Сӗнтӗрвӑрри хулинче шкул тӑвасшӑн. 2022-2024 ҫулсем валли пӑхса хунӑ хыснара ку тӗллевпе укҫа уйӑрнӑ. Ку ыйтӑва паян Патшалӑх Канашӗн ларӑвӗнче татса панӑ.
Сӗнтӗрвӑрринчи 375 вырӑнлӑ шкула «Ял территорийӗсен хальхи сӑнӗ» проектпа килӗшӳллӗн хута ярӗҫ. Ӑна 2022-2023 ҫулсенче тумалла. Ку тӗллевпе 276 миллион тенкӗ пӑхса хунӑ.
Ҫитес виҫӗ ҫулта Шупашкарти «Садовый», «Университет» микрорайонсенче шкулсене туса пӗтермелле.
Удмурт Республикинчи Грахово районӗн администрацийӗн ӗҫченӗсем ҫав тӑрӑхри Пархатар (вырӑсла — Благодатное) ялӗнче тӗпленнӗ Вера Григорьева пирки: «Великая чувашка» (чӑв. Аслӑ чӑваш), — тесе калаҫҫӗ-мӗн. Кун пирки вӑл «Хыпар» хаҫат журналистне Алина Ильинана пӗлтернӗ.
Алина Ильина хыпарланӑ тӑрӑх, чӑвашсем пурӑнакан ҫав ял Столыпин реформи хыҫҫӑн, Хусан кӗпӗрнийӗ вырӑнти ҫӗрсене сутнӑ чухне 11 чӑваш ҫемйи лаптӑк туянса унта тӗпленнӗ май пуҫланса кайнӑ.
«Вера ҫак ял яшӗпе Олег Григорьевпа ҫемье ҫавӑрнӑ, хӑйсем пӳрт лартнӑ. Мӑшӑрӗ чӑваш пулни те ӑна тӑван чӗлхерен пистермен. Ҫавӑнпа вӗсен виҫӗ хӗрӗ те чӑвашла пӗлет. Аслисем иккӗшӗ чӑвашла калаҫаҫҫӗ, кӗҫӗнни ӑнланать, анчах пуплемест. Аслӑ хӗрӗ ҫак ялтах пурӑнать, почта уйрӑмне ертсе пырать. Вӑталӑххи район больницинче — завхоз, кӗҫӗнни — районти шкулта математика учителӗ. Вӗсем пурте кӑҫалхи ҫыравра хӑйсене «чӑваш» тесех ҫыртарнӑ», — тесе пӗлтернӗ Алина Ильина журналист.
Хӗрарӑмӑн ашшӗ енчи тӑванӗсем Ҫӗрпӳ районӗнчен иккен, анчах Вера Шупашкара килсе курман.
Паян ҫур ҫӗр иртни 2 сехетре Шупашкарти Павлов мичман урамӗнчи 7-мӗш ҫуртра хваттер ҫуннӑ. Инкеклӗ лару-тӑру министерстви пӗлтернӗ тӑрӑх, унта 90 ҫулти хӗрарӑм пурӑннӑ.
Пушар 4-мӗш хутри икӗ пӳлӗмлӗ хваттерте тухнӑ. Ҫулӑм сӗтел-пукана, шалти отделкӑна сиенлетнӗ. Ватӑ кил хуҫи хӗрарӑмне пушарнӑйсем урама илсе тухнӑ. Сӗрӗмпе наркӑмӑшланнӑскере Хулари тӗп пульницӑна илсе ҫитернӗ.
Малтанлӑха пӗлтернӗ тӑрӑх, пушар электрохатӗр юсавсӑрлӑхне пула тухнӑ. Сӑмах май, ҫулталӑк пуҫланнӑранпа Чӑваш Енре 1423 пушар пулнӑ.
Шупашкарта пурӑнакан 30 ҫулти художник, Анастасия Степанова, кӑшӑлвируса пула пульницӑри кӑшӑлвирус уйрӑмӗнчи реанимацинче пиллӗкмӗш кун ӗнтӗ выртнине Ирина Павлова журналист ӗнер Фейсбукра пӗлтернӗччӗ. Вӑл хӑйӗн постӗнче ҫырнӑ тӑрӑх, « Настя Шупашкарти художество училищинчен вӗренсе тухнӑ. Пултаруллӑ, ҫепӗҫ те сӑпайлӑ хӗр».
Ӗнерхи постра палӑртнӑ тӑрӑх, тухтӑрсем хӗре кардиодиспансера ЭКМО аппаратпа сывлаттарма куҫарасшӑн. Анчах ун пек аппарат Чӑваш Енре пӗртен-пӗрре иккен те унта лекме йывӑр.
Паян Настьӑн чӗри тапма чарӑннӑ. Кун пирки те Ирина Павлова пӗлтернӗ.
Пӗчӗк хӗрача ҫумне ҫулӑхнӑ арҫынна юсанмалли колоние 12 ҫуллӑха ӑсатнӑ. Ку ӗҫ-пуҫ ҫулла пулнӑ.
Суд палӑртнӑ тӑрӑх, Шупашкарти Эгер бульварӗнче 44 ҫулти ӳсӗр арҫын хӑй палланӑ 5 ҫулти хӗрачана сак ҫине пырса ларнӑ. Вӑл ӑна хӑйӗн чӗрҫи ҫине лартнӑ та ясар шухӑшӗсене пурнӑҫлама хӑтланнӑ.
Кӳршӗ хӗрарӑмӗ ҫакна курса йӗрке хуралҫине пӗлтернӗ. Арҫынна ҫав кунах тытса чарнӑ. Вӑл хӑйӗн айӑпне йышӑннӑ. Экспертиза палӑртнӑ тӑрӑх, преступлени вӑхӑтӗнче арҫын хӑй мӗн тунине ӑнланнӑ. Суд ӑна ҫирӗп ружимлӑ колоние 12 ҫуллӑха ӑсатма йышӑннӑ.
Чӳк уйӑхӗн 13-мӗшӗнче Шупашкар хулинчи йӗрке хуралҫисенчен 43 ҫулти хӗрарӑм пулӑшу ыйтма пынӑ. Вӑл вӗсене ӑнлантарнӑ тӑрӑх, лавккана кайсан карас телефонне ҫухатнӑ.
Хӗрарӑм Университет урамӗнчи суту-илӳ центрӗсенчен пӗринче пулнӑ. Унта вӑл телефона кӑларса ӳкернӗ.
Йӗрке хуралҫисем палӑртнӑ тӑрӑх, 20 пин тенкӗ тӑракан ҫухалнӑ аппарата пӗр каччӑ илнӗ. Сӑнран пӑхсан вӑл 25-30 ҫулсенче, 170-175 сантиметр ҫӳллӗш, вӑтам пӳ-силлӗ. Хӑй сӑрӑ тӗслӗ курткӑпа, кӑвак джинс шӑлавар тӑхӑннӑ.
Каччӑна уйӑрса илнисене йӗрке хуралҫисене ҫак номерсемпе: 8 (8352) 24 09 27 е 102 — пӗлтерме ыйтаҫҫӗ.
Чӳк уйӑхӗн 14-мӗшӗнче ирхине Шупашкарта патрульпе пост службин машинине сехӗрленсе ӳкнӗ хӗрарӑм чарнӑ. Вӑл каланӑ тӑрӑх, нумай хваттерлӗ ҫурт балконӗ хӗрринче, пиллӗмӗш хутра, хӗрарӑм тӑнӑ.
Полици лейтенанчӗ Александр Григорьев часрах подъезда чупса кӗнӗ /алӑка кӳршисем уҫнӑ/, миҫемӗш хваттер пулма пултарнине шутласа тупнӑ. Шаккасан балкон ҫинче тӑракан хӗрарӑмӑн ҫывӑх ҫыннисем уҫнӑ. Вӗсем хӗрӗ хӑрушлӑхра пулнине пӗлмен те.
Ҫав вӑхӑтра полици лейтенанчӗ Дмитрий Ярлыкин урамра хӗрарӑмпа калаҫса тӑнӑ, хӑрушӑ утӑм тӑвасран ӳкӗтленӗ. Александр Григорьев хваттере кӗрсен хӗрарӑма вӑйпах каялла илсе кӗнӗ. Ӑна васкавлӑ медрулӑшу тухтӑрӗсем пульницӑна илсе кайнӑ.
Ача кӗтнӗ чухне кӑшӑлвируспа чирленӗ хӗрарӑма тинех пульницӑран кӑларнӑ. Унӑн ӳпки 100 проценчӗпех сиенленнӗ.
Чирлесен Ирина Афонинӑн вӑхӑтсӑр ҫураттарма тивнӗ. Ачи чиперех ҫуралнӑ. Анчах амӑшӗн чирӗ аталансах пынӑ, ӳпки пӗтӗмпех сиенленнӗ. Вӑл вакцинациленменшӗн ӳкӗннӗ. Хӗрарӑм реанимацирех выртнӑ. Пульницӑра вӑл 2 уйӑха яхӑн ирттернӗ.
Афонинсем – нумай ачаллӑ ҫемье. Вӗсен 3 ача ӳсет. Амӑшне пульницӑран кӑларнӑшӑн упӑшки, ывӑлӗпе хӗрӗ питӗ савӑннӑ. Ку вӗсемшӗн иккӗмӗш ҫуралнӑ кун пекех пулнӑ.
Шупашкарта хӗрарӑм банка пысӑк укҫа куҫарса пама кайнӑ та полицие лекнӗ. Ҫапла вӑл ултавҫӑсен аллине каллех лекесрен хӑтӑлнӑ.
Чӳк уйӑхӗн 12-мӗшӗнче 56 ҫулти хӗрарӑм кредит илнӗ, 1,5 миллион тенкине куҫарса пама хӑтланнӑ. Юрать, банк ӗҫченӗ ӑна вӑхӑтра чарнӑ. Вӑл ку ӗҫ иккӗленӳллӗ пулнине сиснӗ. Банк ӗҫченӗ тӳрех полицейскисене чӗннӗ.
Ҫакӑ паллӑ: хӗрарӑм малтанхи кун 3 миллион тенкӗ кредит илнӗ, хӑйӗн 150 пин тенкине хушнӑ та ултавҫӑсене куҫарса панӑ. Банк ӗҫченӗсем ӑна кун пирки ӑнлантарнӑ.
Шалти ӗҫсен министерствин Шупашкарти управленйиӗнчен пӗр хӗрарӑм пулӑшу ыйтнӑ. Йӗрке хуралҫисене вӑл ӑнлантарнӑ тӑрӑх, тӗнче тетелӗ урлӑ перманент макияжӗ валли аппарат туянас тенӗ.
Тавар хакӗн пӗр пайӗшӗн тӳличчен вӑл посылка килнине йӗрлемелли трек-номер тата таварпа транспорт накладнойне илнӗ. Таваршӑн 10 пин тенкӗ тӳленӗ. Анчах кӑштахран ӑна йӳнӗ футболка ярса панӑ. Ҫавӑн хыҫҫӑн 43 ҫулти хӗрарӑм полицие пӗлтернӗ.
Ултавҫа Краснодарта тытса чарнӑ. Вӑл унта пурӑнакан 24 ҫулти хӗр пунӑ. Хайхискер унччен те ҫынсене ҫавӑн пек улталанӑ. Ӑна судпа та айӑпланӑ.
+0.3 °C