cap.ru сӑнӳкерчӗкӗ

Ҫӗртме уйӑхӗнче Хулари 1-мӗш клиника пульницинче чӗре чирӗпе йывӑр чирлекен ача ҫуралнӑ. Тухтӑрсем ӑна васкавлӑ операци кирлине пӗлтернӗ.

Чӑваш Ен тухтӑрӗсем Пензӑри чӗрепе юн тымарӗсен хирургийӗн федераци центрӗпе ҫыхӑннӑ. Ачан сывлӑхне кӑшт йӗркене кӗртсен ӑна Пензӑна илсе кайма хатӗрленӗ. Пӗчӗкскере реанимобильпе илсе кайнӑ, реанматологсем пӗрлех пулнӑ. Вырӑна ҫитсен ачана унти кардиохирургсен аллине панӑ.

Ача 6 кунра чухне операци тунӑ. Вӑл ӑнӑҫлӑ иртнӗ.

Ача халӗ килтех, Чӑваш Енрех.

Паян тинех урамра ҫуллахи ҫанталӑк хуҫаланать. Синоптиксем пӗлтернӗ тӑрӑх, кун пек уяр та шӑрӑх кунсем сахалтан та 2 эрне пулӗҫ.

Пирӗн патра хуҫаланнӑ циклон Черноземье енне кайнӑ. Паян-ыран 24-29 градус ӑшӑ тӑрӗ. Ҫил лӑпкӑ вӗрӗ.

Ҫитес эрне варринче сывлӑш температури 30 градус таранах ӑшӑнӗ. Каҫсерен те 17-19 градус ӑшӑ тӑрӗ. Анчах вырӑнӑн-вырӑнӑн аслатиллӗ ҫумӑр ҫӑвас хӑрушлӑх пулӗ.

Сӑмах май, иртнӗ талӑкра 1 тӑваткал метр ҫӗр ҫине 10 литр шыв ӳкнӗ. Утӑ уйӑхӗнчи нӳрӗклӗх норми 20 процент ытларах та тулнӑ.

pravdapfo.ru сӑнӳкерчӗкӗ

Шупашкар хулинче пӗр арҫын бетон карта ҫинчен Атӑла сикнӗ. Арҫынна тухтӑрсен пулӑшӑвӗ кирлӗ пулса тухнӑ.

Утӑ уйӑхӗн 21-мӗшӗнче Шупашкарти юханшыв порчӗ патӗнче пӗр арҫын бетон карта ҫинчен Атӑла сикнӗ. Пӗлнӗ-пӗлмен тата пули-пулми вырӑнта шыва сикмелле марри пирки шухӑшламан ҫав этем шывран тухайманине кура ҫынсем ҫӑлавҫӑсене чӗнсе илнӗ.

Республикӑн шыравпа ҫалав службинче пӗлтернӗ тӑрӑх, ҫӑлавҫӑсем арҫын патне кимӗпе пырса ӑна шывран туртса кӑларнӑ, унтан васкавлӑ пулӑшу тухтӑрӗсене чӗнсе илнӗ.

21.mchs.gov.ru сӑнӳкерчӗкӗ

Утӑ уйӑхӗн 21-мӗшӗнче Шупашкар районӗнчи Ҫӗнӗ Тутаркассинче пахча-ҫимӗҫ управӑшӗ ҫуннӑ. Пушарпа кӗрешекенсем вут-ҫулӑма сӳнтерес тесе икӗ сехет таран тӑрӑшнӑ.

Пушар пирки каҫхи пилӗк сехет ҫурӑ тӗлӗнче пӗлтернӗ. Ҫӑлавҫӑсем вырӑна васкавлӑн тухса кайнӑ. Вут-ҫулӑма сӳнтерме 10 машина тата 50 ҫын пырса ҫитнӗ. Пушара 19 сехет те 45 минут тӗлне сӳнтернӗ.

Вут-ҫулӑм пахча-ҫимӗҫ управӑшӗн ҫивиттине пурӗ 550 тӑваткал метр лаптӑкра сиенлетнӗ.

Инкек сӑлтавне тата вут-ҫулӑм миҫе тенкӗлӗх сиен кӳнине экспертсем палӑртӗҫ.

mykaleidoscope.ru сӑнӳкерчӗкӗ

Шупашкар районӗнче пурӑнакан пӗр арҫын командировкӑран килсен аванах хыпса лартнӑ. Вӑл ҫул хӗрринчи кафене кӗрсе кайнӑ та ларнӑ ҫӗртех ҫывӑрса кайичченех ӗҫнӗ.

Ҫурҫӗр иртсен вӑранса кайнӑ та карас телефонӗ ҫуккине асӑрханӑ. Телефон чехолӗнче темиҫе банк картти пулнӑ. Ҫухатнӑ пуль тесе арҫын карттӑсенчен укҫа илмелле мар туса хунӑ, ҫӗнӗ телефонпа сим-карта туяннӑ.

Кӑштахран ун патне банк карттисенчен укҫа касса кайни ҫинчен хыпарсем килсе тулнӑ. Ҫавӑн хыҫҫӑн арҫын йӗрке хуралҫисенчен пулӑшу ыйтнӑ.

Пакунлисем банк карттисемпе Шупашкарти Ҫӗнӗ Кӑнтӑр районӗнчи лавккасемпе пӗчӗк кафесенче такам татӑлнине палӑртнӑ. Видеокамерӑсене пӑхнӑ та — вӗсемпе пӗр ҫын тӳленине ӑнланса илнӗ. Ҫухалнӑ телефона хулари ломбардсенчен пӗринче тупнӑ.

Кӗҫех вӑрра тупса палӑртнӑ. Судпа унччен те айӑпланнӑ 32 ҫулти арҫын телефона ҫул хӗрринчи кафери пукан ҫинчен (телефон хуи ҫав вӑхӑтра ҫывӑрнӑ) илнӗ. Халӗ унӑн каллех суд тенкелӗ ҫине ларма тивӗ.

chuvashia.sledcom.ru сӑнӳкерчӗкӗ

Етӗрне хулинчи общежитире пӗр арҫын хӑйӗн икӗ пӗлӗшне тискеррӗн вӗлернӗ.

2021 ҫулхи ҫурла уйӑхӗн 5-мӗшӗнче ҫав арҫын хӑйӗн кӳрши патӗнче эрех ӗҫсе ларнӑ. Ушкӑнра пӳлӗм хуҫипе пӗрлех тепӗр ҫын та пулнӑ. Сӑра сакки сарлака — ӗҫсен-ӗҫсен виҫӗ пӗлӗш хирӗҫсе кайнӑ. Вӗсенчен пӗри иккӗшне вӗлерме шухӑш тытнӑ.

Кӳршӗ арҫынни юнашар пӳлӗмре пурӑнакана чышкӑпа тата йывӑҫ пуканпа хӗнеме тапранса кайнӑ. Пурӗ 61 хутран кая мар ҫапнӑ. Унтан ҫӗҫӗ ярса илсе унпа 35 хутран кая мар чикнӗ. Тепӗр арҫынна та вӑл хӗнесе пӗтернӗ. Ӑна 8 хутран кая мар ҫӗҫӗпе чикнӗ. Усал арҫын ун хыҫҫӑн кил хуҫин пуҫне тата сылтӑм аллине чӗртсе янӑ.

Преступление пытарас тесе хайхи этем пӳлӗме чӗртсе янӑ, хӑй вара унти телевизора йӑтса тухса кайнӑ.

Халӗ ҫав арҫынна суд 20 ҫуллӑха ҫирӗп режимлӑ колоние ӑсатма йышӑннӑ. Тӗрмерен тухсан та унӑн тӗнче тӑрӑх тата тепӗр ҫулталӑк хушши ирӗклӗ ҫӳреме май килмӗ.

culture.cap.ru сайтран илнӗ сӑнӳкерчӗк

Утӑ уйӑхӗн 20-мӗшӗнче Чӑваш Енӗн наци вулавӑшӗнче чӑваш поэчӗ, прозаикӗ, драматургӗ, Чӑваш Республикин искусствӑсен тава тивӗҫлӗ ӗҫченӗ Николай Теветкел (Петровский) 85 ҫул тултарнине халалласа литература каҫӗ иртнӗ.

Мероприятие культурӑпа ӳнер ӗҫченӗсем, ӑсчахсем, вулавӑш ӗҫченӗсем, вулакансем, ҫыравҫӑн ҫывӑх ҫыннисемпе тӑванӗсем хутшӑннӑ.

Библиотека директорӗ Роза Лизакова Николай Теветкел пултурлӑхне пысӑка хурса хакланӑ май «Теветкел Николай Александрович» ятпа поэтӑн юбилейӗ тӗлне вулавӑш ӗҫченӗсем библиографи указательне хатӗрленине пӗлтернӗ.

Николай Теветкел 1937 ҫулхи утӑ уйӑхӗн 11-мӗшӗнче Йӗпреҫ районӗнчи Савкка ялӗнче ҫуралнӑ. Унӑн тӗп кӑларӑмӗсен хушшинче ҫаксене асӑнса хӑварма пулать: «Хӗвел кӗлти», «Авӑн уйӑхӗ», «Янӑравлӑ тӳпе», «Сонетсем», «Сывлӑмпи», «Хура сулӑ», «Шурӑ ката» т.ыт.те.

cap.ru порталтан илнӗ скриншотпа усӑ курнӑ

Республикӑри пултарулӑх коллективӗсем хӑйсен хӑш-пӗр проектне 2023 ҫулта Чӑваш Ен Элтеперӗн Олег Николаевӑн гранчӗпе пурнӑҫа кӗртӗҫ.

Чӑваш патшалӑх оперӑпа балет театрӗ «История Нарспи» балет лартма, Чӑваш патшалӑх юрӑпа ташӑ ансамблӗ «Ҫул хыҫҫӑн – ҫул, 100 ҫул сулмаклӑн утрӑмӑр» концерт программи валли 5-шер миллион тенке тивӗҫнӗ.

К.В. Иванов ячӗллӗ Чӑваш патшалӑх академи драма театрне Леонид Андреев пьеси тӑрӑх «Ҫын пурнӑҫӗ» спектакль лартма, Вырӑс драма театрне Борис Полевойӑн «Повесть о настоящем человеке» хайлавӗ тӑрӑх спектакль лартма 3-шер миллион тенкӗ уйӑрӗҫ.

СССР лётчик-космонавчӗн А.Г. Николаевӑн мемориал комплексне «Планеты Солнечной системы» паллаштарупа ландшафт композицине йӗркелеме, Ҫеспӗл Мишши ячӗллӗ Чӑваш патшалӑх ҫамрӑксен театрне «Чӑваш юмахӗсем» спектакле вырӑсла тата чӑвашла лартма 1-шер миллион тенкӗ парӗҫ.

4vsar.ru сайтри сӑн

Шупашкар хула администрацийӗ фурӑсене хула урамӗсемпе ҫӳреме чарасшӑн. Тӗрӗсрех каласан, тӗп урамсене ҫак пысӑк машинӑсене кӗртесшӗн мар.

Калинин урамӗ, Мускав проспекчӗ, Сӗнтӗрвӑрри ҫулӗ, Трактор тӑвакансен проспекчӗ, И.Яковлев проспекчӗ, Эгер бульварӗ, Мир проспекчӗ, Гагарин тата Б.Хмельницкий урамӗсем - фурӑсене ҫак урамсемпе ҫӳреме чарасшӑн е пӗр-пӗр вӑхӑтра кӗртесшӗн мар. Е чарӑнса тӑма ирӗк парасшӑн мар. Хальлӗхе тӳре-шара татӑклӑн палӑртман. Кун тӗлӗшпе «Уҫӑ хула» порталта сасӑлав иртет.

Сӑмах май, пӗлтӗр кӗркунне Элтепер пысӑк суту-илӳ сечӗсене логистика центрӗ тума сӗннӗ.

"Про Город" сайтӗнчи сӑн

Паян Шупашкар районӗнчи Ҫӗнӗ Тутаркассинче ферма ҫуннӑ. Кун пирки «Про Город» хаҫата халӑх корреспонденчӗ пӗлтернӗ.

Ку хыпар 17 сехет те 45 минутра ҫитнӗ. Промышленноҫ урамӗнче вырнаҫнӑ фермӑран тӗтӗм тухнӑ, ҫулӑм курӑннӑ.

Халӑх корреспонденчӗ машинӑпа иртсе пынӑ чухне ҫакна видео ӳкерсе хаҫата ярса панӑ.

Хальлӗхе ку пӑтӑрмах пирки тулли информаци ҫук.