Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев «Яндекс» компанипе килӗштерсе ӗҫлесси ҫинчен килӗшӳ алӑ пуснӑ. Республика ертӳҫи экономикӑна тата социаллӑ сферӑна цифровизацилес тӗллевлӗ проекта пурнӑҫа кӗртесшӗн.

«Яндекс» компанин Раҫҫейри гендиректорӗпе Елена Бунинӑпа ирттернӗ онлайн-тӗлпулура онлайн-вӗрентӳ, тӗрлӗ социаллӑ проект (ҫав шутра – сусӑрсене тата ватӑсене пулӑшасси) пирки те калаҫнӑ; хальхи вӑхӑтри навигаци, шыравпа информаци сервисӗсемпе усӑ курас ыйтӑва хускатнӑ.

Республикӑра «Ветерансем валли такси» социаллӑ проекта хута ярасшӑн. Вӑрнар поселокӗнче кӑҫал «Яндекс.Лицей» уҫӑлмалла. Вӑл Чӑваш Енӗн тӑватӑ вӗренӳ учрежденийӗнче ӑнӑҫлӑ ӗҫлет.

Олег Николаев «Яндекс.Лавка» сервиспа та кӑсӑкланнӑ. Вӑл пулӑшнипе вырӑнти производительсен продукцине (сӑмахран, шӑрттана, сӑрана) сутма май килӗччӗ.

Ӗнер Ҫӗрпӳ хулинчи П. Иванов урамӗнчи 7-мӗш ҫуртра Олег Николаевӑн халӑх штабӗ уҫӑлнӑ. Ку хыпара Ҫӗрпӳ район администрацийӗн пуҫлӑхӗ Сергей Беккер Фейсбукра пӗлтернӗ.

Аса илтерер: кӑҫалхи авӑн уйӑхӗн 13-мӗшӗнче Чӑваш Ен Элтеперӗн суйлавӗ иртӗ. Республика ертӳҫин тивӗҫӗсене вӑхӑтлӑх пурнӑҫлакан Олег Николаев суйлава хутшӑнма хӑйӗн докуменчӗсене Чӑваш Ен Тӗп суйлав комиссине чи малтан тӑратрӗ. Унтан тата тепӗр тӑхӑр кандидат суйлава хутшӑнма кӑмӑл турӗ. Вӗсем те суйлав умӗнхи мероприятисене пуҫӑнчӗҫ: хӑйсен кадидатуришӗн сасӑ пухаҫҫӗ, хӑйсен партийӗсен районсенчи уйрӑмӗсен пайташӗсемпе тата Депутатсен пухӑвӗсен депутачӗсемпе тӗлпулусем ирттереҫҫӗ.

Улатӑр хули пуҫлӑхсӑр тӑрса юлнӑ. Муниципалитетӑн сити-менеджерӗ Владимир Степанов ҫулталӑк ӗҫленӗ хыҫҫӑн ҫемҫе пукана хӑй кӑмӑлӗпе пушатнӑ. Владимир Степанов ӗҫрен кайма ҫырса панӑ заявление вырӑнти Депутатсен пухӑвӗн утӑ уйӑхӗн 10-мӗшӗнче иртнӗ ларӑвӗнче пӑхса тухнӑ. Сӑмах май, Владимир Степанова 2019 ҫулхи утӑ уйӑхӗнче пуҫлӑха лартнӑ.

Хальхи вӑхӑтра Улатӑр хула администрацийӗн пуҫлӑхӗн тивӗҫне пурнӑҫлама сити-менеджерӑн пӗрремӗш ҫумӗ – архитектура, хула строительстви, транспорт, ҫутҫанталӑкпа усӑ курас тата ҫурт-йӗрпе коммуналлӑ хуҫалӑх пайӗн пуҫлӑхӗ Марина Фёдоровӑна шаннӑ.

Паян Элтепер суйлавне хутшӑнма кӑмӑл тунӑ вуннӑмӗш кандидат документсене тӑратнӑ. Вӑл – 34 ҫулти усламҫӑ, общество деятелӗ Роман Васильев.

Докуменчӗсене виҫҫӗмӗш хутӗнче кӑна йышӑннӑ, мӗншӗн тесен тӗрӗс мар пулнӑ. Роман Васильев хӑйне «Мӑнаҫлӑ Раҫҫейшӗн» юхӑм лидерӗ, нумай ачаллӑ ҫемьесене пулӑшакан «Ырӑ алӑсем» фонд пуҫаруҫи тет.

Аса илтерер: Элтепер суйлавне Олег Николаев, Юрий Шакеев, Сергей Матвеев, Николай Степанов, Николай Коклейкин, Андрей Ильмендеров, Александр Андреев, Константин Степанов, Юрий Сидоров документсем панӑ.

Чӑваш Енӗн тӗп суйлав комиссийӗ утӑ уйӑхӗн 7-мӗшӗнче ЧР Элтеперӗн суйлавне хутшӑнакан тӑххӑрмӗш кандидатран документсем йышӑннӑ. Вӑл – право хӳтӗлевҫи тата журналист Юрий Сидоров.

Палӑртмалла: Юрий Сидоров суйлав кампанине пӗрре мар хутшӑннӑ. Вӑл суйлавра ҫӗнтерессе шанмасть, унта экспериментшӑн хутшӑнать: суйлав ултавлӑ иртмест-и?

Аса илтерер: Элтепер суйлавне хутшӑнма хальлӗхе 9 кандидат документсем тӑратнӑ. Вӗсем Олег Николаев, Юрий Шакеев, Сергей Матвеев, Николай Степанов, Николай Коклейкин, Андрей Ильмендеров, Александр Андреев, Константин Степанов.

cap.ru сайтри сӑн

Чӑваш Енре ҫӗнӗ прокурора официаллӑ мелпе ҫирӗплетнӗ. Кун пирки ЧР Правительствин пресс-служби пӗлтерет.

Паян, утӑ уйӑхӗн 8-мӗшӗнче, ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев ҫӗнӗ прокурорпа паллаштарнӑ. Вӑл – юстицин 3-мӗш класлӑ патшалӑх советникӗ Андрей Фомин.

Андрей Фомин Ярославль облаҫӗнче прокуратура органӗсенче ӗҫленӗ, прокурор ҫумӗ пулнӑ. 2014 ҫулхи ҫурла уйӑхӗнчен Крым Республикин прокурорӗн пӗрремӗш ҫумӗ пулнӑ.

Аса илтерер: кӑҫал пуш уйӑхӗнче прокурор пулнӑ Василий Пословские тивӗҫлӗ канӑва янӑ.

goszhil.cap.ru сӑнӳкерчӗкӗ

Паян Чӑваш Енӗн Патшалӑхӑн ҫурт-йӗр инспекцийӗн пуҫлӑхӗн — тӗп ҫурт-йӗр инспекторӗн ҫумне Елена Мироновӑна ӗҫрен кӑларнӑ. Ку хушӑва республика Элтеперӗн тивӗҫӗсене вӑхӑтлӑх пурнӑҫлакан Олег Николаев хӑй алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.

Патшалӑхӑн ҫурт-йӗр инспекцийӗн пуҫлӑхӗн — тӗп ҫурт-йӗр инспекторӗн ҫумӗ пулса Елена Миронова 2013 ҫулхи нарӑс уйӑхӗн 7-мӗшӗнченпе ӗҫленӗ. Инспекцире вӑл 2011 ҫулта тӑрӑшма тытӑннӑ. Финанспа хуҫалӑх секторӗн консультанчӗ, ҫав вӑхӑтрах право тата кадр ӗҫӗн пайӗн пуҫлӑхӗ пулса тимленӗ. Хӑй вӑхӑтӗнче вӑл биологипе хими вӗрентекенӗн специальноҫне алла илнӗ, унтан юрист пӗлӗвне алла илнӗ.

Етӗрне районӗнче ӗнертенпе ҫӗнӗ пуҫлӑх ӗҫӗ тытӑннӑ. Унӑн кандидатурине ҫӗртме уйӑхӗн 30-мӗшӗнче ҫирӗплетнӗ. Район администрацийӗн пуҫлӑхӗн тилхепине вырӑнти ҫынна, ял хуҫалӑх пуҫлӑхӗнче тӑрӑшнӑ Александр Семенова тыттарнӑ.

Конкурса хутшӑннӑ тепӗр ҫын та — вырӑнтисемех. Вӑл — Алексей Иванов, Гостехнадзор инспекцийӗн Етӗрне районӗнчи аслӑ инспекторӗ — инспекци пуҫлӑхӗ.

Етӗрне район администрацийӗн пуҫлӑхӗ пулнӑ Андрей Софронова ӗҫрен кӑларассине Чӑваш халӑх сайчӗ ҫу уйӑхӗн 25-мӗшӗнче пӗлтернӗччӗ. Аса илтерер: Софронова хӑй ирӗкӗпе заявлени ҫырма Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев хистенӗ. Асӑннӑ пуҫлӑхӑн ӗҫрен кайма тивни вӑл тӑрӑхра кӑшӑлвируспа чирлекенсем йышлӑ пулнипе ҫыхӑннӑ имӗш.

Чӑваш Ен Элтеперӗ пулас ӗмӗтлисен шучӗ кунсерен нумайланса пырать. Паян тата тепӗр икӗ кандидат ЧР Тӗп суйлав комиссийӗнче пулнӑ.

Александр Андреева (ҫӳлти сӑнӳкерчӗкре сылтӑмри) «Раҫҫей Федерацийӗнчи коммунистсен партийӗн» республикӑри уйрӑмӗ тӑратнӑ. Александр Андреев – Кӳкеҫ ҫынни. Вӑл Чӑваш Ен Патшалӑх Канашӗн депутачӗ, социаллӑ политика тата наци ыйтӑвӗсем енӗпе ӗҫлекен комитечӗн ертӳҫин ҫумӗ.

Паянах саккӑрмӗш кандидата регистрациленӗ. Вӑл – Раҫҫейри либерал-демократсен партийӗн пайташӗ, Чӑваш Ен Патшалӑх Канашӗн депутачӗ, патшалӑх строительстви, вырӑнти хӑй тытӑмлӑх тата депутат этикин енӗпе ӗҫлекен комитечӗн ертӳҫин ҫумӗ Константин Степанов (аялти сӑнӳкерчӗкре сулахайри).

Ҫапла вара республика ертӳҫи пулас ӗмӗтлисен шучӗ сакӑр ҫынна ҫитнӗ. Маларах регистрациленнисем ҫаксем: Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев, «Раҫҫей патриочӗсем» парти пайташӗ Сергей Матвеев, «Раҫҫейри пенсионерсен социаллӑ тӗрӗслӗхшӗн партийӗн» пайташӗ Николай Степанов, Шупашкарта пурӑнакан Юрий Шакеев, Николай Коклейкин тата Андрей Ильдеменов.

Малалла...

amp.ukrainianwall.com сайтри сӑн

Правительство аккаунчӗсене тытса пымалли йӗркене палӑртнӑ. Ку енӗпе вӗсене ЧР Министрсен Кабинечӗен председателӗн ҫумӗ Алла Салаева сӑнаса тӑрӗ.

Сӑмах «Пӗркласрисем», «Конактра», «Фейсбук», «Инсаграм» халӑх тетелӗсенчи правительство аккаунчӗсем пирки пырать. Вӗсене тытса пынӑ чухне текстсемпе, сӑнӳкерчӗксемпе, инфографикӑсемпе, карточкӑсемпе, анимацисемпе, видеосемпе усӑ курмалла, тӳрӗ эфира тухмалла, ыйтӑмсем тумалла. Постсен тексчӗсене ахаль ҫынна ӑнланмалла ҫырмалла. Чӑваш Республикин страницисем ҫинче эрнере Элтепер тата Министрсен Кабинечӗн ӗҫне кӑтаратакан 10 постран кая мар пулмалла, ӗҫ тӑвакан влаҫ органӗсен - 5 постран кая мар.

Аккаунта пӑхса тӑракан ҫынсем ҫырнӑ спам-рассылкӑсене, хӑртса ҫырнисене, усал сӑмахпа усӑ курнӑ комментарисене тасатмалла.