rzd.ru сайтри сӑн

Хӗл мучи Чӑваш Енри ачасене те килсе курӗ. Ҫак асамҫӑ тӗрлӗ хулана ҫитет. Шупашкар та ҫав списока лекнӗ.

Хӗл мучи пуйӑсӗ республикӑн тӗп хулинче ҫак канмалли кунсенче, раштав уйӑхӗн 4-мӗшӗнче, чарӑнӗ. Вӑл Аслӑ Устюгран ҫитӗ, унпа пӗрле ытти асамҫӑ та пулӗ.

Хӗл мучи пуйӑспа килӗ. Унта ачасене йышӑнмалли вакун, вӑйӑсемпе квестсем ирттермелли вакунсем, ресторан, сувенирсем сутакан лавкка пулӗҫ.

Сӑмах май, Хӗл мучи пуйӑсӗ юпа уйӑхӗн 22-мӗшӗнче ҫула тухнӑ, вӑл 100 хулара чарӑнӗ.

"Про Город" сайтӗнчи сӑн

Атӑл пӑрӗ ҫинче пулӑҫсен сезонӗ пуҫланнӑ. Паян чутах 33 арҫын пӑр катӑкӗ ҫинче ларса кайман.

Пулӑҫсем Ҫӗнӗ Шупашкар ҫывӑхӗнче, ГЭС патӗнче, пулӑ тытса ларнӑ. Тӑрук пӑр катӑлнӑ та шыва май юхма пуҫланӑ. Ҫав пӑр катӑкӗн серепине 30 пулӑҫ лекнӗ.

Ҫалавҫӑсем патне 10 сехетре хыпар ҫитнӗ. Пулӑҫсене ҫӑлма Ҫӗнӗ Шупашкарти, Сӗнтӗрвӑрринчи тата Шупашкарти ҫӑлавҫӑсем ҫитнӗ.

11 сехетре 33 пулӑҫа ҫыран хӗррине кӑларнӑ.

ҪҪХПИ тунӑ сӑн

Паян А-151 федераци ҫулӗ ҫинче, Ҫӗрпӳ районӗнче, "Рено Логан" машина кювета чӑмнӑ та ҫаврӑнса ӳкнӗ. Салонра 5 уйӑхри ача пулнӑ

Юрать-ха, вӑл аманнӑ кӑна.

Руль умӗнче 26 ҫулти арҫын пулнӑ. Малтанлӑха пӗлтернӗ тӑрӑх, вӑл малта пыракан машинӑран иртсе каяс тесе ҫул хӗррине тухнӑ, унта руле итлеттереймесӗр кювета чӑмнӑ. Машина икӗ хутчен ҫаврӑнса тӑрри ҫине ӳкнӗ.

Ача автолюлькӑран тухса ӳкнӗ. Ӑна пульницӑна илсе ҫитернӗ.

Синоптиксем пӗлтернӗ тӑрӑх, республикӑра ҫак кунсенче самаях сивӗтет. Паян ҫанталӑк кӑштах ӑшӑтнӑ. Анчах ыранах пирӗн пата антициклон килӗ.

Ҫитес 3 кунра ҫӗрлесерен 20 градус таран сивӗтӗ. Хӑш-пӗр вырӑнта 25-26 градус таранах пулма пултарать. Кӑнтӑрла ӑшӑрах - 10 градус сивӗ. Сивӗ те уяр ҫанталӑк эрне тӑршшӗпех пулӗ. Пӗрремӗш декада вӗҫӗнче кӑна ӑшӑтӗ, юр ҫӑвӗ. Анчах кӑштахран каллех сивӗтӗ.

Ҫак канмалли кунсенче атмосфера пусӑме 770 мл таран хӑпарӗ.

Шупашкарти 1-мӗш Кӑнтӑр тӑкӑрлӑкӗнчи пӗр ҫурт миграци ыйтӑвӗпе ӗҫлекен ҫынсене иккӗлентерме тытӑннӑ. Унта 60 ытла ҫын пропискӑра тӑнӑ.

Вӗсем вырӑна ҫитсе курнӑ та - унта пурӑнмалли юрӑхлӑ ҫурт та пулман, стенасем кӑна.

Ҫӗр хуҫи - 53 ҫулти арҫын. Вӑл тӗрӗссине каласа кӑтартнӑ. Хайхискер унта хӑйӗн пӗлӗшӗсене, 60 ҫынна, пропискӑна тӑратнӑ. Лешсем хӑйсен ачисене прописка панӑ.

Арҫын тӗлӗшпе пуҫарнӑ пуҫиле ӗҫе суда пӑхса тухма панӑ.

Хамӑрӑн Telegram-ри каналта эпир ыйтӑм ирттертӗмӗр: ЖКХ хакӗсем мӗнле сӑлтава пула ӗнер ӳснине халӑхран ыйтрӑмӑр.

Аса илтеретпӗр: раштавӑн 1-мӗшӗнчен пуҫласа ҫутӑшӑн, газшӑн, шывшӑн тата ытти кил-ҫурт таврашӗнчи тӑкакшӑн хаксене хӑпартнӑ. Унччен маларах хаксем нумай пулмасть, утӑ уйӑхӗнче кӑнаҫ ӳснӗччӗ. Пилӗк уйӑх иртнӗ хыҫҫӑн хаксене каллех хӑпартма йышӑннӑ.

Пирӗн ыйтӑма хутшӑнакансенчен ытларах пайӗ ку йышӑнӑва ҫӗршыври инфляцие пула тунӑ тесе шутлать, ҫавӑн пекех «халӑхран укҫа ытларах сӑптӑрас кӑмӑлран» тата «бюджетра укҫа ҫитменнипе» вариантсене суйлакансем пур. Кӑмӑл пур пулсан хӑвӑр шухӑшӑра эсир те пирӗн ыйтӑмра палӑртма пултаратӑр.

mintrans.cap.ru сӑнӳкерчӗкӗ

Муркаш районӗнче метан заправка уҫӑлнӑ. Вӑл — Ситуккасси ялӗ тӗлӗнче.

Заправкӑра икшер колонка вырнаҫтарнӑ. Кашнинче пӗр харӑсах икшер машина заправка витӗр тухайӗ.

Чӑваш Енӗн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, ҫӗнӗ заправка пулӑшӑвӗпе сехетре 10 машинӑран кая мар, талӑкне вара 55 машина таран усӑ курайӗ.

Шупашкарпа Чулхула хушшинче унччен апла заправка пулман иккен. Унтах автомобильсен зарядка станцине те вырнаҫтарнӑ.

Канаш районӗнче те метан заправка уҫӑлӗ. Ӑна раштав уйӑхӗн ҫурринче ӗҫлеттерсе ярасшӑн.

forum.zarulem.ws сӑнӳкерчӗкӗ

Ӗнер, раштав уйӑхӗн 1-мӗшӗнче, Ҫӗнӗ Шупашкарта маршрутка инкеке лекнӗ. Салонти пассажирсенчен пӗри, хӗрарӑм, аманнӑ.

Инкек Терешкова тата Винокуров урамӗсем хӗресленнӗ вырӑнта пулса иртнӗ.

Малтанласа шухӑшланӑ тӑрӑх, инкекшӗн ҫӑмӑл машина айӑплӑ. «Кашкай» автомобиль водителӗ иккӗмӗш пӗлтерӗшлӗ ҫул ҫинчен тухнӑ чухне «Рено» машинӑна ирттерсе яман. «Рено» автомбиль ҫавна пула маршрутка ҫине пырса ҫапӑннӑ.

Пассажирсенчен пӗри, хӗрарӑм, хытах аманса пӗтнӗ. Ӑна больницӑна ӑсатнӑ.

shemur.cap.ru сӑнӳкерчӗкӗ

Шӑмӑршӑра вӑтам шкулта вӗренекен ачисем урокра курткӑпа лараҫҫӗ. Ҫавӑн сӑлтавӗ котельнӑй йӗркеллӗ ӗҫлеменнипе ҫыхӑннӑ.

Район администрацийӗнче лару-тӑрӑва ҫирӗп тӗрӗслесе тӑнине ӗнентернӗ май вӗренӳ процесне чармассине хыпарланӑ.

Шкула тӗплӗн юсанӑ хыҫҫӑн классенчен пӗри сивӗ чухне йӗркеллӗ ӑшӑнса ҫитеймест иккен. Ҫакӑ ачасемшӗн те, учительсемшӗн те меллӗ мар. Шкула, ача пахчине тата больтницӑна ӑшӑпа тивӗҫтерсе тӑракан котельнӑй йӗркеллӗ ӗҫлемест-мӗн. Класра халӗ ӑшӑтмалли хатӗр вырнаҫтарнӑ.

Ӑшӑ ыйтӑвне тӗпрен татса пама модульлӗ котельнӑй вырнаҫтарни пулӑшӗ тесе ӑнлантарнӑ вырӑнти администрацире.

Ҫав вӑхӑтрах класра сивӗ пирки прокуратура тӗрӗслев пуҫарни те паллӑ.

cap.ru сӑнӳкерчӗкӗ

Канмалли кунсенче тинех Шупашкарти Граждан урамӗпе общество транспорчӗ ҫӳреме тытӑнӗ. Раштавӑн 4-мӗшӗнче ҫӗнӗ асфальтпа 11-мӗш троллейбус тата автобуссем ҫӳреме тытӑнӗҫ.

Транспорт Чапаев савучӗ еннелле ҫӗнӗ асфальтпа кайӗ, каялла - Энтузиастсен урамӗпе. Халӗ ҫул хӗресленекен вырӑнта светофора ҫутма хатӗрленеҫҫӗ.

Подрядчик раштав уйӑхӗ вӗҫлениччен икӗ сий асфальт сарма шантарнӑ. Ытти ӗҫе ҫуркунне пурнӑҫлама тытӑнӗҫ.