Чӑваш Республикин искусствӑсен тава тивӗҫлӗ деятелӗ, музыковед, тележурналист, композитор Александр Осипов кӑрлач уйӑхӗн 27-мӗшӗнче 70 ҫул тултарнӑ.
Александр Осипов Канаш районӗнчи Юмансар ялӗнче ҫуралнӑ. Шупашкарти музыка училищинче фортепиано класӗнче, Хусанти патшалӑх консерваторийӗнче теорипе композитор факультетӗнче вӗреннӗ.
1980-1984, 1990-1996 Чӑваш патшалӑх гуманитари ӑслӑлӑхӗсен институтӗнче ӑслӑлӑх ӗҫченӗ пулса ӗҫленӗ. Шупашкарти музыка училищинче те тӑрӑшнӑ. 1996 ҫултанпа Чӑваш патшалӑх телерадиокомпанийӗнче тӑрӑшнӑ.
Шупашкарта пурӑнакан 29 ҫулти хӗрарӑм паллашу сайтӗнче арҫынпа ҫырӑнма тытӑннӑ. Калаҫсан-калаҫсан лешӗ ӑна инвестицие укҫа хывса тупӑш тума сӗннӗ. Ку килӗшнӗ.
Хӗрарӑм палламан арҫынна шанса телефонӗ ҫине сарӑм вырнаҫтарнӑ та укҫа куҫарма пуҫланӑ, тупӑш мӗнле ӳссе пынине сӑнанӑ. Пӗтӗмпе 90 пин тенкӗ куҫарнӑ вӑл. Ҫурри – кредит картти ҫинчи укҫа.
Хӗрарӑм укҫана каялла илме тӑнӑ та… Ун патне Украина ялавне ярса панӑ. Кун хыҫҫӑн тин вӑл ултавҫӑ аллине ҫакланнине ӑнланнӑ.
Полина Андреева Свердловск облаҫӗнче йывӑр атлетика енӗпе иртнӗ Раҫҫей кубокӗнче кӗмӗл медаль ҫӗнсе илнӗ. Палӑртмалла: вӑл Олимп резервӗсен 3-мӗш спорт шкулӗнче ӑсталӑхне туптать.
Полина 49 килограмм таякан спортсменсемпе вӑй виҫнӗ. Вӑл икӗ енлӗ кӗрешӳре 157 килограмм йӑтса пьедесталӑн иккӗмӗш картлашки ҫине хӑпарнӑ. Пӗрремӗш вырӑна Красноярск крайӗнчи Елизавета Жаткина йышӑннӑ, иккӗмӗш вырӑна Санкт-Петербурги Кристина Соболь тухнӑ.
Шупашкарта 18 ҫулти хӗр наркотик хурса ҫӳренӗ. Вӑл ӑна Маршак, Чапаев, Афанасьев, Красин, К.Иванов, Герцен урамӗсенче хунӑ.
Йӗрке хуралҫисем тытса чарнӑ чухне ун ҫумӗнче мефедонлӑ 29 чӗрке пулнӑ.
Хӗр тӗлӗшпе пуҫиле ӗҫ пуҫарнӑ. Ӑна 20 ҫул таран хупса хума пултараҫҫӗ.
Кӑҫалхи кӑрлач уйӑхӗнче Шупашкарта пурӑнакан 6 ҫын энергосбыт компанийӗн тесе шӑнкӑравлакансен капкӑнне ҫакланнӑ.
67 ҫулти хӗрарӑм патне те ют ҫын шӑнкӑравланӑ, вӑл хӑйӗнпе энергосбыт ӗҫченӗ тесе паллаштарнӑ. Хӗрарӑма ҫав ҫын хваттерте счетчик ылмаштармалла тесе ӗнентернӗ май телефонта приложени вырнаҫтарма сӗннӗ, ун урлӑ счётчик кӑтартӑвне пама меллӗ тесе каланӑ. Анчах ҫав каҫӑ сиенлӗ пулнӑ май банккарттӑ ҫинчен 17 пин тенкӗ ҫухалнӑ.
Пуш уйӑхӗн 5-6-мӗшӗсенче «МТВ» суту-илӳ центрӗнчӗ «Ҫӗрулми» курав иртӗ. Кун пирки сайтра пӗлтернӗччӗ.
Куравӑн хӑйӗн талисманӗ пулӗ. Халӗ ун валли ят шыраҫҫӗ.
«Щерулмишка», «Картуша» тата «Бульба-Бадди» – хальлӗхе ҫак виҫӗ ят пур. Анчах тӳре-шара кунпа ҫырлахасшӑн мар, тата ятсем сӗнме калаҫҫӗ. Сӗнӳсене ЧР Ял хуҫалӑх министерствин «Контактри» ушкӑнӗнче йышӑнаҫҫӗ. Унта ятсем сӗннӗ ӗнтӗ: «Картофан», «Картошечка Фиона», «Уммка», «Корней», «Умик», «Парангик», «Пататоша», «Картоша», «Картошкин», «Пан Улмич», «Петруччи», «Гулявый», «Зубоус», «Уммашка».
Чӑваш Ене ҫӗнӗ 12 шкул автобусӗ илсе килнӗ. Кун пирки ЧР Элтеперӗ Олег Николаев телеграм-каналӗнче хыпарланӑ.
Автобуссене округсене те ӑсатӗҫ: Патӑрьел, Вӑрнар, Йӗпреҫ, Муркаш, Шупашкар, Етӗрне тӑрӑхӗсене. Ҫавӑн пекех Шупашкарти тӑлӑх тата ашшӗ-амӑшӗн хӳттисӗр юлнӑ ачасен центрне те автобус парӗҫ.
Ҫӗнӗ автобуссенче ГЛОНАСС, хӑрушсӑрлӑх пиҫиххисем, маяк пур. Палӑртса хӑварар: 9 автобуса – федераци хыснинчи, 3-шне республика хыснинчи укҫапа туяннӑ.
Шупашкарти 53-мӗш шкула карантина хупнӑ. Унти пӗтӗм ача дистанци мелӗпе килтен вӗренӗ.
Ку – ОРВИе пула. Чир сарӑлнӑран хулари 14 шкулти 28 класа карантина янӑ.
Палӑртмалла: иртне эрнере 3396 ҫын ОРВИпе чирленӗ. Ун умӗнхи эрнепе танлаштарсан, ку 12,8 процент нумайрах. Иртнӗ эрнере 19 ҫын гриппа чирленӗ. Ҫулталӑк пуҫланнӑранпа - 73 ҫын. Вӗсенчен 33-шӗ – 17 ҫул тултарман ачасем.
Шупашкарта пурӑнакан 101 ҫулти ветерана Иван Григорьева Ҫӗнтерӳ ҫитнӗренпе 80 ҫул ҫитнине халалласа кӑларнӑ медале панӑ.
Иван Григорьевич фронта 1941 ҫулта хайӗн ирӗкӗпе кайнӑ III Украина тата II Беларуҫ фрончӗсенче минометчик пулса ҫапӑҫнӑ. Вӑл виҫӗ хутчен аманнӑ, ҫапах Ҫӗнтерӗве кӗтсе илнӗ.
Вӑрҫӑ хыҫҫӑн вӑл Хусанти юридици факультетӗнчен вӗренсе тухнӑ, Чӑваш АСССРӗн прокуратуринче 15 ҫул ытла ӗҫленӗ. 1965 ҫулта службӑна республика прокурорӗн ҫумӗн должноҫӗнче вӗҫленӗ.
Нумаях пулмасть пирӗн республикӑра «Их имена останутся в истории» (чӑв. Вӗсен ячӗсем историре юлӗҫ) темӑпа ӑслӑлахпа практика конференцийӗ иртнӗ. Ӑна Тӑван ҫӗршыв хӳтӗлевҫин ҫулталӑкне тата К.П. Неверов генерал-лейтенант ҫуралнӑранпа 130 сул ҫитнине халалланӑ.
К.П. Неверов — чӑваш купсин, меценанчӗн Прокопий Ефремовӑн мӑнукӗн ывӑлӗ. Лидия Филиппова журналист тата публицист халӑх тетелӗнчи хӑйӗн страницинче пӗлтернӗ тӑрӑх, мероприяти ҫӳллӗ шайра иртнӗ. Унта ӑслӑлӑх ӗҫченӗсем, таврапӗлӳҫӗсем, педагогсем, литераторсем, ветерансем, кадетсем тата ыттисем хутшӑннӑ. Шупашкартан ҫеҫ мар, Челепир хулинчен те. Ҫавсен йышӗнче чӑваш меценанчӗн йӑхӗнчен тухнисем те пулнӑ. Мероприяти вӑхӑтӗнче, сӑмахран, Неверов генерал-лейтенантӑн Челепирти мӑнукӗ Наталия Викторовна телефонпа ҫыхӑнса калаҫнӑ.
+15.3 °C