Ку эрне вӗҫӗнче эпир 3 кун канатпӑр: чӳкӗн 4-6-мӗшӗсенче. Пульницӑсем ҫав вӑхӑтра мӗнле графикпе ӗҫлессине палӑртнӑ.
Чӳкӗн 3-мӗшӗнче ӗҫ кунӗ 1 сехет кӗскерех пулӗ. Чӳкӗн 4-мӗшӗнче пульницӑсенче 8-13 сехетсенче васкавлӑ пулӑшу параҫҫӗ. Чӳкӗн 5-мӗшӗнче шӑматкунхи графикпе ӗҫлеҫҫӗ. Чӳкӗн 6-мӗшӗ – канмалли кун, 8-13 сехетсенче васкавлӑ пулӑшу параҫҫӗ.
Кӗҫех, чӳк уйӑхӗнче, вӑраха тӑсӑлакан канмалли кунсем ҫитӗҫ. Чӳк уйӑхӗн 4-мӗшӗ – Халӑхсен пӗрлӗхӗн кунӗ.
Уяв пулнӑ май эрнере пилӗк кун ӗҫлекенсем 3 кун канӗҫ: эрнекунран пуҫласа вырсарникунччен. Кӗҫнерникун, чӳк уйӑхӗн 3-мӗшӗнче, ӗҫ кунӗ 1 сехет кӗскерех пулӗ.
Вӑраха тӑсӑлакан ҫитес канмалли кунсем Ҫӗнӗ ҫул хыҫҫӑн ҫеҫ пулӗҫ. Ун чухне раштав уйӑхӗн 31-мӗшӗнчен тытӑнса кӑрлачӑн 8-мӗшӗччен ӗҫлемӗпӗр.
Чӑваш Ен Элтеперӗ Олег Николаев «хисеплӗ вӗрентекенсемпе педагогика ӗҫӗн ветеранӗсене» Вӗрентекен кунӗпе саламланӑ.
«Вӗрентекен — професси кӑна мар, чун туртӑмӗ те. Шӑпах эсир анлӑ тавра курӑмлӑ та тарӑн пӗлӳллӗ ҫамрӑксене, ҫӗршывӑн пулас гражданӗсене ҫитӗнтеретӗр», — тенӗ Элтепер хӑйӗн саламӗнче.
Республика вара «малашне те шкулсем тӑвас тата вӗсене ҫӗнетес, вӗрентӳ тытӑмне аталантарас, ӗҫре палӑрнисене пулӑшас тата педагог сумне ӳстерес тӗлӗшпе нумай ӗҫ» тӑвӗ.
Юпа уйӑхӗн 2-мӗшӗнче Патӑрьел районӗнче пурӑнакансем ентешлӗх уявне пуҫтарӑннӑ. Пуху Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче иртнӗ. Унта район администрацийӗн пуҫлӑхӗ Рудольф Селиванов та хутшӑннӑ.
Пухӑннисене ентешлӗх ертӳҫи Александр Миронов, ЧР Паташалӑх Канашӗн депутачӗсем Олег Мешков, Валерий Антонов, Юрий Зорин, республикӑри ытти районти ентешлӗх ертӳҫисем саламланӑ.
Сумлӑ ентешӗсене Рудольф Селиванов района йӗркеленӗренпе 95 ҫул ҫитнине халалласа кӑларнӑ медальпе чысланӑ. Уяв Патӑрьел тӑрӑхӗнчен тухнӑ артистсен концерчӗпе вӗҫленнӗ.
Кунашкал акцие Шупашкарта кашни ҫулах ирттереҫҫӗ. Пӗтӗм тӗнчери ваттисен кунӗнче, юпа уйӑхӗн 1-мӗшӗнче, парикмахерсем ватӑ ҫынсен ҫӳҫне йӳнӗрех хакпа касӗҫ.
Акцие 60 ҫултан аслӑраххисем хутшӑнма пултараҫҫӗ. Кӑҫал ӑна икӗ кун ирттерме палӑртнӑ: авӑнӑн 30-мӗшӗнче тата юпа уйӑхӗн 1-мӗшӗнче. 60-тан аслӑраххисен ҫӳҫ касас тесен маларах ҫырӑнмалла.
Ансат прическӑна 150 тенкӗпе тӑвӗҫ. Акцие Шупашкарти 22 парикмахер хутшӑнӗ.
Паян пӗтӗм тӗнче тӑнӑҫлӑх кунне паллӑ тӑвать. Уяв кунӗ кашни ҫул авӑнӑн 21-мӗш кунне килет.
Уява ПНО (вырӑсла ООН) никӗсленӗ. Чи малтанах, 1981 ҫулта 36/67 номерлӗ резолюцине йышӑннӑ хыҫҫӑн, ӑна авӑн уйӑхӗн виҫҫӗмӗш ытларикунне уявлама йышӑннӑ пулнӑ. 20 ҫул иртнӗ хыҫҫӑн вара 2001 ҫулта, 55/282 резолюцие пӗр саслӑн йышӑнса, уява авӑнӑн 21-мӗш кунӗпе ҫыхӑнтарнӑ. ПНО шухӑшӗпе ҫак кун мӗнпур вӑрҫӑра кану илмелле, никама та хур кӑтартмалла мар.
Кашни ҫул ПНО уява тӗрлӗ темӑпа ирттерет. Кӑҫалхи тема: «Расизма пӗтересси. Тӑнӑҫлӑ пурнӑҫ йӗркелесси». ПНО тӗп секретарӗ Антониу Гутерриш ҫапла каланӑ: «Расизм институтсене, социаллӑ тытӑмӗсене тата кашни ҫыннӑн кулленхи пурнӑҫне халь те ура хурса пырать. Вӑл тарӑна кайнӑ танмарлӑхӑн сӑлтавӗ пулса юлать. Вӑл халӗ те ҫынсене хӑйсен тӗп прависене пурнӑҫа кӗртме чӑрмантарать. Вӑл обществӑри йӗркене аркатать, демократие хавшатать, правительствӑсен легитимлӑхне чакарать, унсӑр пуҫне… расизмпа гендерла танмарлӑх хушшинче пӗревӗрлӗх пурри пирки иккӗленмелли ҫук».
Раҫҫей Федерацийӗнче вара паян Владимир Путин Президент мобилизаци пирки хушӑва алӑ пуснӑ.
Паян - Пӗлӳ кунӗ, ачасемпе вӗрентекенсен уявӗ. Анчах республикӑра педагогсем ҫитмеҫҫӗ. 260 ваканси пур. Ҫапла пӗлтерет ЧР Ӗҫлевпе социаллӑ хӳтлӗх министерстви.
Ытларах математика, ют чӗлхе, вырӑс чӗлхипе литературин, физика, физкультура учителӗсем кирлӗ. Тулли мар кун ӗҫленӗшӗн 5889 тенкӗ тӳлеме хатӗр. 15279 тенкӗпе танлашакан шалуллӑ ӗҫ вырӑнӗ нумай.
Раҫҫей Правительстви ҫитеҫ ҫул пирӗн ҫӗршывра епле канассине палӑртнӑ. Правительство председателӗ Михаил Мишустин 2023 ҫулхи канмалли кунсене куҫарасси ҫинчен калакан йышӑнӑва алӑ пуснӑ.
Ҫитес ҫулхи кӑрлач уйӑхӗн 1 тата 8-мӗшӗсем вырсарникуна лекӗҫ. Асӑннӑ кунсем ҫитменнине тата – канмалли кунсем. Вӗсен вырӑнне нарӑс уйӑхӗн 24-мӗшӗнче, эрнекун, тата ҫу уйӑхӗн 8-мӗшӗнче, тунтикун, канӑпӑр.
Ҫӗнӗ ҫул уявӗ 2022 ҫулхи раштав уйӑхӗн 31-мӗшӗнче пуҫланӗ те 2023 ҫулхи кӑрлач уйӑхӗн 8-мӗшӗнче вӗҫленӗ, кӑрлачӑн 9-мӗшӗнче ӗҫе тухӑпӑр.
Ҫӗршыв хӳтӗлевҫин кунӗ тӗлӗнче тӑватӑ кун кантарӗҫ: нарӑс уйӑхӗн 23-мӗшӗнчен тытӑнса 26-мӗшӗ таран. Пуш уйӑхӗн 8-мӗшӗнче те ӗҫлеттермӗҫ. Унсӑр пуҫне ака уйӑхӗн 29-мӗшӗнчен пуҫласа ҫу уйӑхӗн 1-мӗшӗсенче, ҫу уйӑхӗн 6-9-мӗшӗсенче, ҫӗртме уйӑхӗн 10-12-мӗшӗсенче, чӳк уйӑхӗн 4-6-мӗшӗсенче канӑпӑр.
Улатӑрта пурӑнакан Викторпа Нина Куричковсем ҫурлан 26-мӗшӗнче ылтӑн туйне паллӑ тунӑ. Вӗсене администраци ӗҫченӗсем саламланӑ.
Виктор Михайловичпа Нина Михайловна хайне евӗр лару-тарура паллашнӑ. Иртнӗ ӗмӗрӗн 70-мӗш ҫулӗсенче пулнӑ ку. Вӗсем иккӗшӗ те 1-мӗш маршрутпа ҫӳрекен автобуса кӗтсе тӑнӑ. Ҫавӑн чухне вӗсен туслӑхӗ пуҫланнӑ, кайран вӑл юратӑва куҫнӑ.
Анчах вӗсене уйрӑлу кӗтнӗ: Виктора ҫара илнӗ. Вӗсем пӗр-пӗрин патне 2 ҫул ҫыру ҫӳретнӗ. 1972 ҫулхи ҫурла уйӑхӗнче Викторпа Нина пӗрлешнӗ.
Куричковсем хӗрпе ывӑл ҫуралнӑ. Халӗ ылтӑн туя паллӑ тунӑ мӑшӑр мӑнукӗсемпе савӑнса пурӑнать.
Ҫӗнӗ Шупашкарта та, Шупашкарти пекех, Республика кунне халалланӑ мероприятисене ирттересшӗн. Кун пирки ЧР Элтеперӗ Олег Николаев Ҫӗнӗ Шупашкар ҫыннисене хула кунӗпе саламланӑ май каланӑ.
Ҫитес ҫул Республика кунӗ Ҫӗнӗ Шупашкарта та иртӗ. Ҫавна май Элтепер хулара улшӑнусем пулассине каланӑ. Тӗслӗхрен, «Атӑл» кинотеатр ҫывӑхӗнчи лапама хитрелетесшӗн, хӑтлӑх кӗртесшӗн. Ҫавӑн пекех ҫӗнӗ шкул хута ярасшӑн, Атӑл ҫыранне илем кӳресшӗн, ҫурт картишӗсене лайӑхлатасшӑн.
Ҫакна та палӑртмалла: Ҫӗнӗ Шупашкарта водород перекиҫне кӑларакан савут тума тытӑнӗҫ.
+2.3 °C