t.me/chuv_kray каналтан илнӗ сӑнӳкерчӗк

Паян пирӗн республикӑмӑрӑн тӗп хули хӑйӗн сумлӑ юбилейне, 555 ҫулхине, уявлать.

Атӑлӑн акваторийӗнче 11 сехетрен пуҫласа 15 сехетчен парус регати иртӗ.

Хӗрлӗ тӳремре

11 сехетрен 11 сехет те 45 минутчен ҫӑлтӑрпа зарядка пулӗ. Унта, ҫак йӗркесен авторӗ ӑнланнӑ тӑрӑх, хысна учрежденийӗсенче ӗҫлекенсене илсе тухӗҫ.

12 сехетре «Стрижи» (чӑв. Вӗршӗн) ушкӑнӑн авиашоувӗ пуҫланӗ.

12 сехет те 30 минутран 13 сехет те 30 минутчен симфони капеллин «Славься Шупашкар!» концерчӗ пулӗ. 15:00 — 20:00 сехетсенче Ленин проспектӗнче «Пултарулӑх бульварӗ» арт-проект ӗҫлӗ. 17:00 — 20:00 сехетсенче — чӑваш эстрада артисчӗсен концерчӗ пулӗ.

20:00 — 21:00 сехетсенче уяв ячӗпе сцена ҫине тӗрлӗ тӳрӗ-шара тухӗ.

21:00 сехетре ҫӗршыври паллӑ юрӑҫ, SHAMAN, сцена ҫине тухӗ. Унӑн концерчӗ 50 минута пырӗ.

Шупашкарӑн 555 ҫулхи юбилейӗ тӗлне Чӑваш кӗнеке издательстви кӗнеке-альбом кӑларнӑ. Вӑл - вырӑсла тата чӑвашла. Пӗтӗмпе - 44 страница.

Кӗнеке авторӗ - географи ӑслӑлӑхӗсен кандидачӗ Зоя Трифонова. Умсӑмаха тата хыҫсӑмаха Владимир Степанов ҫырнӑ. Ӳнерҫи - Наталия Орлова.

Кӗнекере Шупашкарӑн историне 1469 ҫултанпа ҫырса панӑ.

Олег Николаевӑн Телеграм-каналӗнчи сӑн

Ҫурла уйӑхӗн 17-мӗшӗнче, паян, Шупашкара 20 ҫӗнӗ троллейбус килсе ҫитнӗ. Вӗсем республика займ мелӗпе илнӗ 92 троллейбусран пӗрремӗшӗсем.

Килсе ҫитнӗ транспорта Ҫӗнӗ Шупашкара панӑ. Ку спутник хулари транспорта ҫӗнетме ҫителӗклине пӗлтернӗ.

Ҫулталӑк вӗҫлениччен республикӑна автономлӑ майпа ҫӳрекен 72 троллейбус килсе ҫитмелле. Вӗсенчен 59-шӗ Шупашкарпа Ҫӗнӗ Шупашкара ҫыхӑнтаракан 60-мӗш тата 61-мӗш маршрутсем ҫинче ӗҫлӗҫ.

«Лиза Алерт» шырав отрячӗн сӑнӳкерчӗкӗ

Чӑваш Енре шыравҫӑсем 92 ҫулти кинемее шыраҫҫӗ. Роза Афанасьевна Андреева (Борисова) ятлӑ ватӑ Шупашкара пурӑннӑ. Анчах пӗр кунхине вӑл килӗнчен тухса кайса ҫухалнӑ.

Ватӑ ҫын ӑҫтине ҫывӑх ҫыннисем авӑн уйӑхӗн 13-мӗшӗнченпе пӗлеҫҫӗ.

Кинемей ҫӗтни пирки «Лиза Алерт» шырав отрячӗн халӑх тетелӗнчи страницинче ҫӗркаҫ пӗлтернӗ.

Телеграмри «Чувашский край» каналтан илнӗ сӑнӳкерчӗк

Шупашкарти «Каскад» суту-илӳ центрӗнчи пӗрремӗш хутра арт-объект вырнаҫтарма тытӑннӑ. Ку вӑл — Мускаври ВДНХри «Раҫҫей» куравра Чӑваш Ен элемӗ пулнӑ тухья.

Хӗрӗн пуҫа тӑхӑнмалли хатӗр евӗр арт-объекта республикӑри чи маттур ӑстасем хатӗрленӗ. Суту-илӳ центрӗнчи тухья 6 метр тӑршшӗ пулӗ, 217 ҫутӑ элементӗнчен тӑрӗ.

culture.cap.ru сӑнӳкерчӗкӗ

Ҫитес уйӑхра пирӗн республикӑна Пушкӑрт Республикинчи артистсем килӗҫ. Унти «Нур» театр пирӗн тӑрӑхра гастрольпе пулӗ.

Ӗхпӳри патшалӑх театрӗ тутар театрӗ шутланать. Шупашкарта ҫав коллектив авӑн уйӑхӗн 26-28-мӗшӗсенче пулӗ.

К.В. Иванов ячӗллӗ Чӑваш патшалӑх академи драма театрӗн сцени ҫинче хӑнасем «Галиябану», «Там, где сбываются мечты» тата «Фатима» спектакльсем кӑтартӗҫ.

Чӑваш радиовӗн сӑнӳкерчӗкӗ

Шупашкар хулин 555 ҫулхине халалласа «Общественное признание» (чӑв. Халӑх ырлавӗ) конкурс ирттернӗ.

«Чебоксары — пишу и снимаю о городе» (чӑв. Шупашкар — хула ҫинчен ҫыратӑп тата ӳкеретӗп) номинацире Чӑваш радиовӗн сасӑ режиссёрне Алина Кузьминӑна та дипломпа чысланӑ.

Вӑл Николай Мульянов ертсе пыракан «Столичный курьер» проектӑн сылтӑм алли тесе хыпарлаҫҫӗ хӗрарӑмӑн ӗҫтешӗсем. Программа Шупашкар тата Шупашкар ҫыннисем ҫинчен каласа кӑтартать. Вӑл радиопередача эфира 30 ҫул ытла тухать.

Кӗнеке издательствин сӑнӳкерчӗкӗ

Чӑваш кӗнеке

издательствин тӗп бухгалтерне медальпе чысланӑ.

Ҫурла уйӑхӗн 13-мӗшӗнче Шупашкарти Юманлӑхра Шупашкар юбилейне халалланӑ уяв иртнӗ.

«Шупашкар 555 ҫул тултарнӑ ятпа» юбилей медальне тивӗҫнисене те чысланӑ ҫав кун. Сумлӑ йышра Чӑваш кӗнеке издательствин тӗп бухгалтерӗ Татьяна Журавлева та пулнӑ.

Издательствӑра пӗлтернӗ тӑрӑх, Татьяна Геннадьевна предприятире чылай ҫул ӗҫлет, издательствӑна аталантарассинче унӑн тӳпи пысӑк.

mintrud_21 сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗнчи специалистсем йывӑр лару-тӑрӑва лекнӗ хӗрарӑмсене сӑмахпа та пулӑшаҫҫӗ.

«Тепӗр чухне хӗрарӑмсене хӑйсене хисеплеме вӗрентни те пӗлтерӗшлӗ. Пурнӑҫа хӑйсем ҫеҫ улӑштарма пултарнине ӑнлантарса парсан та ҫын пурнӑҫ тилхепине ҫирӗп алла илет», — каласа кӑтартать йывӑрлӑхри хӗрарӑмсене пулӑшакан пай пуҫлӑхӗ Людмила Иванова.

Асӑннӑ пай Хусанкай урамӗнчи 29 «а» ҫуртра вырнаҫнӑ.

Шупашкар округӗнчи «Атӑл» санаторие сутма тӑратнӑ. Ӑна «Авито» сайт урлӑ сутма лартнӑ. Объект харпӑрҫи – «Отделфинстрой» компани.

Санаторие 260 миллион тенкӗпе сутма тӑратнӑ. Ҫӗр лаптӑкӗ – 65635 тӑваткал метр. Вӑл Шупашкартан 12 ҫухрӑмра Вӑрманкас ялӗнче вырнаҫнӑ.

Палӑртмалла: санаторин 4 хутлӑ корпусне 1975 ҫулта ӗҫлеттерсе янӑ. 2022 ҫулта ӑна «Отделфинстрой» туяннӑ, унта реконструкци тунӑ, оборудование ҫӗнетнӗ.