Ӗнер, кӑрлач уйӑхӗн 13-мӗшӗнче, Шупашкарта васкавлӑ пулӑшу машини инкеке лекнӗ.
Тухтӑрсен автомобилӗ 17 сехет те 35 минутра Шупашкарти База проезчӗпе пынӑ. Кроссовер водителӗ сулахаялла, ҫуртсен картишӗ еннелле, пӑрӑннӑ. Ҫав вӑхӑтра машинӑсем хирӗҫ килмелли ҫулпа васкавлӑ машина карети пынӑ. Инкеке куракансем пӗлтернӗ тӑрӑх, васкавлӑ пулӑшу машини сирена та ҫутнӑ, унӑн ятарлӑ маяк та ӗҫленӗ. Апла пулин те кроссовер пӑрӑнма хӑтланса сиксе тухнӑ та васкавлӑ пулӑшу автомобилӗ унпа ҫапӑннӑ.
Инкекре никам та шар курман. Васкавлӑ пулӑшу машини салонти пӗчӗк ачана малтан пульницӑна ӑсатса хӑварнӑ, кайран инкек вырӑнне ҫаврӑнса килнӗ.
Паян ҫӗрле Шупашкарта 19 ҫулти хӗрӗн пурнӑҫӗ татӑлнӑ. Вӑл чӳречерен тухса ӳкни пирки Следстви комитечӗн Чӑваш Енри следстви управленийӗ пӗлтерет.
Ҫур ҫӗр иртни 3 сехетре Талвир урамӗнчи 4-мӗш ҫуртра пулнӑ ку. Хӗр миҫемӗш хутран ӳкнине пӗлтермен. Вӑл йывӑр суранӗсене пула ҫавӑнтах вилнӗ. Вырӑна оперативлӑ следстви ушкӑнӗ ҫийӗнчех ҫитнӗ.
Халӗ следовательсем ӗҫ-пуҫа уҫӑмлатаҫҫӗ.
Шупашкарти «Мир Луксор» кинотеатр хупӑнӗ. Кун пирки Маргарита Красотина журналист Фейсбукра тепӗр ҫын хыпарлани тӑрӑх пӗлтернӗ.
Чӑн та, cheb.media пӗлтернӗ тӑрӑх, ҫурта 83 миллион тенкӗпе сутса ярасшӑн-мӗн. 1961 ҫулта хӑпартса лартнӑ ҫав ҫурт хула варринче. Унтан тем те тума пулать. Пурӑнмалли ҫурт-и, бизнес-центр-и, канупа суту-илӳ ҫурчӗ-и... Асӑннӑ кинотетарта — куракансем валли икӗ зал. Унта юсав ӗҫне пӗр 20 ҫул каялла туса ирттернӗ.
Мӗн тӑвӑн, «ҫӳлтисем» лайӑхрах пӗлеҫҫӗ пулӗ — хӑҫан тата мӗн сутмаллине, мӗн тусан мӗн пулассине...
Шупашкара Ижевскран юр ирӗлтерекен станцине илсе килнӗ. Кун пирки Шупашкар хула администрацийӗн сайчӗ пӗлтерет. Ҫӗнӗ агрегатпа паян Чӑваш ен тӗп хулин мэрин пуҫлӑхӗ Денис Спирин паллашнӑ.
Сехетре 60 куб метр ирӗлтерме пултаракан юр ирӗлтермелли станци «Дорэкс» предприятире вырнаҫӗ. Кирлӗ пулсан, ӑна вырӑнтан вырӑна куҫарма пулать. Администраци пуҫлӑхӗ каланӑ тӑрӑх, ҫак хатӗре Трактор Тӑвакансен проспектӗнче вырнаҫтарма шутлаҫҫӗ.
Юр ирӗлтермелли станцире ҫӳп-ҫапран тасатакан ала та пур. Юртан пулнӑ шыва канализацине юхтарса ярӗҫ, ҫӳп-ҫапа вара каяш тӑкмалли вырӑна кайса тӑкӗҫ. Системӑна 3 кун хушшинче майлаштарса ҫитерӗҫ.
Шупашкарта пурӑнакан арҫыншӑн 2022 ҫул питӗ ӑнӑҫлӑ пуҫланнӑ. Вӑл 4 миллион ытла тенкӗ выляса илни пирки «Спортлото» пресс-служби пӗлтерет.
Арҫын каласа кӑтартнӑ тӑрӑх, вӑл лавккана кайнӑ. Черетре тӑнӑ чухне вӑл кассӑра лотерея билетне сутнине курнӑ. Пӗрремӗш билета вӑл тӗплӗн суйланӑ. Анчах сутуҫӑ ӑна васкама ыйтнӑ. Иккӗмӗш билета арҫын часрах илнӗ те лавккаран тухнӑ.
Тепӗр 8 минутран унӑн телефонӗ ҫине вӑл укҫа выляса илни пирки смс килнӗ. Унти хисепе курсан арҫын ҫӑвар карса пӑрахнӑ. Лайӑхрах пӑхас тесе вӑл лупа та илнӗ. Ҫийӗнчех Мускаври мӑшӑрӗпе ывӑлӗсем патне савӑнӑҫ пирки шӑнкӑравласа пӗлтернӗ. Вӑл выляса илнӗ укҫа-тенке хваттер илнӗ ҫӗре хывасшӑн.
Автосервисра ӗҫлекен ҫын клиент машинине ӳсӗрле ларса ярӑнса ҫӳренӗ, таксистра та ӗҫлеме ӗлкӗрнӗ.
Кӑрлач уйӑхӗн 11-мӗшӗнче патшалӑх автоинспекцийӗн ӗҫченӗсем Павлов мичман урамӗнче каҫхи клуб умӗнче «Киа Рио» ларнине курнӑ. Унӑн водителӗ ҪҪХПИ ӗҫченӗсен курсан часрах глушителе сӳнтернӗ те пассажир ларкӑчӗ ҫине куҫса ларнӑ.
Полицейскисем те чееленнӗ, курмӑш тунӑ. Лешӗ вырӑнтан тапрансанах ӑна чарнӑ. Руль умӗнче 23 ҫулти арҫын пулнӑ. Вӑл ӳсӗр пулни палӑрнӑ. Унӑн машина докуменчӗсем те пулнӑ. Транспорт автосервиса илсе килнӗскер пулнӑ иккен. Хуҫи унӑн машинипе унти ӗҫчен ярӑнса ҫӳренине пӗлмен те. Ку кӑна мар, вӑл каҫхи клуб умӗнче ҫынсене таксипе турттарма та ӗлкӗрнӗ.
Ҫӗнӗ ҫулта раштавӑн 30-мӗшӗнче 23 сехетрен пуҫласа кӑрлачӑн 1-мӗшӗн кӑнтӑрлахи 12 сехетчен кафесен ӗҫлеме юраман. Ку кӑшӑлвируса сарӑлма парас маррипе ҫыхӑннӑ. Анчах ҫак вӑхӑтра Шупашкарти хӑш-пӗр кафе ӗҫленӗ-мӗн, йӗркене пӑснӑ.
Миттов бульварӗнчи тата Максим Горький проспектӗнчи икӗ кафе юраман вӑхӑтра ҫынсен йышӑннӑ-мӗн. Пӗтӗмпе 5 кафе йӗркене пӑснине палӑртнӑ. Анчах хальлӗхе ыттисем пирки пӗлтермен. Ку ыйтӑва паян Правительство ҫуртӗнче иртнӗ канашлура сӳтсе явнӑ.
ЧР Элтеперӗ Олег Николаев ӗҫ-пуҫа уҫӑмлатас тӗллевпе паян оперштаб ларӑвне ирттересси пирки пӗлтернӗ.
Пурӑнакан пурнӑҫра этем темшӗн те тарӑхать-пӑшӑрханать. Регион управленийӗн центрӗ республикӑра пурӑнакансем тӗнче тетелӗнчи халӑх ушкӑнӗсенче мӗншӗн пӑшӑрханнине тишкерет, ҫавна шута илсе пырать, евитленисене яваплисем патне ҫитерет.
Пӗтӗмпе 20 пин ытла ыйту-хурав хушшинче хӑйнеевӗрлӗхпе ыттисенчен уйрӑлсарах тӑракан ҫырусем те пулнӑ.
Пӗлтӗрхи ака уйӑхӗнче, ав, Шупашкар ҫынни Ӳнер аллейинче ула кураксем нумай тесе пӑлханса пӗлтернӗ. Канашра ҫав кайӑк Машина тӑвакансен урамӗнче пурӑнакансене канӑҫсӑрлантарнӑ.
Авӑн уйӑхӗнче Йӗпреҫ хӗрарӑмӗ тилӗсем чӑх тытаҫҫӗ тесе хыпарланӑ. Чӳк уйӑхӗнче Сӗнтӗрвӑрри хӗрарӑмӗ вырӑнти парк мина уйне ҫаврӑннӑ тесе пӑшӑрханнӑ. Ӑна ӗне каяшӗ килӗшмен. Каяш спорт тата ача-пӑча лапамӗсенче, тротуар ҫинче те пулнӑ-мӗн.
НТВ телеканалпа Шупашкарта пурӑнакан хӗрарӑм пирки сюжет кӑтратнӑ. Вӑл тӗрӗслӗх шырать.
Нумай ачаллӑ хӗрарӑма аваришӗн айӑплӑ тесе йышӑннӑ. Халӗ вӑл приговора улӑштарассишӗн тӑрӑшать.
Аэлита Софронова каласа кӑтартнӑ тӑрӑх, ҫав кун вӑл хӗрне шкула илсе кайнӑ. Поселокран хулана кайнӑ чухне вӗсем аварие лекнӗ. Тепӗр машинӑри 37 ҫулти хӗрарӑм ҫавӑнтах вилнӗ. Аэлита вара суранланнӑ, иккӗмӗш ушкӑн сусӑрӗ пулса юлнӑ, ҫӗнӗрен утма вӗреннӗ. 8-ти хӗрӗ та аманнӑ.
Суд хӗрарӑма колони-поселение икӗ ҫуллӑха яма йышӑннӑ. Анчах Аэлита ку тӗрӗс мар, аваришӗн айӑплӑ чӑн ҫынна тупман тесе шутлать. Унӑн шухӑшӗпе, ҫакна видеорегистратор ҫирӗплетет. Унта акӑ мӗн курӑнать: ӑнсӑртран Аэлитӑна хирӗҫ машина сиксе тухать, ҫавна май вӑл руле итлеттереймесӗр транспорт хирӗҫ килекен ҫул ҫине тухса каять. Никама пӑхӑнман экпертиза Аэлитӑн ҫапӑнмасӑр май пулманнине ҫирӗплетнӗ. Видеорегистратор ҫинче вара тепӗр машинӑн марки те, номерӗ те лайӑх курӑнмасть, ҫавӑнпа водителе тупма ҫӑмӑл мар.
Суд Алитӑна хӗрӗ 14 ҫул тултариччен отсрочка панӑ. Унччен хӗрарӑм Аслӑ суда тӗрӗслӗх шыраса ҫитесшӗн.
Иртнӗ ҫул Шупашкарти хӑна ҫурчӗсене 2020 ҫулхинчен 21% ытларах хӑна вырнаҫтарнӑ. Тӗп хулари хӑна ҫурчӗсем хӑйсем патӗнче пурӗ 144 пин ҫын валли вырӑн тупса панӑ. Сӑмах май, вӗсенчен 2 пинӗшӗ кӑна ытти патшалӑхсен гражданӗсем пулнӑ.
Унчченхи ҫулхипе танлаштарсан 2021 ҫулта Шупашкара теплоходсемпе килекен туристсен шучӗ те ӳснӗ (+11%). Ҫавӑн пекех Шупашкарта чарӑннӑ теплоходсен тӑмалли вӑхӑт тӗлӗшпе те ӳсӗм пуррине палӑртнӑ. Вӑтам чарӑну вӑхӑчӗ 5,5 сехетпе танлашнӑ.
Чӑваш Республикин тӗп хулине вӗҫсе килнӗ пассажирсем тӗлӗшпе статистикӑра пысӑк ӳсӗм. Ҫак виҫе 65% танлашнӑ. Сывлӑш карапӗсем ҫинче вӗҫсе килнӗ пассажирсен йышӗ — 225,5 пин ҫын.
Туристсене ытларах Хӗрлӗ тӳреме туртнине палӑртнӑ. Вӗсен кӑмӑлне каякан иккӗмӗш вырӑнта — Мускав ҫыранлӑхӗ. Шупашкарти ҫак вырӑнсем республикӑра пурӑнакансемшӗн те илӗртӳллӗ пулнине палӑртнӑ.
+0.3 °C