Чӑваш Ен Элтеперӗ Олег Николаев хӗрарӑмсене паянхи уявпа саламланӑ. «Тӗнчене шӑпах эсир, хӗрарӑмсем, лайӑхрах та ырӑрах тӑватӑр, килӗшӳлӗх кӳретӗр. Сирӗн вӑй-халӑр – иксӗлми ҫӑлкуҫ евӗр», — саламланӑ вӑл республикӑн влаҫ органӗсен официаллӑ порталӗнче.
«Хӗрарӑм асамлӑхӗ хуть хӑш саманара та пысӑк ӑстаҫӑсене унӑн тӗлӗнмелле илемӗпе ӑс-хакӑлне мухтакан паха та вилӗмсӗр искусство произведенийӗсем тума хавхалантарнӑ. Хӗрарӑм сӑнарне чӑваш поэчӗсемпе ҫыравҫисем те, художникӗсемпе скульптура ӑстисем те хӑйсен произведенийӗсенче ҫӳле ҫӗкленӗ. Йӑла-йӗркепе кӑмӑл-сипет пуянлӑхне ӑруран ӑрӑва куҫарма, этнокультура хаклӑхӗсене сыхласа упрама пулӑшакан анне сӑнарӗ яланах чи таси те хисеплисенчен пӗри шутланнӑ», — тенӗ Элтепер.
Пуш уйӑхӗн 8-мӗшӗ кану кунӗ пулнӑран пульницӑсем эрне варринче урӑх графикпе ӗҫлӗҫ.
ЧР Сывлӑх сыхлавӗн министерстви пӗлтернӗ тӑрӑх, ыран, пушӑн 7-мӗшӗнчн, пульницӑсенче кӗскетнӗ ӗҫ кунӗ пулӗ: 1 сехет маларах хупӑнӗҫ. Пушӑн 8-мӗшӗнче тухтӑрсем ӗҫлемӗҫ. 8-13 сехетсенче питӗ васкавлӑ медпулӑшу илме май пулӗ. Анчах тухтӑра 12 сехетчен чӗнсе ӗлкӗрмелле. Вакцинаци пӳлӗмӗсем 8-12 сехетсенче ӗҫлӗҫ.
Кӑҫал Пӗтӗм тӗнчери хӗрарӑмсен кунӗ эрне варрине лекнӗрен пӗр кун кӑна кантараҫҫӗ. Раҫҫей Правительстви ку уява Тӑван ҫӗршыв хӳтӗлевҫин кунӗ чухнехи пек ытти канмалли кунпа пӗрлештермен.
Эрнере пилӗк кун ӗҫлекенсем юнкун, пуш уйӑхӗн 8-мӗшӗнче, канӗҫ. Ыран, ытларикун, кӗске ӗҫ кунӗ пулӗ: 1 сехет сахалрах ӗҫлемелле.
Уявпа ҫыхӑннӑ тепӗр канмалли кунсем ҫу уйӑхӗнче кӑна пулӗҫ.
Иртнӗ эрне Ҫӑварни эрни пулчӗ. Вырсарникун вара ӑна тӗрлӗ ҫӗрте тӗрлӗ мероприяти ирттерсе анлӑн уявларӗҫ. Вӑрнарсем те ҫавӑн пек тунӑ. Вӗсем спорт ӑмӑртӑвӗсем те ирттернӗ.
Вӑрнар муниципалитет округӗн пуҫлӑхӗ Андрей Тихонов спорт мероприятийӗсене хутшӑннӑ. Вӑл кире пуканӗ ҫӗкленӗ. 24 килограмм таяканскере хайхискер ним мар 40 хутчен ҫӗклесе илме пултарнӑ. «Ҫамрӑксемшӗн те тӗслӗх», — теҫҫӗ Андрей Тихонов вӑйӗнчен тӗлӗннисем.
Чӑваш Енре хӗрарӑм водительсен ӑмӑртӑвне ирттерӗҫ. Темиҫе туртан тӑракан «АвтоЛеди-2023» конкурс пуш уйӑхӗн 5-мӗшӗнче пулӗ.
Хӗрарӑмсен ҫул-йӗр правилисене мӗнле пӗлнине туллин кӑтартма, унсӑр пуҫне вӗсен руле маттур тытса пынине ҫирӗплетсе пама лекӗ. Унтан хӗрарӑмсен пултарулӑх конкурсӗ те пулӗ.
Заявкӑсене Чӑваш Енӗн Транспорт тата ҫул-йӗр хуҫалӑхӗн министерствинче пуш уйӑхӗн 1-мӗшӗччен йышӑнӗҫ.
Шупашкарта пурӑнакан Надежда Мясникова 91-мӗш ҫула кайнӑ ӗнтӗ. Ӑшӑ кӑмӑллӑ кинемей питех те юрлама юратать. Паян Кӗнеке парнелемелли пӗтӗм тӗнчери кун пулнӑ май социаллӑ ӗҫченсем ӑна чӑвашла юрӑсен пуххине парнеленӗ.
Кинемее Шупашкар хулинчи халӑха социаллӑ пулӑшу кӳрекен центрӗн соцаллӑ ӗҫченӗ пӑхса тӑрать. Ваттисен прунӑҫӗ интереслӗрех те тӗрлӗ енлӗрех пултӑр тесе унта тӗрлӗ проект пурнӑҫӑ кӗртеҫҫӗ. Ҫавсенчен пӗри — «Мобильлӗ вулавӑш». Ҫавна май ватӑсене вӗсен юратнӑ кӗнекисемпе тивӗҫтерсе тӑраҫҫӗ. Кӗнеке вулама юратакан кинемейсемпе мучисене хӑйсем вулама юратакан кӑларӑмсене парнеленӗ.
Паян, Ҫветтуй Валентин кунӗнче, Чӑваш Енри тӳре-шарана халалласа ӳкернӗ «валентинкӑсене» яма пулать. Ку проекта cheb.media пуҫарнӑ.
Шупашкар хула администрацийӗн пуҫлӑхӗ Денис Спирин хӑйӗн «валентинкипе» подписчикӗсемпе пайланнӑ ӗнтӗ. Вӑл кирек мӗнле шӳте те йӗркелле йышӑннине палӑртнӑ. Уйрӑмах паян – Ҫветтуй Валентин кунӗнче.
Ыттисем хальлӗхе хӑйсен «валентинкине» асӑрхаман.
Шупашкар хулинчи Халӑхӑн социаллӑ ыйтӑвӗсене тивӗҫтерекен комплекслӑ центрта паян Кӗнеке парнелемелли пӗтӗм тӗнчери куна халалласа пуҫтарӑннӑ.
Музыкӑпа поэзи каҫне социаллӑ учрежденири стационар уйрӑмӗнче пурӑнакан кинемисемпе мучисем валли йӗркеленӗ.
Ваттисем хӑйсем юратса вулакан кӗнекесем пирки каласа кӑтартнӑ. 72 ҫулти Галина Борзунова, сӑмахран, Вячеслав Шишковӑн «Угрюм-река» романне кӑсӑкланса вулать. Унччен вӑл ҫав хайлавпа ӳкернӗ фильма пӑхнӑ-ха, анчах ватӑ ҫын унпах ҫырлахман — автор еплерех ҫырнине хаклас тенӗ.
Музыкӑпа поэзи каҫӗ «Ивушки» хор (вӑл стационарта пурӑнакан ватӑсенчен тӑрать) концерчӗпе вӗҫленнӗ.
Нарӑс уйӑхӗн 9-мӗшӗнче пирӗн ҫӗршывра Граждан авиацийӗнче ӗҫлекенӗн кунӗ пулчӗ. Шупашкарти аэропортра тӑрӑшакан Владимир Скачков кӑҫал 72 ҫул тултарать. Вӑл 40 ҫул ӗнтӗ унта вӑй хурать.
Халӗ Владимир Яковлевич производствӑпа диспетчер службине ертсе пырать. Унта рейс каярах юлса пулассине е расписание улшӑну кӗртнине пуринчен малтан пӗлеҫҫӗ. Служба сывлӑшри 2100 метр ҫӳллӗшне тата ҫӗр ҫинчи 45 км инҫӗше сӑнаса тӑрать.
Владимир Скачков хӑй вӑхӑтӗнче «Ан-2» самолёт лётчикӗ пулнӑ, каярах «Ан-24» тата «Ту-134» самолётсемпе вӗҫнӗ. Пӗтӗм Совет Союзне, Европӑна ҫитнӗ, Арабсен Эмиратне, Турцие, Китая тата ытти ҫӗршыва вӗҫнӗ.
«Тӳпене юратни вӑл – ӗмӗрлӗхе. Мана тӗрлӗ саманара ӗҫлеме тиврӗ: Шупашкарти аэропорт расписанийӗнче 60 ытла йӗрке пулнине те, 2015 ҫулта вара пӗртен-пӗр Мускав рейсӗ ҫеҫ тӑрса юлнине те. Ун чухне аран-аран 30-40 пассажир пулнине те. Паян аэропорт ҫӗнӗлле аталаннишӗн савӑнатӑп», – тенӗ Владимир Сачков.
ЧР Цифра министерстви аукцион ирттерессине пӗлтернӗ. Мӗн тӗллевпе?
Аукцион ҫӗнтерӳҫин Ҫӗнтерӳ кунӗ, Республика кунӗ, Хусан тата Сӑр хӳтӗлев чиккисен строителӗсене аса илмелли кун тата ытти пысӑк уяв пирки информаци материалӗсем вырнаҫтармалла.
Аукционри малтанхи хак - 429,3 пин тенкӗ. Пӗтӗмпе 700 символран кая мар 28 хыпар вырнаҫтармалла. Эппин, пӗр хыпаршӑн 15,3 пин тенкӗ тухать.
Аукцион ҫӗнтерӳҫин сайта кӗрсе пӑхакансен йышӗ уйӑхра 700 пинрен кая мар пулмалла.
+3.3 °C