Шупашкарти К.В. Иванов ячӗллӗ Литература музейӗнче Пӗтӗм тӗнчери хӗрарӑмсен кунне халалланӑ пултарулӑх каҫӗ иртнӗ. Унта хӗрарӑм-поэтсен вулавӗ пулнӑ тата «Мир цвета глаз женщины» (чӑв. Хӗрарӑм куҫӗн тӗслӗ тӗнче) курав уҫӑлнӑ.

Курав, сӑмах май, 30 ытла ӗҫпе паллаштарать. Пейзажсем, натюрмортсем, портретсем... Курава йӗркелес енӗпе Чӑваш Енри Художниксен союзӗн пайташӗ Светлана Кокель тӑрӑшнӑ.

Музей ертӳҫи Ирина Оленкина пӗлтернӗ тӑрӑх, музейри пултарулӑх каҫӗ йӑлана кӗнӗ ӗнтӗ. Ӑна ҫулсерен йӗркелеҫҫӗ.

Людмила Исаева, Лидия Сарине, Зоя Сывлӑмпи, Светлана Березкина, Нина Пӑрчакан хӑйсен сӑввисене вуланӑ, Людмила Сачкова прозаик тата драматург пултарулӑх планӗпе паллаштарнӑ. Венера Сандомирова чӑваш халӑх юррисемпе романссем юрланӑ.

Паян ЧР экономика министрӗн ҫумӗн тивӗҫӗсене пурнӑҫлама Олег Молякова шаннӑ. Вӑл Игорь Моляков депутатӑн пӗртӑванӗ.

Аса илтерер: «Тӗрӗслӗхшӗн Раҫҫей» партире тӑракан Игорь Моляков нумаях пулмасть РФ Патшалӑх Думине Олег Николаев вырӑнне кайнӑ.

Олег Моляков 55 ҫулта. Вӑл 1993 ҫултан пуҫласа 2002 ҫулччен ЧР экономика министрӗн ҫумӗнче ӗҫленӗ, унтан Патшалӑх Думин депутачӗ пулнӑ. 2010 ҫул пуҫламӑшӗнче «РУКС» предприятире те ӗҫленӗ.

Хӗрлӗ Чутай районӗнчи Горбатовка ялӗнче тискер чӗрчунсен урнӑ чирне тупса палӑртнӑ. Ҫавна май халӗ унта карантин тесе йышӑннӑ. Хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян, пуш уйӑхӗн 4-мӗшӗнче, алӑ пуснӑ.

Карантин вӑхӑтӗнче асӑннӑ ялти выльӑх-чӗрлӗхе сутма-туянма юрамасть, ҫав тӑрӑхра чӗрчунсен куравне йӗркелеме ирӗк памӗҫ тата ытти чару пӑхса хӑварнӑ.

Карантин чирленӗ юлашки чӗрчун сывалсан 2 уйӑхран вӗҫленӗ.

Иртнӗ уйӑхӑн виҫҫӗмӗш вунӑкунлӑхӗн пуҫламӑшӗнче Элӗк районӗнчи Кармал ялӗнче чӗрчунсен урнӑ чирне тупса палӑртнӑччӗ.

Чӑваш Ен Патшалӑх Канашӗн депутачӗ Григорий Данилов республикӑн Правительство ҫуртӗнчи паянхи канашлу пирки Фейсбукра пӗлтернӗ. Унта пухӑннисем, вӑл ҫырнӑ тӑрӑх, республика парламенчӗ ячӗпе Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев патне ҫырупа тухасшӑн. Вӗсем чӑваш чӗлхине сыхласа хӑвармалли тата упрамалли патшалӑх программи хатӗрлеме сӗнесшӗн.

Халӑх ушкӑнӗнчи хӑйӗн постӗнче Григорий Данилов ЮНЕСКО чӑваш чӗлхине пӗтекен чӗлхесен списокне кӗртнине аса илтернӗ.

Григорий Данилов депутат пӗлтернӗ тӑрӑх, паянхи канашлура МИХсен пӗр пайташӗ те пулман. «Патшалӑх Канашӗн аппарачӗ пӗлтермен-ши е ку темӑна хускатма ҫӳлтен хушман-ши?» — тесе пуҫ ватнӑ парламентари.

Чӑваш чӗлхипе ҫыхӑннӑ ыйтӑва Раҫҫей Федерацийӗн Коммунистсен партийӗн чӑваш парламентӗнчи фракцийӗ Чӑваш Ен Патшалӑх Канашӗн нарӑс уйӑхӗн 28-мӗшӗнчи сессийӗнче хускатнӑ.

Елена Зайковская архивӗнчи сӑн

Чӑваш Енри спортсменка Елена Зайковская 60 килограмм тайман виҫе категорийенче вӑй виҫсе киокусинкай енӗпе Раҫҫей чемпионки пулса тӑнӑ. Пике Шупашкара пысӑк кубокпа таврӑннӑ.

ЧР Спорт министерстви пӗлтернӗ тӑрӑх, канмалли кунсенче Мускавра киокусинкай енӗпе Раҫҫей чемпионачӗ тата первенстви иртнӗ. Кавир ҫине Чӑваш Ен чысне хӳтӗлеме 15 спортсмен тухнӑ. Пирӗн команда йышӗнче тӗнче чемпионкине Елена Зайковскаяна ҫитекенни пулман. Олимп резервӗсен 5-мӗш спорт шкулӗнче ӑсталӑхне туптакан хӗр 60 килограмм тайман хӗрсемпе кӗрешнӗ.

Ҫапла майпа Елена Зайковская Раҫҫейӗн пӗрлештернӗ командине кӗнӗ, пушӑн 26-30-мӗшӗсенче вӑл Раҫҫей чысне Стамбулта хӳтӗлӗ.

cap.ru сайтри сӑн

Нарӑс уйӑхӗн 29-мӗшӗнче, 4 ҫулта пӗр хутчен килекен кунра, Шупашкарти пепкелӗх центрӗнче 29 ача кун ҫути курнӑ. Ачасем те, амӑшӗсем те хӑйсене лайӑхах туяҫҫӗ. Пӗр пепке ҫеҫ пӗчӗк виҫепе ҫуралнӑ, ӑна тухтӑрсем сӑнаса тӑрӗҫ.

Трактор тӑвакансен проспектӗнче вырнаҫнӑ ача ҫуратмалли 3-мӗш ҫуртра вара 4 хӗрачапа 6 арҫын ача кун ҫути курнӑ. «Аслӑ хӗр нарӑсӑн 28-мӗшӗнче ҫуралнӑ, ывӑл – нарӑсӑн 29-мӗшӗнче. Пурте мана пушӑн 1-мӗшӗччен чӑтма е нарӑсӑн 28-мӗшӗнче ҫуратма ӳкӗтлерӗҫ. Анчах ывӑл нарӑсӑн 29-мӗшӗнче ҫуралчӗ», - каласа кӑтартнӑ Ольга.

Апла-и, капла-и – ача кирек хӑш кун ҫуралсан та ашшӗ-амашӗшӗн вӑл пысӑк савӑнӑҫ.

Сhuvsu.ru сӑнӳкерчӗкӗ

Паян, пуш уйӑхӗн 3-мӗшӗнче, Чӑваш Енӗн юстици енӗпе ӗҫлекен службин пуҫлӑхне ҫирӗплетнӗ. Ку портфеле Дмитрий Сержантова шаннӑ.

Дмитрий Михайлович 1975 ҫулта Шупашкарта ҫуралнӑ. И.Н. Ульянов ячӗллӗ Чӑваш патшалӑх университетӗнче «Юриспруденци» специальноҫне алла илнӗ.

Тӗрлӗ ҫулсенче вӑл Чӑваш Ен Юстици министерствинче специалистра, Раҫҫей Юстици министерствин Чӑваш Енри управленийӗнче ертсе пыракан специалист, пай пуҫлӑхӗн ҫумӗ, пай пуҫлӑхӗ пулса тӑрӑшнӑ. Чӑваш Ен Элтеперӗн Администрацийӗн Патшалӑхпа право управленийӗнче ӗҫленӗ. 2010 ҫулта ӑна Чӑваш Ен юстици министрӗн ҫумӗ пулма шаннӑ, 2011 ҫулта вӑл РФ Юстици министерствин Чӑваш Енри управленийӗн пуҫлӑхӗ пуканне йышӑннӑ. 2017 ҫулхи раштав уйӑхӗнченпе Самар тӑрӑхӗнче ӗҫленӗ.

Пӑрахӑҫа кӑларнӑ «Шупашкар» ҫар карапне Шупашкара илсе килессине унчченех пӗлтернӗччӗ. 2018 ҫулхи ҫуркунне ӑна ӑҫта вырнаҫтарасси пирки те сӑмах тухнӑччӗ. Аса илтерер: хула администрацийӗ ӑна вырнаҫтармашкӑн проект хатӗрлеме саккас панӑччӗ. Ку тӗллевпе хула хыснинчен 3,5 миллион тенкӗ уйӑрнӑччӗ. Ҫавӑнтанпа Атӑлта самай шыв юхса иртрӗ, Атӑл тӑрӑх карап килсе ҫитеймерӗ.

Кӑҫалхи ҫурла уйӑхӗнче карапа Шупашкара илсе килме палӑртнине Алексей Ладыков сити-менеджер пӗлтернӗ. Карапа е Шупашкарти арҫынсен мӑнастирне хирӗҫ вырнаҫтарӗҫ, е Юханшыв порчӗ тӗлне.

Карапа Балтийскран Шупашкара илсе килме 20 миллион тенке тӑкакланӗ тесе шухӑшлаҫҫӗ, проектпа смета документацине хатӗрлеме — 7 миллион тенкӗ.

Карапа Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев пулӑшнипе май килӗ тесе ырланӑ Алексей Ладыков хула администрацийӗнче ӗнер ирттернӗ планеркӑра.

Карапран ҫитес ҫул музей уҫӗҫ.

mnews.world сайтри сӑн

Кӳкеҫри инфекци пульницинче карантинра пулнӑ Китай ҫыннисене кӑларни пирки пӗлтернӗччӗ. ЧР Сывлӑх сыхлавӗн министерстви республикӑра коронавируспа лару-тӑру мӗнлерех пулнине хыпарланӑ.

Халӗ Чӑваш Енри тепӗр виҫӗ ҫынна тухтӑрсем сӑнаса тӑраҫҫӗ. Вӗсем нумаях пулмасть Италирен таврӑннӑ. Палӑртмалла: унта коронавируспа чирлекенсем йышланнӑ.

Владимир Степанов пӗлтернӗ тӑрӑх, Чӑваш Енре вируспа кӗрешмелли препарат, хӳтӗленмелли хатӗр ҫителӗклех. Ҫапах хӑшӗ-пӗри аптекӑсенче медицина маскисем ҫуккине палӑртать. Китайра эпидеми сарӑлнине кура ҫынсем маскӑсем туянаҫҫӗ. Тавар вӑйлӑ сутӑнать, производительсем вара ӑна кӑларса ӗлкӗреймеҫҫӗ. Раҫҫейри чылай аптекӑра лару-тӑру ҫакнашкал-мӗн.

zen.yandex.com сайтри сӑн

ЧР Элтеперӗн тивӗҫӗсене пурнӑҫлакан Олег Николаев Чӑваш Енре пурӑнакан «вӑрҫӑ ачисене» ҫӑмӑллӑхсем туса парас ыйтӑва ҫӗкленӗ.

Паянхи кун тӗлне республикӑра ҫак категорири 70,5 пин ҫын пурӑнать. Олег Алексеевич ЧР Ӗҫлев министерствине ҫак ҫынсене мӗнле ҫӑмӑллӑхсемпе тивеҫтермелли пирки шутлама ыйтнӑ. «Чи малтанах вӗсем «вӑрҫӑ ачи» пулнине кӑтартакан статуса илесшӗн. Иккӗмӗшӗнчен, укҫан пулӑшнисӗр пуҫне урӑх пулӑшусем пур. Тӗслӗхрен, тухтӑр патне черетсӗр кӗресси», - тенӗ Олег Николаев.

Палӑртмалла: РФ Патшалӑх Думи 2006 ҫултанпа «Вӑрҫӑ ачисем пирки» федераци саккунне йышӑнма хӑтланать. Анчах ҫакна пӑхмасӑрах 30 регионта ҫак категорири ҫынсен ҫӑмӑллахсем пур.