Ҫӗртме уйӑхӗнче эрнере 5 кун ӗҫлекенсем 3 кун канӗҫ. Ку Раҫҫей кунӗпе ҫыхӑннӑ, ӑна ҫӗртмен 12-мӗшӗнче уявлаҫҫӗ. Кӑҫал вӑл шӑматкуна лекнӗрен тунтикун та кантарӗҫ. Ҫӗртмен 11-мӗшӗнче ӗҫ кунӗ 1 сехет маларах вӗҫленмелле.

Кӑҫал Республика кунӗ кӗҫнерникуна лекет. Регионти саккунпа килӗшӳллӗн, ҫӗртме уйӑхӗн 24-мӗшӗ канмалли кун шутланать. Анчах Раҫҫейри филиалсем, урӑх хулари компанисем ӗҫтешӗсене хӑйсен кӑмӑлне кура кантараҫҫӗ.

Ҫапах ҫӗртме уйӑхӗн 24-мӗшӗнче кансан та тепӗр кун тулли ӗҫ кунӗ шутланать.

Шупашкарти пӗтӗм тӗнчери кинофестиваль пуҫланиччен пӗр уйӑхран та катӑлчӗ. Вӑл ҫӗртме уйӑхӗн 21-25-мӗшӗсенче пулӗ. Вӑл районсемпе хуласенче те иртӗ.

Унта Раҫҫейре ӳкернӗ фильмсемпе пӗрлех Индире, Беларуҫра, Польшӑра, Францире, Чехинче тата Данире калӑпланисене кӑтартӗҫ.

Этника тата регионсенчи кино программине Чӑваш Енри, Чечняри, Калмӑк Республикинчи, Пушкӑртстанри, Бурят Республикинчи, Якут Республикинчи, Хакас Республикинчи, Тутарстанри, Байкал тӑрӑхӗнчи, Свердлов облаҫӗнчи тата Тыва Республикинчи 17 ӗҫ кӗнӗ.

Кинофестиваль программинчи фильмсене Шупашкарта ҫеҫ мар, Ҫӗнӗ Шупашкарта, Канашра, Ҫӗмӗрлере, Сӗнтӗрвӑрринче, Шупашкар, Патӑрьел, Вӑрмар, Пӑрачкав, Куславкка, Хӗрлӗ Чутай, Йӗпреҫ, Вӑрнар, Элӗк районӗсенче пурӑнакансене те тӳлевсӗр кӑтартӗҫ.

Максим Жучин

Чӑваш патшалӑх оперӑпа балет театрӗнче ҫӗнӗ худрук ӗҫе кӳлӗннӗ. Унпа ӗнер худканашӑн ларӑвӗнче культура, национальноҫсен ӗҫӗсен тата архив ӗҫӗн министрӗ Светлана Каликова паллаштарнӑ. Театрӑн илемлӗх ертӳҫинче Максим Жучин тимлеме тытӑннӑ.

Культура учрежденийӗнче Максим Юрьевича пӗлеҫҫӗ. Унччен вӑл театрта тӗп режиссёрта тӑрӑшнӑ.

Максим Жучин Питӗрти Н.А. Римский-Корсаков ячӗллӗ патшалӑх консерваторийӗнче «вокал искусстви» тата «музыка театрӗн режиссёрӗ» специальноҫсене алла илнӗ. Мариинкӑри тата Михайловский театрсенче, Питӗрти Камера музыка театрӗнче, унти Оперӑпа балет театрӗнче тӑрӑшнӑ. Вӑл — Питӗрти консерваторин опера хатӗрлевӗн кафедрин преподавателӗ, ученӑй канашӗн яваплӑ секретарӗ.

«Дуняша Style» фолк-ушкӑн нумаях пулмасть Питӗрти фестивальтен таврӑннӑ. Чӑваш Енри ӑста коллектив халӑх юррисен «Добровидение» пӗтӗм тӗнчери музыка фестивальне хутшӑннӑ. Асӑннӑ мероприяти Славян культурин кунӗнче, ҫу уйӑхӗн 24-мӗшӗнче, иртнӗ. Фестивалӗн гала-концерчӗ «Сибур Арена» спортпа концерт комплексӗнче пулнӑ.

Фестиваль кӑҫалхипе улттӑмӗш хут иртнӗ. 2016 ҫулта ӑна Совет Союзӗн Геройӗ, Валентина Терешкова космонавт, СССР халӑх артисчӗ Иосиф Кобзон, РФ Патшалӑх Думин депутачӗ Олег Нилов пуҫарнӑ. Хальхи вӑхӑтра фестиваль попечителӗсен шутӗнче — «Справедливая Россия» парти ертӳҫи Сергей Миронов, Рф Патшалӑх Думин халӑх хушшинчи ӗҫемпе тимлекен комитечӗн ертӳҫи Леонид Слуцкий, Раҫҫейӗн культура тава тивӗҫлӗ ӗҫченӗ Нелли Кобзон тата ытти политик, усламҫӑ, общество ӗҫченӗ.

Чӑваш Енри районсене ҫулпа ҫыхӑнтарасшӑн. Ҫакӑн пирки республикӑн Транспорт тата ҫул-йӗр хуҫалӑхӗн министерствин коллегийӗн анлӑ ларӑвӗнче пӗлтернӗ.

Владимир Осипов министр хӑйӗн докладӗнче палӑртнӑ тӑрӑх, регионти ҫулсене урапа ҫулӗпе ҫыхӑнтарнине пӗтерсе асфальт сарасшӑн.

2021 ҫулта Сӗнтӗрвӑррипе Куславкка районӗсене ҫыхӑнтаракан муниципалитетсем хушшинчи ҫула сарассипе ҫыхӑннӑ проекта хатӗрлесе пӗтермелле. Приоритетлӑ тепӗр объект — Элӗк тата Хӗрлӗ Чутай районӗсене асфальт ҫулпа ҫыхӑнтарасси.

elt-shop.ru сайтри сӑн

Чӑваш Енре электросамокатпа ярӑнса ҫын вилнӗ. Кунашкалли пирӗн патра пӗрремӗш хутчен пулнӑ.

Ку ҫу уйӑхӗн 9-мӗшӗнче Ҫӗнӗ Шупашкарта пулнӑ. Арҫын электросамокатпа пынӑ чухне ӳкнӗ те шӑп пандус ҫине ҫапӑннӑ. Ӑна пульницӑна илсе кайнӑ, унта вӑл пӗр эрне выртнӑ хыҫҫӑн вилнӗ. Самокатӑн хӑвачӗ 250 ватт ытла пулнӑ.

ҪҪХПИ ӗҫченӗсем самокатсен тӗлӗшпе рейд ирттерме палӑртнӑ. Иртнӗ кунсенче 18 ҫынна штрафланӑ. Вӗсем тротуарпа мар, ҫулпа пынӑ сӑмах май, самокатсемпе ярӑнса аяк пӗрчисене хуҫнӑ тӗслӗхсем те пулнӑ.

pxhere.com сайтри сӑн

Кӑҫал та, пӗлтӗрхи пекех, ӗне усракансене укҫан пулӑшаҫҫӗ. Пӗрремӗш 40 ҫын субсидие илме документсем тӑратнӑ ӗнтӗ. Ҫапла пӗлтерет ЧР Ял хуҫалӑх министерстви пӗлтерет.

Укҫана паян тӳлеме тытӑннӑ. 40 ҫынна укҫана куҫарса панӑ ӗнтӗ. Пӗтӗмпе 201700 тенкӗлӗх.

Пӗр ӗнешӗн – 2400 тенкӗ, икӗ ӗнешӗн – 3400-шер тенкӗ, виҫӗ тата ытларах ӗнешӗн 4400 тенкӗшер параҫҫӗ. Кӑҫал ӗне усракансене пулӑшас тӗллевпе хыснаран 171,4 миллион тенкӗ пӑхса хунӑ. Субсидие 35 пин ытла ҫын илейӗ. Ӑна тивӗҫес тесен вырӑнти администрацие заявлени ҫырса памалла.

cap.ru сӑнӳкерчӗкӗ

Канмалли кунсенче пилӗк ҫын ҫӳллӗшӗнчен ӳксе шар курнӑ. Вӗсенчен иккӗшӗ – ачасем. Кун пирки Катастрофа медицинин тата васкавлӑ медпулӑшу центрӗ пӗлтерет.

Ҫу уйӑхӗн 22-мӗшӗнче 8 ҫулти арҫын ача йывӑҫ ҫинчен ӳксе пульницӑна лекнӗ. Ҫав кунах Ҫӗнӗ Шупашкарта иккӗмӗш хутри чӳречерен 1 ҫулти ача тухса ӳкнӗ. Йывӑр суранланнӑскере пульницӑна илсе ҫитернӗ.

Ҫӗрле Ҫӗнӗ Шупашкарта 43 ҫулти арҫын чӳречерен тухса ӳкнӗ. Васкавлӑ медпулӑшу бригади пациента пульницӑна илсе ҫитернӗ. Вӑл унта вилнӗ.

Ҫу уйӑхӗн 23-мӗшӗнче Сосновкӑра, Шупашкар районӗнче арҫынсем ҫурт тӑрринчен ӳкнӗ. Вӗсем те пульницӑна лекнӗ. Шупашкарта виҫҫӗмӗш хутран ӳкнӗ арҫын реанимацире выртать.

cap.ru сӑнӳкерчӗкӗ

Чӑваш Енре хӑш-пӗр ҫынсене килтех кӑшӑлвирусран прививка тума пултарӗҫ. Кун пирки ЧР Сывлӑх сыхлавӗн министерстви пӗлтерет.

Хулари 2-мӗш пульницӑн тӗп тухтӑрӗ Лидия Веденеева ӑнлантарнӑ тӑрӑх, сывлӑх енчен хавшак ҫынсен кӑшӑлвируспа чирлес хӑрушлӑх пысӑк. Ҫавна май вӗсем пульницӑна хӑйсем тӗллӗн пыраймаҫҫӗ. Шӑпах ун пеккисене ҫак амакран килтех прививка тума пултарӗҫ.

Килте те, пульницӑри пекех, пациента малтан терапевт пӑхать, юн пусӑмне виҫет, вӑраха кайнӑ чирсем пирки ыйтса пӗлет, аллерги пуррипе ҫуккине палӑртать.

Тухтӑра прививка тумашкӑн киле чӗнсе илес тесен вырӑнти регистратурӑна шӑнкӑравламалла.

Чӑваш Ен Патшалӑх Канашӗн депутачӗ Александр Андреев Фейсбукра пӗлтернӗ тӑрӑх, Ҫӗрпӳре район ҫыннисемпе тӗлпулу иртнӗ. Унта Рынкӑ ял тӑрӑхӗн территорийӗнчи ял хуҫалӑх теллевӗллӗ 54 гектар ҫӗре промышленность ҫӗрӗ категорие куҫарас ыйтӑва хускатнӑ.

Александр Андреев ҫырнӑ тӑрӑх, администраци пуҫлӑхӗ халӑх иккӗленӗвне сирсе ярайман. « Агропарк валли ҫӗре промышленность тӗллевӗпе куҫарни кирлӗ мар, усӑ курмалли тӗсе ҫеҫ улӑштармалла. Ют ҫӗршыв инвесторӗсем ял хуҫалӑх тӗллевӗллӗ ҫӗре туянаймаҫҫӗ, промышленность тӗллевӗллине илме май пур. Халӑх итлевӗ май килнӗ таран анлӑн та уҫҫӑн иртмелле», — тесе ҫырнӑ депутат.