Паян 11 сехет те 20 минутра Ҫӗрпӳ округӗнче авари пулнӑ. Шел те, инкекре ҫын пурнӑҫӗ татӑлнӑ.
Унта ВАЗ-2114 тата фура ҫапӑннӑ. Малтанлӑха пӗлтернӗ тӑрӑх, ВАЗ-2114 иномаркӑпа ҫапӑнасран пӑрӑннӑ та фура ҫине пырса кӗнӗ. Ҫӑмӑл машинӑра малта ларнӑ 46 ҫулти хӗрарӑм вилмеллех аманнӑ. Водителе тата тепӗр икӗ пассажира пульницӑна илсе кайнӑ.
Халӗ ӗҫ-пуҫа малалла тӗпчеҫҫӗ.
Ӗнер, утӑ уйӑхӗн 15-мӗшӗнче, Шупашкарта пурӑнакан 46 ҫулти хӗрарӑм пурнӑҫӗ сарӑмсӑр татӑлнӑ.
Чӑваш Енӗн Шалти ӗҫсен министерствин пресс-службинче пӗлтернӗ тӑрӑх, вӑл «Атӑл» М-7 автомобиль ҫулӗн 647-мӗш километрӗнче ҫул урлӑ каҫма тӑнӑ. Ҫынсене ятарласа каҫмалли вырӑна темшӗн ҫитсе пӗтмен-ҫке.... Хӑй тата тӗксӗм ҫипуҫпа пулнӑ.
Хӗрарӑм ҫине «Лада Ларгус» автомобиль пырса кӗнӗ. Йывӑр суранланнӑ ҫын инкек вырӑнӗнчех вилнӗ. 43 ҫулти водитель урах пулнӑ.
Чӑваш Енре «Пешеход. Пешеходный переход» (чӑв. Ҫуран ҫӳрекен. Ҫуран каҫмалли вырӑн) рейд иртнӗ. Йӗркене пӑсакан водительсене те, ҫуран ҫӳрекенсене те явап тыттарнӑ.
Чӑваш Енӗн Ҫул-йӗр хӑрушсӑрлӑхӗн патшалӑх автоинспекцийӗнче пӗлтернӗ тӑрӑх, ҫуран ҫӳрекен 100 ҫынна административлӑ майпа явап тыттарнӑ, 55 ҫынна — ҫуран ҫӳрекенсене ҫул паманшӑн.
Муркаш тӑрӑхӗнче ӳсӗр тракториста тытса чарнӑ.
Руль умне ӳсӗр пуҫпа ларнӑ ҫынна Ҫул-йӗр хӑрушсӑрлӑхӗн патшалӑх автоинспекцийӗн специалисчӗсем асӑрханӑ. Медицина тӗрӗслевӗ ирттернӗ те арҫын, чӑн та, эрех ӗҫни ҫиеле тухнӑ.
Тракториста паян, утӑ уйӑхӗн 10-мӗшӗнче, асӑрханӑ.
Инспекторсем руль умне ӳсӗрле ларни инкекпе вӗҫленме пултарассине аса илтерееҫҫӗ.
Улатӑр тӑрӑхӗнчи прокуратура Чӑвашупрдор предприяти Улатӑртан Патӑрьеле каякан ҫул хӗррине йӗркеллӗ тытса тӑманнине тупса палӑртнӑ.
Аслӑ ҫул хӗррипе йывӑҫсемпе тӗмсем тӳнсе кайса ҫӗрсе выртнӑ, халь-халь персе анас пек усӑнса ларакансем те пулнӑ. Пластик савӑт-сапа, целлофан хутаҫ йӑваланса выртнӑ.
Кӑлтӑка пӗтерме ыйтса надзор органӗ Чӑвашупрдор ячӗпе асӑрхаттару хучӗ шӑрҫаланӑ.
Ҫак уйӑхран Шупашкартан Минеральные Воды хулине самолётсем эрнере икӗ хутчен вӗҫме тытӑннӑ.
Аса илтерер: маршрут хыснаран субсидилекеннисен шутне лекнӗрен билетсем ытлашши хаклӑ мар. Пирӗн тӑрӑха Кавказпа сывлӑш ҫулӗпе ҫыхӑнтараканни – «Азимут» авиакомпани.
Хальхи вӑхӑтра самолётсем Шупашкартан Минеральные Воды хулине тата Минеральные Воды хулинчен Шупашкара эрнере икӗ хутчен: тунтикунпа шӑматкунсерен – вӗҫеҫҫӗ. Самолётсем ҫурла уйӑхӗн вӗҫӗччен ҫула илсе тухӗҫ.
Ӗнер, ҫӗртме уйӑхӗн 20-мӗшӗнче, Елчӗк тӑрӑхӗнчи Таяпа Энтри ялӗнче пӗр мотоциклист арҫын ҫине пырса кӗнӗ. 48 ҫулти арҫын Казахстанран тӑванӗсем патне хӑнана килнӗ пулнӑ.
Инкек ҫурҫӗр ҫитеспе пулса иртнӗ. Суранланнӑ арҫын васкавлӑ пулӑшу машининче куҫне ӗмӗрлӗхе хупнӑ. Мотоцикл хуҫи икӗ урапаллӑ транспортне пӑрахса инкек вырӑнӗнчен тарнӑ.
Мотоцикла кирлӗ пек регистрацилемен пулин те унӑн унчченхи хуҫи урлӑ ҫӗнӗ хуҫана темиҫе сехет хушшинче тупса палӑртма май килнӗ. Мотоцикл рулӗ умӗнче Елчӗк муниципаллӑ округӗнчи 24 ҫулти ҫамрӑк пулнӑ иккен. Вӑл урах пулнӑ.
Паян Патӑрьел тӑрӑхӗнчи Вӑрманхӗрри Шӑхаль ялӗнче тӑватӑ ҫын аманнӑ.
Пӑтӑрмах ҫурҫӗр иртни 2 сехетре пулса иртнӗ. «Киа Церато» машина рулӗ умӗнчи 24 ҫулти ҫамрӑк ҫулӑн сылтӑм енне тухса кайса ҫул айккине чӑмнӑ.
Машинӑри 5 ҫамрӑка, ҫав шутра водителе те, пульницӑна илсе кайнӑ. Вӗсем — 20-25 ҫулсенчи ҫамрӑксем. Вӗсенчен пӗрне килне янӑ, ыттисем тухтӑр патӗнче сипленеҫҫӗ.
Чӑваш Енӗн Шалти ӗҫсен министерствинче пӗлтернӗ тӑрӑх, пӑтӑрмаха лекнӗ водителе хӑвӑртлӑха ӳстернӗшӗн административлӑ майпа кӑҫал ҫеҫ 8 хутчен явапа тыттарнӑ.
Ҫӗнӗ Шупашкара Шупашкартан тройллейбуспа ҫӳреме пуҫласан ҫул укҫине маршруткӑринчен йӳнӗрех тума йышӑннӑ. Ҫакӑ пассажирсене илӗртес тӗллевпе ҫыхӑннӑ.
Ҫӗртме уйӑхӗн 20-мӗшӗнчен троллейбуспа ҫула тухсан аллӑн укҫа тӳлесен 33 тенкӗ тӳлемелле, карттӑпа пулсан — 29 тенкӗ. Проезднойпа ҫӳрекенсен 60 хутчен ҫула тухмалли билет (вӑл 45 куна пырӗ) ҫул укҫи 27 тенке ларӗ.
Маршруткӑсем ҫинче ҫул укҫи 34 тата 30 тенкӗ (аллӑн укҫа тӳлесен тата карттӑпа татӑлсан).
Шупашкартана Сосновкӑна ҫӳрекен автобус паян Атӑл леш енче аварие лекнӗ. Унта 3 ҫын пурнӑҫран уйрӑлнӑ.
Инкек «Астраханка» чарануран инҫех марп улнӑ. Аварире вилнӗ ҫынсем - ҫӑмӑл машинӑра пулнӑскерсем. Малтанлӑха пӗлтернӗ тӑрӑх, «Киа спектра» хирӗҫ ҫул ҫине тухса кайса автобуспа ҫапӑннӑ. Автобусри пассажирсем пурте чӗрех, хӑшӗ-пӗри аманнӑ. Мари Элти ҪҪХПИ пӗлтернӗ тӑрӑх, унашкаллисем – 6 ҫын.
+6.3 °C