cap.ru сайтри сӑн

Республикӑра кӑшӑлвирусран вакцинаци тӑвас ӗҫ малалла пырать. Юпа уйӑхӗн 31-мӗшӗнчи даннӑйсене илес тӗк, 610 пин ытла ҫын прививка тутарнӑ. Апла Чӑваш Енре пурӑнакансен ҫурри вакцинациленнӗ.

Вакцинациленнисенчен 605,9 пинӗшӗ – аслӑ ӳсӗмри ҫынсем, ыттисем – ачасем. 18 ҫул тултарман 4,3 пин ача кӑшӑлвирусран прививка тутарнӑ.

Вакцинацилес ӗҫ Шупашкарта, Канашра, Патӑрьел, Комсомольски, Сӗнтӗрвӑрри, Хӗрлӗ Чутай, Канаш, Красноармейски районӗсенче аван пырать.

Стопкоронавирус.рф сайтри сӑн

Юлашки вӑхӑтра кӑшӑлвирус пирки ытлах калаҫмаҫҫӗ. Анчах ку чир ҫухалнине пӗлтермест. Юпа уйӑхӗнче пирӗн республикӑра ҫак амака пула 12 ҫын пурнӑҫран уйрӑлнӑ.

Иртнӗ талӑкра 39 ҫын кӑшӑлвируспа инфекциленнӗ, пӗрне те пульницӑна вырттарман. Юпа уйӑхӗн 30-мӗшӗнче те больницӑна лекмеллех чирлекенсем пулман. Юпан 29-мӗшӗнче стационара 15 пациента вырттарнӑ.

Пандеми пуҫланнӑранпа Чӑваш Енре 102,1 пин ҫын кӑшӑлвируспа чирленӗ, вӗсенчен 96,9 пинӗшӗ сывалнӑ. 4,7 пин ҫын ҫак амакран сывалайман.

Республикӑра санавиаци валли ҫӗнӗ лапамсем тума палӑртнӑ. Унашкалли кӑҫал Патӑрьелте пулмалла. Ҫитес ҫул вара Етӗрнере хута яма палӑртнӑ.

Аса илтерер: санавиаци пирӗн регионта 2020 ҫултанпа ӗҫлет. Вертолета тара илеҫҫӗ. Ӑна анса лармашкӑн Шупашкарта, Улатӑрта, Канашра, Ҫӗмӗрлере лапамсем пур. Кашни ҫула йывӑр чирлӗ вун-вун ҫынна санавиаци больницӑна илсе ҫитерет.

Патӑрьелте вертолет анса лармалли лапама пӗчӗккӗн туса пӗтереҫҫӗ ӗнтӗ.

cap.ru сайтри сӑн

Патӑрьел районӗнчи поликлиникӑра юсав ӗҫӗсем пыраҫҫӗ. Анчах, ЧР Сывлӑх сыхлавӗн министерстви пӗлтернӗ тӑрӑх, питӗ вӑрах.

Юсав ӗҫӗсене ҫуркунне вӗҫӗнче пуҫӑннӑ. Поликлиникӑна раштав уйӑхӗн 30-мӗшӗччен ҫӗнетсе пӗтермелле. Кун валли 39,9 миллион тенкӗ уйӑрнӑ.

Сывлӑх сыхлавӗн министрӗ Владимир Степанов ӗҫсене часрах вӗҫлеме, ҫитменлӗхсене пӗтерме хушнӑ. Ҫывӑх вӑхӑтра ҫӗнетнӗ поликлиникӑна йышӑнас процедура пуҫланмалла.

Хальлӗхе вара тухтӑрсем пациентсене ача ҫуратмалли уйрӑмра йышӑнаҫҫӗ.

Василий Киргизов фельдшер

Ҫӗрпӳ районӗнче пурӑнакан 58 ҫулти арҫын ӗҫрен килсен хӑйне япӑх туйма пуҫланӑ. Каҫхине арӑмӗ васкавлӑ медпулӑшу чӗннӗ.

Василий Киргизов фельдшер унӑн инфаркт пулнине тӳрех палӑртнӑ, медпулӑшу пама пуҫланӑ. Кайран пациента машинӑна хурса Республикӑри кардиодиспансера илсе кайма тухнӑ.

Алексей Далызин водитель «пӑкӑсенчен» иртсе кайса Шупашкара васканӑ. Питӗ пысӑк хӑвӑртлӑхпа пынӑ вӑл. Юрать, ытти водитель васкавлӑ медпулӑшу машинине ирттерсе янӑ. Пациента пульницӑна вӑхӑтра илсе ҫитерсе операци тунӑ.

cap.ru сӑнӳкерчӗкӗ

Шӑматкун, юпа уйӑхӗн 22-мӗшӗнче, республикӑри спорт лапамӗсене, тренажер тата фитнес залсене, катоксене, бассейнсене тӳлевсӗрех кайма май пулӗ.

ЧР Спорт министерствин сайтӗнче сывлӑх кунӗнче мӗнле мероприятисем пулнипе, спорт организацийӗсенче тӳлевсӗр мӗнле пулӑшусемпе усӑ курма май пуррипе паллашма пулать. Сӑмах май, сывлӑх кунӗсене Чӑваш Енре 2014 ҫултанпа ирттереҫҫӗ.

Хальхи вӑхӑтра республикӑра 4 пине яхӑн спорт сооруженийӗ ӗҫлет.

rptd.med.cap.ru сӑнӳкерчӗкӗ

Красноармейски районӗнчи пӗр арҫын туберкулёзран сипленесшӗн пулман. Арҫын уҫӑ формипе (вӑл ҫынсене ерет) чирленӗ. Вӑл Республикӑн туберкулёзпа кӗрешекен диспансерӗнче унччен выртнӑ-ха, анчах хӑй тӗллӗн тухса каяс йӑла пулнӑ. Кӑҫалхи ҫӗртме уйӑхӗнченпе вӑл сипленме пӑрахнӑ.

Ыйтӑва прокуратура тата суд урлӑ татса пама тивнӗ. Республикӑн Сывлӑх сыхлав министерстви надзор органне евитленӗ, унтисем суда ҫитнӗ. Суд арҫынна больницӑра сипленмелле йышӑну кӑларнӑ.

Светлана Баландина - сулахайри. medicin.cap.ru сӑнӳкерчӗкӗ

Республикӑн онкодиспансерӗнче ҫӗнӗ тӗп врач ӗҫе кӳлӗннӗ. Унпа коллектива юпа уйӑхн 17-мӗшӗнче паллаштарнӑ.

Светлана Баландина — Чулхуларан. Унти медицина институтӗнче вӗреннӗ. Ахаль врачран пуҫласа Чулхула облаҫӗн сывлӑх сыхлав тытӑмӗнчи ертсе пыракан должноҫсем таран йышӑнма пултарнӑ, Чулхула облаҫӗнчи клиника онкологи диспансерӗнче чылай ҫул тӑрӑшнӑ.

medicin.cap.ru сӑнӳкерчӗкӗ

Чӑваш Ене пневмококран вакцина кӳрсе килнӗ. Пурӗ — 5 830 доза.

«Пневмовакс-23» ятлӑ вакцина пневмококк инфекцийӗн 23 серотипӗнчен хӳтӗлет иккен. Ҫав шутра — пневмонирен (ӳпке шыҫни), отитран (хӑлха шыҫни), ҫӗрекен менингитран (пуҫ мими шыҫни), эндокардитран (эндокарди шыҫни), артритран (шӑмӑ чирӗ) тата ытти чӗр-чӗртен.

Вакцинӑна 2 ҫултан иртнӗ ачасенчен пуҫласа тӑваҫҫӗ. Препарата республикӑн сывлӑх сиплев учрежденийӗсене валеҫсе панӑ.

Стопкоронавирус.рф сайтри сӑн

Чӑваш Енре кӑшӑлвируспа чирлекен сахалланнӑ. Чӑннипе, Раҫҫейӗпех ҫапла.

Юпан 17-мӗшӗнче республикӑра 49 ҫын кӑшӑлвируспа чирленӗ. Ку, авӑн уйӑхӗн варрипе танлаштарсан, 10 хут сахалрах. Инфекциленнисенчен ытларахӑшӗ – 50 ҫултан аслӑраххисем.

Юлашки вӑхӑтра чирлекенсен йышӗнче вилекен, пульницӑра сипленекен сахалланнӑ. Иртнӗ талӑкра 1 ҫын вилнӗ, 49 ҫын инфекциленнӗ. Сывалакансем нумаййӑн пулнӑ: 122 ҫын.