Следстви комитечӗ тунӑ сӑн

Паян Шупашкарти Ярославль урамӗнчи 64-мӗш ҫуртра инкек пулнӑ. Ирхи 10 сехетре пӗр хваттерти 3 ҫын газ сӗрӗмӗпе наркӑмӑшланни пирки пӗлтернӗ.

Шел те, 9 ҫулти арҫын ача вилмеллех наркӑмӑшланнӑ. Унӑн 38 ҫулти амӑшне пульницӑна илсе ҫитернӗ. Арҫын ачан иккӗмӗш сыпӑкри пиччӗшӗ, 18 ҫулти каччӑ, реанимацире. Унӑн сывлӑхӗ йывӑр.

Ҫакӑ паллӑ: хваттерте шыв ӑшӑтмалли газ колонки пур. Малтанлӑха пӗлтернӗ тӑрӑх, вентиляци лайӑх ӗҫлемен. Халӗ ӗҫ-пуҫа тишкерӗҫ, ҫурта пӑхса тӑракан управляющи компанийӗн, газ службин ӗҫне хак парӗҫ.

cap.ru сӑнӳкерчӗкӗ

Раҫҫей ҫар искусствисен регионти уйрӑмӗн вӗренекенӗ Ева Митрякова Ӗпхӳре хутӑш кӗрешӳ енӗпе иртнӗ Пӗтӗм Раҫҫейри ӑмӑртура кӗмӗл медаль ҫӗнсе илнӗ.

Ева 18-20 ҫулсенчи спортмсенсемпе ӑмӑртнӑ. 61,2 килограмм таякан виҫе категорийӗнче вӑл иккӗмӗш вырӑна тухнӑ. Пирӗн ентеш Ҫурҫӗр Осетири спортменкӑна парӑнтарнӑ. Финалта вара Мускаври спортсменкӑна ҫӗнеймен.

Синоптиксем пӗлтернӗ тӑрӑх, паян-ыран ӑшӑ тӑрӗ те вырсарникун кӑшт сивӗтӗ. Телее, нумайлӑха мар.

Вырсарникун ҫумӑр ҫукалӗ, 11-16 градус таран кӑна ӑшӑ пулӗ. Тунтикун ӑшӑтма пуҫлӗ, 18 градус пулӗ. Кашни кун ӑшӑтса пырӗ, эрне варринелле 25 градус тарана шӑрӑх пулӗ. Ҫӗрлесерен те ӑшӑрах туйӑнӗ.

Малтанлӑха палӑртнӑ тӑрӑх, текех сивӗ пулмӗ. Ҫу уйӑхӗн вӗҫӗнче термометр 30 градус таранах кӑтартма пултарӗ.

Стопкоронавирус.рф сайтри сӑн

Чӑваш Енре кӑшӑлвируспа чирлекенсем сахалланнӑ. Кун пирки Стопкоронавирус.рф сайт пӗлтерет.

Ҫу уйӑхӗн 10-мӗшӗнче чи пӗчӗк кӑтарту пулнӑ: 7 ҫын кӑна чирленӗ. Ҫу уйӑхӗн 9-мӗшӗнче – 9, ӗнер 8 ҫын ку инфекципе аптӑранӑ.

Пандеми пуҫланнӑранпа республикӑра 114085 ҫын чирленӗ. Вӗсенчен 4732-шӗ чире парӑнтарайман.

Чӑваш Ен влаҫӗ чӑваш тӗрриллӗ алшӑлли туянасшӑн. Пӗтӗмпе – 5167. Кашнине 790 тенкӗпе туянма хатӗр. Ҫавна май аукцион ирттереҫҫӗ, ку тӗллевпе 4 миллион та 81 пин те 930 тенкӗ уйӑрма палӑртнӑ.

Аукциона ҫу уйӑхӗн 23-мӗшӗнче пӗтӗмлетӗҫ. Ҫӗнтерӳҫӗн тавара килӗшӳ алӑ пуснӑ хыҫҫӑн 10 кунра илсе ҫитермелле.

Алшӑлли ҫине «Сывлӑх, чун илемӗ» тесе ҫырӗҫ.

cap.ru порталтан илнӗ сӑнӳкерчӗк

Шупашкарти электроаппаратура заводӗнче ҫӗнӗ производство участокне хута янӑ. Унта БЭМП сериллӗ микропроцессор блокӗсен сӑнавлӑ тӗслӗхӗсене туса кӑларӗҫ.

Асӑннӑ продукци хальхи вӑхӑтра питех те кирлӗ иккен, ӑна ыйтакансем нумай. Ҫавӑнпа заводра ку енӗпе ҫине тӑрса ӗҫлеме пуҫласшӑн.

«Производство участокӗ пысӑк мар, анчах унӑн пӗлтерӗшӗ пысӑк. Сӑнавлӑ тӗслӗхсемпе макетсем мӗнпур производствӑна витӗм кӳреҫҫӗ», —- тенӗ ҫӗнӗ участока уҫма хутшӑннӑ республикӑн промышленноҫпа энергетика министрӗ Александр Кондратьев.

electrogor.ru сӑнӳкерчӗкӗ

Пӗлтӗрхи кӗркунне Шупашкарти пӗр арҫын 8 пин тенкӗ тӑракан телефонне ҫухатнӑ. 33 ҫулти арҫын Энтузиастсен урамӗнчи гараж комплексӗнче пулнӑ. Телефона водитель алӑкне питӗрсе илмен машинӑри прибор панелӗ ҫинче 20 минутлӑха хурса хӑварнӑ.

Хаклӑ япалана Етӗрне районӗнчи 25 ҫулти каччӑ вӑрласа кайнӑ иккен. Вӑло ӑна телефон юсакан ӑстана сутса янӑ.

Телефона халӗ хуҫине тавӑрса панӑ.

Вӑрӑ ӗҫӗпе унччен те пӑтӑрмаха темиҫе хутчен ҫакланнӑ каччӑ тӗлӗшпе пуҫиле ӗҫ пуҫарнӑ.

cap.ru сӑнӳкерчӗкӗ

Чӑваш патшалӑх ӳнер музейӗнче «Победители. Орест Филиппов» (чӑв. Ҫӗнтерӳҫӗсем. Орест Филиппов) курав уҫӑлнӑ. Ӑна художник ҫуралнӑранпа 100 ҫул ҫитнине халалланӑ.

Раҫҫейӗн тава тивӗҫлӗ художникӗ Виктор Бритвин Орест Ивановича ӑшӑпа аса илсе каласа кӑтартнӑ. Вӑл ӑна художник, учитель тата ӗҫтеш евӗр пӗлнӗ.

«Директорта ӗҫлеме ҫирӗплӗх ҫитмест тесе ун пирки каланине астӑватӑп. Ӗҫри тавлашусенче вӑл час-часах парӑнатчӗ. Ман шухӑшпа, вӑл вӑрҫӑ, вилӗм, юлташсене ҫухатни мӗнне пӗлнӗ, чӗрӗ юлса Ҫӗнтерӗве кӗтсе илнӗ. Ҫавӑн пеккисемпе танлаштарсан ытти уншӑн вак-тӗвекӗн туйӑннӑ пулинех», — тенӗ Виктор Бритвин.

https://ok.ru/profile/578554898199 страницӑран илнӗ сӑнӳкерчӗк

Кӑҫалхи утӑ уйӑхӗн 1-2-мӗшӗсенче «Чӑваш халӑх еткерлӗхӗ» ятпа регионсем хушшинчи фестиваль иртӗ. Ӑна Чӑваш таврапӗлӳҫисен пӗрлӗхӗ йӗркелӗ.

Фестивале Чӑваш Енпе, чӑвашсен историйӗпе, этносӗпе тата культурипе паллаштарас тӗллевпе ирттереҫҫӗ. Фестиваль ӗҫӗ-хӗлӗн тӗп ҫул-йӗрӗсем ҫаксем: шкул таврапӗлӗвӗ, археологи таврапӗлӗвӗ, экологи таврапӗлӗвӗ, ҫарпа истори таврапӗлӗвӗ, туризм таврапӗлӗвӗ, литература таврапӗлӗвӗ, музыка таврапӗлӗвӗ. Унта 14-26 ҫулхи вӗренекенсемпе студентсене, ҫавӑн пекех вӗсен ертӳҫисене хутшӑнма сӗнеҫҫӗ.

Фестиваль «Чӑваш Керем» этнографи комплексӗнче иртӗ.

cap.ru сӑнӳкерчӗкӗ

Чӑваш Енре туса илекен йӗтӗн ют ҫӗршыва ӑсанать. Республикӑн Ял хуҫалӑх министерствинче пӗлтернӗ тӑрӑх, «Средняя Волга» агрофирма чикӗ леш енне 40 тонна ытла йӗтӗн ӑсатнӑ.

Республикӑран агропромышленность продукцине ют ҫӗршыва ӑсатасси тӗрлӗ чару саманинче те чакман. 2023 ҫулхи пӗрремӗш кварталта агропромышленность продукцине пирӗн тӑрӑхран 8,7 пин тонна ӑсатнӑ, ку вӑл унчченхи ҫулхи кӑрлач-пуш уйӑхӗсенчинчен 54 процент нумайрах. Ҫакӑн пек пӗлтернӗ республикӑн ял хуҫалӑх министрӗ Сергей Артамонов.