Шупашкар хулинче вырнаҫнӑ Федерацин травматологи, ортопеди тата эндопротезировани центрӗ кӑшӑлвируспа чирлисене сиплеме пӑрахӗ. Кун пирки паян республикӑн Правительство ҫуртӗнче сӑмах хускатнӑ. Чӑваш Ен сывлӑх сыхлав министрӗ Владимир Степанов каланӑ тӑрӑх, травматологи центрӗнче пӳлӗмсемпе ӗҫ хатӗрӗсене сиенсӗрлетесси вӗҫленсе пырать. Раҫҫей Сывлӑх сыхлав министерствинчен хушу килсен центр унчченхилле йӗркепе ӗҫлеме тытӑнӗ.

Аса илтерер: ҫу уйӑхӗн 14-мӗшӗнче травматологи центрӗнче кӑшӑлвируспа чирлисене йышӑнма пуҫланӑччӗ.

Чӑваш Ен Элтеперӗ тивӗҫӗсене вӑхӑтлӑх пурнӑҫлакан Олег НиколаевCOVID диагнозӗллисене сиплемелли центрсем йӗркеленӗ республикӑри ытти пульницӑна та хӑйсен унчченхи йӗркипе ӗҫлеттерме тытӑнмаллине каланӑ. Анчах паян-ыранах мар. лару-тӑру лайӑхланнӑҫемӗн.

Чӑваш Ен Сывлӑх сыхлав министерствин Президент пепкелӗх центрӗнче виҫӗреш ҫуралнӑ. Кӑҫал унта апла тӗслӗх халиччен пулман. Хӗрарӑм виҫӗреш ҫуратакан тӗслӗхсем ытти чухне ҫулталӑкра пӗр хутран пуҫласа тӑватӑ хут таран пулкаланӑ.

Халӗ асӑннӑ тӗслӗхре ҫут тӗнчене виҫӗ хӗр килнӗ. Вӗсем 1,5 килограма яхӑн таяҫҫӗ. Ҫут тӗнчене вӑхӑт ҫитиччен васкасарах килнисен сывлӑхӗшӗн тухтӑрсем тӑрӑшаҫҫӗ.

Ачасен амӑшӗ шурӑ халатлисене каланӑ тӑрӑх, пӗр харӑс виҫӗ пепке ҫуралнӑшӑн килтисем савӑннӑ. Хӗрарӑм унчченхи ачана 2018 ҫулта ҫуратнӑ. Ҫавӑн чухне ҫамрӑк ҫемьене ывӑл килнӗ. Халӗ телейлӗ мӑшӑр харӑсах тӑватӑ ачаллӑ пулса тӑнӑ.

И.Н. Ульянов ячӗллӗ Чӑваш патшалӑх университетӗнчен тухтӑра кӑҫал 682 ҫамрӑк вӗренсе тухнӑ. Вӗсенчен пысӑк пайӗ, 355 ҫын, «Стоматологи» ӑсталӑхне алла илнӗ, 279 хӗрпе каччӑ — сиплев ӗҫне, 48-ӑн педиатр пулма вӗреннӗ. Медицина факультетӗнчен вӗренсе тухнисенчен 59-шӗ хӗрлӗ диплома тивӗҫнӗ. Чӑваш Ен Сывлӑх сыхлав министерствин направленийӗпе 82 ҫамрӑк вӗреннӗ.

Шупашкарти аслӑ шкулӑн медицина факультетӗнче ҫӗршывӑн 38 регионӗнчен килнисем пӗлӳ илеҫҫӗ. Ун пеккисем — 31 процент.

Стоматолог пулас ӗмӗтлисене кӑҫал пӗрремӗш курсран тытӑнсах акӑлчан чӗлхипе вӗрентнӗ. Ҫакна ют ҫӗршыв студенчӗсемшӗн тӑрӑшнипе сӑлтавлаҫҫӗ.

Кӑшӑлвирус инфекцийӗ алхасма пуҫланӑранпа пирӗн республикӑра ҫак амак 6 пин те 216 ҫынна ернӗ. Ку вӑл, тӳрех палӑртар, – официаллӑ статистика.

Иртсе кайнӑ талӑкра республикӑра 30 ҫын сывалнӑ. Ҫулталӑк пуҫланнӑранпа пирӗн тӑрӑхра пӗтӗмпе 3 пин те 364 пациент сывалнӑ.

Кӑшӑлвирус теме пуҫласаӗах пӗр ҫын чирлесен те сисчӗвленсе йышӑнатчӗҫ, вӑл ӑҫтан пулнине тата епле майпа чир ертнине пӗлесшӗн ҫунатчӗҫ. Халӗ хӑнӑхма пуҫларӑмӑр курӑнать.

Утӑ уйӑхӗн 19-мӗшӗ тӗлне илсен кӑшӑлвируспа чирлисене Чӑваш Енре тата тепӗр 52 ҫынна тупса палӑртнӑ.

Кӑшӑлвирус диагнозне палӑртнисем хушшинче вилекенсем те пур. Иртсе кайнӑ талӑкра тата тепӗр ҫыннӑн пурнӑҫӗ татӑлнӑ. Ҫапла вара пирӗн республикӑра кӑшӑлвирус диагнозӗллӗ 49 ҫын пурнӑҫран уйрӑлнӑ.

news.nashbryansk.ru сайтри сӑн

Юлашки талӑкра Чӑваш Енре 54 ҫын кӑшӑлвируспа чирленӗ. Кун пирки оперштаб хыпарлать.

Ҫак каварлӑ инфекципе чирлекенсен йышӗ республикӑра 6 пинрен иртнӗ – 6164 ҫын. Ку таранччен 3334 пациент сывалнӑ. Юлашки талӑкра 27 ҫын вируса парӑнтарнӑ. Ӗнер, виҫӗмкун та 27 ҫын сывални пирки пӗлтернӗ.

Республикӑра 48 ҫын кӑшӑлвируса пула вилнӗ. Ӗнер-паян вируса пула пурнӑҫран уйрӑлнисем пулман.

Аса илтерер: республика пандемие пула йышӑннӑ чарусене пӑрахӑҫламалли пӗрремӗш тапхӑра кӑна кӗнӗ, иккӗмӗшӗ пирки хальлӗхе калаҫма иртерех.

progorod21 сӑнӳкерчӗкӗ

Паян Чӑваш Енре кӑшӑлвирус сарӑлнине хирӗҫ ӗҫлекен оперативлӑ штабӑн ларӑвӗ иртнӗ. Республикӑн сывлӑх сыхлав министрӗ Владимир Степанов пӗлтернӗ тӑрӑх, ӳпкене искусствӑлла майпа сывлаттаракан аппаратпа 23 пациента ҫыхӑнтарнӑ. Министр каланӑ тӑрӑх, ун пек аппаратсем пульницӑсенче ҫителӗклех. COVID-19 чирӗллисем валли республикӑра 1955 койка пӑхса хӑварнӑ.

Чирлекенсен шучӗ Шупашкарпа Ҫӗнӗ Шупашкарта ӳснине пӗлтернӗ. Чирлисенчен 42 проценчӗ – Шупашкарта пурӑнакансем. Юлашки эрнере ку цифра тата ӳснӗ, 52-64 процента ҫитнӗ. Унсӑр пуҫне республикӑри 14 районта чирлисем йышлӑ. Ҫавна май республика чару мерисене пӑрахӑҫлама хатӗр мар.

Чирлекенсенчен ытларахӑшӗ – 50-59 тата 40-49 ҫулсенчи ҫынсем.

⠀

Чӑваш Енре кӑшӑлвируса парӑнтарма ниепле те май килмест. Иртсе кайнӑ талӑкра COVID-19 диагнозне тата тепӗр 55 ҫынӑнне тупса палӑртнӑ. Вирус пандемийӗ пуҫланнӑранпа пирӗн республикӑра 6 110 ҫын кӑшӑлвируспа чирленине шута илнӗ. Ҫав вӑхӑтра 3307-ӑн чире ҫӗнтернӗ.

Чӑваш Енӗн влаҫӗсен тӗнче тетелӗнчи официаллӑ страницинче утӑ уйӑхӗн 8–17-мӗшӗсенчи цифрӑсене илсе кӑтартнӑ. Утӑ уйӑхӗн 8-мӗшӗнче кӑшӑлвируспа чирлекен 69 ҫынна шута илнӗ, тепӗр кунхине – 67 ҫынна, 10-мӗшӗнче – 61 ҫынна. Ҫӗнӗ кӑшӑлвируспа чирлекенсен шучӗ юлашки ҫичӗ кунта ултӑ теҫеткерен иртмен.

Шел те, ку амак ҫын пурнӑҫне те татать. Пандеми пуҫланнӑранпа кӑшӑлвирус диагнозӗллӗ 48 ҫын вилнӗ.

cap.ru сайтри сӑн

Шупашкарти Пепкелӗх центрӗнче 650 грамм таякан ача ҫуралнӑ. Вӑл 25-мӗш эрнере кун ҫути курнӑ.

Тухтӑрсем унӑн пурнӑҫне ҫӑлнӑ. Пӗчӗкскерӗн чӗрине операци тунӑ. Ҫак йывӑр ӗҫе ЧР Сывлӑх сыхлавӗн министерствин штатра тӑман ача-пӑча хирургӗ Анатолий Павлов тата ведомствӑн штатра тӑман ача-пӑча анестезиолог-реаниматологӗ Дмитрий Лукоянов тунӑ. Ача виҫи пӗчӗк пулни операцие тата кӑткӑслатнӑ.

Унччен кунашкал операцисене тунӑ-ха, анчах ача виҫи кун пек пӗчӗк пулнӑ тӗслӗх тӗл пулман.

Елчӗк районӗнчи Ҫӗнӗ Арланкассинче ҫӗнӗ фельдшерпа акушер пункчӗ тӑваҫҫӗ. Ӗҫ епле пынипе районти тӗп пульницӑн тӗп врачӗ Надежда Уркова паллашнӑ.

Асӑннӑ ялта фельдшерпа акушер пункчӗ халӗ те пур-ха. Анчах вӑл кивӗ ҫуртра вырнаҫнӑ.

Ҫӗнӗ ҫурта сывлӑха сыхласси ҫинчен калакан наци проекчӗпе килӗшӳллӗн хӑпартаҫҫӗ. Асӑннӑ нацпроекта ҫӗршыв Президенчӗ Владимир Путин пуҫарнӑ.

Модульлӗ ФАПӑн никӗсне янӑ ӗнтӗ, стенасене хӑпартнӑ. Фельдшерпа акушер пунктӗнче тӗрлӗ пӳлӗм пулӗ. ФАПа кирлӗ оборудованипе тивӗҫтерӗҫ, территорие хӑтлӑлатӗҫ. Чи кирли тухтӑрсем халӑха ӑшӑ кӑмӑлпа кӗтсе илсе, тӗплӗн тӗрӗслесе ырӑ кӑмӑлпа ӑсатчӑр тесси ҫеҫ юлать.

Иртсе кайнӑ талӑкра пирӗн республикӑра кӑшӑлвирус тата тепӗр ҫын пурнӑҫне татнӑ. Ҫапла вара COVID-19 47 ҫынна леш тӗнчене ӑсатнӑ. Ку вӑл – Чӑваш Ен Сывлӑх сыхлав министерстви пӗлтерекен официаллӑ цифрӑсем ӗнентерни тӑрӑх.

Паян, утӑ уйӑхӗн 14-мӗшӗнче, кӑшӑлвируспа пирӗн республикӑри тата 54 ҫын чирлине палӑртнӑ. «Стопкоронавирус.рф» сайтра хыпарланӑ тӑрӑх, эпидеми пуҫланнӑранпа кӑшӑлвирус диагнозне Чӑваш Енре 5940 ҫыннӑнне тупса палӑртнӑ.

Хальхи вӑхӑтра кӑшӑлвируспа 2665 ҫын чирлет. Вирус алхасма пуҫланӑранпа 3228 пациент сывалнӑ, юлашки талӑкра – 25-ӗн.

Пирӗн ҫӗршывра кӑшӑлвируса хирӗҫ икӗ йышши препарат шухӑшласа кӑларнӑ. Сӑмах май, вакцина тӗрӗслевне те иртереҫҫӗ.