗрех пулӗ. Асӑннӑ авиамаршрутпа пассажирсене турттаракан «Победа» авиакомпани расписание кӑнтӑрлахи хушма рейссем кӗртме пӑхса хӑварнӑ.
Нарӑс уйӑхӗн 16-мӗшӗнче, пуш уйӑхӗн 8-мӗшӗнче марта, ҫавӑн пекех пуш уйӑхӗнче тунтикунсерен (асӑннӑ уйӑхӑн 7, 14, 21 тата тата 28-мӗшӗсенче ) самолётсен хушма рейспа 15 сехет те 15 минутра ҫула тухӗҫ. Пассажирсене самолёт Мускаври Внуково аэропорта илсе ҫитерӗ.
Сӑмах май каласан, Шупашкара транзит авиарейссем те пур. Суперджетпа Чӑваш Ен ҫыннисем ҫӗршывӑн темиҫе хулине ҫитме пултараҫҫӗ.
Паян ирхине 8 сехетре Шупашкарта ҫӑмӑл тата васкавлӑ пулӑшу машини ҫапӑннӑ. Ҫул-йӗр ҫинчи транспорт инкекӗ Гладков урамӗнчи 25-мӗш ҫурт ҫывӑхӗнче пулса иртнӗ.
Малтанлӑха шутланӑ тӑрӑх «Соларис» ҫӑмӑл машшинӑн водителӗ айӑплӑ шутланать, вӑл васкавлӑ пулӑшу карети сасӑллӑ тата мӗлтлетекен сигналпа пынине пӑхмасӑрах сулахаялла пӑрӑнма шутланӑ.
Чӑваш Енри ШӖМӗн УГИБДД-ра пӗлтернӗ тӑрӑх, пӑтӑрмахра никам та шар курман. Васкавлӑ пулӑшу машини ачана лартса пынӑ. Каярах ӑна тепӗр экипаж медицина учрежденине илсе ҫитернӗ. Транспорт хатӗрӗсен водителӗсем иккӗшӗ те урӑ пулнине палӑртнӑ.
Шупашкарта вулавӑшсен пӗрлешӗвӗн – ҫӗнӗ ертӳҫӗ. Унпа паян хула администрацийӗнче иртнӗ планеркӑра паллаштарнӑ.
Вӑл – Маргарита Пыркина. Вулавӑш ӗҫченӗсемшӗн вӑл ҫӗнӗ ҫын мар. Маргарита Пыркина ҫурла уйӑхӗнченпе директорӑн тивӗҫӗсене пурнӑҫланӑ.
Маргарита Николаевна Шупашкарти вулавӑшсен пӗрлешӗвӗнче 200 ҫултанпа ӗҫлет. 2020 ҫулта ӑна директорӑн ҫумне ҫирӗплетнӗ. Ун умӗн ку тивӗҫе Светлана Коледова икӗ ҫул пурнӑҫланӑ.
«Героям – быть!» (чӑв. Паттӑрсем пулмалла!) пӗтӗм ҫӗршыври проекта Чӑваш Енри ҫын та хутшӑнать.
Асӑннӑ проект социаллӑ яваплӑ ҫынсемпе паллаштарать. Проект йӗркелӳҫисем палӑртнӑ тӑрӑх, пирӗн ҫӗршыври ҫӗршер пин ҫын машина тӑвас, металлурги, энергетика, нефтехими, йывӑр промышленноҫӑн ытти отраслӗнче тӑрӑшать. Кӑткӑс та яваплӑ ӗҫре вӑй хуракан ҫав ҫынсем йывӑр смена тата ӗҫ кунӗ хыҫҫӑн нимеҫӗ пулса тӗрлӗ енӗпе тимлеҫҫӗ. Ҫав йышра Шупашкарти Трактор историйӗн музейӗн директорӗ Альберт Сергеев та вӑл. Проекта вӑл «Оберегая планету» (чӑв. Планетӑна сыхласа) номинацире хутшӑнать.
Альберт Николаевич тӑван тӑрӑхӗшӗн, Элӗк районӗнчи Анаткас Татмӑш ялӗшӗн, тӑрӑшать. Вӑл унти чылай вырӑна хӑтлӑх кӗртнӗ. Черетре — Атӑк ҫӑлӗ. Ялти хастарсемпе энтузиаст ӗҫе пуҫӑннӑ ӗнтӗ.
Альберта Сергеевшӑн ҫак каҫӑпа https://clck.ru/aruR5 сасӑламалла. Ҫак ӗҫе нарӑс уйӑхӗн 9-мӗшӗччен туса ӗлкӗрмелле.
2022 ҫултанпа Раҫҫейре зоопарксене, цирксене ҫӗнӗ йӗркепе ӗҫлеттермелли саккунсем вӑя кӗнӗ. Ҫавна май Шупашкарти "Ковчег" зоокӗтӗс нарӑс уйӑхӗн 3-мӗшӗнче лицензи илнӗ. Вӑл сроксӑр пулӗ.
Пӗлтӗр раштав уйӑхӗнче зоокӗтесе Роспотребнадзор ӗҫченӗсем тӗрӗсленӗ. Лицензи илме ирӗк панӑ. Зоокӗтес директорӗн тивӗҫӗсене пурнӑҫлакан Надежда Айвенова Шупашкарти ҫак вырӑн аталанассине, унта тӗрлӗ мероприяти иртессине пӗлтернӗ. Ҫитес вӑхӑтра вӗсем ҫӳлевӗҫ туянасшӑн.
Палӑртса хӑварар: зоокӗтес 2010 ҫултанпа ӗҫлет. Унта халӗ 150 ытла чӗрчунпа 40 ытла кайӑк-кӗшӗк пур. Зоокӗтес юнкунран пуҫласа шӑматкунччен 10-18 сехетсенче ӗҫлет. Сӑмах май вӑл республикӑра лицензи илнӗ иккӗмӗш зоопарк. Пӗрремӗшӗ - Ҫӗнӗ Шупашкарти Тӗкӗрҫ ращинчи зоопарк.
Чӑваш Енре пурӑнакансем телефонпа шӑнкӑравласа улталакансен капкӑнне ҫаплипех ҫакланаҫҫӗ. Ваттисем ҫеҫ мар, вӑтам ҫулсенчисем те суеҫӗсене ӗненеҫҫӗ, шаннипе самай укҫа кӑларса тыттараҫҫӗ.
Нарӑс уйӑхӗн 3-мӗшӗнче йӗрке хуралҫисенчен Шупашкарта пурӑнакан 50 ҫулти хӗрарӑм пулӑшу ыйтнӑ. Ӑна хӗрӗ машинӑпа инкеке лекнӗ, ҫынна шар кӑтартнӑ. Ӑна айӑплассинчен хӑтарса хӑварас тесен кирлӗ ҫынсем валли курьер урлӑ миллион тенкӗ парса ямалла тесе ӗнентернӗ. Анчах хӗрарӑмӑн ун чухлӗ укҫа пулман, пухса хуни ҫур миллион тенкӗ тупӑннӑ. Шӑпах ҫав суммӑна тыттарса янӑ та хӗрарӑм.
Шупашкарти «Солнечный» микрорайонта общество транспорчӗн чарӑнӑвӗ валли ят шыраҫҫӗ. Вӑл мӗнли пулӗ? Ҫакна халӑхран ыйтаҫҫӗ.
Сасӑлав йӑлана кӗнӗ тӑрӑх «Уҫӑ хула» порталта иртет. Хӗвеллӗ бульвар вӗҫӗнче вырнаҫнӑ чарӑнура 35-мӗш автобус, 14-мӗш троллейбус чарӑнаҫҫӗ.
Ҫынсем чарӑнӑва «Сергей Бутяков урамӗ», «Ясная поляна» ЖК» е «Бауман вӑрманӗ» ят пама сӗннӗ. Сасӑлав пырать. Вӑл нарӑс уйӑхӗн 14-мӗшӗнче вӗҫленӗ.
Паян оперштаб ларӑвӗ иртнӗ. Шкул ачисене малалла та дистанци мелӗпе вӗрентмелле-и е ҫук-и? Тӗп ыйтусенчен ҫакӑ пулнӑ.
Ларура ЧР Элтеперӗ Олег Николаев шкул ачисене малалла та дистанци мелӗпе вӗрентессине каланӑ. Аса илтерер: Шупашкар хулинчи шкул ачисем ҫак мелпе кӑрлач уйӑхӗн 27-мӗшӗнченпе вӗренеҫҫӗ, Ҫӗнӗ Шупашкарта вара – кӑрлачӑн 31-мӗшӗнченпе.
Планпа килӗшӳллӗн, нарӑс уйӑхӗнче 1-мӗш классен каникул пулмалла. Эпидемиологи лару-тӑрӑвӗ япӑх пулнӑран вӗсене халех кантарма йышӑннӑ.
Паян, нарӑс уйӑхӗн 4-мӗшӗнче, Чӑваш Енӗн Культура, национальноҫсен ӗҫӗсен тата архив ӗҫӗн министерствинче кадр улшӑнӑвӗ пулса иртнӗ. Министр ҫумӗнче шӑп та лӑп пӗр ҫулталӑк ӗҫленӗ Георгий Богуславский министерствӑри пукансӑр юлнӑ. Йышӑнӑва республика ертӳҫи Олег Николаев паян алӑ пуснӑ.
Георгий Леонидович — Ставрополь крайӗнчи Кисловодск хулинче 1978 ҫулта ҫуралнӑ. Шупашкарти И.Н. Ульянов ячӗллӗ Чӑваш патшалӑх университетӗнче тата Мускаври М.А. Шолохов ячӗллӗ патшалӑх гуманитари институтӗнчен вӗренсе тухнӑ. Культура министерствине куҫиччен вӑл Шупашкарти А.Г. Николаев ячӗллӗ ача-пӑча паркне (2007 ҫулхи раштав уйӑхӗн 17-мӗшӗнченпе) ертсе пынӑ.
Ҫак кунсенче Китайра Олимпиада пырать. Вӑйӑсем нарӑс уйӑхӗн 2-мӗшӗнче пуҫланчӗҫ, нарӑс уйӑхӗн 20-мӗшӗччен пырӗҫ. Олимпиадӑна официаллӑ майпа паян савӑнӑҫлӑ лару-тӑрура уҫӗҫ.
Эпир, биатлона юратакансем, ҫак кунсенче Раҫҫей спортсменӗсемшӗн хытах пӑлханӑпӑр, вӗсене ӑнӑҫу сунӑпӑр. Ҫитменнине тата пирӗншӗн, Чӑваш Ен ҫыннисемшӗн, питех те ырӑ хыпар пур. Биатлонистсен тренерӗсенчен пӗри — Сергей Башкиров.
Шупашкарта ҫуралса ӳснӗ Сергей Башкиров биатлонпа 10 ҫула ҫитсен кӑсӑкланма тытӑннӑ. Унӑн пӗрремӗш тренерӗ ашшӗ пулнӑ.
Сергей Башкиров Тӗнче чемпионатӗнче юниорсем хушшинче ҫӗнтернӗ, Тӗнче кубокӗн тапхӑрӗнче, Европа кубокӗн тӑватӑ ӑмӑртӑвӗнче мала тухнӑ.
Сергей Башкиров 2002 ҫулта ҫӗршывӑн командин йышӗнче Америкӑри Солт-Лейк-Сити хулинчи хӗллехи Олимп ӑмӑртӑвне хутшӑннӑ.
+0.3 °C